Showing posts with label அகத்தியான்பள்ளி. Show all posts
Showing posts with label அகத்தியான்பள்ளி. Show all posts

Thursday, May 9, 2024

07.42 - அகத்தியான்பள்ளி - தலைவநின் மென்மலர்த்

07.42 - அகத்தியான்பள்ளி - தலைவநின் மென்மலர்த்


2016-05-09

07.42 - அகத்தியான்பள்ளி

------------------

(கலிவிருத்தம் - விளம் விளம் விளம் விளம் - வாய்பாடு)

(சம்பந்தர் தேவாரம் - 3.36.1 - "சந்தமா ரகிலொடு சாதிதேக் கம்மரம்")

(சுந்தரர் தேவாரம் - 7.37.2 - "பறக்குமெங் கிள்ளைகாள் பாடுமெம் பூவைகாள்")


1)

தலைவநின் மென்மலர்த் தாளிணை போற்றினேன்

மலையன வல்வினை மாய்த்தருள் நல்கிடாய்

அலைகடல் அதனயல் அகத்தியான் பள்ளியில்

மலைமகள் தன்னொடும் மகிழ்ந்துறை வரதனே.


தலைவ, நின் மென்மலர்த் தாள் இணை போற்றினேன் - தலைவனே; உன் மென்மையான மலர்ப்பாதங்கள் இரண்டையும் வணங்கினேன்;

மலை அன வல்வினை மாய்த்து அருள் நல்கிடாய் - மலை போன்ற வலிய வினைகளை அழித்து அருள்புரிவாயாக;

அலைகடல் அதன் அயல் அகத்தியான்பள்ளியில் மலைமகள் தன்னொடும் மகிழ்ந்து உறை வரதனே - கடலின் அருகே உள்ள அகத்தியான்பள்ளியில் மலையான் மகளான உமாதேவியோடு மகிழ்ந்து உறைகின்ற வரதனே; (* அகத்தியான்பள்ளி இறைவி திருநாமம் - பாகம்பிரியாள்);


2)

நீர்மலர் புகைகொடு நின்கழல் போற்றினேன்

கார்வணக் கூற்றுயிர் கவருமுன் காத்திடாய்

ஆர்கடல் அதனயல் அகத்தியான் பள்ளியில்

வார்குழ லாளொடும் மகிழ்ந்துறை வரதனே.


நீர் மலர் புகைகொடு நின் கழல் போற்றினேன் - நீராலும் மலராலும் தூபத்தாலும் உன் திருவடியை வழிபட்டேன்; (அப்பர் தேவாரம் - 4.1.6 - "சலம் பூவொடு தூபம் மறந்தறியேன்"); (சம்பந்தர் தேவாரம் - 2.121.4 - "போதினாலும் புகையாலும் உய்த்தே அடியார்கள்தாம் போதினாலே வழிபாடு செய்ய");

கார் வணக் கூற்று உயிர் கவருமுன் காத்திடாய் - கரிய நிறம் உடைய காலன் என் உயிரைக் கைப்பற்றுமுன் காத்து அருள்வாயாக;

ஆர் கடல் அதன் அயல் அகத்தியான்பள்ளியில் வார்குழலாளொடும் மகிழ்ந்து உறை வரதனே - ஒலிக்கின்ற கடலின் அருகே உள்ள அகத்தியான்பள்ளியில் நீண்ட கூந்தல் உடைய உமாதேவியோடு மகிழ்ந்து உறைகின்ற வரதனே; (ஆர்த்தல் - ஒலித்தல்);


3)

வாழ்கநின் மலரடி வல்வினைக் கடலிடை

மூழ்குமென் இடரவை முடிவுற அருளிடாய்

ஆழ்கடல் அதனயல் அகத்தியான் பள்ளியில்

தாழ்குழ லாளொடும் தங்கிடும் வரதனே.


வாழ்க நின் மலரடி - ஈசனே, மலர்போன்ற உன் திருவடி வாழ்க!

வல்வினைக் கடலிடை மூழ்கும் என் இடரவை முடிவுற அருளிடாய் - வலிய வினைக்கடலில் மூழ்கித் துன்புறும் என் துன்பத்தைத் தீர்த்து அருள்வாயாக; (முடிவு - End, finality; இறுதி); (முடிதல் - அழிதல்);

ஆழ்கடல் அதன் அயல் அகத்தியான்பள்ளியில் தாழ்குழலாளொடும் தங்கிடும் வரதனே - ஆழமான கடலின் அருகே உள்ள அகத்தியான்பள்ளியில் தாழ்ந்த கூந்தலையுடைய உமாதேவியோடு உறைகின்ற வரதனே; (சுந்தரர் தேவாரம் - 7.35.8 - "நெஞ்சமே எங்கள் சங்கரன் வந்து தங்குமூர் ... புறம்பயந் தொழப் போதுமே");


4)

சூலமார் கையினாய் துணையடி போற்றினேன்

காலனார் என்னுயிர் கவருமுன் காத்திடாய்

ஆலமார் கண்டனே அகத்தியான் பள்ளியில்

ஏலவார் குழலியோ டினிதுறை வரதனே.


சூலம் ஆர் கையினாய் துணையடி போற்றினேன் - சூலபாணியே, உன் இரு-திருவடிகளை வணங்கினேன்;

காலனார் என் உயிர் கவருமுன் காத்திடாய் - காலன் என் உயிரைக் கவர்ந்துசெல்வதன் முன்னமே என்னைக் காப்பாயாக;

ஆலம் ஆர் கண்டனே - விடம் பொருந்திய நீலகண்டனே; (ஆலம் - ஆலகால விடம்);

அகத்தியான்பள்ளியில் ஏல வார் குழலியோடு இனிது உறை வரதனே - அகத்தியான்பள்ளியில் மயிர்ச்சாந்து அணிந்த நீண்ட கூந்தலையுடைய உமாதேவியோடு இனிது உறைகின்ற வரதனே; (ஏலம் - மயிர்ச்சாந்து);


5)

மருமலர் இட்டடி வாழ்த்தினேன் எமபடர்

வருமுனம் துணையென வந்தெனைக் காத்திடாய்

அருமறை ஓதினாய் அகத்தியான் பள்ளியில்

ஒருமட மாதொடும் உறைதரு வரதனே.


மரு மலர் இட்டு அடி வாழ்த்தினேன் - வாசமலர்களைத் தூவித் திருவடியை வணங்கினேன்; (மரு - வாசனை); (சம்பந்தர் தேவாரம் - 2.86.8 - "மருமலர் தூவியென்றும் வழிபாடு செய்ம்மின்");

எமபடர் வருமுனம் துணை என வந்து எனைக் காத்திடாய் - காலதூதுவர் என்னிடம் வருவதன்முன் எனக்குத் துணையாக வந்து என்னைக் காப்பாயாக;

அரு-மறை ஓதினாய் - அரிய வேதத்தை ஓதியவனே;

அகத்தியான்பள்ளியில் ஒரு மட-மாதொடும் உறைதரு வரதனே - அகத்தியான்பள்ளியில் ஒப்பில்லாத அழகுடைய உமாதேவியோடு உறைகின்ற வரதனே; (ஒரு - ஒப்பற்ற); (மடம் - அழகு; மென்மை); (தருதல் - ஒரு துணைவினை); (சம்பந்தர் தேவாரம் - 3.73.9 - "நீறதணிவான் உமைதனோடும் உறை பட்டிசரமே");


6)

ஏறணி கொடியினாய் இணையடி ஏத்தினேன்

சீறுவெங் கூற்றிடர் செய்யுமுன் காத்திடாய்

ஆறணி வேணியாய் அகத்தியான் பள்ளியில்

கூறணி மாதொடும் கோயில்கொள் வரதனே.


ஏறு அணி கொடியினாய் இணையடி ஏத்தினேன் - இடபச்சின்னம் பொறித்த கொடியை உடையவனே, உன் இரு-திருவடிகளை வணங்கினேன்;

சீறு வெங்-கூற்று இடர் செய்யு(ம்)முன் காத்திடாய் - கோபிக்கின்ற கொடிய நமன் எனக்குத் துன்பம் விளைப்பதன்முன் காப்பாயாக; (சீறுதல் - கோபித்தல்);

ஆறு அணி வேணியாய் - கங்கையைச் சடையில் அணிந்தவனே; (வேணி - சடை);

அகத்தியான்பள்ளியில் கூறு அணி மாதொடும் கோயில்கொள் வரதனே - அகத்தியான்பள்ளியில் உமாதேவி ஒரு பாகமாக உறைகின்ற வரதனே; (கூறு - பங்கு); (கோயில்கொள்ளுதல் - வாழுமிடமாகக் கொள்ளுதல்);


7)

தினங்களாய் நமனிடர் செய்யுமுன் காத்திடாய்

மனங்கொடு மலரடி வாழ்த்தினேன் காமனை

அனங்கனென் றாக்கினாய் அகத்தியான் பள்ளியில்

வனங்கிளர் மாதொடும் மகிழ்ந்துறை வரதனே.


தினங்கள் ஆய் நமன் இடர் செய்யும் முன் காத்திடாய் - என் வாழ்நாள் முடிந்து, காலன் எனக்குத் துன்பம் செய்வதன் முன்னமே காப்பாயாக; (ஆய் - ஆகி - தீர்ந்து; முடிந்து); ("தினங்கள் ஆய் நமன்" என்பதை வினைத்தொகையாகக் கொண்டும் பொருள்காணல் ஆம்; "நம் வாழ்நாளை ஆராயும் காலன்" - ஆய்தல் - ஆராய்தல்);

மனம் கொடு மலரடி வாழ்த்தினேன் - என் மனத்தால் உன் மலர் போன்ற திருவடியை வாழ்த்தினேன்; (கொடு - கொண்டு - மூன்றாம் வேற்றுமைச் சொல்லுருபு);

காமனை அனங்கன் என்று ஆக்கினாய் - மன்மதனை எரித்து அவனை உடலற்றவன் என்று செய்தவனே;

அகத்தியான்பள்ளியில் வனம் கிளர் மாதொடும் மகிழ்ந்து உறை வரதனே - அகத்தியான்பள்ளியில் அழகு மிகும் உமாதேவியோடு மகிழ்ந்து உறைகின்ற வரதனே; (வனம் - அழகு); (கிளர்தல் - மிகுதல்; சிறத்தல்);


8)

எயிலெரி நகையினாய் ஏத்தினேற் கிரங்கிடாய்

கயிலையை எடுத்தவன் கத்திட ஊன்றினாய்

அயிலுடை வேலினாய் அகத்தியான் பள்ளியில்

மயிலன மாதொடும் மகிழ்ந்துறை வரதனே.


எயில் எரி நகையினாய் ஏத்தினேற்கு இரங்கிடாய் - மூன்று கோட்டைகளைச் சிரித்து எரித்தவனே, உன்னைத் துதிக்கும் எனக்கு இரங்குவாயாக; (எயில் - கோட்டை - முப்புரம்); (நகை - சிரிப்பு);

கயிலையை எடுத்தவன் கத்திட ஊன்றினாய் - கயிலைமலையைப் பெயர்த்த இராவணன் அலறுமாறு ஒரு விரலை ஊன்றியவனே;

அயில்உடை வேலினாய் - கூர்மை மிக்க சூலம் ஏந்தியவனே; (அயில் - கூர்மை);

அகத்தியான்பள்ளியில் மயில் அன மாதொடும் மகிழ்ந்து உறை வரதனே - அகத்தியான்பள்ளியில் மயில் போன்ற சாயல் உடைய உமாதேவியோடு மகிழ்ந்து உறைகின்ற வரதனே; (அன - அன்ன - போன்ற);


9)

பூரணா உன்னடி போற்றினேன் காத்திடாய்

நாரணன் நான்முகன் நண்ணொணாச் சோதியே

ஆரணப் பொருளினாய் அகத்தியான் பள்ளியில்

ஏரணி கண்ணியோ டினிதுறை வரதனே.


பூரணா உன்னடி போற்றினேன் காத்திடாய் - பூரணனே, உன் திருவடியை வணங்கினேன், காப்பாயாக; (பூரணன் - முழுப்பொருள்; முழுமையானவன்);

நாரணன் நான்முகன் நண்ணொணாச் சோதியே - திருமாலும் பிரமனும் அணுக ஒண்ணாத ஜோதியே; (நண்ணொணா - நண்ண ஒண்ணா - தொகுத்தல் விகாரம், இடைக்குறை விகாரம்);

ஆரணப் பொருளினாய் - வேதப்பொருளே; (ஆரணம் - வேதம்);

அகத்தியான்பள்ளியில் ஏர் அணி கண்ணியோடு இனிது உறை வரதனே - அகத்தியான்பள்ளியில் அழகிய கண்களையுடைய உமாதேவியோடு இனிது உறைகின்ற வரதனே; (ஏர் - அழகு); (திருக்கோவையார் - 18 வரைபொருட்பிரிதல் - 31 - "காரணன் ஏரணி கண்ணுதலோன்");


10)

பொய்யணி நாவராய்ப் புன்னெறிக் கழைத்திடும்

கையருக் கருளிலான் காதலர்க் கெளியவன்

ஐயமுண் வாழ்க்கையன் அகத்தியான் பள்ளியில்

தையலாள் தன்னொடும் தங்கிடும் வரதனே.


பொய் அணி நாவராய்ப் புன்னெறிக்கு அழைத்திடும் கையருக்கு அருள் இலான் - நாக்கில் பொய்யை அணிந்து தங்கள் சிறுநெறிகளில் சேருங்கள் என்று அழைக்கும் கீழோருக்கு அருள் இல்லாதவன்; (கையர் - கீழோர்; வஞ்சகர்);

காதலர்க்கு எளியவன் - அன்பர்களால் எளிதில் அடையப்படுபவன்;

ஐயம் உண் வாழ்க்கையன் - பிச்சை ஏற்று உண்ணும் வாழ்க்கையன்; (சம்பந்தர் தேவாரம் - 1.107.7 - "வாடல் உடைதலையில் பலிகொள்ளும் வாழ்க்கையனாய்க்");

அகத்தியான்பள்ளியில் தையலாள்-தன்னொடும் தங்கிடும் வரதனே - அகத்தியான்பள்ளியில் உமாதேவியோடு உறைகின்ற வரதனே;


11)

சலம்படர் சடையடை சங்கரன் தாள்தொழல்

நலம்பெறு வழியது நம்பயம் நீக்குவான்

அலம்புதண் கடலயல் அகத்தியான் பள்ளியில்

சிலம்புமன் மகளொடும் சேர்ந்துறை வரதனே.


சலம் படர்-சடை அடை சங்கரன் தாள் தொழல் நலம் பெறு வழியது - கங்கையைத் தன் படர்ந்த சடையில் அடைத்த சங்கரனுடைய திருவடிகளை வணங்குவது நன்மை அடையும் வழியாகும்; (சலம் - ஜலம் - கங்கை);

நம் பயம் நீக்குவான் - அப்பெருமான் நம் அச்சத்தைத் தீர்ப்பான்;

அலம்பு தண்-கடல் அயல் அகத்தியான்பள்ளியில் - ஒலிக்கின்ற குளிர்ந்த கடலின் அருகே அகத்தியான்பள்ளியில்; (அலம்புதல் - ஒலித்தல்);

சிலம்பு-மன் மகளொடும் சேர்ந்து உறை வரதனே - மலைக்கு மன்னன் மகளான உமாதேவியோடு சேர்ந்து உறைகின்ற வரதனே; (சிலம்பு - மலை); (மன் - மன்னன்; அரசன்);


பிற்குறிப்புகள்:

1. யாப்புக் குறிப்பு: கலிவிருத்தம் - "தானனா தானனா தானனா தானனா" - "விளம் விளம் விளம் விளம்" என்ற வாய்பாடு; தானனா என்பது தனதனா என்றும் வரலாம்;

2. சம்பந்தர் தேவாரம் - 3.35.1 -

முன்னைநான் மறையவை முறைமுறை குறையொடும்

தன்னதாள் தொழுதெழ நின்றவன் தன்னிடம்

மன்னுமா காவிரி வந்தடி வருடநல்

செந்நெலார் வளவயல் தென்குடித் திட்டையே.


3. அகத்தியான்பள்ளி - இது வேதாரண்யத்திற்குத் தெற்கே உள்ள தலம்; இக்கால வழக்கில் அகஸ்தியான்பள்ளி / அகஸ்தியம்பள்ளி.


வி. சுப்பிரமணியன்

-------------- --------------


Saturday, March 4, 2023

07.04 – அகத்தியான்பள்ளி

07.04 – அகத்தியான்பள்ளி

2015-09-10

அகத்தியான்பள்ளி

------------------

(எண்சீர் விருத்தம் - "தான தானன தனதன தனன" என்ற அரையடி அமைப்பு;

யாப்புக் குறிப்பைக் கீழ்க் காண்க)

(சுந்தரர் தேவாரம் - 7.68.1 - "செம்பொன் மேனிவெண் ணீறணி வானைக்")


1)

என்பும் ஏனவெண் கொம்பும ணிந்தோர்

.. ஏற தேறிய இறையவன் வாச

அம்பை ஏவிய மன்மதன் தன்னை

.. ஆகம் அற்றிடக் காய்நுதற் கண்ணன்

தென்பு லத்துவன் கூற்றையு தைத்துச்

.. சிறுவர் ஆருயிர் காத்தருள் செய்தான்

அன்பி னால்தொழும் அடியவர்க் கினியன்

.. அகத்தி யான்பள்ளி மேவிய அரனே.


என்பும் ஏன-வெண்-கொம்பும் அணிந்து ஓர் ஏறது ஏறிய இறையவன் - எலும்பும் பன்றியின் வெண்கொம்பும் அணிந்த, இடபவாகனம் உடைய இறைவன்; (என்பு - எலும்பு); (ஏனம் - பன்றி);

வாச அம்பை ஏவிய மன்மதன்தன்னை ஆகம் அற்றிடக் காய்-நுதற்-கண்ணன் - மலரம்பை எய்த காமனை உடம்பு இல்லாதவன் ஆகும்படி கோபித்து எரித்த நெற்றிக்கண்ணன்;

தென்புலத்து வன்-கூற்றை உதைத்துச், சிறுவர் ஆருயிர் காத்தருள் செய்தான் - தென்திசையினன் ஆன கொடிய கூற்றுவனை உதைத்து, மார்க்கண்டேயரது அரிய உயிரைக் காத்தவன்;

அன்பினால் தொழும் அடியவர்க்கு இனியன் - அன்போடு தொழும் பக்தர்களுக்கு இனிமை பயப்பவன்;

அகத்தியான்பள்ளி மேவிய அரனே - அகத்தியான்பள்ளியில் எழுந்தருளிய ஹரன்;

2)

நேத்தி ரந்திகழ் நெற்றியன் முடிமேல்

.. நிலவு சூடிய நின்மலன் மாலை

சாத்து தாடகைக் கணிபனந் தாளில்

.. சாய்ந்த அன்பினன் தாழ்சடை அண்ணல்

பார்த்தி ருந்தடி பரவிடு பத்தர்

.. பாவம் ஆயின தீர்த்தருள் பண்பன்

ஆர்த்து வண்திரை மோதிடு கரைமேல்

.. அகத்தி யான்பள்ளி மேவிய அரனே.


மாலை சாத்து தாடகைக்கு அணி பனந்தாளில் சாய்ந்த அன்பினன் - தாடகை என்ற பக்தைக்காக அழகிய திருப்பனந்தாளில் தன் தலையைச் சாய்த்து அவள் இட்ட மாலையை ஏற்றுக்கொண்ட ஈசன்; (இவ்வரலாற்றைத் திருப்பனந்தாள் தலவரலாற்றிற் காண்க);

பார்த்திருந்து அடி பரவிடு பத்தர் பாவம் ஆயின தீர்த்தருள் பண்பன் - தன்னைத் தரிசித்தும் தியானித்தும் திருவடியைத் துதிக்கும் பக்தர்களது பாவங்களையெல்லாம் தீர்த்து அருள்பவன்; (பார்த்தல் - கண்ணால் நோக்குதல்; தேடுதல்; கருதுதல்); (அப்பர் தேவாரம் - 4.23.6 - "பார்த்திருந் தடிய னேனான் பரவுவன் பாடி யாடி");

ஆர்த்து வண் திரை மோதிடு கரைமேல் அகத்தியான்பள்ளி - ஒலித்து, வளம் மிக்க அலைகள் மோதுகின்ற கடற்கரையில் உள்ள அகத்தியான்பள்ளி;


3)

கார்ப்பு மிக்கவன் னஞ்சினை உண்டு

.. கண்டம் இட்டவன் ஓட்டினை ஏந்தி

ஊர்ப்ப லிக்குழல் கின்றவன் இடப

.. ஊர்தி யன்கொடி இடையினை உடைய

பார்ப்ப திக்கொரு பாகம ளித்த

.. பண்பன் நீர்மலி சடைமிசை மதியன்

ஆர்ப்ப ரித்தலை சேர்கரை அயலே

.. அகத்தி யான்பள்ளி மேவிய அரனே.


கார்ப்பு மிக்க வன் நஞ்சினை உண்டு கண்டம் இட்டவன் - கரிய காரம் மிக்க கொடிய விடத்தை உண்டு கண்டத்தில் வைத்தவன்; (கார்ப்பு - காரம்; கார்த்தல் - கறுப்பாதல்; உறைத்தல்);

ஓட்டினை ஏந்தி ஊர்ப்பலிக்கு உழல்கின்றவன் - பிரமன் மண்டையோட்டை ஏந்தி ஊரார் இடும் பிச்சைக்குத் திரிபவன்; (ஊர்ப்பலிக்கு - பல ஊர்களில் பிச்சைக்கு; ஊரிலுள்ளோர் இடும் பிச்சைக்கு);

பார்ப்பதி - பார்வதி;

நீர் மலி சடைமிசை மதியன் - கங்கை தங்கும் சடைமேல் சந்திரனை அணிந்தவன்;

ஆர்ப்பரித்து அலை சேர் கரை அயலே - ஆரவாரம் செய்து அலைகள் சேர்கின்ற கரையின் பக்கத்தில் உள்ள;


4)

தரையிற் சக்கரம் ஒன்றினைக் கீறிச்

.. சலந்த ரன்றனைச் செற்றவன் மேரு

வரையை வில்லெனக் கையினில் ஏந்தி

.. வாளி யாஅரி கால்எரி கொண்டு

விரவ லார்புர மூன்றெரி செய்த

.. வீரன் வெண்பொடி மேனியன் அரையில்

அரவக் கச்சினன் அலைமலி கின்ற

.. அகத்தி யான்பள்ளி மேவிய அரனே.


தரையிற் சக்கரம் ஒன்றினைக் கீறிச் சலந்தரன்தனைச் செற்றவன் - நிலத்தில் ஒரு வட்டத்தை வரைந்து அதனைக்கொண்டு சலந்தராசுரனை அழித்தவன்;

வரையை - மலையை;

வாளியா அரி கால் எரி கொண்டு - அம்பாக விஷ்ணு வாயு அக்னி இவர்களைக் கொண்டு; (வாள் - அம்பு); (கால் - வாயு);

விரவலார் புரம் மூன்று எரி செய்த - பகைவர்களுடைய முப்புரங்களையும் எரித்த;

அரையில் அரவக் கச்சினன் - அரையில் பாம்பை அரைநாணாகக் கட்டியவன்;


5)

நச்சி மண்ணிலிங் கத்தினைச் செய்து

.. நம்ப னைத்தொழக் கண்டுசி தைத்த

எச்ச தத்தனின் கால்களை மழுவால்

.. எறிந்த சண்டியை மகனென ஏற்றான்

நிச்ச லும்தமிழ் மாலைகள் பாடி

.. நினையும் அன்பருக் கரணென ஆகி

அச்சம் தீர்த்தருள் செய்பவன் அலையார்

.. அகத்தி யான்பள்ளி மேவிய அரனே.


* சண்டேசுர நாயனார் வரலாற்றைப் பெரியபுராணத்திற் காண்க.

நச்சி மண் இலிங்கத்தினைச் செய்து நம்பனைத் தொழக் கண்டு - (தன் மகனான விசாரசருமன்) விரும்பி ஆற்றுமணலில் இலிங்கம் செய்து பாலால் அபிஷேகம் செய்து ஈசனை வழிபடுவதைப் பார்த்து; (நச்சுதல் - விரும்புதல்);

சிதைத்த எச்சதத்தனின் கால்களை மழுவால் எறிந்த சண்டியை மகன் என ஏற்றான் - (கோபித்து) அப்பூசையைக் (காலால் உதைத்து) அழித்த (தந்தை) எச்சதத்தன் கால்களை ஒரு கோலே மழு ஆகக் கொண்டு வெட்டிய சண்டீசனைத் தன் மகனாக ஏற்றுக்கொண்ட பெருமான்; (சிதைத்தல் - குலைத்தல்; கெடுத்தல்); (எறிதல் - வெட்டுதல்);

நிச்சலும் - நித்தலும் - தினந்தோறும்;

அரண் - காவல்;

அலை ஆர் - அலைகள் பொருந்திய;


6)

மல்லின் ஆர்புயம் எட்டுடை ஈசன்

.. வார ணத்துரி மூடிய மைந்தன்

அல்லில் ஆடிடு கழலினன் அங்கம்

.. ஆறு நான்மறை ஆகிய அண்ணல்

சொல்லிற் சிந்தையிற் செய்கையில் என்றும்

.. தூய வன்றனை இருத்திய அன்பர்

அல்லல் நீக்கிய ருள்பவன் அலையார்

.. அகத்தி யான்பள்ளி மேவிய அரனே.


மல்லின் ஆர் புயம் எட்டு உடை ஈசன் - வலிமை மிக்க எண்தோள்கள் உடைய பெருமான்;

வாரணத்து உரி மூடிய மைந்தன் - யானைத்தோலைப் போர்த்த வீரன்;

அல்லில் ஆடிடு கழலினன் - நள்ளிருளில் நட்டம் ஆடும் திருவடியை உடையவன்;

அங்கம் ஆறு நான்மறை ஆகிய அண்ணல் - நால்வேதமும் ஆறங்கமும் ஆனவன்; (அப்பர் தேவாரம் - 6.1.6 - "அருமறையோ டாறங்க மாயி னானைச்");

சொல்லில் சிந்தையில் செய்கையில் என்றும் தூயவன்தனை இருத்திய அன்பர் அல்லல் நீக்கி அருள்பவன் - மனம் வாக்கு காயம் என்ற மூன்றாலும் ஈசன் பணியே செய்யும் பக்தர்களுக்கு அவர்களுடைய அல்லகளை நீக்கி அருள்வான் சிவபெருமான்;


7)

வேலை நஞ்சினைக் கண்டுந டுங்கி

.. விண்ணு ளார்தொழ உண்டருள் செய்த

நீல மாமிட றுடையவன் எந்தை

.. நெற்றி மேலொரு கண்ணுடை நிமலன்

ஏல வார்குழல் மாதினை ஓர்பால்

.. ஏற்ற வன்முனி நால்வர்கள் வேண்ட

ஆல மர்ந்தறம் சொன்னவன் அலையார்

.. அகத்தி யான்பள்ளி மேவிய அரனே.


வேலை நஞ்சு - கடலில் எழுந்த விடம்;

விண்ணுளார் - தேவர்கள்;

நீல மா மிடறு - அழகிய நீலகண்டம்;

ஏல வார் குழல் மாதை இடப்பால் ஏற்றவன் - வாசனைச்சாந்து பூசிய, நீண்ட கூந்தலை உடைய உமையை இடப்பக்கம் ஏற்றவன்;

ஆல் அமர்ந்து அறம் சொன்னவன் - கல்லால மரத்தின்கீழ் வீற்றிருக்கும் தட்சிணாமூர்த்தி;


8)

மலையை ஆட்டிய வாளரக் கன்தன்

.. வாய்கள் பத்தும ரற்றிட ஊன்று

தலைவன் தன்னிகர் அற்றவன் தேய்ந்து

.. தாளில் வீழ்ந்துவ ணங்கிய மதியைத்

தலையின் மேல்திகழ் வித்தவன் நீறு

.. தாங்கு மார்பினன் கலமலி கடலின்

அலைகள் வந்தெறி கரையதன் அயலே

.. அகத்தி யான்பள்ளி மேவிய அரனே.


வாள் அரக்கன்தன் வாய்கள் பத்தும் அரற்றிட - கொடிய அரக்கனான இராவணனின் பத்து வாய்களும் அழுது புலம்புமாறு; (அரற்றுதல் - புலம்புதல்);

தன்னிகர் அற்றவன் - ஒப்பற்றவன்;

கலம் மலி கடலின் அலைகள் வந்து எறி கரை அதன் அயலே - மரக்கலங்கள் (படகுகள், கப்பல்கள்,,,) மிகுந்த கடலில் அலைகள் வந்து மோதுகின்ற கரையின் அருகே;


9)

நார ணன்பிர மன்மிக நேடி

.. நாணி ஏத்திட அழலென நின்ற

பூர ணன்புனல் சூடிய புனிதன்

.. புவனம் ஏழையும் ஆக்கியொ டுக்கும்

கார ணன்குழைக் காதினன் காலைக்

.. கதிர்நி றத்தினன் கற்றவர் கருதும்

ஆர ணப்பொருள் ஆனவன் அலையார்

.. அகத்தி யான்பள்ளி மேவிய அரனே.


நாரணன் பிரமன் மிக நேடி நாணி ஏத்திட - விஷ்ணுவும் பிரமனும் மிகவும் தேடி, வாடி, வெட்கி, வாழ்த்தும்படி;

அழல் என நின்ற பூரணன் - சோதி உருவில் ஓங்கியவன்; முழுமுதற்பொருள்;

புனல் சூடிய புனிதன் - கங்காதரன்;

புவனம் ஏழையும் ஆக்கி ஒடுக்கும் காரணன் - ஏழு உலகங்களையும் தோற்றுவித்து முடிவில் ஒடுக்குபவன்; முதற்காரணன்; (காரணன் - மூலமானவன் - One who is the First Cause, as the Supreme Being);

குழைக் காதினன் - காதில் குழையை அணிந்தவன்;

காலைக்கதிர் நிறத்தினன் - உதிக்கின்ற சூரியனைப் போல் செம்மேனியன்;

ஆரணப்பொருள் ஆனவன் - வேதப்பொருளாகி விளங்குபவன்; (ஆரணம் - வேதம்);


10)

துணிந்து பொய்யுரை அற்பர்கள் சொல்லும்

.. சொற்க ளைச்சிறி தும்மதி யேன்மின்

தணிந்த சிந்தைய ராய்மலர் தூவித்

.. தண்ட மிழ்த்தொடை பாடிம லர்த்தாள்

பணிந்து போற்றிடு வார்துயர் நீக்கும்

.. பரமன் ஏறமர் கொடியினன் நாகம்

அணிந்த செஞ்சடை வேதியன் அலையார்

.. அகத்தி யான்பள்ளி மேவிய அரனே.


துணிந்து பொய் உரை அற்பர்கள் சொல்லும் சொற்களைச் சிறிதும் மதியேன்மின் - அஞ்சாமல் பொய்பேசும் கீழோர் சொல்லும் வார்த்தைகளைக் கொஞ்சமும் மதிக்க வேண்டா; (மதியேன்மின் - மதியாதீர்கள்);

தணிந்த சிந்தையராய் மலர் தூவித், தண் தமிழ்த்தொடை பாடி, மலர்த்தாள் பணிந்து போற்றிடுவார் துயர் நீக்கும் பரமன் - மனத்தை அடக்கி, மலர்களைத் தூவிக், குளிர்ந்த தமிழ்ப்பாமாலைகள் பாடி, மலர் போன்ற திருவடிகளை வணங்கும் பக்தர்களது துயரத்தைப் போக்கும் பரமன்;

ஏறு அமர் கொடியினன் - இடபக்கொடி உடையவன்;

நாகம் அணிந்த செஞ்சடை வேதியன் - பாம்பை அணிந்தவன்; செஞ்சடை உடையவன்; வேதியன்; (சி.கே.சுப்பிரமணிய முதலியார் பெரியபுராண உரையில், "நீற்றால்நிறை வாகிய மேனியுடன்" என்று தொடங்கும் பாடலுக்குத் தரும் விளக்கத்திலிருந்து: வேதியன் - வேதத்தைச் சொன்னவன் - வேதத்தின் பொருளாவான். வேதத்தில் விளங்குபவன் என்றபடி. வேதித்தல் - வேறுபடுத்துதல் என்று கொண்டு உரைத்தலுமாம்);


11)

நக்க னேகரி காட்டிடை ஆடும்

.. நாத னேவிடை ஏறிய நம்பா

சொக்க னேஅருள் என்றடி வாழ்த்தும்

.. தொண்ட ருக்குயர் வானம ளிப்பான்

செக்கர் வானன மேனிவெண் ணீற்றன்

.. தேவ தேவன்அ ணங்கொரு பங்கன்

அக்கின் ஆரம ணிந்தவன் அலையார்

.. அகத்தி யான்பள்ளி மேவிய அரனே.


"நக்கனே, கரிகாட்டிடை ஆடும் நாதனே, விடை ஏறிய நம்பா - "நிர்வாணியே, சுடுகாட்டில் ஆடும் தலைவனே, இடப வாகனம் உடையவனே, விரும்பத்தக்கவனே;

சொக்கனே அருள்" என்று அடி வாழ்த்தும் தொண்டருக்கு உயர் வானம் அளிப்பான் - அழகனே அருளாய்" என்று அடிதொழும் பக்தர்களுக்கு உயர்ந்த வானம் (சிவலோகம்) அளிப்பான்;

(சம்பந்தர் தேவாரம் - 1.67.1 - "நாதாவெனவும் நக்காவெனவும் நம்பா எனநின்று பாதந்தொழுவார் பாவந்தீர்ப்பார் பழன நகராரே");

செக்கர் வான் அன மேனி வெண்ணீற்றன் - செவ்வானம் போன்ற செம்மேனியில் வெண் திருநீறு பூசியவன்;

அணங்கு ஒரு பங்கன் - அர்த்தநாரீஸ்வரன்;

அக்கின் ஆரம் அணிந்தவன் - எலும்பு மாலை அணிந்தவன்; (அக்கு - எலும்பு); (ஆரம் - மாலை);


பிற்குறிப்புகள்:

1. யாப்புக் குறிப்பு:

எண்சீர் விருத்தம் - "தான தானன தனதன தனன" என்ற அரையடி அமைப்பு;

தான – தனன என்றும் வரும்; தனதன – தானன என்றும் வரும்; தனன – தனனா, தான, தானா என்றும் வரும்;

அரையடியில்:

  • முதற்சீர் குறிலில் முடியும் மாச்சீர்.

  • இரண்டாம் சீர் நேரசையில் தொடங்கும் விளச்சீர்.

  • மூன்றாம் சீர் விளச்சீர்.

  • நாலாம் சீர் மாச்சீர்.

  • விளச்சீர் வரும் இடத்தில் ஒரோவழி மாங்காய்ச்சீரும் வரலாம்.


2. அகத்தியான்பள்ளி - இது வேதாரண்யத்திற்குத் தெற்கே உள்ள தலம்; இக்கால வழக்கில் அகஸ்தியான்பள்ளி/அகஸ்தியம்பள்ளி.

3. கோயில் தகவல்கள் - தினமலர் தளத்தில்: https://temple.dinamalar.com/New.php?id=1041


வி. சுப்பிரமணியன்

-------------- --------------