M.072 - தொண்டை - அணிமையா - மடக்கு

2019-10-11

M.072 - தொண்டை - அணிமையா - மடக்கு

-----------------

தொண்டை அனவாயாள் பங்கன் சுடுபொடியன்

தொண்டை நினையார்க்குத் தூரத்தான் - தொண்டை

அணிமையா ஏறேறும் ஐயாவென் பார்கட்(கு)

அணிமையா உள்ளான் அவன்.

சொற்பொருள்:

தொண்டை - 1. கொவ்வை; 2. தொண்டு+ஐ - தொண்டினை; 3. மிடறு (கண்டம்);

அணிமையா - 1. அணி மையா (அழகிய மையனே); 2. அணிமையா - அணிமையாக (சமீபமாக);

தொண்டை அன வாயாள் பங்கன் - கொவ்வைக்கனி போன்ற செவ்வாயை உடைய உமையை ஒரு பங்கில் உடையவன்;

சுடுபொடியன் - சுட்ட திருநீற்றைப் பூசியவன்;

தொண்டை நினையார்க்குத் தூரத்தான் - திருத்தொண்டுகளை எண்ணாதவர்களுக்கு மிகத் தூரத்தே உள்ளவன்; (= திருத்தொண்டுகள் செய்ய நினையாதவர்களால் அடைய ஒண்ணாதவன்);

"தொண்டை அணி மையா - "கண்டத்தில் அழகிய கறுப்பை உடையவனே (நீலகண்டனே); (அணி - அழகு); (மை - கருநிறம்);

ஏறு ஏறும் ஐயா" என்பார்கட்கு அணிமையா உள்ளான் அவன் - இடபவாகனனே" என்று போற்றும் அடியார்களுக்கோ அவன் மிகவும் பக்கத்தில் உள்ளவன்; (என்பார்கட்கு - என்பவர்களுக்கோ; ஓகாரம் தொக்கது);

வி. சுப்பிரமணியன்

------------ ------------