Showing posts with label நெல்வேலி (திருநெல்வேலி). Show all posts
Showing posts with label நெல்வேலி (திருநெல்வேலி). Show all posts

Tuesday, May 12, 2026

P.486 - நெல்வேலி - தூயவன் தொழுதவர்

2019-10-18

P.486 - நெல்வேலி (திருநெல்வேலி)

---------------------------------

(கலிவிருத்தம் - விளம் விளம் மா கூவிளம் - வாய்பாடு; மூன்றாம் சீர் குறிலில் முடியும்)

(அப்பர் தேவாரம் - 4.11.1 - "சொற்றுணை வேதியன்")

(சம்பந்தர் தேவாரம் - 3.22.1 - "துஞ்சலும் துஞ்சலி லாத")


1)

தூயவன்; தொழுதவர் துன்பம் தீர்த்திடும்

தாயவன்; தேவர்கள் தலைவன்; நீறணி

தீயன மேனியன்; திருநெல் வேலியில்

மேயவன் அடிதொழ வினைகள் வீடுமே.


தூயவன் - பரிசுத்தன்;

தொழுதவர் துன்பம் தீர்த்திடும் தாய்அவன் - வழிபடுபவர்களது துன்பத்தைத் தீர்க்கும் தாய்; (அவன் - பகுதிப்பொருள்விகுதி);

தேவர்கள் தலைவன் - வானோர் பிரான்;

நீறு அணி தீ அன மேனியன் - தீப் போன்ற செம்மேனியில் திருநீற்றைப் பூசியவன்; (நீறு பூத்த நெருப்புப் போன்ற மேனியை உடையவன்);

திருநெல்வேலியில் மேயவன் அடி தொழ வினைகள் வீடுமே - திருநெல்வேலியில் உறைகின்ற சிவபெருமானது திருவடியைத் தொழுதால் நம் வினைகள் அழியும்; (வீடுதல் - நீங்குதல்; அழிதல்);


2)

போர்விடை ஊர்தியன்; பொடிகொள் மேனியன்;

பார்புகழ் தாமிர பரணி பாய்தரச்,

சீர்திகழ் கோபுரத் திருநெல் வேலியில்,

வார்சடை யான்கழல் வாழ்த்தி வாழ்மினே.


போர்விடை ஊர்தியன் - போர் செய்ய வல்ல இடபத்தை வாகனமாக உடையவன்;

பொடிகொள் மேனியன் - திருநீற்றைப் பூசிய மேனியினான்;

பார் புகழ் தாமிரபரணி பாய்தரச் சீர் திகழ் கோபுரத் திருநெல்வேலியில் - உலகம் புகழும் தாமிரபரணிநதி பாய்கின்ற, அழகிய கோபுரம் திகழும் திருநெல்வேலியில் உறைகின்ற; (தருதல் - ஒரு துணைவினை);

வார்சடையான் கழல் வாழ்த்தி வாழ்மினே - நீள்சடை உடைய சிவபெருமானது கழல் அணிந்த திருவடியை வாழ்த்தி நற்கதி அடையுங்கள்; (வார்தல் - நீள்தல்);


3)

கோணுடைப் பிறைதனைக் குஞ்சி ஏற்றினான்;

வாணுதல் மாதினை வாமம் வைத்தவன்;

சேணுயர் கோபுரத் திருநெல் வேலியில்,

தாணுவின் தாள்தொழச் சாரும் இன்பமே.


கோணுடைப் பிறைதனைக் குஞ்சி ஏற்றினான் - வளைந்த பிறையைச் சென்னிமேல் வைத்தவன்; (கோண் - வளைவு); (குஞ்சி - ஆண்களின் தலைமயிர்; தலை); (திருவாசகம் - திருப்பொன்னூசல் - 8.16.5 - "கோணார் பிறைச்சென்னிக் கூத்தன்");

வாள்-நுதல் மாதினை வாமம் வைத்தவன் - ஒளி பொருந்திய நெற்றியையுடைய உமையை இடப்பக்கம் கூறாக உடையவன்; (வாள் - ஒளி); (நுதல் - நெற்றி); (வாமம் - இடப்பக்கம்);

சேண் உயர் கோபுரத் திருநெல்வேலியில் - வானளாவிய கோபுரம் திகழும் திருநெல்வேலியில் உறைகின்ற; (சேண் - ஆகாயம்);

தாணுவின் தாள் தொழச் சாரும் இன்பமே - தாணு என்ற திருநாமம் உடைய சிவபெருமானது கழல் அணிந்த திருவடியைத் தொழுதால் இன்பம் வந்தடையும்; (தாணு - sthāṇuḥ स्थाणुः - சிவன் திருநாமம்);


4)

அண்மையன்; சேய்மையன்; ஆன்ற ஞானியர்

எண்மலர் கொண்டடி ஏத்து முக்கணன்;

திண்மதில் புடையணி திருநெல் வேலியில்,

தண்மதி சூடியைச் சார்ந்து வாழ்மினே.


அண்மையன் சேய்மையன் - (அன்பர்களுக்கு) அருகே இருப்பவன், (அன்பில்லாதவர்களுக்குத்) தொலைவில் இருப்பவன்; (அண்மை - சமீபம்); (சேய்மை - தூரம்);

ஆன்ற ஞானியர் எண்மலர் கொண்டு அடி ஏத்து முக்கணன் - சிறந்த ஞானியர்கள் எட்டுமலர்களால் வழிபாடு செய்கின்ற முக்கண்ணன்; (எண்மலர் - அஷ்டபுஷ்பம் - இவை அகமலர்கள் எட்டு, புறமலர்கள் எட்டு); (அப்பர் தேவாரம் - 5.54.1 - "எட்டு நாண்மலர் கொண்டவன் சேவடி மட்டலர் இடுவார் வினை மாயுமால்" - எட்டு நாண்மலர் - அஷ்ட புஷ்பங்கள் எனப்படும் எண்வகைப் புதிய மலர்கள். அவையாவன - புன்னை, வெள்ளெருக்கு, சண்பகம், நந்தியாவர்த்தம், பாதிரி, குவளை, அலரி, செந்தாமரை; அகப்பூசைக்குரிய அட்டபுட்பங்கள் - கொல்லாமை, ஐம்பொறியடக்கம், பொறை, அருள், அறிவு, வாய்மை, தவம், அன்பு);

திண்மதில் புடை அணி திருநெல்வேலியில் - உறுதியான மதிலால் சூழப்பெற்ற திருநெல்வேலியில் உறைகின்ற;

தண்மதி சூடியைச் சார்ந்து வாழ்மினே - குளிர்ந்த பிறையைச் சூடிய சிவபெருமானைச் சரணடைந்து உய்யுங்கள்;


5)

பாந்தளைப் பால்மதிப் பாங்கர் வைத்தவன்;

காந்திம திக்கிறை; கையில் வேலுடைச்

சேந்தனைப் பெற்றவன்; திருநெல் வேலியில்

சாந்தவெண் ணீற்றனைச் சார்ந்து வாழ்மினே.


பாந்தளைப் பால்மதிப் பாங்கர் வைத்தவன் - பாம்பைப் பால் போன்ற வெண்திங்கள் பக்கத்தில் வைத்தவன்; (பாந்தள் - பாம்பு); (பாங்கர் - பக்கம்);

காந்திமதிக்கு இறை - காந்திமதி என்ற திருநாமத்தை உடைய உமாதேவிக்குக் கணவன்; (* காந்திமதி - இத்தலத்தில் இறைவி திருநாமம்); (காந்தி - kānti - ஒளி; அழகு; காந்திமதி - அழகுள்ளவள்; ஒளியுள்ளவள்);

கையில் வேலுடைச் சேந்தனைப் பெற்றவன் - கையில் வேலை ஏந்திய முருகனுக்குத் தந்தை; (சேந்தன் - முருகன்);

திருநெல்வேலியில் சாந்த-வெண்ணீற்றனைச் சார்ந்து வாழ்மினே - திருநெல்வேலியில் உறைகின்றவனும் சந்தனம் போல வெண்மையான திருநீற்றைப் பூசியவனுமான சிவபெருமானது திருவடியைச் சரணடைந்து உய்யுங்கள்; (சாந்தம் - சந்தனம்);


6)

அருநமன் தனையுதை அடிகள்; நான்மறைப்

பொருளென உள்ளவன்; பூத நாயகன்;

தெருவினில் ஒலிமலி திருநெல் வேலியில்,

கருமிட றுடையவன் கழலை வாழ்த்துமே.


அருநமன்தனை உதை அடிகள் - கொடிய கூற்றுவனை உதைத்த சுவாமி;

நான்மறைப்பொருள் என உள்ளவன் - நால்வேதப்பொருள் ஆனவன்;

பூதநாயகன் - உயிர்கட்கெல்லாம் தலைவன்; பூதகணங்களுக்குத் தலைவன்; (பூதம் - 1. பூதகணம்; 2. உயிர்வர்க்கம்);

தெருவினில் ஒலி மலி திருநெல்வேலியில் - வீதியில் ஒலி மிகுந்த திருநெல்வேலியில் உறைகின்ற;

கருமிடறு உடையவன் கழலை வாழ்த்துமே - நீலகண்டன் திருவடியை வாழ்த்துங்கள்; (மிடறு - கண்டம்);


7)

மழுவினை ஏந்திய மன்னன்; வேணியில்

விழுபுனல் தேக்கிய விமல வித்தகன்;

செழுமதில் புடையணி திருநெல் வேலியில்,

உழுவையின் அதளனை ஓம்பி உய்ம்மினே.


மழுவினை ஏந்திய மன்னன் - கையில் மழுவாயுதத்தை ஏந்திய அரசன்;

வேணியில் விழு-புனல் தேக்கிய விமல வித்தகன் - சடையில் விழுந்த கங்கையைத் தேக்கிய தூயவன், வல்லவன்; (வேணி - சடை);

செழுமதில் புடை அணி திருநெல்வேலியில் - சிறந்த மதில் புடை சூழ்ந்த திருநெல்வேலியில் உறைகின்ற;

உழுவையின் அதளனை ஓம்பி உய்ம்மினே - புலித்தோல் ஆடையனைப் போற்றி உய்யுங்கள்; (உழுவை - புலி); (அதள் - தோல்); (ஓம்புதல் - பேணுதல்);


8)

மலைபெயர் அரக்கனை வாட ஊன்றினான்;

மலைபவர் மும்மதில் மாய அன்றொரு

சிலைவளை வித்தவன்; திருநெல் வேலியில்

தலைவனைத் தாள்தொழச் சாரும் இன்பமே.


மலை பெயர் அரக்கனை வாட ஊன்றினான் - கயிலைமலையைப் பெயர்த்த இராவணன் வாடும்படி அவனைத் திருப்பாதவிரலை ஊன்றி நசுக்கியவன்;

மலைபவர் மும்மதில் மாய அன்று ஒரு சிலை வளைவித்தவன் - பகைத்தவர்களது முப்புரங்கள் அழியும்படி முன்பு ஒரு மலையை வில்லாக வளைத்தவன்; (மலைதல் - பகைத்து மாறுபடுதல்); (மாய்தல் - அழிதல்); (சிலை - வில்; மலை); (சம்பந்தர் தேவாரம் - 2.15.5 - " மலைபவர் மும்மதில் மாய்வித்த சிலையானே");

திருநெல்வேலியில் தலைவனைத் தாள் தொழச் சாரும் இன்பமே - திருநெல்வேலியில் உறைகின்ற தலைவனான சிவபெருமானை அடிபணிந்தால் இன்பம் வந்தடையும்;


9)

பன்றியின் உருவிலும் பறவை ஆகியும்

சென்றவர் அடிமுடி தேடிக் காண்கிலார்;

தென்றமிழ் விருப்பினன்; திருநெல் வேலியில்

நின்றவன் தாள்தொழ நீங்கும் துன்பமே.


பன்றியின் உருவிலும் பறவை ஆகியும் சென்றவர் அடிமுடி தேடிக் காண்கிலார் - திருமால் பிரமன் இருவரும் பன்றி அன்னப்பறவை வடிவங்களில் சென்று தேடியும் அவர்களால் அடிமுடி அறியப்படாதவன்;

தென்-தமிழ் விருப்பினன் - இனிய தமிழ்ப்-பாமாலைகளை விரும்புபவன்; (தென் - இனிமை);

திருநெல்வேலியில் நின்றவன் தாள் தொழ நீங்கும் துன்பமே - திருநெல்வேலியில் நீங்காமல் உறைகின்ற சிவபெருமானை அடிபணிந்தால் துன்பம் தீரும்;


10)

வெந்தவெண் ணீற்றினை மேனிப் பூசிடா

அந்தகர் பொய்ம்மொழி அகன்று வம்மினீர்;

செந்தழல் மேனியன்; திருநெல் வேலியில்

எந்தையை ஏத்திட எய்தும் இன்பமே.


வெந்த வெண்ணீற்றினை மேனிப் பூசிடா அந்தகர் பொய்ம்மொழி அகன்று வம்மினீர் - சுட்ட திருநீற்றை உடம்பின்மேல் பூசாத குருடர்கள் சொல்லும் பொய்களை நீங்கி வாருங்கள்; (அகல்தல் - நீங்குதல்); (வம்மினீர் - வம்மின் நீர்; மின் - ஏவற்பன்மை விகுதி);

செந்தழல் மேனியன் - செந்தீப் போன்ற செம்மேனியன்;

திருநெல்வேலியில் எந்தையை ஏத்திட எய்தும் இன்பமே - திருநெல்வேலியில் உறைகின்ற எம் தந்தையான சிவபெருமானைத் துதித்தால் இன்பம் வந்தடையும்;


11)

மஞ்சடை மலைக்கிறை மருகன்; வாளிகள்

அஞ்சுடைக் காமனை அனங்கன் ஆக்கினான்;

செஞ்சடைப் புண்ணியன்; திருநெல் வேலியில்

நஞ்சடை கண்டனை நண்ணி உய்ம்மினே.


மஞ்சு அடை மலைக்கு இறை மருகன் - மேகம் அடைகின்ற மலைக்கு அரசனான இமவானுக்கு மருகன்; (இறை - அரசன்);

வாளிகள் அஞ்சுடைக் காமனை அனங்கன் ஆக்கினான் - ஐந்து அம்புகளை உடைய மன்மதனது உடலைச் சுட்டெரித்தவன்; (வாளி - அம்பு); (அனங்கன் - உடலற்றவன்);

செஞ்சடைப் புண்ணியன் - சிவந்த சடையை உடைய புண்ணியமூர்த்தி;

திருநெல்வேலியில் நஞ்சு அடை கண்டனை நண்ணி உய்ம்மினே - திருநெல்வேலியில் உறைகின்ற, ஆலகாலத்தைக் கண்டத்தில் ஒளித்த பெருமானை (நீலகண்டனை) அடைந்து உய்யுங்கள்; (அடைத்தல் - ஒளித்துவைத்தல்);


வி. சுப்பிரமணியன்

----------- --------------


Wednesday, September 3, 2025

P.450 - நெல்வேலி - மழவிடை ஏறும்

2018-09-10

P.450 - நெல்வேலி (திருநெல்வேலி)

-------------------------------

(எழுசீர் விருத்தம் - விளம் மா விளம் மா விளம் விளம் மா - வாய்பாடு)

(சம்பந்தர் தேவாரம் - 3.120.1 - "மங்கையர்க் கரசி");

(சுந்தரர் தேவாரம் - 7.14.1 - "வைத்தனன் தனக்கே தலையும்என் நாவும்");


1)

மழவிடை ஏறும் அழகிய மன்னே .. வார்சடை மேற்பிறை உடையாய்

அழலினை ஒத்த செவ்வண மேனி .. அதன்மிசை நீற்றனே என்று

கழலிணை தன்னிற் கடிமலர் தூவிக் .. கைதொழு தேத்திடும் அடியார்

பழவினை தீர்க்கும் தாமிர பரணிப் .. பாங்கர்நெல் வேலியெம் பரனே.


மழவிடை ஏறும் அழகிய மன்னே - இளைய இடபத்தை வாகனமாக உடைய அழகிய மன்னனே;

வார்சடைமேல் பிறை உடையாய் - நீண்ட சடைமேல் சந்திரனை அணிந்தவனே; (வார்தல் - நீள்தல்);

அழலினை ஒத்த செவ்வண மேனி அதன்மிசை நீற்றனே என்று - தீப் போன்ற செந்நிறம் திகழும் திருமேனியின்மேல் திருநீற்றைப் பூசியவனே என்று வாழ்த்தி;

கழலிணை-தன்னில் கடிமலர் தூவிக், கைதொழுது ஏத்திடும் அடியார் - இரு-திருவடிகளில் வாசமலர்களைத் தூவிக் கைகூப்பித் துதிக்கும் பக்தர்களது;

பழவினை தீர்க்கும் தாமிரபரணிப் பாங்கர் நெல்வேலி எம் பரனே - பழைய வினைகளைத் தீர்ப்பான் தாமிரபரணியின் கரையில் உள்ள திருநெல்வேலியில் உறையும் எம் பரமன்; (தீர்க்கும் - தீர்ப்பான்; செய்யும் என்ற வாய்பாட்டு வினைமுற்று); (பாங்கர் - பக்கம்);


2)

வெற்றிவெள் விடைமேல் ஏறிய வேந்தே .. வேதம தோதிய நாவா

குற்றமில் புகழாய் கூவிளம் கொன்றை .. குரவணி சடையனே என்று

நற்றமிழ் பாடி நறுமலர் தூவி .. நாள்தொறும் ஏத்திடும் அடியார்

பற்றெலாம் பாற்றும் தாமிர பரணிப் .. பாங்கர்நெல் வேலியெம் பரனே.


வெற்றி-வெள்-விடைமேல் ஏறிய வேந்தே - வெற்றியுடைய வெள்ளை இடபவாகனத்தின்மேல் ஏறிய அரசனே;

வேதம்அது ஓதிய நாவா - வேதங்களைப் பாடியருளியவனே;

குற்றம் இல் புகழாய் - குற்றமற்ற புகழை உடையவனே;

கூவிளம் கொன்றை குரவு அணி சடையனே என்று - வில்வம், கொன்றைமலர், குராமலர் இவற்றையெல்லாம் சடையில் அணிந்தவனே என்று சொல்லி;

நற்றமிழ் பாடி நறுமலர் தூவி நாள்தொறும் ஏத்திடும் அடியார் - தேவாரம் திருவாசகம் முதலிய பாமாலைகளைப் பாடி வாசமலர்களைத் தூவித் தினமும் வழிபடும் பக்தர்களது;

பற்று எலாம் பாற்றும் தாமிர பரணிப் பாங்கர் நெல்வேலி எம் பரனே - பந்தங்களை எல்லாம் அழிப்பான் தாமிரபரணியின் கரையில் உள்ள திருநெல்வேலியில் உறையும் எம் பரமன்; (பற்று - அகப்பற்றுப் புறப்பற்றுகளாகிய அபிமானங்கள்); (பாற்றுதல் - நீக்குதல்; அழித்தல்); (பாற்றும் - அழிப்பான்; செய்யும் என்ற வாய்பாட்டு வினைமுற்று); (திருவாசகம் - திருக்கோத்தும்பி - 8.10.5 - "பற்றற நான் பற்றிநின்ற மெய்த்தேவர் தேவற்கே சென்றூதாய் கோத்தும்பீ");


3)

மாவங்கக் கடலின் வல்விடம் உண்ட .. மணிமிடற் றண்ணலே அரனே

நாவங்கம் ஆறு நான்மறை ஓது .. நம்பனே நாதனே என்று

பூவங்கைக் கொண்டு பொற்கழல் தன்னைப் .. போற்றிடும் பொற்புடை அடியார்

பாவங்கள் பாற்றும் தாமிர பரணிப் .. பாங்கர்நெல் வேலியெம் பரனே.


மா-வங்கக் கடலின் வல்விடம் உண்ட மணிமிடற்று அண்ணலே அரனே - பெரிய அலையுடைய (/ மரக்கலங்கள் செல்லும்) கடலில் தோன்றிய கொடிய நஞ்சை உண்ட நீலகண்டனே, ஹரனே; (வங்கம் - அலை; படகு; கப்பல்); (மிடறு - கண்டம்);

நா அங்கம் ஆறு நான்மறை ஓது நம்பனே நாதனே என்று - திருநாவால் நால்வேதத்தையும் ஆறங்கத்தையும் ஓதியவனே, விரும்பத்தக்கவனே, தலைவனே என்று; (நம்பன் - சிவன் திருநாமங்களுள் ஒன்று - விரும்பத்தக்கவன்);

பூ அங்கைக்-கொண்டு பொற்கழல் தன்னைப் போற்றிடும் பொற்புடை அடியார் - பூக்களைக் கையிற்கொண்டு ஈசனது பொன்னடியைப் போற்றி வழிபடும் குணம் உடைய பக்தர்களது; (பொற்பு - அழகு; தன்மை); (அப்பர் தேவாரம் - 5.90.5 - "பூக்கைக் கொண்டரன் பொன்னடி போற்றிலார்");

பாவங்கள் பாற்றும் தாமிரபரணிப் பாங்கர் நெல்வேலி எம் பரனே - பாவங்களை எல்லாம் அழிப்பான் தாமிரபரணியின் கரையில் உள்ள திருநெல்வேலியில் உறையும் எம் பரமன்; (பாற்றுதல் - நீக்குதல்; அழித்தல்); (பாற்றும் - அழிப்பான்; செய்யும் என்ற வாய்பாட்டு வினைமுற்று);


4)

சந்தங்கள் பாடித் தாள்தொழு மாணி .. தன்னுயிர் கொல்வதற் கெண்ணி

வந்தங்கண் சேர்ந்த மறலியைச் செற்ற .. மைந்தனே என்றுளம் உருகிச்

சிந்துங்கள் மலரைச் சேவடி இட்டுத் .. தினந்தொறும் போற்றிசெய் அடியார்

பந்தங்கள் பாற்றும் தாமிர பரணிப் .. பாங்கர்நெல் வேலியெம் பரனே.


சந்தங்கள் பாடித் தாள்தொழு மாணிதன் உயிர் கொல்வதற்கு எண்ணி - வேதங்களைப் பாடித் திருவடியைத் தொழுத மார்க்கண்டேயரது உயிரைக் கொல்ல நினைந்து; (சந்தம் - வேதம்; சந்தப் பாடல்);

வந்து அங்கண் சேர்ந்த மறலியைச் செற்ற மைந்தனே என்று உளம் உருகிச் - அவ்விடம் வந்து சேர்ந்த நமனை உதைத்து அழித்த வீரனே என்று உள்ளம் நெகிழ்ந்து; (அங்கண் - அவ்விடம்); (மறலி - இயமன்); (செறுதல் - அழித்தல்); (மைந்தன் - வீரன்);

சிந்தும் கள் மலரைச் சேவடி இட்டுத் தினந்தொறும் போற்றிசெய் அடியார் - வாசனை கமழும் தேன் நிறைந்த பூக்களைச் சிவந்த திருவடியில் தூவித் தினமும் வழிபடுகின்ற பக்தர்களது; ( சிந்துதல் - ஒழுகுதல்; பரப்புதல்); (சிந்தும் கள் மலரை = 1. கள் சிந்தும் மலரை (தேன் ஒழுகும் பூவை); 2. மணம் சிந்தும் கள்-மலரை (வாசனை கமழும் தேன்மலரை));

பந்தங்கள் பாற்றும் தாமிரபரணிப் பாங்கர் நெல்வேலி எம் பரனே - பந்தங்களை எல்லாம் அழிப்பான் தாமிரபரணியின் கரையில் உள்ள திருநெல்வேலியில் உறையும் எம் பரமன்; (பந்தம் - கட்டு; வினைக்கட்டு); (பாற்றுதல் - நீக்குதல்; அழித்தல்); (பாற்றும் - அழிப்பான்; செய்யும் என்ற வாய்பாட்டு வினைமுற்று);


5)

வகைவகை யான மலர்களைத் தூவி .. வணங்கிய வானவர்க் கிரங்கி

நகையது கொண்டு நண்ணலர் புரங்கள் .. நாசம தாக்கினாய் என்று

புகையொடு தீபம் புதுமலர் கொண்டு .. பொன்னடி போற்றிசெய் அடியார்

பகைவினை பாற்றும் தாமிர பரணிப் .. பாங்கர்நெல் வேலியெம் பரனே.


வகைவகையான மலர்களைத் தூவி வணங்கிய வானவர்க்கு இரங்கி - பலவிதப் பூக்களைத் தூவி வணங்கிய தேவர்களுக்கு இரங்கி;

நகைஅது கொண்டு நண்ணலர் புரங்கள் நாசம்அது ஆக்கினாய் என்று - ஒரு சிரிப்பால் பகைவர்களது முப்புரங்களையும் அழித்தவனே என்று; (நகை - சிரிப்பு); (நண்ணலர் - பகைவர்); (நகையது, நாசமது - இவற்றில் "அது" என்றது பகுதிப்பொருள்விகுதி);

புகையொடு தீபம் புதுமலர் கொண்டு பொன்னடி போற்றிசெய் அடியார் - தூபம், தீபம், நாண்மலர் இவற்றால் பொன் போன்ற திருவடியை வழிபாடு செய்யும் பக்தர்களது; (புகை - தூபம்);

பகைவினை பாற்றும் தாமிர பரணிப் பாங்கர் நெல்வேலி எம் பரனே - பகையான வினையையெல்லாம் அழிப்பான் தாமிரபரணியின் கரையில் உள்ள திருநெல்வேலியில் உறையும் எம் பரமன்; (பகைவினை - 1. பகையாக உள்ள வினை; 2. பகையையும் வினையையும் என்று உம்மைத் தொகையாகவும் கொள்ளக்கூடும்); (பாற்றுதல் - நீக்குதல்; அழித்தல்); (பாற்றும் - அழிப்பான்; செய்யும் என்ற வாய்பாட்டு வினைமுற்று);


6)

காலனைக் காய்ந்து பாலனைக் காத்த .. கண்ணுதல் அண்ணலே ஒருபால்

சேலன கண்ணி சேர்திரு மேனிச் .. செல்வனே நல்லனே என்று

பாலன நீற்றைப் பாங்குறப் பூசிப் .. பதமலர் பணிபவர் தம்மைப்

பாலனம் செய்யும் தாமிர பரணிப் .. பாங்கர்நெல் வேலியெம் பரனே.


காலனைக் காய்ந்து பாலனைக் காத்த கண்ணுதல் அண்ணலே - காலனைச் சினந்து உதைத்துச், சிறுவரான மார்க்கண்டேயரைக் காத்த நெற்றிக்கண்ணனே;

ஒருபால் சேல் அன கண்ணி சேர் திருமேனிச் செல்வனே நல்லனே என்று - சேல்மீன் போன்ற கண்களையுடைய உமையைத் திருமேனியில் ஒரு பக்கம் பாகமாக உடைய செல்வனே, நல்லவனே, என்று சொல்லி; (அன - அன்ன - போன்ற);

பால் அன நீற்றைப் பாங்கு உறப் பூசிப் பதமலர் பணிபவர் தம்மைப் - பால் போன்ற வெண்ணிறம் உடைய திருநீற்றை அழகுறப் பூசித் திருவடித்தாமரையை வழிபடும் பக்தர்களை; (சம்பந்தர் தேவாரம் - 2.66.1 - "சுந்தரம் ஆவது நீறு");

பாலனம் செய்யும் தாமிரபரணிப் பாங்கர் நெல்வேலி எம் பரனே - காப்பான் தாமிரபரணியின் கரையில் உள்ள திருநெல்வேலியில் உறையும் எம் பரமன்; (பாலனம் - பாதுகாத்தல்);


7)

எரியொரு கையில் ஏந்திய ஈசா .. இருளினில் திருநடம் புரிவாய்

கரியுரி போர்த்த கறையணி கண்டா .. கடும்புனற் கங்கையைக் கரந்த

புரிசடைப் பெருமான் என்றனு தினமும் .. போற்றிசெய் அடியவர் தம்மைப்

பரிவொடு காக்கும் தாமிர பரணிப் .. பாங்கர்நெல் வேலியெம் பரனே.


எரி ஒரு கையில் ஏந்திய ஈசா - ஒரு கரத்தில் தீயை ஏந்திய ஈசனே;

இருளினில் திருநடம் புரிவாய் - இரவில் கூத்து ஆடுபவனே; (புரிதல் - செய்தல்);

கரி-உரி போர்த்த கறை அணி கண்டா - யானைத்தோலை மார்புறப் போர்த்த நீலகண்டனே; (உரி - தோல்);

கடும்புனல் கங்கையைக் கரந்த புரிசடைப் பெருமான் என்று - விரைந்து வந்த கங்கையைச் சடையில் ஒளித்த பெருமானே என்று துதித்து; (கரத்தல் - மறைத்தல்); (புரிதல் - சுருள்தல்; முறுக்குக்கொள்தல்); (அப்பர் தேவாரம் - 5.79.5 -"கங்கையெனுங் கடும்புனலைக் கரந்தான் தன்னைக்");

அனுதினமும் போற்றிசெய் அடியவர்-தம்மைப் - தினமும் வழிபடுகின்ற அடியவர்களை; (அனுதினம் - நாள்தோறும்); (உம் - அசை);

பரிவொடு காக்கும் தாமிரபரணிப் பாங்கர் நெல்வேலி எம் பரனே - அன்போடு காப்பான் தாமிரபரணியின் கரையில் உள்ள திருநெல்வேலியில் உறையும் எம் பரமன்; (பரிவு - அன்பு );


8)

விடுவிடென் றோடி வெற்பிடந் தானை .. விரல்நுதி யால்நெரி செய்தாய்

சுடுபொடி பூசிச் சுடலையில் ஆடும் .. தூயனே நாயனே என்று

தொடுமலர் மாலை துணையடிச் சாத்தித் .. தொழுதெழும் அடியவர்க் கிரங்கிப்

படுதுயர் களையும் தாமிர பரணிப் .. பாங்கர்நெல் வேலியெம் பரனே.


விடுவிடென்று ஓடி வெற்பு இடந்தானை விரல்-நுதியால் நெரி-செய்தாய் - விரைந்து ஓடிப் போய்க் கயிலைமலையைப் பெயர்த்த இராவணனைத் திருப்பாத-விரல்நுனியால் நசுக்கியவனே; (நுதி - நுனி); (நெரிசெய்தல் - நசுக்குதல்); (சம்பந்தர் தேவாரம் - 3.86.8 - "நிட்டுரன் உடலொடு நெடுமுடி ஒருபது நெரிசெய்தார்");

சுடுபொடி பூசிச் சுடலையில் ஆடும் தூயனே நாயனே என்று - சுட்ட திருநீற்றைப் பூசிச் சுடுகாட்டில் ஆடுகின்ற தூயவனே, தலைவனே, என்று துதித்து; (நாயன் - தலைவன்; கடவுள்);

தொடு-மலர்மாலை துணையடிச் சாத்தித் தொழுதெழும் அடியவர்க்கு இரங்கிப் - தொடுத்த பூமாலைகளை இரு-திருவடிகளில் சூட்டி வழிபடும் பக்தர்களுக்கு இரங்கி; (சாத்துதல் - அணிதல்); (துணை - இரண்டு; உதவி; காப்பு);

படு-துயர் களையும் தாமிர பரணிப் பாங்கர் நெல்வேலி எம் பரனே - அவர்கள் படுகின்ற (/ அவர்களது கொடிய) துன்பத்தைத் தீர்ப்பான் தாமிரபரணியின் கரையில் உள்ள திருநெல்வேலியில் உறையும் எம் பரமன்; (படு - பெரிய; கொடிய); (படுதல் - துன்பம் அனுபவித்தல்); (பரிவு - அன்பு); (சம்பந்தர் தேவாரம் - 3.93.3 - "பரவின அடியவர் படுதுயர் கெடுப்பவர்");


9)

நறைமலர் மேலான் நாரணன் இவர்கள் .. நண்ணுதற் கரும்பெருஞ் சோதீ

பறைபல ஆர்த்துப் பாரிடஞ் சூழப் .. படுபிணக் காட்டிடை ஆடீ

கறையணி கண்டா என்றடி போற்றிக் .. கைதொழும் அடியவர் வினைகள்

பறைவுற அருளும் தாமிர பரணிப் .. பாங்கர்நெல் வேலியெம் பரனே.


நறைமலர் மேலான் நாரணன் இவர்கள் நண்ணுதற்கு அரும் பெரும் சோதீ - வாசமலரான தாமரைமேல் உறையும் பிரமன், திருமால் என்ற இவ்விருவராலும் அடைய ஒண்ணாத அரிய பெரிய ஜோதியே;

பறை பல ஆர்த்துப் பாரிடம் சூழப் படுபிணக்காட்டிடை ஆடீ - பல பறைகளை முழக்கிப் பூதங்கள் சூழ, இறந்த பிணங்களையுடைய சுடுகாட்டில் திருநடம் ஆடுபவனே; (படுதல் - சாதல்); (சுந்தரர் தேவாரம் - 7.98.4 - "படு பல்பிணக் காடரங்கா ஆடிய மாநடத்தான்");

கறை அணி கண்டா என்று அடி போற்றிக் கைதொழும் அடியவர் வினைகள் - நீலகண்டனே என்று திருவடியை வாழ்த்திக் கைகூப்பி வழிபடும் அடியவர்களது வினைகள் எல்லாம்;

பறைவு-உற அருளும் தாமிர பரணிப் பாங்கர் நெல்வேலி எம் பரனே - அழியுமாறு அருள்வான் தாமிரபரணியின் கரையில் உள்ள திருநெல்வேலியில் உறையும் எம் பரமன்; (பறைவு - அழிவு; பறைதல் - அழிதல்);


10)

தவமென நாளும் அவ(ம்)மிகச் செய்யும் .. சழக்கர்கள் சொற்களை விடுமின்

பவளமே அனைய மேனியிற் பாவை .. பங்கனே இறைவனென் றன்பால்

சிவசிவ என்று நீற்றினைப் பூசித் .. தினமடி இணைதொழும் அடியார்

பவபயம் தீர்க்கும் தாமிர பரணிப் .. பாங்கர்நெல் வேலியெம் பரனே.


தவம் என நாளும் அவம் மிகச் செய்யும் சழக்கர்கள் சொற்களை விடுமின் - தவம் என்று எந்நாளும் மிகவும் இழிந்த செயல்களையே செய்யும் தீயவர்களது பேச்சை நீங்கள் மதிக்கவேண்டா; (சழக்கன் - தீயவன்);

பவளமே அனைய மேனியில் பாவை பங்கனே இறைவன் என்று அன்பால் - பவளம் போன்ற செம்மேனியில் உமையை ஒரு பங்காக உடையவனே இறைவன் என்று தெளிந்து, அன்போடு;

சிவசிவ என்று நீற்றினைப் பூசித் தினம் அடிஇணை தொழும் அடியார் - சிவசிவ என்று சொல்லித் திருநீற்றை அணிந்து தினந்தோறும் இரு-திருவடிகளை வணங்கும் அடியவர்களது;

பவபயம் தீர்க்கும் தாமிரபரணிப் பாங்கர் நெல்வேலி எம் பரனே - வினைகளை அழித்துப் பிறவிப்பிணியைத் தீர்ப்பான் தாமிரபரணியின் கரையில் உள்ள திருநெல்வேலியில் உறையும் எம் பரமன்; (பவம் - பிறவி; பவபயம் - பிறவித்தொடரால் ஏற்படும் அச்சம்);


11)

துணிமதி யோடு சுழல்மலி கங்கை .. தூமலர் கூவிளம் நாகம்

அணிமுடி உடையாய் அமரர்கள் உய்ய .. அருவிடம் அமுதென உண்டு

மணியணி கண்டா மாதுமை பங்கா .. மலரடி சரணெனப் போற்றிப்

பணிபவர்க் கருளும் தாமிர பரணிப் .. பாங்கர்நெல் வேலியெம் பரனே.


துணி-மதியோடு, சுழல்-மலி கங்கை, தூ-மலர், கூவிளம், நாகம், அணி முடி உடையாய் - நிலாத்துண்டம், சுழல் மிக்க கங்கை, தூய மலர்கள், வில்வம், பாம்பு இவற்றையெல்லாம் திருமுடிமேல் அணிந்தவனே; (துணி - துண்டம்); (கூவிளம் - வில்வம்);

அமரர்கள் உய்ய அருவிடம் அமுது என உண்டு மணி அணி கண்டா - தேவர்கள் உய்வதற்காக, உண்ணற்கரிய ஆலகாலத்தை அமுதம் போல உண்டு கண்டத்தில் நீலமணியை அணிந்தவனே;

மாது உமை பங்கா - மாதொருபாகனே;

மலரடி சரண் எனப் போற்றிப் பணிபவர்க்கு அருளும் தாமிரபரணிப் பாங்கர் நெல்வேலி எம் பரனே - உன் மலர்ப்பாதமே துணை என்று போற்றி வணங்கும் அடியவர்களுக்கு அருள்வான் தாமிரபரணியின் கரையில் உள்ள திருநெல்வேலியில் உறையும் எம் பரமன்;


வி. சுப்பிரமணியன்

----------- --------------


Monday, April 16, 2018

04.23 - நெல்வேலி - அறைகின்ற கடலுமிழ்ந்த

04.23 - நெல்வேலி - அறைகின்ற கடலுமிழ்ந்த

2013-11-22

நெல்வேலி (திருநெல்வேலி)

----------------------------------

(நாலடித் தரவு கொச்சகக் கலிப்பா)

(சம்பந்தர் தேவாரம் - 2.48.1 - "கண்காட்டு நுதலானும்")


1)

அறைகின்ற கடலுமிழ்ந்த ஆலாலம் அமுதுண்டு

கறைகொண்ட மிடற்றானைக் காந்திமதி காதலனை

நிறைநெஞ்சர் வந்திக்க நெல்வேலித் தடங்கோயில்

உறைகின்ற உத்தமனை ஓதவினைத் தீதறுமே.


* காந்திமதி - இத்தலத்து அம்பிகை திருநாமம்.

அறைதல் - ஒலித்தல்; அலைமோதுதல்;

ஆலாலம் - ஆலகால விடம்;

அமுதுண்டு - அமுதாக உண்டு; (சம்பந்தர் தேவாரம் - 2.20.2 - "கடலேறிய நஞ்சமுதுண்டவனே");

மிடறு - கண்டம்;

காதலன் - கணவன்; அன்புள்ளவன்;

நிறைநெஞ்சர் - மனநிறைவுற்ற அடியார்கள்;

தடங்கோயில் - பெரிய கோயில்; (தடம் - பெருமை);

ஓதுதல் - பாடுதல்;

வினைத்தீது - வினைக்குற்றம்; வினைக்கேடு;

அறுதல் - தீர்தல்; இல்லாமற் போதல்;


2)

மதனாகம் எரித்துப்பின் மனைவிக்குப் பரிந்தானைக்

கதநாகக் கச்சையனைக் காந்திமதி காதலனை

நிதமன்பர் திரண்டேத்தும் நெல்வேலித் தடங்கோயில்

மதமத்தம் சூடிறையை வாழ்த்தவினை மாய்ந்தறுமே.


மதன் ஆகம் எரித்துப் பின் மனைவிக்குப் பரிந்தானை - மன்மதனின் உடலை நெற்றிக்கண்ணால் சாம்பலாக்கிப், பிறகு அவன் மனைவி இரதிக்கு இரங்கி அருள்புரிந்தவனை; (இலக்கணக் குறிப்பு: "மதன்" என்ற சொல்லை முதனிலைத் தீவகமாகக் கொண்டு, "மதன் ஆகம் எரித்துப் பின் மதன் மனைவிக்குப் பரிந்தானை" என்று இயைத்துக்கொள்க);

கதநாகக் கச்சையனை - கோபிக்கின்ற நாகத்தை அரையில் கச்சையாக அணிந்தவனை;

நிதம் - தினமும்;

மத-மத்தம் சூடு இறையை - வாசனையையுடைய ஊமத்தை மலரை அணியும் இறைவனை;

மாய்தல் - அழிதல்;


3)

ஓடுமொரு கலனாக உண்பலிதேர்ந் துழல்வானைக்

காடுமிடம் ஆனவனைக் காந்திமதி காதலனை

நீடுயர்ந்த கோபுரஞ்சூழ் நெல்வேலித் தடங்கோயில்

நாடுகின்ற நாடகனை நாடவினை நலிந்தறுமே.


ஓடு - பிரமனின் மண்டையோடு;

உண்பலி - பிச்சை;

காடு - சுடுகாடு;

நீடுயர்ந்த - மிக உயர்ந்த;

நாடகன் - கூத்தன்;

நலிந்தறுதல் - அழிந்து கெடும்; (நலிதல் - அழிதல்); (அறுதல் - தீர்தல்; இல்லாமற்போதல்); (சம்பந்தர் தேவாரம் - 2.24.1 - "மன்னே என வல்வினை மாய்ந்தறுமே");


4)

அடுகின்ற புலியதன்தோல் ஆடையனை அமரர்க்காக்

கடுநஞ்சம் ஆர்ந்தானைக் காந்திமதி காதலனை

நெடுவீதி சூழ்ந்தழகார் நெல்வேலித் தடங்கோயிற்

சுடுநீறு பூசிதனைத் தொழுதேத்தப் பழுதிலையே.


அடுகின்ற புலியதன்தோல் ஆடையனை - கொல்லும் புலியின் தோலை ஆடையாக அணீந்தவனை; (அடுதல் - கொல்லுதல்); (சம்பந்தர் தேவாரம் - 2.46.4 - "கொல்புலித்தோல் ஆடையான்");

அமரர்க்காக் கடு நஞ்சம் ஆர்ந்தானை - தேவர்களுக்காகக் கொடிய விடத்தை உண்டவனை; (ஆர்தல் - உண்ணுதல்);

சுடுநீறு பூசிதனை - திருநீறு பூசியவனை;

பழுது இலையே - குற்றம் இல்லை; தீங்கு இல்லை;


5)

சலமுலவு சடையானைத் தனிவெள்ளை விடையானைக்

கலவமயில் அன்னநடைக் காந்திமதி காதலனை

நிலவுதொடு கோபுரஞ்சூழ் நெல்வேலித் தடங்கோயில்

தலைமகனை முக்கண்ணன் தனைநினைய வினையறுமே


சலம் உலவு சடையானை - கங்கை உலாவுகின்ற சடையை உடையவனை; (சலம் - ஜலம் - கங்கை);

தனி வெள்ளை விடையானை - ஒப்பற்ற வெண்ணிற இடபத்தை வாகனமாக உடையவனை; (தனி - ஒப்பற்ற);

கலவமயில் அன்னநடைக் காந்திமதி காதலனை - தோகையுடைய மயிலின் சாயலும் அன்னத்தின் நடையும் உடைய காந்திமதி அம்மையின் கணவனை;

நிலவு தொடு கோபுரம் சூழ் - திங்களைத் தீண்டுமளவு உயர்ந்த கோபுரங்கள் சூழ்ந்த;

தலைமகனை முக்கண்ணன்தனை - தலைவனை, முக்கண்ணனை; (தலைமகன் - தலைவன்);

நினைய இருவினை அறுமே - சிந்தித்தால் இருவினைக் கட்டு நீங்கும்;


6)

அத்தியுரி போர்த்தவனை அலைகடலில் அன்றெழுந்த

கைத்தவிடம் உண்டானைக் காந்திமதி காதலனை

நித்தமடி யார்திரளும் நெல்வேலித் தடங்கோயில்

மத்தமணி உத்தமனை வாழ்த்தவினை மாய்ந்தறுமே.


அத்தி உரி - யானைத்தோல்;

கைத்த விடம் - கசப்புடைய நஞ்சு;

நித்தம் - நாள்தோறும்;

மத்தம் அணி உத்தமன் - ஊமத்தமலரைச் சூடிய உத்தமன்;


7)

பெற்றமிவர் பெற்றியனைப் பிறைசூடும் பெருமானைக்

கற்றவருக் கினியவனைக் காந்திமதி காதலனை

நெற்றிவிழி உடையானை நெல்வேலித் தடங்கோயில்

உற்றவனை நற்றவனைப் பற்றவினை பற்றறுமே.


பெற்றம் இவர் பெற்றியனை - இடபத்தின்மேல் செல்லும் பெருமை உடையவன்; (இவர்தல் - ஏறிச் செலுத்துதல்);

உற்றவன் - நண்பன்; சுற்றத்தான்;

நற்றவன் - நல்ல தவ வடிவினன்;


8)

இருபதுதோள் உடையானை இருவரைக்கீழ் அடர்த்தானைக்

கருவிடமார் மிடற்றானைக் காந்திமதி காதலனை

நிருபமனை மதில்சூழ்ந்த நெல்வேலித் தடங்கோயிற்

குருபரனை இருகரங்கள் கொண்டுதொழ வினையறுமே.


இருவரை - பெரியமலை - கயிலைமலை; (திருமாளிகைத்தேவர் - திருவிசைப்பா - 9.1.10 - "வல்லரக்கன் அரட்டு இருவரைக்கீழ் அடர்த்த பொன்னம்பலத்தரசே");

கருவிடம் ஆர் மிடற்றானை - நீலகண்டனை; (கரு-விடம் - கரிய நஞ்சு); (ஆர்தல் - பொருந்துதல்; உண்ணுதல்); (மிடறு - கண்டம்);

நிருபமன் - ஒப்பில்லாதவன்; (சம்பந்தர் தேவாரம் - 1.124.2 - "நிருபமன் மிழலையை நினைய வலவரே");

குருபரன் - குருசிரேட்டன்;


9)

சேண்பறந்த நான்முகனும் திருமகட்கு நாயகனும்

காண்பரிய தாணுவினைக் காந்திமதி காதலனை

நீண்மதில்கள் புடைசூழ்ந்த நெல்வேலித் தடங்கோயிற்

கேண்மையனை அடிபோற்றக் கேடில்லா நிலைதானே.


சேண் - ஆகாயம்;

திருமகட்கு நாயகன் - திருமால்;

காண்பு அரிய தாணு - (அடிமுடி) காண இயலாத (ஒளித்)தூண்;

நீண்மதில்கள் - நீள் மதில்கள் - நீண்ட மதில்;

கேண்மையன் - நட்பு உடையவன்; அருள் உடையவன்; (கேண்மை - நட்பு; கண்ணோட்டம்);

(திருவாசகம் - கீர்த்தித் திருவகவல் - 8.4 - அடி 120 - "தோழா போற்றி துணைவா போற்றி");

(சுந்தரர் தேவாரம் - 7.24.2 - "மழபாடியுள் மாணிக்கமே கேளா நின்னையல்லால் இனி யாரை நினைக்கேனே");


10)

விருப்பமொடு நீறணியா வெற்றுரையர் சொல்விடுமின்

கருப்புவிலி தனையெரித்த காந்திமதி காதலனை

நெருப்புமிழும் நேத்திரனை நெல்வேலித் தடங்கோயில்

இருப்பவனை இருபொழுதும் எண்ணவினை நண்ணாவே.


விருப்பமொடு நீறு அணியா - திருநீறு பூச மாட்டாத;

வெற்றுரையர் - பொருளற்ற பேச்சுப் பேசுகின்றவர்கள்;

சொல் விடுமின் - சொற்களை மதிக்கவேண்டா;

கருப்புவிலி தனையெரித்த காந்திமதி காதலனை நெருப்புமிழும் நேத்திரனை - "கருப்புவிலி தனையெரித்த நெருப்புமிழும் நேத்திரனைக் காந்திமதி காதலனை" என்று கூட்டிப் பொருள்கொள்க; (கருப்புவிலி - கருப்புவில்லி - கரும்பை வில்லாக ஏந்தும் காமன்; நேத்திரம் - கண்);

நண்ணா - அடையா;


11)

சீலமணி மாணியிடம் சென்றிடர்செய் காலனுயிர்

காலவுதை கழலானைக் காந்திமதி காதலனை

நீலமணி மிடற்றானை நெல்வேலித் தடங்கோயில்

ஆலமணி சடையானை அடையவினை அடையாவே.


சீலமணி மாணி - சீல மணி மாணி / சீலம் அணி மாணி - சீலம் மிக்க மணி போன்ற மார்க்கண்டேயர் / சீலத்தை அணியாக உடைய மார்க்கண்டேயர்;

காலன் உயிர் கால உதை கழலானை - எமனை உயிர் கக்குமாறு உதைத்த திருவடியினானை;

நீல மணி மிடற்றானை - நீலமணி போன்ற கண்டத்தை உடையவனை;

ஆலம் அணி சடையானை - கங்கையைச் சடையில் அணிந்தவனை; (ஆலம் - நீர்);


வி. சுப்பிரமணியன்

----------- --------------