Showing posts with label நெடுங்களம் (திருநெடுங்களம்). Show all posts
Showing posts with label நெடுங்களம் (திருநெடுங்களம்). Show all posts

Tuesday, March 7, 2023

07.08 – நெடுங்களம்

07.08 – நெடுங்களம்

2015-11-20

திருநெடுங்களம்

-------------------------

(எண்சீர் விருத்தம் - "விளம் விளம் விளம் மா" - அரையடி வாய்பாடு).

(சம்பந்தர் தேவாரம் - 1.76.1 - "மலையினார் பருப்பதந் துருத்திமாற் பேறு")

(சுந்தரர் தேவாரம் - 7.58.1 - "சாதலும் பிறத்தலுந் தவிர்த்தெனை வகுத்துத்")

(திருவாசகம் - திருப்பள்ளியெழுச்சி - 8.20.1 - "போற்றிஎன் வாழ்முத லாகிய பொருளே")


1)

நார்மலி நெஞ்சொடு நற்றமிழ் பாடி

.. நாள்தொறும் தொழுமடி யாரிடர் தீர்ப்பான்

கூர்மலி நுனைதிகழ் மூவிலை வேலன்

.. கொல்புலித் தோலினை அரையினில் வீக்கி

ஏர்மலி கொன்றையந் தாரணி மார்பன்

.. இளமதிச் சடையினன் அடியொடு முடியை

நீர்மிசைத் துயிலரி நான்முகன் நேட

.. நீளெரி ஆயவன் நெடுங்களத் தரனே.


நார்மலி நெஞ்சொடு நற்றமிழ் பாடி நாள்தொறும் தொழும் அடியார் இடர் தீர்ப்பான் - அன்பு நிறைந்த நெஞ்சோடு தேவாரம் முதலிய பாமாலைகளைப் பாடித் தினமும் வணங்கும் பக்தர்களது துன்பத்தைத் தீர்ப்பான்; (நார் - அன்பு); (மலிதல் - மிகுதல்; நிறைதல்);

கூர் மலி நுனை திகழ் மூவிலை வேலன் - கூமையான நுனியையுடைய திரிசூலத்தை ஏந்தியவன்; (நுனை - நுனி; முனை); (மூவிலை வேல் - திரிசூலம்);

கொல்புலித் தோலினை அரையினில் வீக்கி - கொல்லும் புலியின் தோலை அரையில் கட்டியவன்; (வீக்குதல் - கட்டுதல்); (சுந்தரர் தேவாரம் - 7.6.1 - "பாய்பு லித்தோல் அரையில் வீக்கி");

ஏர் மலி கொன்றையந் தார் அணி மார்பன் - அழகிய கொன்றைமாலையை மார்பில் அணிந்தவன்; (ஏர் - அழகு); (தார் - ஒருவகை மாலை);

இளமதிச் சடையினன் - இளம் பிறைச்சந்திரனைச் சடையில் அணிந்தவன்;

அடியொடு முடியை நீர்மிசைத் துயில் அரி நான்முகன் நேட - அடியையும் முடியையும் பாற்கடலில் பள்ளிகொள்ளும் திருமாலும் பிரமனும் தேடும்படி; (நீர் - கடல்; இங்கே பாற்கடலைக் குறித்தது); (சம்பந்தர் தேவாரம் - 1.106.9 - "நீரின் மிசைத்துயின்றோன்"); (நேடுதல் - தேடுதல்);

நீள் எரி ஆயவன் நெடுங்களத்து அரனே - எல்லையின்றி நீண்ட ஜோதி ஆனவன், திருநெடுங்களத்தில் உறையும் ஹரன்; (எரி - தீ; ஜோதி);


2)

தூமலர் பலகொடு மாலைகள் கட்டித்

.. துணையடி போற்றிசெய் தொண்டர்கள் மீண்டும்

பூமியிற் பிறப்படை யாவணம் அருள்வான்

.. புன்சடை யாய்உனை அன்றியொர் புகலிங்

கியாமிலம் என்றடை தேவருக் கிரங்கி

.. அருவிடம் உண்டவன் அடியொடு முடியை

நேமியைத் தரியரி நான்முகன் நேட

.. நீளெரி ஆயவன் நெடுங்களத் தரனே.


தூமலர் பலகொடு மாலைகள் கட்டித் துணையடி போற்றிசெய் தொண்டர்கள் மீண்டும் பூமியில் பிறப்பு அடையாவணம் அருள்வான் - சிறந்த பல பூக்களால் மாலை தொடுத்து இரு திருவடிகளை வழிபடும் பக்தர்கள் இனி மண்ணுலகில் பிறவி அடையாதபடி அருள்செய்வான்;

"புன்சடையாய், உனை அன்றி ஒர் புகல் இங்கு யாம் இலம்" என்று அடை தேவருக்கு இரங்கி அருவிடம் உண்டவன் - "செஞ்சடையானே, உன்னைத் தவிர வேறு புகலிடம் எமக்கு இல்லை" என்று சரணடைந்த தேவர்களுக்கு இரங்கி அரிய நஞ்சை உண்டவன்; (புகலிங்கியாமிலம் - புகல் இங்கு யாம் இலம்; இலக்கணக் குறிப்பு - இங்கு + யாம் - இங்கியாம்; குற்றியலிகரம்);

அடியொடு முடியை நேமியைத் தரி அரி நான்முகன் நேட - அடியையும் முடியையும் சக்கராயுதத்தை ஏந்தும் திருமாலும் பிரமனும் தேடும்படி; (நேமி - சக்கரம்);

நீள் எரி ஆயவன் நெடுங்களத்து அரனே - எல்லையின்றி நீண்ட ஜோதி ஆனவன், திருநெடுங்களத்தில் உறையும் ஹரன்;


3)

கோலநன் மலர்களை அடியிணைச் சாத்திக்

.. கும்பிடும் அன்பருக் கின்னருள் புரிவான்

பாலன நீற்றினை மேனியிற் பூசிப்

.. பணிந்தெழு பாலன தாருயிர் காத்துக்

காலனைக் காய்ந்தவன் கமழ்சடை தன்னிற்

.. கங்கையைக் கரந்தவன் கழலொடு முடியை

நீலநி றத்தரி நான்முகன் நேட

.. நீளெரி ஆயவன் நெடுங்களத் தரனே.


கோல நன் மலர்களை அடியிணைச் சாத்தி - அழகிய சிறந்த பூக்களை இரு திருவடிகளில் இட்டு; (சாத்துதல் - அணிதல்);

பால் அன நீற்றினை மேனியில் பூசி - பால் போன்ற வெண்திருநீற்றை உடலில் பூசிக்கொண்டு;

பணிந்தெழு பாலனது ஆருயிர் காத்துக் காலனைக் காய்ந்தவன் - வணங்கிய மறைச்சிறுவரான மார்க்கண்டேயருடைய அரிய உயிரைக் காத்துக், கூற்றுவனைச் சினந்து உதைத்தவன்;

கமழ்சடை தன்னிற் கங்கையைக் கரந்தவன் - மணம் கமழும் சடையில் கங்கையை ஒளித்தவன்;

நீல நிறத்து அரி - கரிய நிறம் உடைய திருமால்;


4)

சலமலர் தமிழ்கொடு தாளிணை போற்றித்

.. தலைவணங் கடியவர் தமக்கரண் ஆகி

அலமரல் தீர்ப்பவன் அரையினில் நாணா

.. அரவினை ஆர்த்தவன் ஆயிழை கூறன்

வலமலி மால்விடை ஊர்தியின் மீது

.. வருமிறை மலரடி தன்னொடு முடியை

நிலமகழ் மாதவன் நான்முகன் நேட

.. நீளெரி ஆயவன் நெடுங்களத் தரனே.


சலமலர் தமிழ்கொடு தாளிணை போற்றித் - நீர் (சலம்), பூக்கள், தமிழ்ப்பாமாலை இவற்றால் திருவடியை வழிபாடு செய்து; (சலமலர் = நீரில் பூக்கும் மலர்கள் - தாமரை முதலியன என்றும் பொருள்கொள்ளலாம்); (திருநாவுக்கரசர் அப்பர் தேவாரம் - 4.1.6 - "சலம்பூவொடு தூபம் மறந்தறியேன் தமிழோடிசை பாடல் மறந்தறியேன்");

தலைவணங்கு அடியவர் தமக்கு அரண் ஆகி அலமரல் தீர்ப்பவன் - தலையால் வணங்கும் பக்தர்களுக்குப் பாதுகாவல் ஆகி, அவர்கள் துன்பத்தைத் தீர்ப்பவன்; (அலமரல் - கலக்கம்; துக்கம்);

அரையினில் நாணா அரவினை ஆர்த்தவன் - பாம்பை அரைக்கச்சாகக் கட்டியவன்;

ஆயிழை கூறன் - உமைபங்கன்;

வலமலி மால்விடை ஊர்தியின் மீது வரும் இறை - வலிய, வெற்றி மிக்க பெரிய இடப வாகனத்தின்மேல் வரும் இறைவன்; (வலம் - வலிமை; வெற்றி); (மால் - பெரிய);

நிலம் அகழ் மாதவன் - நிலத்தை அகழ்ந்த திருமால்;


5)

கடிமலர் தூவியும் பாடியும் போற்றிக்

.. கரைமனத் தடியவர் வாழ்வினில் என்றும்

மிடியொடு துயரிலை எனும்நிலை ஈவான்

.. விண்ணவர் செய்தஅத் தேர்மிசை ஏறி

நொடியினில் முப்புரம் படநகை செய்தான்

.. நூல்திகழ் மார்பினன் அடியொடு முடியை

நெடியவன் தாமரை மேலயன் நேட

.. நீளெரி ஆயவன் நெடுங்களத் தரனே.


கடிமலர் - வாசம் கமழ் பூக்கள்;

கரைமனத்து அடியவர் - உருகும் மனத்தை உடைய பக்தர்கள்;

மிடி - வறுமை; துன்பம்;

நொடியினில் முப்புரம் பட நகை செய்தான் - முப்புரங்களும் ஒரு நொடிப்பொழுதளவில் அழியும்படி சிரித்தவன்;

நெடியவன் - நெடியோன் - திருமால்;

அயன் - பிரமன்;


6)

மூண்டெழும் அன்பொடு நால்வரின் தமிழால்

.. முக்கணன் இருங்கழல் போற்றிடு பத்தர்

வேண்டிய வரங்களை நல்கிடும் நம்பன்

.. வேதமும் அங்கமும் ஓதிய நாவன்

பாண்டியன் பிரம்படி பட்டவன் எயில்கள்

.. படக்கணை தொட்டவன் வாமனன் ஆகி

நீண்டவன் தாமரை மேலயன் நேட

.. நீளெரி ஆயவன் நெடுங்களத் தரனே.


நால்வர் இன் தமிழால் - சமயக்குரவர் நால்வர் பாடியருளிய இனிய தமிழான தேவாரம், திருவாசகம் இவற்றால்;

இருங்கழல் - பெருமைமிக்க, கழல் அணிந்த திருவடி; (இருமை - பெருமை); (திருவாசகம் - போற்றித் திருவகவல் - 8.4 - அடி 129-130 - "என்னையும் ஒருவ னாக்கி இருங்கழல் சென்னியில் வைத்த சேவக போற்றி");

எயில்கள் படக் கணை தொட்டவன் - முப்புரங்கள் அழிய ஒரு கணையைத் தொடுத்தவன்;


7)

நறத்திகழ் நாண்மலர் தூவிநன் னாமம்

.. நாவினில் தரித்திடும் அடியவர் வினைகள்

அறத்திரு ஆகிட அருள்புரி ஐயன்

.. ஆரழல் போல்திகழ் திருவுடம் பினிலோர்

புறத்தினில் பெண்மையை உடையவன் திங்கள்

.. புற்றர வம்பொலி சடையினன் கரிய

நிறத்தரி தாமரை மேலயன் நேட

.. நீளெரி ஆயவன் நெடுங்களத் தரனே.


நறத் திகழ் நாண்மலர் தூவி நன்னாமம் நாவினில் தரித்திடும் - வாசனை திகழும் புதுமலர்களைத் திருவடியில் தூவித், திருவைந்தெழுத்தை நாக்கில் தரிக்கின்ற; (நற - நறா / நறவு / நறவம் - தேன்; வாசனை); (சுந்தரர் தேவாரம் - 7.97.2 - "நறவிரி கொன்றையினான்");

அடியவர் வினைகள் அறத், திரு ஆகிட அருள்புரி ஐயன் - பக்தர்களுடைய பழவினைகள் நீங்கவும் அவர்களுக்குத் திரு மலியவும் அருளும் தலைவன்;

ஆரழல் போல் திகழ் திருவுடம்பினில் ஓர் புறத்தினில் பெண்மையை உடையவன் - தீப் போல் திகழும் திருமேனியில் ஒரு பக்கம் (இடப்பக்கம்) உமையை உடையவன்; (சம்பந்தர் தேவாரம் - 1.1.5 - "ஒருமை பெண்மையுடையன்");

புற்றரவம் - புற்றில் வாழும் தன்மையுடைய பாம்பு;

கரிய நிறத்து அரி - திருமால்;


8)

அன்றலர் மலர்களை அடியிணைத் தூவும்

.. அடியவர் அருவினை தீர்த்தருள் அண்ணல்

குன்றினைப் பேர்த்தவன் ஐயிரு வாய்கள்

.. கூக்குர லிட்டழ ஒருவிரல் ஊன்றி

மன்றினில் நடம்புரி மன்னவன் முன்னர்

.. மாவலி யிடம்குறள் வடிவொடு சென்று

நின்றவன் தாமரை மேலயன் நேட

.. நீளெரி ஆயவன் நெடுங்களத் தரனே.


அன்று அலர் மலர்களை அடியிணைத் தூவும் - அன்று பூத்த புதுப்பூக்களை இரு திருவடிகளில் தூவுகின்ற;

குன்றினைப் பேர்த்தவன் ஐயிரு வாய்கள் கூக்குரலிட்டு அழ ஒருவிரல் ஊன்றி - கயிலையைப் பெயர்க்க முயன்ற இராவணனது பத்து வாய்களும் கத்தி அழும்படி திருவடி விரல் ஒன்றை ஊன்றியவன்;

மன்றினில் நடம்புரி மன்னவன் - அம்பலத்தில் ஆடும் நடராஜன்;

முன்னர் மாவலியிடம் குறள் வடிவொடு சென்று நின்றவன் - முன்பு மகாபலியிடம் குறுகிய வடிவம் உடைய வாமனனாகிச் சென்று மூவடி மண் யாசித்து நின்ற திருமால்;


9)

பூத்தொடை செந்தமிழ்ப் பாத்தொடை கொண்டு

.. பொன்னடி போற்றிடும் அடியவர் தம்மைக்

காத்தருள் கண்ணுதல் கங்கையைச் சடையிற்

.. கரந்தவன் காமனைக் காய்ந்தவன் மூப்பில்

மூத்தவன் நான்மறைப் பொருள்தனை நாலு

.. முனிவருக் குரைத்தவன் முளரிநி கர்த்த

நேத்திர னோடயன் அடிமுடி நேட

.. நீளெரி ஆயவன் நெடுங்களத் தரனே.


பூத்தொடை செந்தமிழ்ப் பாத்தொடை கொண்டு பொன்னடி போற்றிடும் அடியவர்தம்மைக் காத்தருள் கண்ணுதல் - பூமாலை பாமாலை இவற்றால் பொற்பாதத்தைப் போற்றும் அடியாரைக் காத்து அருளும் நெற்றிக்கண்ணன்; (தொடை - மாலை);

கங்கையைச் சடையில் கரந்தவன் - கங்கையைச் சடையில் ஒளித்தவன்;

காமனைக் காய்ந்தவன் - மன்மதனைக் கோபித்து எரித்தவன்;

மூப்பு இல் மூத்தவன் - என்றும் இளமையோடு இருக்கும் மூத்தவன்;

நான்மறைப் பொருள்தனை நாலு முனிவருக்கு உரைத்தவன் - நால்வேதப் பொருளைச் சனகாதியர் நால்வருக்கு விளக்கியவன் - தட்சிணாமூர்த்தி;

முளரி நிகர்த்த நேத்திரனோடு அயன் - தாமரை போன்ற கண் உடைய திருமாலும் பிரமனும்; (முளரி - தாமரை); (திருவிளையாடற் புராணம் - மதுரைக் காண்டம் - மாணிக்கம் விற்ற படலம் - "முள்ளரை முளரிக் கண்ணன் மோகினி அணங்காய் ஓட");


10)

தத்துவம் ஒன்றறி யாதவர் நாளும்

.. தவமெனப் பொய்தனை உரைத்துழல் புல்லர்

கத்திடும் சொற்களைப் பொருளெனக் கருதேல்

.. கைதொழும் அன்பரைக் காப்பவன் முடிமேல்

மத்தமும் மதியமும் வைத்தவன் நீல

.. மணிமிட றுடையவன் பாம்பணை மீது

நித்திரை செய்யரி நான்முகன் நேட

.. நீளெரி ஆயவன் நெடுங்களத் தரனே.


புல்லர் - கீழோர்;

பொருளெனக் கருதேல் - மதிக்கவேண்டா;

முடிமேல் மத்தமும் மதியமும் வைத்தவன் - திருமுடிமேல் ஊமத்த மலரையும் சந்திரனையும் அணிந்தவன்;

நீலமணி மிடறு உடையவன் - நீலகண்டன்;

பாம்பு அணை மீது நித்திரை செய் அரி நான்முகன் நேட - பாம்பைப் படுக்கையாகக் கொண்டு அதன்மேல் துயிலும் திருமாலும் பிரமனும் தேட;


11)

தூயநன் மலர்பல தொடுத்தடி இட்டுத்

.. தொழுதுளம் உருகிடும் தொண்டர்கள் தமக்குத்

தாயினும் நல்லவன் தாள்பணி மதியைத்

.. தலைமிசைத் தாங்கிய சங்கரன் கையில்

தீயனும் சடையிடைப் புனலனும் ஆனான்

.. சேவடி முடிதனைத் திருமகள் தனக்கு

நேயனும் மலருறை பிரமனும் நேட

.. நீளெரி ஆயவன் நெடுங்களத் தரனே.


தாயினும் நல்லவன் - தாயைவிட நல்லவன்; (சம்பந்தர் தேவாரம் - 3.123.5 – "தாயினும் நல்ல தலைவரென் றடியார் தம்மடி போற்றிசைப்பார்கள்");

கையில் தீயனும் சடையிடைப் புனலனும் ஆனான் - கையில் தீயையும் சடையில் கங்கையையும் தாங்கியவன்; (சம்பந்தர் தேவாரம் - 1.1.7 - "சடைமுயங்கு புனலன் அனலன்");

திருமகள் தனக்கு நேயனும் மலருறை பிரமனும் நேட - லக்ஷ்மிக்கு அன்புடைய திருமாலும் தாமரையில் வீற்றிருக்கும் பிரமனும் தேட; (நேயம் - அன்பு);


வி. சுப்பிரமணியன்


பிற்குறிப்பு :

இப்பதிகம் பாடப்பெற்ற ஆண்டின் (2015-11-25) கார்த்திகைத் தீபத் திருநாளை முன்னிட்டு, எல்லாப் பாடல்களிலும் ஈசனது ஜோதி வடிவம் போற்றப்பெறுகின்றது.

-------------- --------------


Thursday, October 11, 2018

04.55 - நெடுங்களம் - கழல்மகிழ்ந்து வாழ்த்துவார்

04.55 - நெடுங்களம் - கழல்மகிழ்ந்து வாழ்த்துவார்

2014-03-15

நெடுங்களம்

----------------------------------

(சந்தக் கலிவிருத்தம் - தனாதனா தனாதனா தனாதனா தனாதனா)

(தனாதனான தானனா தனாதனான தானனா - என்றும் நோக்கலாம்)

(கணேச பஞ்சரத்ன ஸ்தோத்திரம் - "முதாகராத்த மோதகம்")

(சம்பந்தர் தேவாரம் - 2.98.1 - "வரைத்தலைப் பசும்பொனோடு")


முற்குறிப்புகள் - சந்தம் கருதிச் சில இடங்களில் ஒற்று விரித்தல் விகாரம். படிப்போர் வசதி கருதிச் சந்தி பிரித்துக் காட்டப்பட்டுள்ளது.

*(ம்) - புணர்ச்சியில் மகர ஒற்றுக் கெடும் இடம்;


1)

கழல்மகிழ்ந்து வாழ்த்துவார் களிக்குமாறு நல்குவான்

தழல்விளங்கு கையினான் தரைக்கிறங்கு வான்புனல்

சுழல்விளங்கு வேணியான் துதைந்திலங்கு நீற்றினான்

நிழல்மழுப் படைக்கரன் நெடுங்களத்து நாதனே.


* திருநெடுங்களத்து ஈசன் திருநாமம் - திருநெடுங்களநாதர், நித்திய சுந்தரேஸ்வரர்.

கழல் மகிழ்ந்து வாழ்த்துவார் களிக்குமாறு நல்குவான் - திருவடியை விரும்பித் துதிக்கும் அன்பர்கள் இன்புறும்படி அருள்புரிபவன்;

தழல் விளங்கு கையினான் - கையில் தீயை ஏந்தியவன்;

தரைக்கு இறங்கு வான்புனற்-சுழல் விளங்கு வேணியான் - வானத்திலிருந்து கீழ்நோக்கிப் பாய்ந்த கங்கையின் சுழல்கள் விளங்கும் சடையை உடையவன் - கங்காதரன்; (வேணி - சடை);

துதைந்து இலங்கு நீற்றினான் - மேனிமேல் திருநீற்றை அழுந்தப் பூசியவன்;

நிழல்-மழுப்படைக் கரன் - ஒளிவீசும் மழுவாயுதத்தைக் கையில் ஏந்தியவன்;

நெடுங்களத்து நாதனே - திருநெடுங்களத்தில் உறையும் பெருமான்; (கரன்னெடுங்களத்து - கரன் நெடுங்களத்து - னகர ஒற்று விரித்தல் விகாரம்);


2)

புனைந்ததிங்க ளோடராப் பொருந்துகின்ற சென்னியான்

நனைந்தசெஞ் சடைப்பரன் நடஞ்செயும் பதந்தனைச்

சினந்தவிர்ந்த நெஞ்சராய்த் தினம்பணிந்து போற்றிட

நினைந்தவர்க்கு நன்மையான் நெடுங்களத்து நாதனே.


புனைந்த திங்களோடு அராப் பொருந்துகின்ற சென்னியான் - திருமுடிமேல் சந்திரனையும் பாம்பையும் அணிந்தவன்; (அரா - பாம்பு);

நனைந்த செஞ்சடைப் பரன் - கங்கையைச் சடையில் உடைய பரமன்;

நடம் செயும் பதந்தனைச் சினம் தவிர்ந்த நெஞ்சராய்த் தினம் பணிந்து போற்றிட நினைந்தவர்க்கு நன்மையான் - கூத்தாடும் திருவடியைச் சினம் முதலிய குற்றங்கள் நீங்கிய மனத்தோடு தினமும் மறவாமல் வழிபடும் பக்தர்களுக்கு நன்மை செய்பவன்; (பரன்னடஞ்செயும் - பரன் நடஞ்செயும் - னகர ஒற்று விரித்தல் விகாரம்);

நெடுங்களத்து நாதனே - திருநெடுங்களத்தில் உறையும் பெருமான்;


3)

உறங்குகின்ற போதிலும் உறங்கிடாத போதிலும்

மறந்திடாது வாழ்த்தினால் மறைப்பிலாது நல்குவான்

பிறங்குதிங்கள் ஏற்றவன் பிறப்பிறப்பி லாதவன்

நிறங்களைந்தும் ஆயினான் நெடுங்களத்து நாதனே.


உறங்குகின்ற போதிலும் உறங்கிடாத போதிலும் மறந்திடாது வாழ்த்தினால் மறைப்பு இலாது நல்குவான் - இரவும் பகலும் நினைந்து வழிபடும் பக்தர்களுக்கு அருளை வாரி வழங்குபவன்; (மறைப்பு - ஒளித்தல்); (சம்பந்தர் தேவாரம் - 3.22.1 - "துஞ்சலும் துஞ்சலிலாத போழ்தினும் நெஞ்சகம் நைந்து நினைமின் நாள்தொறும்"); (போதிலும்முறங்கிடாத - போதிலும் உறங்கிடாத - மகர ஒற்று விரித்தல் விகாரம்);

பிறங்கு-திங்கள் ஏற்றவன் - ஒளிவீசும் சந்திரனைச் சூடியவன்; (பிறங்குதல் - விளங்குதல்);

பிறப்பு இறப்பு இலாதவன் - பிறத்தலும் சாதலும் இல்லாதவன்;

நிறங்கள் ஐந்தும் ஆயினான் - ஐந்து நிறங்கள் உடையவன்; (திருவாசகம் - சிவபுராணம் - அடி 49-50 "நிறங்களோர் ஐந்துடையாய்");


4)

விருப்பிலான் வெறுப்பிலான் விரும்புவார்க் கருத்தியான்

பருப்பதத்தில் உள்ளவன் பதங்கடந்து நிற்பவன்

பொருப்புவில்ல தேந்தினான் புரந்தகிக்க நக்கவன்

நெருப்பிருக்கு(ம்) நெற்றியான் நெடுங்களத்து நாதனே.


விருப்பிலான் வெறுப்பிலான் - விருப்பு வெறுப்பு இவை இல்லாதவன்;

விரும்புவார்க்கு அருத்தியான் - அன்பருக்கு அன்பன்; (அருத்தி - அன்பு);

பருப்பதத்தில் உள்ளவன் - கயிலைமலையான்; ஸ்ரீசைலத்தில் உள்ளவன்; (பருப்பதம் - மலை - இங்கே கயிலைமலை; திருப்பருப்பதம் (ஸ்ரீசைலம்) என்றும் கொள்ளலாம்);

பதம் கடந்து நிற்பவன் - வாக்கிற்கு எட்டாதவன்; (பதம் - மொழி; சொல்; அளவை); (திருவாசகம் - திருவண்டப் பகுதி - அடி 111 - "சொற்பதங் கடந்த தொல்லோன்");

பொருப்பு வில்-அது ஏந்தினான் - மேருமலையை வில்லாக ஏந்தியவன்;

புரம் தகிக்க நக்கவன் - முப்புரங்களை எரிக்கச் சிரித்தவன்; (தகித்தல் - எரித்தல்);

நெருப்பு இருக்கும் நெற்றியான் - நெற்றிக்கண்ணன்;


5)

பகைத்தெதிர்ந்த மும்மதப் பகட்டினைச் செகுத்தவன்

மிகைத்ததக்க னார்சிரம் தடிந்தவன் வியன்புரம்

நகைத்தழித்த பெற்றியான் நலங்கிளர்ந்த செஞ்சுடர்

நிகர்த்திலங்கு மேனியான் நெடுங்களத்து நாதனே.


பகைத்து எதிர்ந்த மும்மதப் பகட்டினைச் செகுத்தவன் - எதிர்த்துப் போர்செய்த ஆண்யானையைக் கொன்றவன்; (பகடு - ஆண் யானை); (செகுத்தல் - கொல்லுதல்);

மிகைத்த தக்கனார் சிரம் தடிந்தவன் - ஆணவத்தோடு அவவேள்விசெய்த தக்கனது தலையை வெட்டியவன்; (மிகைத்தல் - செருக்குறுதல்); (தக்கனார் - தக்கன்; ஆர் - இழித்தற்பொருளில் வந்தது); (தடிதல் - வெட்டுதல்);

வியன்-புரம் நகைத்து அழித்த பெற்றியான் - பெரிய முப்புரங்களைச் சிரித்து எரித்த பெருமை உடையவன்; (வியன் - பெரிய); (அப்பர் தேவாரம் - 6.5.1 - "வில்லால் வியனரணம் எய்தாய் போற்றி"); (நகைத்தல் - சிரித்தல்); (பெற்றி - பெருமை; இயல்பு);

நலம் கிளர்ந்த செஞ்சுடர் நிகர்த்து இலங்கு மேனியான் - அழகு மிக்க செந்தீப் போல் செம்மேனியன்; (நலம் - நன்மை; அழகு); (கிளர்தல் - மிகுதல்; சிறத்தல்; ஓங்குதல்);


6)

மருந்துவேண்டு வானவர் வழுத்தநஞ்சம் உண்டவன்

அருந்தவம் புரிந்தவர்க் கறங்களோதும் ஆரியன்

பொருந்திநின்று சந்ததம் புகழ்ந்திடும் தொழும்பரை

நெருங்கிநின்று காப்பவன் நெடுங்களத்து நாதனே.


மருந்து வேண்டு வானவர் வழுத்த நஞ்சம் உண்டவன் - அமுதினை விரும்பிய தேவர்கள் வணங்க, அவர்களுக்கு இரங்கி ஆலகால விஷத்தை உண்டவன்; (மருந்து - அமுதம்); (வழுத்துதல் - துதித்தல்); (நஞ்சம் - விஷம்);

அருந்தவம் புரிந்தவர்க்கு அறங்கள் ஓதும் ஆரியன் - அரிய தவமுடைய சங்காதியர்களுக்கு வேதப்பொருளை உபதேசித்த குரு; (ஆரியன் - ஆசாரியன்);

பொருந்திநின்று சந்ததம் புகழ்ந்திடும் தொழும்பரை நெருங்கிநின்று காப்பவன் - மனம் ஒன்றி எப்பொழுதும் துதிக்கும் பக்தர்களை அருகிருந்து காத்தருள்பவன்; (சந்ததம் - எப்பொழுதும்); (தொழும்பர் - அடியவர்);


7)

மறைந்துவாளி எய்தவல் மதன்தனைப் பொடித்தவன்

குறைந்ததிங்கள் ஏத்தவே குளிர்ந்துகுஞ்சி வைத்தவன்

நிறந்திகழ் மிடற்றினான் நிலத்திலும் விசும்பிலும்

நிறைந்திலங்கு பெற்றியான் நெடுங்களத்து நாதனே.


மறைந்து வாளி எய்த வல்-மதன்தனைப் பொடித்தவன் - ஒளித்திருந்து அம்பை எய்த வலிய மன்மதனைச் சாம்பலாக்கியவன்; (மறைந்து - "மறைத்து" என்றது எதுகைநோக்கி மெலித்தல் விகாரம்); (வாளி - அம்பு); (சம்பந்தர் தேவாரம் - 3.22.5 - "கொங்கலர் வன்மதன் வாளி ஐந்தகத்து");

குறைந்த திங்கள் ஏத்தவே குளிர்ந்து குஞ்சி வைத்தவன் - தேய்ந்து அழியவிருந்த சந்திரன் வணங்கவும், இரங்கித் தன் தலைமேல் அணிந்து அதனைக் காத்தவன்; (குளிர்தல் - கருணையால் முகங்கனிதல்); (குஞ்சி - தலை);

நிறம் திகழ் மிடற்றினான் - கரிய நிறம் திகழும் கண்டத்தன்; (கருமை என்பது குறிப்பால் பெறப்பட்டது);

நிலத்திலும் விசும்பிலும் நிறைந்து இலங்கு பெற்றியான் - மண்ணிலும் விண்ணிலும் எங்கும் வியாபித்து இருப்பவன்; (விசும்பு - ஆகாயம்); (பெற்றி - தன்மை);


8)

தரித்தவன் சலத்தினைத் தலைச்சரம் புனைந்தவன்

எரித்தவன் திரிந்தமூ வெயில்களைக் கணத்தினில்

சிரித்துவா ளரக்கனார் சிரங்களஞ்சொ டஞ்சையும்

நெரித்துவாள் அளித்தவன் நெடுங்களத்து நாதனே.


தரித்தவன் சலத்தினைத் - கங்காதரன்; (சலம் - ஜலம்);

தலைச்சரம் புனைந்தவன் - தலைமாலை அணிந்தவன்; (சரம் - மாலை); (முதலடியில் "தலை" என்ற சொல், "தரித்தவன் சலத்தினைத் தலை", "தலைச்சரம் புனைந்தவன்" என்று இருபக்கமும் இடைநிலைத் தீவகமாகி இயையும்);

எரித்தவன் திரிந்த மூவெயில்களைக் கணத்தினில், சிரித்து - திரிந்த முப்புரங்களைத் தன் சிரிப்பினால் நொடியளவில் எரித்தவன்; (எயில் - மதில்); (கணம் - க்ஷணம்);

சிரித்து, வாள்-அரக்கனார் சிரங்கள் அஞ்சொடு அஞ்சையும் நெரித்து வாள் அளித்தவன் - (இராவணன் கயிலைமலையைப் பெயர்த்தபொழுது) சிரித்துக், கொடிய அரக்கனான அவன் தலைகள் பத்தையும் நசுக்கிப், பின் (அவன் பாடிய இசையைக் கேட்டு இரங்கி அவனுக்குச் சந்திரஹாஸம் என்ற) வாளைத் தந்தருளியவன்; (அரக்கனார் - ஆர் என்றது இழிவு குறித்து); ("சிரித்து" என்ற சொல் இடைநிலைத் தீவகமாக இருபக்கமும் சேர்த்துப் பொருள்கொள்ள நின்றது); (அப்பர் தேவாரம் - 4.80.10 - "மலைமகள் கோன்சிரித்து அரக்கன் மணிமுடி பத்தும் ... நெருக்கி மிதித்த விரல்");

நெடுங்களத்து நாதனே - திருநெடுங்களத்தில் உறையும் சிவபெருமான்.


9)

அலம்புமாழி வண்ணனும் மலர்ந்தபோதின் அண்ணலும்

புலம்புமா றுயர்ந்தவன் புறத்தகத் திருப்பவன்

சலம்புகுந்த வேணியன் சலந்தரற் றடிந்தவன்

நிலம்பணிந்து போற்றிசெய் நெடுங்களத்து நாதனே.


அலம்பும் ஆழி வண்ணனும் அலர்ந்த போதின் அண்ணலும் புலம்புமாறு உயர்ந்தவன் - ஒலிக்கின்ற கடலின் நிறத்தை உடைய திருமாலும் மலர்ந்த தாமரைமேல் இருக்கும் பிரமனும் அடிமுடி தேடி வருந்துமாறு ஓங்கியவன்; (அலம்புதல் - ஒலித்தல்); (ஆழி - கடல்); (போது - பூ - தாமரைப்பூ); (புலம்புதல் - வாடுதல்; வருந்துதல்; அடிக்கடி கூறுதல்); (வண்ணனும்மலர்ந்த - வண்ணனும் அலர்ந்த - மகர ஒற்று விரித்தல் விகாரம்);

புறத்து அகத்து இருப்பவன் - வெளியிலும் உள்ளும் இருப்பவன்; (உம்மைத்தொகை);

சலம் புகுந்த வேணியன் - சடையில் ஜலத்தை (கங்கையை) உடையவன்;

சலந்தரற் றடிந்தவன் - சலந்தரனைத் தடிந்தவன் - சலந்தராசுரனை அழித்தவன்; (உயர்திணைப் பெயர்கள் வரும் இடத்தில் இரண்டாம் வேற்றுமைத்தொகையில் னகர ஒற்று றகர ஒற்றாகத் திரியும்);

நிலம் பணிந்து போற்றிசெய் நெடுங்களத்து நாதனே - உலகோர் வழிபடும் ஈசன், திருநெடுங்களத்தில் உறைகின்ற சிவபெருமான்;


10)

பொலாததே புகன்றிடும் புரட்டரும் பிரட்டரும்

இலார்நலங்கள் ஏத்துவீர் இரங்குவான் உருத்திரன்

நலார்கள்நால்வ ருக்கறம் விரித்தவேத நாயகன்

நிலாவணிந்த உச்சியான் நெடுங்களத்து நாதனே.


பொலாததே புகன்றிடும் புரட்டரும் பிரட்டரும் இலார் நலங்கள் - பொல்லாதவற்றையே பேசுகின்ற வஞ்சகர்களும் நெறிக்குப் புறம்பானவர்களும் நன்மை இல்லாதவர்கள்; (பொலாததே, இலார், நலார்கள் - பொல்லாததே, இல்லார், நல்லார்கள் - இடைக்குறை விகாரம்); (புரட்டர் - பொய்யர்கள்; வஞ்சகர்கள்); (பிரட்டர் - பிரஷ்டர் - நெறிக்குப் புறம்பானவர்கள்); (நலம் - நல்ல குணம்; உயர்வு; அன்பு; இன்பம்);

ஏத்துவீர் இரங்குவான் உருத்திரன் - நீங்கள் உருத்திரமூர்த்தியான சிவபெருமானைத் துதியுங்கள்; அப்பெருமான் இரங்கி அருள்வான்; (அப்பர் தேவாரம் - 4.11.6 - "சலமிலன் சங்கரன் சார்ந்தவர்க்கலால் நலமிலன்");

நலார்கள் நால்வருக்கு அறம் விரித்த வேதநாயகன் - முனிவர்கள் நால்வருக்கு மறைப்பொருளை உபதேசித்தவனும் வேதங்களுக்குத் தலைவனுமான தட்சிணாமூர்த்தி; (நலார்கணால்வர் - நலார்கள் நால்வர்);

நிலா அணிந்த உச்சியான் - சந்திரசேகரன்;

நெடுங்களத்து நாதனே - திருநெடுங்களத்தில் உறைகின்ற சிவபெருமான்;


11)

கரந்தவன் திரைப்புனல் சிரத்திலூண் இரந்தவன்

கரந்தொழும் தொழும்பரின் கருத்தறிந்து வேண்டிய

வரந்தரும் பரம்பரன் மடக்கொடிக் கிடந்தரும்

நிரந்தரன் சுதந்திரன் நெடுங்களத்து நாதனே.


கரந்தவன் திரைப்புனல் - அலைமிக்க கங்கையைச் சடையில் ஒளித்தவன்; (கரத்தல் - ஒளித்தல்; மறைத்தல்);

சிரத்தில் ஊண் இரந்தவன் - பிரமனது மண்டையோட்டில் பிச்சை ஏற்பவன்; (ஊண் - உணவு);

கரம் தொழும் தொழும்பரின் கருத்து அறிந்து வேண்டிய வரம் தரும் பரம்பரன் - கைதொழும் அடியவர்களது எண்ணத்தை அறிந்து அவர்கள் விரும்பிய வரங்களையெல்லாம் தருகின்ற மேலானவன்; (தொழும்பர் - அடியவர்);

மடக்கொடிக்கு இடம் தரும் - இளங்கொடி போன்ற உமைக்கு இடப்பாகத்தைத் தருகின்ற;

நிரந்தரன் சுதந்திரன் - அழிவற்றவன், தனக்கு ஒரு தலைவன் இல்லாதவன்; (அப்பர் தேவாரம் - 6.98.1 - "தாம் ஆர்க்கும் குடி அல்லாத் தன்மையான சங்கரன்");

நெடுங்களத்து நாதனே - திருநெடுங்களத்தில் உறைகின்ற சிவபெருமான்;


பிற்குறிப்பு: யாப்புக் குறிப்பு:

சந்தக் கலிவிருத்தம் - தனாதனா தனாதனா தனாதனா தனாதனா.

இச்சந்தத்தைத் - தனாதனான தானனா தனாதனான தானனா - என்றும் நோக்கலாம்.

"லகு-குரு" என்ற அமைப்பு அடிகள்தோறும் 8 முறை வரும்.

குரு = நெடில் / நெடில்+ஒற்று / குறில்+ஒற்று.

லகு = குறில் (ஒற்றுத் தொடராதபோது).

அடி ஈற்றில் வரும் லகுவும் குருவாகக் கருதப்படும்.

இச்சந்தத்தை வடமொழியில் "பஞ்சசாமரம்" (pañcacāmaram - पञ्चचामरम्) என்பர்;

உதாரணம் - கணேச பஞ்சரத்ன ஸ்தோத்திரம் - "முதாகராத்த மோதகம் ஸதா விமுக்தி ஸாதகம்";


சம்பந்தர் தேவாரம் - 2.98.1 - "வரைத்தலைப் பசும்பொனோ டருங்கலன் களுந்திவந்(து)"


(தேவாரத்தில் 4 விளச்சீர்கள் வரும் வேறு பதிகங்களும் உள்ளன. ஆனால் அவை இச்சந்தத்தினின்று சற்றே வேறுபடுவன. உதாரணம்: சம்பந்தர் தேவாரம் - 3.25.1 - "மருந்துவேண் டில்இவை மந்திரங் கள்இவை")


வி. சுப்பிரமணியன்

------------ ------------------

Saturday, September 15, 2018

04.41 - நெடுங்களம் - பூமிடை மாலையோடு

04.41 - நெடுங்களம் - பூமிடை மாலையோடு

2014-01-07

திருநெடுங்களம்

----------------------------------

(அறுசீர் விருத்தம் - விளம் மா தேமா - அரையடி வாய்பாடு). (திருநேரிசை அமைப்பு)

(அப்பர் தேவாரம் - திருநேரிசை - 4.66.1 - "கச்சைசேர் அரவர் போலும்")


1)

பூமிடை மாலை யோடு பொன்னடி போற்று வார்கள்

பூமிமீ ளாத வாறு புரிந்தருள் செய்பு ராணர்

தே(ம்)மிகு மலர்போல் கண்ணைத் திருவடி இட்ட மாற்கு

நேமிவான் படைய ளித்தார் நெடுங்கள நாத னாரே.


பூ மிடை மாலையோடு பொன்னடி போற்றுவார்கள் பூமி மீளாதவாறு புரிந்து அருள்செய் புராணர் - ; பூக்கள் செறிந்த மாலைகளால் பொற்பாதத்தை வழிபடும் பக்தர்கள் மீண்டும் மண்ணுலகில் பிறவி அடையாதபடி விரும்பி அருளும் தொன்மையானவர்; (மிடைதல் - செறிதல்; நிறைதல்); (புராணன் - பழையோன்); (அப்பர் தேவாரம் - 6.57.2 - "என்றும் மீளா அருள் செய்வாய் போற்றி");

தே(ம்)மிகு மலர்போல் கண்ணைத் திருவடி இட்ட மாற்கு நேமி வான்-படை அளித்தார் நெடுங்கள நாதனாரே - தேன் நிறைந்த தாமரைமலர் போலக் கண்ணைத் தோண்டித் திருவடியில் தூவி வணங்கிய திருமாலுக்குச் சக்கராயுதத்தை அளித்தவர் திருநெடுங்களத்தில் உறையும் நாதர்; (தேம் - தேன்); (மாற்கு - திருமாலுக்கு); (நேமி - சக்கரம்); (* திருமாலுக்குச் சக்கரம் அருளியது - திருவீழிமிழலைத் தலவரலாறு);


2)

கனைகடல் வாயெ ழுந்த கடுவிடம் உண்ட கண்டர்

சுனையெனக் கங்கை தன்னைச் சுடர்ச்சடை வைத்தார் கூரார்

நுனையிலை வேலர் மார்பில் நூலினர் நாளும் போற்றி

நினைபவர் இடர்கள் நீக்கும் நெடுங்கள நாத னாரே.


கனைகடல்வாய் எழுந்த கடுவிடம் உண்ட கண்டர் - ஒலிக்கின்ற கடலில் தோன்றிய கொடிய நஞ்சை உண்ட நீலகண்டர்;

சுனையெனக் கங்கைதன்னைச் சுடர்ச்சடை வைத்தார் - சுனையைப் போலக் கங்கையை ஒளி பொருந்திய சடையில் தேக்கிவைத்தவர்; (சுனை - நீர்நிலை);

கூர் ஆர் நுனை இலை வேலர் - கூர்மையுடைய, இலை போன்ற நுனியை உடைய சூலத்தை ஏந்தியவர்;

மார்பில் நூலினர் - மார்பில் பூணூல் அணிந்தவர்;


3)

எருதமர் இறைவர் தாளை ஏத்திடும் அன்பர்க் கெல்லாம்

தருபவர் தலையொன் றேந்தித் தையலார் இடுப லிக்கு

வருபவர் மங்கை பங்கர் வார்த்தையிற் சொல்ல ஒண்ணா

நிருபமர் நீல கண்டர் நெடுங்கள நாத னாரே.


தாளை ஏத்திடும் அன்பர்க்கு எல்லாம் தருபவர் - பக்தர்களுக்கு அவர்கள் வேண்டிய வரங்களையெல்லாம் அளிப்பவர்;

தலை ஒன்று ஏந்தித் தையலார் இடு பலிக்கு வருபவர் - பிரமன் மண்டையோட்டைக் கையில் ஏந்திப் பெண்கள் இடும் பிச்சை ஏற்பதற்கு வருபவர்;

நிருபமர் - உவமை அற்றவர்; ஒப்பில்லாதவர்; (சம்பந்தர் தேவாரம் - 1.124.2 - "நிருபமன் மிழலையை நினைய வலவரே");


4)

சீரணி தமிழைப் பாடிச் சேவடி போற்றில் காப்பார்

வாரணி முலையாள் பங்கர் வானவர் வாழ்வ தற்காக்

காரணி கண்டர் நாகக் கச்சினர் கொன்றை யோடு

நீரணி சடையர் எங்கள் நெடுங்கள நாத னாரே.


சீர் - புகழ்; அணிதல் - பூணுதல்; சூடுதல்; பொருந்துதல்; போற்றில் - போற்றினால்; வாழ்வதற்கா - வாழ்வதற்காக; கார் அணி கண்டர் - கருமையை அணியும் கண்டத்தை உடையவர்; நாகக் கச்சினர் - பாம்பை அரையில் கச்சாகக் கட்டியவர்; நீர் - கங்கை;


5)

பாரிடஞ் சூழ ஆடும் பதவிணை போற்று வாரைப்

பேரிடர் சூழா வண்ணம் பெருந்துணை யாகிக் காப்பார்

காரிழை காட்டு கண்டர் காலனைக் காய்ந்த காலர்

நேரிழை பங்கர் எங்கள் நெடுங்கள நாத னாரே.


பாரிடம் - பூதகணங்கள்; பத இணை - இரு திருவடிகள்; கார் இழை காட்டு கண்டர் - கரிய மணியைக் காட்டும் கண்டத்தை உடையவர் - நீலகண்டர்; (இழை - ஆபரணம்); காலனைக் காய்ந்த காலர் - இயமனைக் காலால் உதைத்தவர்; காலனுக்குக் காலன் ஆனவர்; (காய்தல் - அழித்தல்; கோபித்தல்); (அப்பர் தேவாரம் - 4.71.6 - "காலற் காய்ந்த காலனை"); நேரிழை பங்கர் - உமையை ஒரு பங்கில் உடையவர்; (நேரிழை - பெண்);


6)

சுற்றிவந் தேத்தும் அன்பர் துயரினைத் துடைக்கும் பண்பர்

வற்றிய தலையொன் றேந்தி வாயிலில் பலிக்கு நிற்கும்

பெற்றியர் பெண்ணர் ஆணர் பெருவிடம் உண்ட பித்தர்

நெற்றியில் கண்ணர் எங்கள் நெடுங்கள நாத னாரே.


வற்றிய தலை - உலர்ந்த தலை; (அப்பர் தேவாரம் - 6.77.1 "வாடல் தலையொன்று கையிற் கண்டேன்"); பெற்றி - இயல்பு; பெருமை; பெண்ணர் - பெண்ணாய் இருப்பவர்; ஆணர் - ஆணாய் இருப்பவர்; (அப்பர் தேவாரம் - 6.17.3 - "ஆணர் பெண்ணர்");


7)

நிலமிசை வீழ்ந்தும் நின்றும் நீள்கழல் போற்று வார்க்கு

மலைவினை நீக்கி நன்மை மல்கிட அருள்வார் மேருச்

சிலையினை வில்லா ஏந்தித் திரிபுரம் செற்று கந்தார்

நிலவணி சடையர் எங்கள் நெடுங்கள நாத னாரே.


மலைவினை நீக்கி - மலையளவு உள்ள பழவினைகளைத் தீர்த்து; "மயக்கத்தைப் போக்கி" என்றும் பொருள்கொள்ளல் ஆம்; (மலைவு - மயக்கம்); மல்குதல் - பெருகுதல்; செழித்தல்; மேருச் சிலையினை வில்லா ஏந்தித் திரிபுரம் செற்று உகந்தார் - மேருமலையை வில்லாக ஏந்தி முப்புரங்களை அழித்தவர்; (சிலை - மலை); (செறுதல் - அழித்தல்);


8)

தரித்தவர் நெற்றிக் கண்ணைத்; தகர்த்தவர் தக்கன் வேள்வி;

உரித்தவர் மதவே ழத்தை; ஒன்னலர் முப்பு ரத்தை

எரித்தருள் வில்லர்; வெற்பை இடந்தவி லங்கைக் கோனை

நெரித்தருள் விரலர்; எங்கள் நெடுங்கள நாத னாரே.


தரித்தவர் நெற்றிக் கண்ணைத் - நெற்றிக்கண் உடையவர்;

தகர்த்தவர் தக்கன் வேள்வி - தக்கன் செய்த வேள்வியை அழித்தவர்;

உரித்தவர் மதவேழத்தை - மதயானையின் தோலை உரித்தவர்;

ஒன்னலர் முப்புரத்தை எரித்தருள் வில்லர் - பகைவர்களது முப்புரங்களை வில்லை ஏந்தி எரித்தவர்; (ஒன்னலர் - பகைவர்);

வெற்பை இடந்த இலங்கைக்கோனை நெரித்து-அருள் விரலர் - கயிலைமலையைப் பேர்த்த இராவணனை நசுக்கிய விரலை உடையவர்; (சம்பந்தர் தேவாரம் - 2.20.9 - "மலையை அரக்கன் தணியா தெடுத்தான் உடலம் நெரித்த அணியார் விரலாய்");


9)

கூடிய வாறு போற்றில் குறைகளைத் தீர்ப்பார் திங்கள்

சூடிய முடியர் பூதம் சூழ்ந்திசை பாடக் கானில்

ஆடிய கழலர் பூமேல் அண்ணலும் அரியும் எங்கும்

நேடிய சோதி எங்கள் நெடுங்கள நாத னாரே.


கூடியவாறு - இயன்ற வகையில்; (கூடுதல் - இயலுதல்); கானில் ஆடிய கழலர் - சுடுகாட்டில் திருநடம் செய்யும் திருப்பாதர்; பூமேல் அண்ணலும் அரியும் எங்கும் நேடிய சோதி - பிரமனும் திருமாலும் மேலும் கீழும் தேடிய சோதி ஆனவர்; (நேடுதல் - தேடுதல்);


10)

நாத்திகர் பேச்சும், பண்டை நான்மறை நெறியைத் தூற்றிப்

பேத்திடும் பிட்டர் சொல்லும் பேணிடேல்; அன்பர் தம்மைக்

காத்திடர் களைவார், அம்பெய் காமனை நீறு செய்த

நேத்திரம் காட்டு நெற்றி நெடுங்கள நாத னாரே.


பேத்திடும் - பிதற்றிடும் என்பது பேத்திடும் என்று மருவி வந்தது; (பேத்துதல் - பிதற்றுதல்); பிட்டர் - பிரட்டர்கள் - மதத்துக்குப் புறம்பானவர்; நெறியினின்று வழுவினவர்கள்; அம்பு எய் காமனை நீறு செய்த - மலர்க்கணை எய்த மன்மதனைச் சாம்பலாக்கிய; நேத்திரம் காட்டு நெற்றி நெடுங்கள நாதனார் - நெற்றிக்கண்ணரான நெடுங்களப் பெருமானார்;


11)

ஆயிரந் திருநா மத்தார் ஆதிரை நாளர் ஊர்கள்

போயிரந் துண்பார் சாம்பற் பூச்சினர் புலியின் தோலர்

வாயருந் தமிழ்கள் பாட மனத்தினால் மறவா தேத்தும்

நேயருக் கன்பர் எங்கள் நெடுங்கள நாத னாரே.


ஆயிரம் திருநாமத்தார் - ஆயிரம் திருப்பெயர்கள் உடையவர்;

ஆதிரை நாளர் - திருவாதிரை என்னும் நட்சத்திரத்திற்கு உரியவர்; (அப்பர் தேவாரம் - 4.32.5 - "ஆதிரை நாளர் போலும்");

ஊர்கள் போய் இரந்து உண்பார் - பல ஊர்களில் பிச்சையெடுப்பவர்;

சாம்பற்-பூச்சினர் - திருநீற்றைப் பூசியவர்;

புலியின் தோலர் - புலித்தோலை ஆடையாக அணிந்தவர்;

வாய் அருந்-தமிழ்கள் பாட, மனத்தினால் மறவாது ஏத்தும் நேயருக்கு அன்பர் - அரிய தமிழான தேவாரம் திருவாசகம் இவற்றை வாயால் பாடி மனத்தினால் மறவாமல் போற்றும் பக்தர்களுக்கு அன்பு உடையவர்;


வி. சுப்பிரமணியன்

----------- --------------