Showing posts with label தனதந்த தானத் x3 தனதான. Show all posts
Showing posts with label தனதந்த தானத் x3 தனதான. Show all posts

Saturday, July 30, 2022

T.151 - நின்றியூர் - தெரிகின்ற தீயை

2011-07-16

T.151 - நின்றியூர் - தெரிகின்ற தீயை

(மயிலாடுதுறை அருகே உள்ள தலம்)

--------------

(வண்ணவிருத்தம்;

தனதந்த தானத் தனதந்த தானத்

தனதந்த தானத் .. தனதான)


தெரிகின்ற தீயைத் தொடவென்றும் ஓடித்

.. .. தெளிவின்றி வாடித் .. தவியாமல்

.. சினமின்றி ஆசைப் புயலின்றி மாயத்

.. .. திரைவென்று வாழற் .. கருளாயே

பரிகின்ற தாயிற் பெரிதுன்றன் நேயப்

.. .. பதமென்று பேசப் .. படுவோனே

.. பணிகொண்ட பேருக் கணிநின்று பாவப்

.. .. படைகொன்று வானைத் .. தருவோனே

இரிகின்ற தேவர்க் குயிர்தந்து பாலித்

.. .. தெரிநஞ்சை வாயிட் .. டதனாலே

.. இருள்கண்ட தீயொத் தொளிர்கின்ற ஆகத்

.. .. திணைகின்ற மாதுக் .. கினியானே

திரிகின்ற மாமுப் புரமன்று வேவச்

.. .. சிலையொன்றில் ஏவைப் .. பிணைவீரா

.. சிறைவண்டு பாடித் திரள்கின்ற சோலைத்

.. .. திருநின்றி யூரிற் .. பெருமானே.


பதம் பிரித்து:

தெரிகின்ற தீயைத் தொட என்றும் ஓடித்,

.. .. தெளிவு இன்றி வாடித் தவியாமல்,

.. சினம் இன்றி, ஆசைப் புயல் இன்றி, மாயத்

.. .. திரை வென்று வாழற்கு அருளாயே;

பரிகின்ற தாயிற் பெரிது உன்றன் நேயப்

.. .. பதம் என்று பேசப்படுவோனே;

.. பணிகொண்ட பேருக்கு அணி நின்று, பாவப்-

.. .. படை கொன்று, வானைத் தருவோனே;

இரிகின்ற தேவர்க்கு உயிர் தந்து பாலித்து

.. .. எரி-நஞ்சை வாய் இட்டு அதனாலே

.. இருள்-கண்ட; தீ ஒத்து ஒளிர்கின்ற ஆகத்து

.. .. இணைகின்ற மாதுக்கு இனியானே;

திரிகின்ற மா-முப்புரம் அன்று வேவச்

.. .. சிலை ஒன்றில் ஏவைப் பிணை-வீரா;

.. சிறை-வண்டு பாடித் திரள்கின்ற சோலைத்

.. .. திருநின்றியூரிற் பெருமானே.


தெரிகின்ற தீயைத் தொட என்றும் ஓடித், தெளிவு இன்றி வாடித் தவியாமல் - தீ வெளிப்படையாகத் தெரிந்தபோதும், தெளிவில்லாமல் எந்நாளும் சென்று அத்தீயில் விழுந்து வாடி வருந்தாமல்;

சினம் இன்றி, ஆசைப்-புயல் இன்றி, மாயத்-திரை வென்று வாழற்கு அருளாயே - கோபம், ஆசைப்புயல் இவற்றை நீங்கி, மாயக்கடலை வென்று இனிது வாழ்வதற்கு அருள்வாயாக; (திரை - கடல்);

பரிகின்ற தாயிற் பெரிது உன்றன் நேயப்-பதம் என்று பேசப்படுவோனே - அன்புடைய தாயை விடச் சிறந்த அன்பு உடையவன் என்று புகழப்படுபவனே; (தாயிற்பெரிது - தாயினும் சிறந்தது); (நேயப் பதம் - அன்புத் திருவடி; அன்பின் தன்மை); (திருவாசகம் - சிவபுராணம் - 8.1 - "தாயிற் சிறந்த தயாவான தத்துவனே");

பணிகொண்ட பேருக்கு அணி நின்று, பாவப் படை கொன்று, வானைத் தருவோனே - அடியவர்களுக்குப் பக்கத்தில் (காக்கும் படையாக) நின்று, அவர்களைத் தாக்க வரும் பாவப்படையை அழித்துச், சிவலோகத்தைக் கொடுப்பவனே; (பணிகொள்தல் - தொண்டனாக ஏற்றுக்கொள்தல்); (அணி - சமீபத்தில் (அண்ணி); படை); (அண்ணுதல் - கிட்டுதல்);

இரிகின்ற தேவர்க்கு உயிர் தந்து பாலித்து, எரி-நஞ்சை வாய் இட்டு அதனாலே இருள்-கண்ட - (பாற்கடலைக் கடைந்தபோது விளைந்த விஷத்தைக் கண்டு) அஞ்சி ஓடிய தேவர்கள் அழியாதபடி அவர்களைக் காத்து, எரிக்கும் நஞ்சை உண்டு அதனால் கறுத்த கண்டத்தை உடையவனே; (இரிதல் - அஞ்சி ஓடுதல்); (பாலித்தல் - காத்தல்); (இருள்தல் - கறுத்தல்);

தீ ஒத்து ஒளிர்கின்ற ஆகத்து இணைகின்ற மாதுக்கு இனியானே - தீப் போல ஒளிவீசும் செம்மேனியில் ஒரு பாகமாக இணையும் பார்வதிக்கு இனியவனே; (ஆகம் - உடல்);

திரிகின்ற மா-முப்புரம் அன்று வேவச் சிலை ஒன்றில் ஏவைப் பிணை வீரா - எங்கும் திரியும் பெரிய முப்புரங்களும் அன்று வெந்து அழியும்படி ஒரு வில்லில் அம்பைப் பூட்டிய வீரனே; (சிலை - வில்; மலை); (ஏ - அம்பு); (பிணைத்தல் - சேர்த்தல்);

சிறை-வண்டு பாடித் திரள்கின்ற சோலைத் திருநின்றியூரிற் பெருமானே - இறகுகளை உடைய வண்டுகள் ரீங்காரம் செய்து திரளும் சோலை சூழ்ந்த திருநின்றியூரில் எழுந்தருளியிருக்கும் சிவபெருமானே. (சிறை - இறகு);


வி. சுப்பிரமணியன்

----------- -----------

Tuesday, July 5, 2022

T.134 - நின்றவூர் (திருநின்றவூர்) - தினமண்டும் ஆசை

2011-01-23

T.134 - நின்றவூர் (திருநின்றவூர்) - தினமண்டும் ஆசை

-----------------

(வண்ணவிருத்தம்;

தனதந்த தானத் தனதந்த தானத்

தனதந்த தானத் .. தனதான)


தின(ம்)மண்டும் ஆசைப் புயலுந்த ஆடித்

.. .. திருவின்றி வாடித் .. தவியாமல்

.. செறிசந்த மாலைத் தமிழ்கொண்டு பாடித்

.. .. திகழ்கின்ற தாளைத் .. தொழுவேனோ

இனலின்றி வாழற் கருளென்று சேவித்

.. .. தெழில்பொங்கு பூவிட் .. டடைமாணி

.. இனியென்றும் வாழற் கியமன்றன் மார்பத்

.. .. திடுகின்ற வீரக் .. கழலானே

உனையென்றும் ஓதித் தெருள்கொண்ட பூசற்

.. .. குள(ம்)நின்ற மாணத் .. தளியானே

.. உடையென்று தோலைப் புனையின்ப ஆகத்

.. .. துமைதங்கு வேணிச் .. சடையானே

சினம்வென்று வாசக் கணைகொண்ட காமற்

.. .. செருவென்ற சீலர்க் .. கினியானே

.. சினைநின்று கோலக் கிளிகொஞ்சு சோலைத்

.. .. திருநின்ற வூரிற் .. பெருமானே.


பதம் பிரித்து:

தின(ம்) மண்டும் ஆசைப் புயல் உந்த ஆடித்,

.. .. திரு இன்றி வாடித் தவியாமல்,

.. செறி-சந்த மாலைத் தமிழ்கொண்டு பாடித்,

.. .. திகழ்கின்ற தாளைத் தொழுவேனோ;

"இனல் இன்றி வாழற்கு அருள்" என்று சேவித்து,

.. .. எழில் பொங்கு பூ இட்டு அடை-மாணி

.. இனி என்றும் வாழற்கு, இயமன்றன் மார்பத்து

.. .. இடுகின்ற வீரக் கழலானே;

உனை என்றும் ஓதித் தெருள்கொண்ட பூசற்கு

.. .. உள(ம்) நின்ற மாணத் தளியானே;

.. உடை என்று தோலைப் புனை இன்ப; ஆகத்து

.. .. உமை தங்கு, வேணிச்-சடையானே;

சினம் வென்று, வாசக்-கணைகொண்ட காமற்

.. .. செரு வென்ற சீலர்க்கு இனியானே;

.. சினை-நின்று கோலக்-கிளி கொஞ்சு சோலைத்

.. .. திருநின்றவூரிற் பெருமானே.


* (ம்) - புணர்ச்சியில் மகர-ஒற்றுக் கெடும் இடம்;

தின(ம்) மண்டும் ஆசைப்-புயல் உந்த ஆடித், திரு இன்றி வாடித் தவியாமல் - தினமும் மிகுகின்ற ஆசைப்புயலானது என்னைத் தள்ள அங்குமிங்கம் அலைந்து, திரு இல்லாமல் வாடித் துன்புறும் நிலையை அடையாமல்; (மண்டுதல் - மிகுதல்); (ஆடுதல் - அசைதல்; சஞ்சரித்தல்;)

செறி-சந்த மாலைத் தமிழ்கொண்டு பாடித், திகழ்கின்ற தாளைத் தொழுவேனோ - சந்தம் செறிந்த தமிழ்ப்பாமாலைகளைப் பாடி, விளங்குகின்ற திருவடியை வணங்க அருள்வாயாக; (செறி-சந்த மாலைத் தமிழ் = சந்தம் செறி தமிழ் மாலை); (சம்பந்தர் தேவாரம் - 1.57.11 - "ஞானசம்பந்தன செந்தமிழ் கொண்டு பாடக் குணமாமே");


"இனல் இன்றி வாழற்கு அருள்" என்று சேவித்து, எழில் பொங்கு பூ இட்டு அடை-மாணி - "துன்பம் இல்லாமல் வாழ அருள்வாயாக" என்று துதித்து, அழகிய பூக்களைத் தூவிச் சரண்புகுந்த மார்க்கண்டேயர்; (இனல் - இன்னல்; இடைக்குறை விகாரம்); (அடைதல் - சரண்புகுதல்); (மாணி - மார்க்கண்டேயர்);

இனி என்றும் வாழற்கு இயமன்றன் மார்பத்து இடுகின்ற வீரக் கழலானே - இனிமேல் என்றும் இறப்பின்றிச் சிரஞ்சீவியாக வாழும் பொருட்டுக் காலனது மார்பில் உதைத்த வீரக்கழல் அணிந்த திருவடியினனே; (மார்பம் - மார்பு); (இடுதல் - வைத்தல்; குத்துதல்);


உனை என்றும் ஓதித் தெருள்கொண்ட பூசற்கு உள(ம்) நின்ற மாணத்-தளியானே - உன்னை என்றும் போற்றி வழிபாடு செய்து தெளிந்த பூசலார்க்கு அவர் உள்ளத்தில் இருந்த சிறந்த கோயிலில் உறைபவனே; (பூசற்கு - பூசல்+கு - பூசலார்க்கு); (மாணம் - மாட்சிமை); (தளி - கோயில்); (பெரியபுராணம் - பூசலார் புராணம் - 12.65.10 - "நின்றவூர்ப் பூசல் அன்பன் நெடிதுநாள் நினைந்து செய்த நன்றுநீடாலயத்து நாளை நாம் புகுவோம்"); (* திருநின்றவூர் - பூசலார் நாயனார் வாழ்ந்த தலம்);

உடை என்று தோலைப் புனை இன்ப - புலித்தோலை உடையாக அணியும் இன்பனே;

ஆகத்து உமை தங்கு, வேணிச்-சடையானே - திருமேனியில் உமை ஒரு பாகமாகத் தங்கிய, கங்கைச்-சடையானே; (ஆகம் - மேனி); (வேணி - நதி);


சினம் வென்று, வாசக்-கணை கொண்ட காமற் செரு வென்ற, சீலர்க்கு இனியானே - சினத்தையும் வென்று, வாசம் மிக்க பூங்கணை ஏவும் காமனது போரையும் வென்ற, சீலர்களுக்கு இனிமை பயப்பவனே; (செரு - போர்); (காமற் செரு வென்ற - மன்மதனைப் போரில் வென்ற; இரண்டாம் வேற்றுமைத்தொகையில் உயர்திணையில் பொருள்தெளிவு கருதி, முதற்சொல்லின் ஈற்றில் உள்ள ன் ஒற்று ற் ஒற்றாகத் திரியும்); ("உனைத் தினம்" - திருப்புகழ் - திருப்பரங்குன்றம் - "சினத்தை நிந்தனை செயுமுநிவரர் தொழ மகிழ்வோனே");

சினை-நின்று கோலக்-கிளி கொஞ்சு சோலைத் திருநின்றவூரிற் பெருமானே - மரக்கிளையில் தங்கி அழகிய கிளிகள் இன்னொலி செய்யும் பொழில் சூழ்ந்த திருநின்றவூரில் உறைகின்ற பெருமானே; (சினை - மரக்கிளை); (நிற்றல் - தங்குதல்); (கோலம் அழகு); (கொஞ்சுதல் - இனிதாய் ஒலித்தல்);


வி. சுப்பிரமணியன்

----------- --------------