Showing posts with label திருவிராகம். Show all posts
Showing posts with label திருவிராகம். Show all posts

Monday, April 27, 2026

P.472 - இடைமருதூர் - இருபொழுது இலைமலர்

2019-06-11

P.472 - இடைமருதூர் (திருவிடைமருதூர்)

---------------------------------

(சந்தக் கலிவிருத்தம் - தனதன தனதன தனதன தனதன - திருவிராகம் ஒத்த அமைப்பு)

(சம்பந்தர் தேவாரம் - 1.123.5 - "பிடியத னுருவுமை")


முற்குறிப்பு: படிப்போர் வசதி கருதிச் சந்தம் கெடாத இடங்களில் புணர்ச்சி பிரித்துக் காட்டப்பட்டுள்ளது;

1)

இருபொழு திலைமலர் இவைகொடு தொழுபவர்

அருவினை அறவினி தருளரன் எரியன

உருவினன் அரிவையை ஒருபுறம் உடையவன்

எருதமர் இறையிடம் இடைமரு ததுவே.


பதம் பிரித்து:

இருபொழுது இலை மலர் இவைகொடு தொழுபவர்

அரு-வினை அற இனிது அருள் அரன்; எரி அன

உருவினன்; அரிவையை ஒரு-புறம் உடையவன்;

எருது அமர் இறை இடம் இடைமருது அதுவே.


காலையும் மாலையும் (வில்வம் வன்னி முதலிய) இலைகளாலும் பூக்களாலும் வழிபடும் பக்தர்களது அரிய வினை தீர இன்னருள் புரியும் ஹரன்; தீப் போன்ற செம்மேனியன்; உமையை இடப்பக்கம் பாகமாக உடையவன்; இடபத்தை வாகனமாக விரும்பும் இறைவன் உறையும் தலம் திருவிடைமருதூர்;

(எரி - தீ); (அரிவை - பெண்); (அமர்தல் - விரும்புதல்); (சம்பந்தர் தேவாரம் - 3.74.1 - "காடு பயில் வீடு ... வேதியர் திருந்து-பதிதான் ... தேவூர் அதுவே");


2)

நீறணி அடியவர் நினைவன அருள்துணை

தேறலர் திரிபுரம் எரிதிரு நகையினன்

ஆறர விளமதி அணிசடை முடியினன்

ஏறமர் இறையிடம் இடைமரு ததுவே.


நீறு அணி அடியவர் நினைவன அருள் துணை - திருநீற்றைப் பூசிய அடியார்கள் எண்ணிய வரங்களை அருளும் துணைவன்; (துணை - துணைவன்); (அருள்+துணை = அருடுணை என்று புணரும்; சந்தம் கெடாது);

தேறலர் திரிபுரம் எரி திரு-நகையினன் - பகைவர்களது முப்புரங்களை எரித்த சிரிப்பினன்; (தேறலர் - பகைவர்);

ஆறு, அரவு, இளமதி அணி சடை முடியினன் - கங்கை, பாம்பு, இளம்பிறை இவற்றை அணிந்த சடைமுடி உடையவன்;

ஏறு அமர் இறை இடம் இடைமருது அதுவே - இடபத்தை வாகனமாக விரும்பும் இறைவன் உறையும் தலம் திருவிடைமருதூர்; (அமர்தல் - விரும்புதல்);


3)

தொடுமலர் கொடுகழல் தொழுதெழும் அடியவர்

படுதுயர் பழவினை பறைதர அருள்பவன்

அடுபுலி அதளினன் நடுவிருள் தனில்நடம்

இடுமிறை யவனிடம் இடைமரு ததுவே.


தொடு-மலர்-கொடு கழல் தொழுதெழும் அடியவர் படுதுயர் பழவினை பறைதர அருள்பவன் - தொடுத்த மலரால் திருவடியை வழிபடும் அடியார்களது கொடிய துன்பங்களும் பழைய வினைகளும் அழிய அருள்பவன்; (தொடுமலர் - தொடுத்த பூ); (பறைதல் - அழிதல்); (தருதல் - ஒரு துணைவினை);

அடு-புலி அதளினன் - கொல்லும் இயல்புடைய புலியின் தோலை ஆடையாகக் கட்டியவன்; (அடுதல் - கொல்தல்); (அதள் - தோல்);

நடுவிருள்தனில் நடம் இடும் இறை அவன் இடம் இடைமருது அதுவே - நள்ளிருளில் கூத்து ஆடும் இறைவன் உறையும் தலம் திருவிடைமருதூர்; (இறை - இறைவன்; அவன் - பகுதிபொருள்விகுதி); (சம்பந்தர் தேவாரம் - 2.84.11 - "நடுவிருள் ஆடும் எந்தை");


4)

ஓர்ந்தவர் இருவினை ஒழியரன்; மனமது

சோர்ந்தடி தொழுதெழு சுரரவர் துயர்கெட

ஆர்ந்தவன் அருவிடம்; அயிலுறு மழுவினை

ஏந்திய இறையிடம் இடைமரு ததுவே.


ஓர்ந்தவர் இருவினை ஒழி-அரன் - தியானிக்கும் அடியார்களது இருவினையைத் தீர்க்கும் ஹரன்; (ஓர்தல் - எண்ணுதல்);

மனமது சோர்ந்து அடி தொழுதெழு சுரர்-அவர் துயர் கெட ஆர்ந்தவன் அருவிடம் - மனம் தளர்ந்து திருவடியை வணங்கிய தேவர்களது துன்பம் தீர அரிய விஷத்தை உண்டவன்; (ஆர்தல் - உண்தல்);

அயில்-உறு மழுவினை ஏந்திய இறை இடம் இடைமருது அதுவே - கூர்மையான மழுவை ஏந்திய இறைவன் உறையும் தலம் திருவிடைமருதூர்; (அயில் - கூர்மை);


5)

கரியதன் உரிபுனை பெரியவன் எளியவன்

அரியவன் எனநிகழ் அதிசயன் அலைமலி

புரிசடை மிசைமதி பொலியரன் மழுமறி

எரிதரி இறையிடம் இடைமரு ததுவே.


கரி-அதன் உரி புனை பெரியவன் - யானைத்தோலைப் போர்த்த பெரியோன்; (கரி - யானை); (உரி - தோல்);

எளியவன் அரியவன் என நிகழ் அதிசயன் - (அடியார்களல்) எளிதில் அடையப்படுபவனும் (மற்றவர்களால்) அடைய இயலாதவனும் ஆன அதிசயத்தன்மை உடையவன்; (நிகழ்தல் - விளங்குதல்);

அலை மலி புரி-சடைமிசை மதி பொலி-அரன் - (கங்கையின்) அலை மிகுந்த சுருண்ட சடையில் திங்கள் திகழ்கின்ற ஹரன்; (புரிதல் - முறுக்குக்கொள்தல்);

மழு மறி எரி தரி இறை இடம் இடைமருது அதுவே - மழு, மான்கன்று, தீ இவற்றை ஏந்திய இறைவன் உறையும் தலம் திருவிடைமருதூர்; (மறி - மான்கன்று); (எரி - நெருப்பு);


6)

கைதொழும் அடியவர் கருதின தருபவன்

மைதிகழ் உடலுடை மறலியை விழவுதை

செய்தவன் நணுகலர் திரிபுரம் எரியெழ

எய்தருள் இறையிடம் இடைமரு ததுவே.


கைதொழும் அடியவர் கருதின தருபவன் - வணங்கும் அடியார்கள் எண்ணிய வரங்களை அருள்பவன்;

மை திகழ் உடலுடை மறலியை விழ உதை செய்தவன் - கரிய உடலுடைய இயமனை அவன் இறந்து விழும்படி உதைத்தவன்; (மை - கருநிறம்); (மறலி - இயமன்); (விழுதல் - தரையில் விழுதல்; சாதல்); (அப்பர் தேவாரம் - 4.107.1 - "இருட்டிய மேனி ... வெங் கூற்றம் பதைப்ப உதைத்து");

நணுகலர் திரிபுரம் எரி எழ எய்து-அருள் இறை இடம் இடைமருது அதுவே - பகைவர்களது முப்புரங்களில் தீயெழும்படி ஒரு கணை எய்து அருளிய இறைவன் உறையும் தலம் திருவிடைமருதூர்; (நணுகலர் - பகைவர்);


7)

கொய்ம்மலர் கொடுதொழும் அடியவர் குறைதவிர்

செம்மலை எனவெழில் திகழ்தரும் உருவினன்

மும்மலம் இலனணி இளமதி புனைபவன்

எம்மிறை அவனிடம் இடைமரு ததுவே.


கொய்ம்-மலர்-கொடு தொழும் அடியவர் குறை தவிர் - பறித்த பூக்களால் தொழும் அடியார்களது குறைகளைத் தீர்க்கும்;

செம்-மலை என எழில் திகழ்தரும் உருவினன் - செந்நிறம் திகழும் மலை போன்ற அழகு திகழும் வடிவினன்; (தருதல் - ஒரு துணைவினை);

மும்மலம் இலன் - இயல்பாகவே மும்மலங்களும் இல்லாதவன்;

அணி இளமதி புனைபவன் - அழகிய இளந்திங்களை அணிந்தவன்;

எம் இறை அவன் இடம் இடைமருது அதுவே - எம் இறைவன் உறையும் தலம் திருவிடைமருதூர்;


8)

மலைபெயர் தசமுகன் வலிகெட நிறுவிய

மலரடி விரலினன் மணிதிகழ் மிடறினன்

அலைதிகழ் சடைமிசை அளியறை நறைமலர்

இலையணி இறையிடம் இடைமரு ததுவே.


மலை பெயர் தசமுகன் வலி கெட நிறுவிய மலரடி விரலினன் - கயிலைமலையைப் பெயர்த்த இராவணனது வலிமை அழியும்படி மலர்ப்பாத-விரல் ஒன்றை ஊன்றியவன்; (சம்பந்தர் தேவாரம் - 1.20.8 - "தசமுகனது கரமிருபது நெரிதர விரல் நிறுவிய கழலடி யுடையவன்");

மணி திகழ் மிடறினன் - கண்டத்தில் நீலமணி உடையவன்; (மிடறு - கண்டம்);

அலை திகழ் சடைமிசை அளி அறை நறை-மலர் இலை அணி இறை இடம் இடைமருது அதுவே - கங்கை திகழும் சடையில் வண்டுகள் ஒலிக்கும் தேன்மலர்களையும், (வில்வம் வன்னி முதலிய) இலைகளையும் அணிந்த இறைவன் உறையும் தலம் திருவிடைமருதூர்; (அளி - வண்டு); (நறை - தேன்);


9)

கண்ணனும் அழகிய கடிமலர் மிசையுறை

அண்ணலும் அயர்வுற அழலென உயர்பரன்

மண்ணினர் இமையவர் மலர்கொடு வழிபடும்

எண்ணுரு வினனிடம் இடைமரு ததுவே.


கண்ணனும் அழகிய கடி-மலர்மிசை உறை அண்ணலும் அயர்வுற அழல் என உயர்-பரன் - திருமாலும் அழகிய வாசத்தாமரைமேல் இருக்கும் பிரமனும் (அடிமுடி தேடித்) தளரும்படி ஜோதியாகி ஓங்கிய பரமன்; (கடி - வாசனை); (அழல் - தீ);

மண்ணினர் இமையவர் மலர்கொடு வழிபடும் - மண்ணுலகினரும் தேவரும் பூக்களால் வழிபாடு செய்கின்ற;

எண்-உருவினன் இடம் இடைமருது அதுவே - அஷ்டமூர்த்தம் உடைய (/ எண்ணிய வடிவங்கள் உடைய) இறைவன் உறையும் தலம் திருவிடைமருதூர்;


10)

கைதவம் உடையவர் கலதிகள் உரைபல

பொய்களை விலகுமின் நலமருள் புரிபவன்

மைதிகழ் மிடறினன் வரிசிலை கொடுபுரம்

எய்தவன் உறைவிடம் இடைமரு ததுவே.


கைதவம் உடையவர் கலதிகள் உரை பல பொய்களை விலகுமின் - வஞ்சகம் உடையவர்களும் தீயோர்களும் சொல்லும் பல பொய்களை நீங்குங்கள்; (கைதவம் - வஞ்சகம்; கபடம்); (கலதி - தீயோன்);

நலம் அருள் புரிபவன் - நன்மை அருள்பவன்;

மை திகழ் மிடறினன் - நீலகண்டன்; (மை - கறுப்பு); (மிடறு - கண்டம்);

வரி-சிலை-கொடு புரம் எய்தவன் உறைவிடம் இடைமருது அதுவே - (நாணைக்) கட்டிய வில்லால் முப்புரங்களை எய்து அழித்த இறைவன் உறையும் தலம் திருவிடைமருதூர்; (வரிதல் - கட்டுதல்); (சிலை - வில்); (சம்பந்தர் தேவாரம் - 1.120.3 - "வரிந்த வெஞ்சிலை பிடித்து அவுணர்தம் வளநகர் எரிந்தற எய்தவன்");


11)

அடைபவர் அருவினை அறவருள் புரிபவன்

விடமணி மிடறினன் விரிசடை முடியினன்

அடல்விடை உடையவன் அழகிய உமைதனை

இட(ம்)மகிழ் இறையிடம் இடைமரு ததுவே.


அடைபவர் அரு-வினை அற அருள் புரிபவன் - சரண்புகுந்தவர்களது அரிய வினை தீர அருள்செய்பவன்;

விடமணி மிடறினன் - ஆலகாலத்தை அணிந்த கண்டன்; விஷத்தால் ஆன மணி இருக்கும் கண்டன்; (விடமணி - 1. விடம் அணி; 2. விட-மணி = விஷ-மணி);

விரி-சடை முடியினன் - விரித்த சடைமுடி உடையவன்;

அடல்-விடை உடையவன் - வலிய எருதை வாகனமாக உடையவன்; (அடல் - வலிமை; போர்; வெற்றி);

அழகிய உமைதனை இட(ம்) மகிழ் இறை இடம் இடைமருது அதுவே - அழகிய உமாதேவியை இடப்பாகமாக மகிழும் இறைவன் உறையும் தலம் திருவிடைமருதூர்;


பிற்குறிப்பு: யாப்புக் குறிப்பு :

  • சந்தக் கலிவிருத்தம் - "தனதன தனதன தனதன தனதன" என்ற சந்தம்.

  • முதற்சீர் "தானன" என்றும் சில பாடல்களில் வரலாம்.

  • பாடல்தோறும் பாடலின் ஈற்றுச்சீர் "தனனா".

  • முடுகு ஓசை அமைந்த பாடல்கள். தேவாரத்தில் உள்ள திருவிராகம் ஒத்த அமைப்பு.

சம்பந்தர் தேவாரம் - 1.123.1 - "பூவியல் புரிகுழல் வரிசிலை நிகர்நுதல்"

சம்பந்தர் தேவாரம் - 1.123.5 - "பிடியத னுருவுமை கொளமிகு கரியது"


வி. சுப்பிரமணியன்

----------- --------------


Monday, September 15, 2025

P.456 - பேரூர் - துள்ளுமறி மூவிலைய

2018-11-01

P.456 - பேரூர்

-------------------------------

(சந்தக் கலிவிருத்தம் - தானதன தானதன தானதன தானா) (திருவிராகம் அமைப்பு)

(சம்பந்தர் தேவாரம் - 2.29.1 - திருவிராகம் - "முன்னிய கலைப்பொருளும்")


* (ம்) - புணர்ச்சியில் மகர ஒற்றுக் கெடும் இடம்;


1)

துள்ளுமறி மூவிலைய சூலமிவை ஏந்தி

வெள்ளைவிடை மீதுவரும் வேந்தனுமை பங்கன்

பிள்ளைமதி சூடுமிறை பீடுடைய பேரூர்

வள்ளலவன் வார்கழலை வாழ்த்தவரும் இன்பே.


துள்ளும் மறி, மூ-இலைய சூலம், இவை ஏந்தி - துள்ளும் மான்கன்றையும், மூன்று இலை போன்ற நுனிகளையுடைய சூலத்தையும், ஏந்தியவன்;

வெள்ளை-விடைமீது வரும் வேந்தன் - வெண்ணிற இடபத்தை வாகனமாக உடைய அரசன்;

உமைபங்கன் - உமாதேவியை ஒரு பாகமாக உடையவன்;

பிள்ளைமதி சூடும் இறை - இளந்திங்களை அணிந்த இறைவன்; (சம்பந்தர் தேவாரம் - 2.80.5 - "பிள்ளைமதியம் உடையார்");

பீடு உடைய பேரூர் வள்ளல் அவன் வார்-கழலை வாழ்த்த வரும் இன்பே - பெருமைமிக்க பேரூரில் உறைகின்ற வள்ளலான அப்பெருமானது நீண்ட கழல் அணிந்த திருவடியை வாழ்த்தினால், இன்பம் வந்து அடையும்; (வள்ளல்அவன் - அவன் - பகுதிப்பொருள்விகுதி);


2)

அன்னையென அத்தனென ஆனசிவன் எம்மான்

சென்னிமிசை வெண்பிறையன் முன்னவனும் ஆகிப்

பின்னவனும் ஆயவிறை பீடுடைய பேரூர்

மன்னனவன் வார்கழலை வாழ்த்தவரும் இன்பே.


அன்னை என அத்தன் என ஆன சிவன் எம்மான் - தாயும் தந்தையும் ஆனவன், சிவன், எம் தலைவன்;

சென்னிமிசை வெண்பிறையன் - திருமுடிமேல் வெண்திங்களை அணிந்தவன்;

முன்னவனும் ஆகிப் பின்னவனும் ஆய இறை - எல்லாம் தோன்றுவதன் முன்னும், எல்லாம் ஒடுங்கியதன் பின்னும் இருக்கின்ற இறைவன்; (அப்பர் தேவாரம் - 6.48.8 - "முன்னவன்காண் பின்னவன்காண்");

பீடு உடைய பேரூர் மன்னன் அவன் வார்கழல்கள் வாழ்த்த வரும் இன்பே - பெருமைமிக்க பேரூரில் உறைகின்ற அரசனான அப்பெருமானது நீண்ட கழல் அணிந்த திருவடியை வாழ்த்தினால், இன்பம் வந்து அடையும்;


3)

கார்மலியு(ம்) மாமிடறன் நெற்றியிலொர் கண்ணன்

போர்விடையன் வாச(ம்)மலி பூதியணி மார்பன்

பேர்பலவும் ஏற்றவிறை பீடுடைய பேரூர்

வார்சடையன் ஆர்கழலை வாழ்த்தவரும் இன்பே.


கார் மலியும் மா மிடறன் - கருமை திகழும் அழகிய நீலகண்டம் உடையவன்; (மிடறு - கண்டம்);

நெற்றியில் ஒர் கண்ணன் - நெற்றியில் ஒரு கண்ணை உடையவன்; (ஒர் - ஓர்; குறுக்கல் விகாரம்);

போர்-விடையன் - போர் செய்யவல்ல இடபத்தை வாகனமாக உடையவன்;

வாசம் மலி பூதி அணி மார்பன் - வாசனை கமழும் திருநீற்றை மார்பில் பூசியவன்; (பூதி - திருநீறு);

பேர் பலவும் ஏற்ற இறை - பல திருநாமங்களை உடைய இறைவன்;

பீடு உடைய பேரூர் வார்-சடையன் ஆர்-கழலை வாழ்த்த வரும் இன்பே - பெருமைமிக்க பேரூரில் உறைகின்ற நீள்சடையை உடைய அப்பெருமானது ஒலிக்கின்ற கழல் அணிந்த திருவடியை வழிபட்டால், இன்பம் வந்து அடையும்; (வார்தல் - நீள்தல்);


4)

நற்றவர்கள் நால்வர்தொழ நான்மறைவி ரித்தான்

நெற்றியில்நெ ருப்புமிழு(ம்) நேத்திரன்நி ருத்தன்

பெற்றமது பேணுமிறை பீடுடைய பேரூர்க்

கொற்றவன்அ டிப்பெருமை கூறவரும் இன்பே.


நற்றவர்கள் நால்வர் தொழ நான்மறை விரித்தான் - சனகாதி முனிவர்கள் நால்வருக்கு நால்வேதப்பொருளை உபதேசித்தவன்;

நெற்றியில் நெருப்பு உமிழும் நேத்திரன் நிருத்தன் - தீயைக் கக்கும் நெற்றிக்கண் உடையவன், கூத்தன்;

பெற்றமது பேணும் இறை - இடபத்தை வாகனமாக விரும்பிம் இறைவன்; (பெற்றம் - எருது; அது - பகுதிப்பொருள்விகுதி); (சம்பந்தர் தேவாரம் - 2.95.2 - "ஏறு பேணிய தேறி");

பீடு உடைய பேரூர்க் கொற்றவன் அடிப்பெருமை கூற வரும் இன்பே - பெருமைமிக்க பேரூரில் உறைகின்ற அரசனான அப்பெருமானது திருவடிப்-புகழைக் கூறினால், இன்பம் வந்து அடையும்;


5)

விண்ணவர்கள் வேண்டமலை வில்லதனை ஏந்தித்

திண்ணரணம் மூன்றையெரி செய்யநகை செய்தான்

பெண்ணையிடம் ஏற்றவிறை பீடுடைய பேரூர்

அண்ணலவன் நற்கழலை நண்ணமகிழ் வாமே.


விண்ணவர்கள் வேண்ட மலை-வில் அதனை ஏந்தித் - தேவர்கள் இறைஞ்ச, அவர்களுக்கு இரங்கி மேருமலையை வில்லாக ஏந்தி;

திண்-அரணம் மூன்றை எரிசெய்ய நகைசெய்தான் - வலிய முப்புரங்களை எரிக்கச் சிரித்தவன்;

பெண்ணை இடம் ஏற்ற இறை - உமையை இடப்பக்கத்தில் பாகமாக ஏற்ற இறைவன்;

பீடு உடைய பேரூர் அண்ணல் அவன் நற்கழலை நண்ண மகிழ்வு ஆமே - பெருமைமிக்க பேரூரில் உறைகின்ற தலைவனான அப்பெருமானது நல்ல திருவடியை அடைந்தால், இன்பம் ஆகும்;


6)

வண்டுமகிழ் கொன்றையணி வார்சடையன் நஞ்சை

உண்டுகறை கொண்டுதிகழ் கண்டனழ கார்ந்த

பெண்திகழு(ம்) மேனியிறை பீடுடைய பேரூர்

அண்டனடி போற்றியவர் பண்டைவினை வீடே.


வண்டு மகிழ் கொன்றை அணி வார்-சடையன் - வண்டுகள் விரும்பும் கொன்றைமலரை நீள்சடையில் அணிந்தவன்;

நஞ்சை உண்டு கறை கொண்டு திகழ் கண்டன் - ஆலகாலத்தை உண்டு கறையை ஏற்று விளங்கும் கண்டத்தை உடையவன்;

அழகு ஆர்ந்த பெண் திகழும் மேனி இறை - அழகிய உமை ஒரு கூறாகத் திகழும் மேனியை உடைய இறைவன்; (பெண்டிகழும் = பெண் + திகழும்);

பீடு உடைய பேரூர் அண்டன் அடி போற்றியவர் பண்டைவினை வீடே - பெருமைமிக்க பேரூரில் உறைகின்ற கடவுளான அப்பெருமானது திருவடியை வழிபட்டவர்களது பழவினைகள் நீங்கும்; (சம்பந்தர் தேவாரம் - 1.54.11 - "ஞானசம்பந்தன்-சொல் விரும்புவார் வினை வீடே"); (வீடுதல் - நீங்குதல்; அழிதல்);


7)

மத்தமலர் ஆர்சடையில் வானதிக ரந்தான்

கத்துகடல் நஞ்சுதனை உண்டமணி கண்டன்

பித்தனெனு(ம்) நாமவிறை பீடுடைய பேரூர்

அத்தனடி போற்றிசெயும் அன்பர்வினை வீடே.


மத்தமலர் ஆர் சடையில் வானதி கரந்தான் - ஊமத்தமலரை அணிந்த சடையில் கங்கையை ஒளித்தவன்; (ஆர்தல் - அணிதல்; பொருந்துதல்);

கத்து-கடல் நஞ்சுதனை உண்ட மணிகண்டன் - ஒலிக்கும் கடலில் தோன்றிய ஆலகாலத்தை உண்ட நீலமணிகண்டன்;

பித்தன் எனும் நாம-இறை - பித்தன் (பேரருளாளன்) என்ற திருநாமத்தை உடைய இறைவன்;

பீடு உடைய பேரூர் அத்தன் அடி போற்றிசெயும் அன்பர் வினை வீடே - பெருமைமிக்க பேரூரில் உறைகின்ற தந்தையான அப்பெருமானது திருவடியை வழிபடும் பக்தர்களது வினைகள் நீங்கும்;


8)

காய்மொழியு ரைத்துமலை பேர்த்தவனு(ம்) நைந்து

வாய்களிசை பாடியழு மாறுவிரல் வைத்தான்

பேய்களிடை ஆடுமிறை பீடுடைய பேரூர்

நாயகனின் நற்கழலை நண்ணநலம் ஆமே.


காய்-மொழி உரைத்து மலை பேர்த்தவனும் நைந்து வாய்கள் இசை பாடி அழுமாறு விரல் வைத்தான் - பல இழிமொழிகள் சொல்லித் திட்டிக் கயிலைமலையைப் பெயர்த்த இராவணனை, அவன் மிக வாடிப் பத்துவாய்களால் அழுது இசைபாடி வணங்கும்படி, ஒரு விரலை அம்மலைமேல் ஊன்றி அவனை நசுக்கியவன்;

பேய்களிடை ஆடும் இறை - பேய்கள் சூழத் திருநடம் செய்யும் இறைவன்;

பீடு உடைய பேரூர் நாயகனின் நற்கழலை நண்ண நலம் ஆமே - பெருமைமிக்க பேரூரில் உறைகின்ற தலைவனான அப்பெருமானது நல்ல திருவடியை அடைந்தால் நன்மை ஆகும்;


9)

அச்சுதனு(ம்) நான்முகனும் அன்றுதொழ நின்றான்

உச்சிமிசை ஒண்பிறையன் ஓர்தலையை ஏந்திப்

பிச்சையிடும் என்னுமிறை பீடுடைய பேரூர்

நச்சரவன் நற்கழலை நண்ணநலம் ஆமே.


அச்சுதனும் நான்முகனும் அன்று தொழ நின்றான் - திருமாலும் பிரமனும் முன்பு (அடிமுடி தேடி) வணங்கும்படி ஜோதியாகி உயர்ந்தவன்;

உச்சிமிசை ஒண்-பிறையன் - ஒளிவீசும் சந்திரனைத் தலைமேல் அணிந்தவன்;

ஓர் தலையை ஏந்திப், "பிச்சை இடும்" என்னும் இறை - ஒரு மண்டையோட்டை ஏந்திவந்து, "பிச்சை இடுங்கள்" என்னும் இறைவன்;

பீடு உடைய பேரூர் நச்சரவன் நற்கழலை நண்ண நலம் ஆமே - பெருமைமிக்க பேரூரில் உறைகின்றவனும் விஷப்பாம்பை அணிந்தவனுமான அப்பெருமானது நல்ல திருவடியை அடைந்தால் நன்மை ஆகும்;


10)

போதனையெ னப்புறனை நாளுமுரை புல்லர்

ஆதரவர் சொல்லைவிடும் ஆலநிழல் அண்ணல்

பேதையிடம் ஏற்றவிறை பீடுடைய பேரூர்

நாதனவன் நற்கழலை நண்ணநலம் ஆமே.


போதனை எனப் புறனை நாளும் உரை- புல்லர் - போதனை என்று நாள்தோறும் பழிமொழிகள் உரைக்கின்ற கீழோர்கள்; (புறன் - புறம் - பழிச்சொல்);

ஆதர்-அவர் சொல்லை விடும் - அந்தக் குருடர்கள் (அறிவிலிகள்) பேசும் பேச்சைப் பொருட்படுத்தாது நீங்குங்கள்;

ஆலநிழல் அண்ணல் - கல்லால-மரத்தின்கீழ் வீற்றிருக்கும் தட்சிணாமூர்த்தி;

பேதை இடம் ஏற்ற இறை - உமாதேவியை இடப்பாகமாக ஏற்ற இறைவன்; (இறை - இறைவன்; கணவன்);

பீடு உடைய பேரூர் நாதன் அவன் நற்கழலை நண்ண நலம் ஆமே - பெருமைமிக்க பேரூரில் உறைகின்ற தலைவனான அப்பெருமானது நல்ல திருவடியை அடைந்தால் நன்மை ஆகும்;


11)

மாணியுயிர் காத்துநமன் மார்பிலுதை காலன்

வேணியிடை வானதியன் வெந்தபொடி தன்னைப்

பேணியணி கின்றவிறை பீடுடைய பேரூர்

ஆணியடி போற்றவினை அற்றுமகிழ் வாமே.


மாணி உயிர் காத்து, நமன் மார்பில் உதை காலன் - மார்க்கண்டேயரது உயிரைக் காத்தருளிக், கூற்றுவனது மார்பில் உதைத்த காலகாலன்;

வேணியிடை வானதியன் - சடையிடைக் கங்கையை உடையவன்; (வேணி - சடை); (வானதி - கங்கை);

வெந்தபொடி-தன்னைப் பேணி அணிகின்ற இறை - சுட்ட திருநீற்றை விரும்பி அணியும் இறைவன்;

பீடு உடைய பேரூர் ஆணி அடி போற்ற வினை அற்று மகிழ்வு ஆமே - பெருமைமிக்க பேரூரில் உறைகின்ற ஆணிப்பொன் போன்ற அப்பெருமானது திருவடியை வழிபட்டால் வினைகள் தீர்ந்து இன்பம் ஆகும்; (ஆணி - பொன்னின் மாற்று அறிதற்கு வைத்திருக்கும் மாற்றுயர்ந்த பொன்); (அப்பர் தேவாரம் - 5.2.4 - "என் ஆணியைச் செம்பொன் அம்பலத்துள் நின்ற தாணுவை");


வி. சுப்பிரமணியன்

----------- --------------


Monday, September 1, 2025

P.447 - இடையாறு - செந்தழலை ஒத்தநிற

2018-08-30

P.447 - இடையாறு

-------------------------------

(சந்தக் கலிவிருத்தம் - தானதன தானதன தானதன தானா) (திருவிராகம் அமைப்பு)

(சம்பந்தர் தேவாரம் - 2.29.1 - திருவிராகம் - "முன்னிய கலைப்பொருளும்")


* (ம்) - புணர்ச்சியில் மகர ஒற்றுக் கெடும் இடம்;


1)

செந்தழலை ஒத்தநிற வேணிதிகழ் செல்வன்

இந்துதனை இண்டையென ஏற்றருளும் ஏந்தல்

இந்திரனு(ம்) மாலயனும் ஈசனென ஏத்தும்

எந்தையிடம் ஈரவயல் சூழுமிடை யாறே.


செந்தழலை ஒத்த நிற வேணி திகழ் செல்வன் - சிவந்த நெருப்புப் போன்ற நிறமுடைய சடையை உடைய செல்வன்; (வேணி - சடை);

இந்துதனை இண்டை என ஏற்று அருளும் ஏந்தல் - திங்களை இண்டைமாலை போலச் சூடிய தலைவன்; (இந்து - சந்திரன்); (இண்டை - தலையில் அணியும் மாலைவகை);

இந்திரனும் மால்-அயனும் ஈசன் என ஏத்தும் - இந்திரன், திருமால், பிரமன் இவர்களால் "ஈசன்" என்று போற்றி வழிபடப்பெறும்;

எந்தை இடம் ஈர-வயல் சூழும் இடையாறே - எம் தந்தையான சிவபெருமான் உறையும் தலம் ஈரம் மிக்க வயல் சூழ்ந்த இடையாறு ஆகும். (ஈரம் - நீர்ப்பற்று; குளிர்ச்சி); (ஈரவயல் - தண்வயல் என்பதனை ஒத்த பிரயோகம்; சம்பந்தர் தேவாரம் - 2.45.11 - "தண்வயல்சூழ் காழி");


2)

வாச(ம்)மலி கொன்றையணி வார்சடையன் நாளும்

நேச(ம்)மிக ஏத்துமவர் நெஞ்சிலுறை தேசன்

நாசமிலி பார்த்தனவன் நாடுபடை ஈந்த

ஈசனிடம் ஈரவயல் சூழுமிடை யாறே.


வாசம் மலி கொன்றை அணி வார்-சடையன் - மணம் மிக்க கொன்றைமலரை நீள்சடையில் அணிந்தவன்; (வார்தல் - நீள்தல்);

நாளும் நேசம் மிக ஏத்தும் அவர் நெஞ்சில் உறை தேசன் - தினமும் அன்போடு துதிப்பவர் நெஞ்சில் உறைகின்ற ஒளிவடிவினன்;

நாசமிலி - அழிவற்றவன்;

பார்த்தனவன் நாடு-படை ஈந்த - அர்ஜுனன் விரும்பிய பாசுபதாஸ்திரத்தை அருளிய; (பார்த்தன் - அர்ஜுனன்; அவன் - பகுதிப்பொருள்விகுதி); (நாடுதல் - விரும்புதல்); (படை - ஆயுதம்);

ஈசன் இடம் ஈர-வயல் சூழும் இடையாறே - சிவபெருமான் உறையும் தலம் ஈரம் மிக்க வயல் சூழ்ந்த இடையாறு ஆகும்.


3)

சாந்தமென நீறுதனை மார்பிலணி தந்தை

சேர்ந்துசுரர் ஏத்தவருள் செய்துபெரு நஞ்சை

மாந்துமணி கண்டனுமை மங்கையொரு கூறாம்

ஏந்தலிடம் ஈரவயல் சூழுமிடை யாறே.


சாந்தம் என நீறுதனை மார்பில் அணி தந்தை - சந்தனம் போலத் திருநீற்றை மார்பில் பூசிய தந்தை; (சாந்தம் - சந்தனம்);

சேர்ந்து சுரர் ஏத்த அருள்செய்து பெரு-நஞ்சை மாந்து மணிகண்டன் - தேவர்களெல்லாம் கூடி இறைஞ்ச, அவர்களுக்கு அருள்செய்து, ஆலகாலத்தை உண்ட நீலமணிகண்டம் உடையவன்; (மாந்துதல் - உண்ணுதல்);

உமை மங்கை ஒரு கூறு ஆம் - திருமேனியில் உமாதேவி இடப்பக்கம் ஒரு பாகம் ஆகிய;

ஏந்தல் இடம் ஈர-வயல் சூழும் இடையாறே - பெருமையுடையவனான சிவபெருமான் உறையும் தலம் ஈரம் மிக்க வயல் சூழ்ந்த இடையாறு ஆகும். (ஏந்தல் - பெருமையிற் சிறந்தோன்; அரசன்);


4)

போற்றுமுனி பொன்றுதினம் என்றுவரு பொல்லாக்

கூற்றையுதை செய்தவிறை கூவிளமும் ஆறும்

சீற்ற(ம்)மலி பாம்புமணி செஞ்சடையன் வெள்ளை

ஏற்றனிடம் ஈரவயல் சூழுமிடை யாறே.


போற்று முனி பொன்று தினம் என்று வரு பொல்லாக் கூற்றை உதைசெய்த இறை - திருவடியைப் போற்றி வணங்கிய மார்க்கண்டேயர் இறக்கும் நாள் என்று வந்த கொடிய கூற்றுவனை உதைத்த இறைவன்; (முனி - முனிவர்); (பொன்றுதல் - சாதல்);

கூவிளமும் ஆறும் சீற்றம் மலி பாம்பும் அணி செஞ்சடையன் - செஞ்சடையில் வில்வம், கங்கை, சினம் மிக்க பாம்பு இவற்றையெல்லாம் அணிந்தவன்; (கூவிளம் - வில்வம்);

வெள்ளை-ஏற்றன் இடம் ஈர-வயல் சூழும் இடையாறே - வெண்ணிற இடபத்தை வாகனமாக உடைய சிவபெருமான் உறையும் தலம் ஈரம் மிக்க வயல் சூழ்ந்த இடையாறு ஆகும். (ஏறு - இடபம்);


5)

பருக்கையுடை வேழமது பற்றியுரி செய்த

திருக்கையினன் ஆரமென நாகமணி தேவன்

இருக்குதனை ஓதியவன் என்றுமக லாதே

இருக்குமிடம் ஈரவயல் சூழுமிடை யாறே.


பருக்-கையுடை வேழம்அது பற்றி உரிசெய்த திருக்-கையினன் - பருத்த துதிக்கையை உடைய யானையைப் பிடித்து அதன் தோலைக் கையால் உரித்தவன்;

ஆரம் என நாகம் அணி தேவன் - பாம்பை மாலையாக அணிகின்ற தேவன்;

இருக்குதனை ஓதியவன் - வேதங்களைப் பாடியருளியவன்; (இருக்கு - ரிக் - வேதம்);

என்றும் அகலாதே இருக்கும் இடம் ஈர-வயல் சூழும் இடையாறே - அச்சிவபெருமான் நீங்காது உறையும் தலம் ஈரம் மிக்க வயல் சூழ்ந்த இடையாறு ஆகும். (அகல்தல் - நீங்குதல்);


6)

கண்திகழு(ம்) நெற்றிகொடு காமனையெ ரித்தான்

பெண்திகழு(ம்) மேனியினன் நாளுமடி பேணித்

தெண்டனிடும் அன்பரிடர் தீர்க்குமிறை திங்கள்

இண்டையனி ருக்குமிடம் ஏர்கொளிடை யாறே.


கண் திகழும் நெற்றிகொடு காமனை எரித்தான் - நெற்றிக்கண்ணால் மன்மதனை எரித்தவன்; (கண்டிகழும் = கண் + திகழும்); (கண் திகழும் நெற்றி = நெற்றிக்கண்);

பெண் திகழும் மேனியினன் - உமை ஒரு பங்கன்; (பெண்டிகழும் = பெண் + திகழும்);

நாளும் அடி பேணித் தெண்டனிடும் அன்பர் இடர் தீர்க்கும் இறை - தினமும் திருவடியைப் போற்றி வணங்கும் பக்தர்களது துன்பத்தைத் தீர்க்கும் இறைவன்;

திங்கள்-இண்டையன் இருக்கும் இடம் ஏர்கொள் இடையாறே - சந்திரனைத் திருமுடிமேல் இண்டைமாலை போல அணிந்த சிவபெருமான் உறையும் தலம் அழகிய இடையாறு ஆகும். (இண்டை - தலையில் அணியும் மாலைவகை); (ஏர் - அழகு);


7)

நீற்றையணி நேயரிடர் நீக்கியருள் நாதன்

தோற்றமிலி அந்தமிலி தூயசடை மீது

நாற்ற(ம்)மலி கொன்றையொடு நச்சரவு திங்கள்

ஏற்றவனி ருக்குமிடம் ஏர்கொளிடை யாறே.


நீற்றை அணி நேயர் இடர் நீக்கி அருள் நாதன் - திருநீற்றைப் பூசி வழிபடும் பக்தர்களது துன்பங்களைத் தீர்த்து அருளும் தலைவன்;

தோற்றமிலி அந்தமிலி - பிறப்பும் இறப்பும் இல்லாதவன்;

தூய சடைமீது நாற்றம் மலி கொன்றையொடு நச்சரவு திங்கள் - தூய சடையின்மேல் மணம் மிக்க கொன்றைமலர், விஷப்பாம்பு, சந்திரன் இவற்றையெல்லாம்;

ஏற்றவன் இருக்கும் இடம் ஏர்கொள் இடையாறே - அணிந்த சிவபெருமான் உறையும் தலம் அழகிய இடையாறு ஆகும். (ஏர் - அழகு);


8)

திருத்தகுபொ ருப்பெறிசெ ருக்கனழ ஊன்றி

நெரித்தினிய கீதமது கேட்டருள்நி ருத்தன்

மருத்திகழும் அம்புதொடு மன்மதனை முன்னம்

எரித்தவனி ருக்குமிடம் ஏர்கொளிடை யாறே.


திருத்தகு பொருப்பு எறி செருக்கன் அழ ஊன்றி நெரித்து - திரு மிக்க அழகிய கயிலைமலையைப் பெயர்த்து எறிய முயன்றவனான செருக்குடைய இராவணனை அவன் அழும்படி ஒரு விரலை ஊன்றி நசுக்கி; (திருத்தகுதல் - பரிசுத்தம் பொருந்துதல்; அழகு தகுதல்); (பொருப்பு - மலை); (செருக்கன் - கர்வம் மிக்கவன்); (நெரித்தல் - நசுக்குதல்);

இனிய கீதம்அது கேட்டு அருள் நிருத்தன் - அவன் இசைபாடக் கேட்டு இரங்கி அருள்புரிந்த கூத்தன்; (நிருத்தன் - கூத்தன்);

மருத் திகழும் அம்பு தொடு மன்மதனை முன்னம் எரித்தவன் - வாசனையுடைய மலர்-அம்புகளைத் தொடுக்கின்ற மன்மதனை முற்காலத்தில் எரித்தவன்; (மரு - வாசனை);

இருக்கும் இடம் ஏர்கொள் இடையாறே - அப்பெருமான் உறையும் தலம் அழகிய இடையாறு ஆகும். (ஏர் - அழகு);


9)

அயன்திருவின் நாயகன கழ்ந்துயர ஏறி

முயன்றிடவ ளர்ந்தவெரி முன்பணியும் அன்பர்

வியன்புவனம் ஆளவருள் நல்குமரன் எல்லாம்

இயன்றவனி ருக்குமிடம் ஏர்கொளிடை யாறே.


அயன் திருவின் நாயகன் அகழ்ந்து உயர ஏறி முயன்றிட வளர்ந்த எரி - பிரமனும் திருமகள் தலைவனான திருமாலும் நிலத்தை அகழ்ந்தும் வானில் பறந்து உயர்ந்தும் தேடும்படி ஓங்கிய ஜோதிவடிவினன்; (அயன்றிருவின் = அயன் + திருவின்); (திருமால் பிரமன் இவர்கள் அடிமுடி தேடியது எதிர்நிரனிறையாக வந்தது);

முன் பணியும் அன்பர் வியன் புவனம் ஆள அருள் நல்கும் அரன் - திருமுன்பு வணங்குகின்ற பக்தர்கள் அகன்ற பெரிய உலகெல்லாம் ஆளும்படி அருள்கின்ற ஹரன்;

எல்லாம் இயன்றவன் - எல்லாம் செய்ய வல்லவன்;

இருக்கும் இடம் ஏர்கொள் இடையாறே - அப்பெருமான் உறையும் தலம் அழகிய இடையாறு ஆகும். (ஏர் - அழகு);


10)

பொய்ம்மொழிகள் நாளுமுரை புல்லருரை பேணேல்

கொய்ம்மலர்கள் இட்டுருகு நெஞ்சர்குறை தீர்ப்பான்

அம்மையொரு பங்கமரும் அத்தனர வார்த்த

எம்மிறையி ருக்குமிடம் ஏர்கொளிடை யாறே.


பொய்ம்மொழிகள் நாளும் உரை புல்லர் உரை பேணேல் - பொய்களையே தினந்தோறும் பேசுகின்ற கீழோர்களது வார்த்தைகளை மதிக்கவேண்டா;

கொய்ம்மலர்கள் இட்டு உருகு நெஞ்சர் குறை தீர்ப்பான் - பறித்த மலர்களைத் தூவி உருகுகின்ற மனம் உடைய அன்பர்களது குறைகளையெல்லாம் தீர்ப்பவன்; (கொய்தல் - பறித்தல்);

அம்மை ஒரு பங்கு அமரும் அத்தன் - உமையம்மையை ஒரு பங்கில் விரும்பும் அப்பன் - அம்மையப்பன்;

அரவு ஆர்த்த எம் இறை - பாம்பை நாணாகக் கட்டிய எம் இறைவன்; (ஆர்த்தல் - கட்டுதல்);

இருக்கும் இடம் ஏர்கொள் இடையாறே - அப்பெருமான் உறையும் தலம் அழகிய இடையாறு ஆகும். (ஏர் - அழகு);


11)

சிற்றிடைம டக்கொடியை வாம(ம்)மகிழ் தேவன்

வெற்றிவிடை மீதுவரு வேந்தனிரு தாளைப்

பற்றியவர் உற்றதுணை மேயபதி பெண்ணை

எற்றுதிரை எய்துகரை ஏர்கொளிடை யாறே.


சிற்றிடை மடக்கொடியை வாமம் மகிழ் தேவன் - சிற்றிடையை உடையவளும் இளங்கொடி போன்றவளுமான உமாதேவியைத் தன் திருமேனியில் இடப்பக்கம் ஒரு பாகமாக விரும்பிய தேவன்; (மகிழ்தல் - விரும்புதல்); (* சிற்றிடை நாயகி - இத்தலத்து இறைவி திருநாமம்);

வெற்றி-விடைமீது வரு வேந்தன் - வெற்றியை உடைய இடபத்தை வாகனமாக உடைய அரசன்;

இரு-தாளைப் பற்றியவர் உற்ற துணை மேய பதி - தன் இரு-திருவடிகளைப் பற்றிய அடியவர்களுக்குச் சிறந்த துணைவன் ஆன சிவபெருமான் விரும்பி உறையும் தலம்; (மேய - மேவிய); (பதி - தலம்);

பெண்ணை எற்று திரை எய்து கரை ஏர்கொள் இடையாறே - பெண்ணையாற்றின் மோதுகின்ற அலைகள் அடைகின்ற கரையில் உள்ள அழகிய இடையாறு ஆகும். (பெண்ணை - பெண்ணையாறு); (எற்றுதல் - மோதுதல்); (திரை - அலை); (ஏர் - அழகு);


வி. சுப்பிரமணியன்

----------- --------------