Showing posts with label வஞ்சிவிருத்தம். Show all posts
Showing posts with label வஞ்சிவிருத்தம். Show all posts

Saturday, August 1, 2026

P.507 - காழி - அவமலி வேள்வியை

2020-06-18

P.507 - காழி (சீகாழி)

--------------

(சந்த வஞ்சிவிருத்தம் - தானன தானன தானதனா)

(தானன என்பது தனதன என்றும், தானதனா என்பது தனதனனா/தானதானா என்றும் வரலாம்)

(சம்பந்தர் தேவாரம் - 1.112.1 - "இன்குரல் இசைகெழும் யாழ்முரலத்")


1)

அவ(ம்)மலி வேள்வியை அன்றுசெய்து

தவறிழை தக்கனைத் தலையரிந்தான்

கவுணியர்க் கமுதருள் காழிநகர்ச்

சிவனடி இணைதனைச் சிந்திநெஞ்சே.


அவம் மலி வேள்வியை அன்று செய்து தவறு இழை தக்கனைத் தலை அரிந்தான் - முன்பு அவவேள்வி செய்து குற்றம் செய்த தக்கனது தலையை வெட்டித் தண்டித்தவன்; (அரிதல் - அறுத்தல்);

கவுணியர்க்கு அமுது அருள் காழிநகர்ச் சிவனடி இணைதனைச் சிந்தி நெஞ்சே - கௌண்டின்ய கோத்திரத்தில் அவதரித்த திருஞான சம்பந்தருக்கு ஞானப்பாலை அளித்து அருளியவனும் சீகாழியில் உறைபவனுமான சிவபெருமானது இரு-திருவடிகளை, மனமே நீ எண்ணுவாயாக;


2)

வனமலர் வாளிவன் மதனழிய

அனலுமிழ் கண்ணனை அதிசயனைக்

கனலெரி ஏந்தியைக் காழிநகர்ப்

புனலணி சடையனைப் போற்றுநெஞ்சே.


வன-மலர் வாளி வன்-மதன் அழிய அனல் உமிழ் கண்ணனை - அழகிய மலரம்பை ஏவுகின்ற வலிய மன்மதன் அழியும்படி தீயை உமிழ்ந்த நெற்றிக்கண்ணனை; (வனம் - அழகு); (வாளி - அம்பு); (மதன் - காமன்);

அதிசயனை - அற்புதனை;

கனல்-எரி ஏந்தியைக் - கனல்கின்ற தீயைக் கையில் ஏந்தியவனை;

காழிநகர்ப் புனல் அணி சடையனைப் போற்று நெஞ்சே - சீகாழியில் உறைகின்றவனும் சடையில் கங்கையை அணிந்தவனுமான சிவபெருமானை, மனமே நீ போற்றுவாயாக;


3)

பொடியணி மேனியன் போர்விடையன்

கொடியிடை கூறமர் கொள்கையினான்

கடிமல ரான்தொழு காழிநகர்

அடிகளை அடிதொழ அறுமிடரே.


பொடி அணி மேனியன் - திருநீற்றை மேனிமேல் பூசியவன்;

போர்-விடையன் - போர்செய்யவல்ல இடபத்தை ஊர்தியாக உடையவன்;

கொடியிடை கூறு அமர் கொள்கையினான் - கொடி போன்ற இடையை உடைய உமையை ஒரு கூறாக விரும்பியவன்;

கடி-மலரான் தொழு காழிநகர் அடிகளை அடிதொழ அறும் இடரே - மணம் மிக்க தாமரைமேல் இருக்கும் பிரமனால் வழிபடப்பட்டவனும் சீகாழியில் உறைகின்றவனுமான சிவபெருமானை வணங்கினால் துன்பம் தீரும்; (கடி - வாசனை);


4)

இமையவர் அமுதுண இருள்மிடறன்

அமலையை ஒருபுறம் அமர்பெருமான்

கமலனுக் கருளிய காழிநகர்

விமலனைத் தொழுதெழ வினையறுமே.


இமையவர் அமுது உண இருள்-மிடறன் - தேவர்கள் அமுதம் உண்பதற்காக (நஞ்சை உண்ட) நீலகண்டம் உடையவன்; (இருள்தல் - கறுப்பாதல்); (மிடறு - கண்டம்);

அமலையை ஒருபுறம் அமர் பெருமான் - தூயவளான உமையை இடப்பக்கம் பாகமாக விரும்பிய பெருமான்; (அமர்தல் - விரும்புதல்);

கமலனுக்கு அருளிய காழிநகர் விமலனைத் தொழுதெழ வினை அறுமே - தாமரைமலர்மேல் இருக்கும் பிரமனுக்கு அருளியவனும் சீகாழியில் உறைகின்ற தூயனுமான சிவபெருமானை வணங்கினால் வினைகள் தீரும்; (கமலன் - பிரமன்); (விமலன் - பரிசுத்தன்);


5)

விண்ணவர் தலைவனை வெண்மதியம்

தண்ணதி தாங்கிய சடையிறையைக்

கண்ணமர் நுதலனைக் காழிநகர்

அண்ணலை அடிதொழ அறுமிடரே.


விண்ணவர் தலைவனை - தேவர்கள் தலைவனை;

வெண்மதியம் தண்-நதி தாங்கிய சடை இறையைக் - வெண்மையான சந்திரனையும் குளிர்ந்த கங்கையாற்றையும் சடையில் தாங்கிய இறைவனை;

கண் அமர் நுதலனைக் - நெற்றிக்கண்ணனை; (அமர்தல் -இருத்தல்); (நுதல் - நெற்றி);

காழிநகர் அண்ணலை அடிதொழ அறும் இடரே - சீகாழியில் உறைகின்ற சிவபெருமானை வணங்கினால் துன்பம் தீரும்;


6)

வாரணம் உரிசெய்த மைந்தனருள்

காரணம் கொண்டுருக் காட்டிடுவான்

காரிகை பங்கனைக் காழிநகர்ச்

சீரனை ஏத்திடத் திருவருமே.


வாரணம் உரிசெய்த மைந்தன் - யானையைத் தோலுரித்த வீரன்; (வாரணம் - யானை); (மைந்தன் - வீரன்);

அருள்-காரணம் கொண்டு உருக் காட்டிடுவான் - அருளே காரணமாக பல வடிவங்களை ஏற்று அன்பர்களுக்குக் காட்சிதருபவன்; (அப்பர் தேவாரம் - 4.8.2 - "அரிதரு கண்ணியாளை ஒருபாகமாக அருள்காரணத்தில் வருவார்" - அருள் காரணம் - உயிர்கட்கு இம்மை மறுமை வீடுபேறு எய்த அருளும் காரணம்);

காரிகை-பங்கனைக் - (அந்த) உமைபங்கனை; (காரிகை - பெண்);

காழிநகர்ச் சீரனை ஏத்திடத் திரு வருமே - சீகாழியில் உறைகின்றவனும் புகழ்உடையவனுமான சிவபெருமானைப் போற்றினால் திரு வந்தடையும்; (சீரன் - புகழுடையவன்); (சம்பந்தர் தேவாரம் - 1.94.10 - "ஆர(ம்) நாகமாம் சீரன் ஆலவாய்த்");


7)

மறையணி நாவனை வாளரவம்

பிறையணி சடையுடைப் பிஞ்ஞகனைக்

கறையணி கண்டனைக் காழிநகர்

இறைவனை ஏத்திட இடர்கெடுமே.


மறை அணி நாவனை - வேதங்களைப் பாடியருளியவனை;

வாள்-அரவம் பிறை அணி சடையுடைப் பிஞ்ஞகனைக் - கொடிய பாம்பையும் பிறையையும் சடையில் அணிந்த, பிஞ்ஞகன் என்ற திருநாமம் உடையவனை; (வாள் - கொடிய); (பிஞ்ஞகன் - தலைக்கோலம் உடையவன்);

கறை அணி கண்டனைக் - நீலகண்டனை;

காழிநகர் இறைவனை ஏத்திட இடர் கெடுமே - சீகாழியில் உறைகின்ற சிவபெருமானைப் போற்றினால் துன்பம் தீரும்;


8)

தடவரை ஏந்திய தசமுகனைப்

படவிரல் ஊன்றிய படர்சடையன்

கடல்விடம் உண்ணியைக் காழிநகர்க்

கடவுளைக் கைதொழ இடர்கெடுமே.


தட-வரை ஏந்திய தசமுகனைப் பட விரல் ஊன்றிய படர்-சடையன் - பெரிய கயிலைமலையைப் பெயர்த்துத் தூக்கிய இராவணனை அவன் வருந்தும்படி திருப்பாதவிரல் ஒன்றை ஊன்றி நசுக்கிய, படர்ந்த சடையை உடைய பெருமானை; (படுதல் - அழிதல்; வாடுதல்; துன்பமடைதல்); (அப்பர் தேவாரம் - 5.56.10 - "மடுத்து மாமலை ஏந்தலுற்றான்றனை அடர்த்து");

கடல்-விடம் உண்ணியைக் - பாற்கடலில் எழுந்த ஆலகாலத்தை உண்டவனை; (உண்ணி - உண்பவன்);

காழிநகர்க் கடவுளைக் கைதொழ இடர் கெடுமே - சீகாழியில் உறைகின்ற சிவபெருமானைப் போற்றினால் துன்பம் தீரும்;


9)

வேதனும் விண்டுவு(ம்) நண்ணரிய

பாதனை ஒண்மழுப் படையினனைக்

காதணி தோடனைக் காழிநகர்

நாதனை வாழ்த்திட நலிவறுமே.


வேதனும் விண்டுவும் நண்ணரிய பாதனை - பிரமன் திருமால் இவர்களால் அணுக ஒண்ணாத திருப்பாதம் உடையவனை; (வேதன் - பிரமன்); (விண்டு - விஷ்ணு); (11.32.49 - "விளவைத் தளர்வித்த விண்டுவுந் தாமரை மேலயனும் அளவிற்கு அறியா வகைநின்ற");

ஒண்மழுப் படையினனைக் - ஒளியுடைய மழுவாயுதத்தை ஏந்தியவனை;

காது அணி தோடனைக் - காதில் அழகிய தோடு அணிந்தவனை; (தோடு அணிந்த செவியனை); (=அர்த்தநாரீசனை); (அணி - அழகிய);

காழிநகர் நாதனை வாழ்த்திட நலிவு அறுமே - சீகாழியில் உறைகின்ற சிவபெருமானைப் போற்றினால் துன்பம் தீரும்; (நலிவு - துன்பம்);


10)

பொய்யர்கள் மொழியவை பொருளலவே

மெய்யனை வெண்பொடி மேனியனைக்

கையினில் தீயனைக் காழிநகர்

ஐயனை அடிதொழ அறுமிடரே.


பொய்யர்கள் மொழி-அவை பொருள் அலவே - பொய்யுரைக்கும் புன்னெறியாளர் பேச்சுகள் பொருளற்றவை;

மெய்யனை - மெய்ப்பொருள் ஆனவனை;

வெண்பொடி மேனியனைக் - வெண்ணீற்றைப் பூசிய திருமேனி உடையவனை;

கையினில் தீயனைக் - கையில் தீயை ஏந்தியவனை;

காழிநகர் ஐயனை அடிதொழ அறும் இடரே - சீகாழியில் உறைகின்ற தலைவனான சிவபெருமானை வழிபட்டால் துன்பம் தீரும்;


11)

பவனவன் அடியவர் பரவுவணம்

அவனியில் வருபவன் அன்புருவன்

கவினுறு பொழிலணி காழிநகர்ச்

சிவனடி தொழுதெழத் திருவருமே.


பவன்-அவன் - பவன் என்ற திருநாமம் உடையவன்; (அவன் - பகுதிப்பொருள்விகுதி);

அடியவர் பரவு-வணம் அவனியில் வருபவன் - பக்தர்கள் எப்படி வழிபடுகின்றார்களோ அப்படித் தோன்றி அருள்பவன்; (அவனி - பூமி); (வணம் - வண்ணம் - விதம்; வகை);

அன்பு-உருவன் - அன்பே வடிவானவன்;

கவினுறு பொழில் அணி காழிநகர்ச் சிவன் அடி தொழுதெழத் திரு வருமே - அழகிய சோலை சூழ்ந்த சீகாழியில் உறைகின்ற சிவபெருமான் திருவடியை வழிபட்டால் திரு வந்தடையும்;


வி. சுப்பிரமணியன்

----------- --------------


P.506 - வழுவூர் - இலைமூன்று

2020-06-17

P.506 - வழுவூர்

--------------

(சந்த வஞ்சிவிருத்தம் - தனனா தனனா தனதானா - சந்தம். முதற்சீர் தானா என்றும் வரலாம்)

(சம்பந்தர் தேவாரம் - 1.37.1 - "அரவச் சடைமேல் மதிமத்தம்")


1)

இலைமூன் றுடைவேல் தனையேந்தி

மலைபோல் மதமா உரிமூடி

அலையார் சடையான் இடமென்பர்

மலரார் பொழில்சூழ் வழுவூரே.


இலை-மூன்றுடை வேல்தனை ஏந்தி - திரிசூலத்தை ஏந்தியவன்;

மலை போல் மதமா உரிமூடி - மலை போன்ற பெரிய யானையின் தோலை உரித்துப் போர்த்தவன்; (மதமா - மதமுடைய யானை); (உரி - தோல்);

அலை ஆர் சடையான் இடம் என்பர் - அலை நிறைந்த (= கங்கையை அணிந்த) சடையை உடையவன் உறையும் தலம்;

மலர் ஆர் பொழில் சூழ் வழுவூரே - மலர்கள் நிறைந்த சோலை சூழ்ந்த வழுவூர்;


2)

மதவேள் உடலைப் பொடிசெய்தான்

மதியோ டரவைச் சடைவைத்தான்

முதலாய்க் கடையாம் பெருமானூர்

மதுவீப் பொழில்சூழ் வழுவூரே.


மதவேள் உடலைப் பொடிசெய்தான் - மன்மதனைச் சாம்பலாக்கியவன்;

மதியோடு அரவைச் சடை வைத்தான் - சந்திரனையும் பாம்பையும் சடையில் ஒன்றாகச் சேர்த்தவன்;

முதலாய்க் கடை-ஆம் பெருமான் ஊர் - ஆதியும் அந்தமும் ஆன பெருமான் உறையும் தலம்;

மது-வீப்-பொழில் சூழ் வழுவூரே - தேன்மலர்கள் நிறைந்த சோலை சூழ்ந்த வழுவூர்; (வீ - பூ);


3)

அணையார் புர(ம்)மூன் றெரிசெய்தாய்

துணைநீ எனவே தொழுவார்க்குப்

புணையாய் வருவான் இடமென்பர்

மணமார் பொழில்சூழ் வழுவூரே.


"அணையார் புரம் மூன்று எரிசெய்தாய் - "பகைவர்களது முப்புரங்களை எரித்தவனே; (அணையார் - பகைவர்);

துணை நீ" எனவே தொழுவார்க்குப் - நீயே துணை" என்று தொழும் அன்பர்களுக்கு;

புணையாய் வருவான் இடம் என்பர் - பிறவிக்கடலைக் கடப்பிக்கும் படகாக வருபவன் உறையும் தலம்; (புணை - தெப்பம்);

மணம் ஆர் பொழில் சூழ் வழுவூரே - மணம் மிக்க சோலை சூழ்ந்த வழுவூர்;


4)

குளமாய் இருகண் கசியன்பர்

உளமே தளியா மகிழண்ணல்

இளமா விடையான் இடமென்பர்

வளமார் வயல்சூழ் வழுவூரே.


குளமாய் இருகண் கசி அன்பர் உளமே தளியா மகிழ் அண்ணல் - இருகண்களும் குளமாகிக் கசிகின்ற பக்தர்களது உள்ளமே கோயிலாக மகிழ்கின்ற பெருமான்;

இள-மா-விடையான் இடம் என்பர் - இளைய பெரிய எருதினை ஊர்தியாக உடையவன் உறையும் தலம்;

வளம் ஆர் வயல் சூழ் வழுவூரே - வளம் மிக்க வயல் சூழ்ந்த வழுவூர்;


5)

அருமா விடமுண் டமுதீந்த

பெருமான் சடைமேற் பிறைசூடி

அருவாய் உருவாம் அரனூராம்

வருவார் மகிழும் வழுவூரே.


அரு-மா-விடம் உண்டு அமுது ஈந்த பெருமான் - கொடிய பெரிய ஆலகாலத்தை உண்டு தேவர்களுக்கு அமுதத்தை அளித்த பெருமான்;

சடைமேல் பிறைசூடி - சடையில் சந்திரனைச் சூடியவன்;

அருவாய் உருவாம் அரன் ஊர் ஆம் - அருவும் உருவும் ஆகும் அரன் உறையும் தலம்; (அரு - உருவமின்மை);

வருவார் மகிழும் வழுவூரே - வந்து தொழும் பக்தர்கள் வரம் பெற்று மகிழ்கின்ற வழுவூர்;


6)

பண்டங் கழலைத் தொழுதேத்தும்

வெண்டிங் களைவே ணியில்வைத்தான்

கண்டங் கரியான் இடமென்பர்

வண்டின் னிசைசெய் வழுவூரே.


பண்டு அங்-கழலைத் தொழுதேத்தும் வெண்-திங்களை வேணியில் வைத்தான் - முன்பு அழகிய திருவடியை வழிபட்ட வெண்பிறையைச் சடையில் தரித்தவன்; (பண்டு - முன்பு); (அம் - அழகு); (வேணி - சடை);

கண்டம் கரியான் இடம் என்பர் - நீலகண்டன் உறையும் தலம்;

வண்டு இன்னிசை செய் வழுவூரே - வண்டுகள் இனிய இசை பாடுகின்ற (சோலை சூழ்ந்த) வழுவூர்;


7)

பறிமா மலரால் பணிவார்தம்

செறிதீ வினைதீர்த் தருள்தேவன்

பொறியார் அரவம் திகழ்மார்பன்

மறியார் கரனூர் வழுவூரே.


பறி-மா-மலரால் பணிவார்தம் செறி-தீவினை தீர்த்தருள் தேவன் - பறித்த அழகிய பூக்களைத் தூவி வணங்கும் பக்தர்களது செறிந்த தீவினையையெல்லாம் தீர்த்து அருளும் தேவன்;

பொறி ஆர் அரவம் திகழ் மார்பன் - புள்ளிகள் திகழும் பாம்பை மார்பில் மாலையாக அணிந்தவன்; (பொறி - புள்ளி);

மறி ஆர் கரன் ஊர் வழுவூரே - கையில் மான்கன்றை ஏந்தியவன் உறையும் தலம் வழுவூர்; (மறி - மான்கன்று);


8)

செழுமா மலைபேர்த் தவன்வாடி

அழுமா றுநெரித் திசைகேட்டான்

தொழுவார்க் கருளும் தொழிலேந்தல்

மழுவாட் பரனூர் வழுவூரே.


செழு-மா-மலை பேர்த்தவன் வாடி அழுமாறு நெரித்து இசை கேட்டான் - செழுமையான கயிலைமலையைப் பெயர்த்த இராவணன் வாடி அழும்படி அவனை நசுக்கிப் பின் அவன் பாடிய இசையைக் கேட்டவன்;

தொழுவார்க்கு அருளும் தொழில்-ஏந்தல் - தொழுவார்க்கு அருள்கின்ற தொழிலை உடைய அரசன்; (ஏந்தல் - அரசன்; பெருமையிற் சிறந்தோன்); (சுந்தரர் தேவாரம் - 7.1.9 - "தொழுவாரவர் துயராயின தீர்த்தல்லுன தொழிலே" - உன்னை வணங்குவாரது துன்பங்களை நீக்குதல் உனது தொழில்);

மழுவாட் பரன் ஊர் வழுவூரே - மழுவாளை ஏந்திய பரமன் உறையும் தலம் வழுவூர்;


9)

நறைமா மலரான் அரிகாணா

இறையான் எழிலார் உமைபங்கன்

கறையார் மிடறன் கயிலாயன்

மறைநா வினனூர் வழுவூரே.


நறை-மா-மலரான் அரி காணா இறையான் - வாசனையுடைய தாமரைமலர்மேல் இருக்கும் பிரமன் திருமால் இவர்களால் காண ஒண்ணாத இறைவன்; (இறையான் - இறைவன்); (சம்பந்தர் தேவாரம் - 2.46.5 - "நாலூர் மயானத்தெம் இறையான்");

எழில் ஆர் உமைபங்கன் - அழகிய உமாதேவியை ஒரு பங்கில் உடையவன்;

கறை ஆர் மிடறன் - நீலகண்டன்; (மிடறு - கண்டம்);

கயிலாயன் - கயிலைமலையில் இருப்பவன்;

மறை-நாவினன் ஊர் வழுவூரே - வேதங்களைப் பாடியருளிய பெருமான் உறையும் தலம் வழுவூர்;


10)

மதியீ னர்கள்சொல் புறனெல்லாம்

மதியா தடைமின் மகிழ்வெய்த

கொதியா வருகூற் றுதைசெய்தான்

மதிசூ டியிடம் வழுவூரே.


மதியீனர்கள் சொல் புறன்-எல்லாம் மதியாது, அடைமின் மகிழ்வு எய்த - அறிவீனர்கள் சொல்லும் பழிச்சொற்களையெல்லாம் மதிக்கவேண்டா; இன்பம் எய்த அடையுங்கள்; (மின் - ஏவற்பன்மை விகுதி);

கொதியா வரு கூற்று உதைசெய்தான் - மார்கண்டேயரைக் கொல்லக் கோபத்தோடு வந்த காலனை உதைத்தவன்; (கொதியா வரு - கொதித்து வந்த - சினந்து வந்த); (சம்பந்தர் தேவாரம் - 1.30.1 - "கொதியா வருகூற்றை யுதைத்தவர்");

மதிசூடி இடம் வழுவூரே - சந்திரசேகரன் உறையும் தலமான வழுவூரை;


11)

பணிகின் றவர்தம் பய(ம்)நீக்கிப்

பிணிவல் வினைதீர்த் தருள்பெம்மான்

துணிவெண் பிறையன் சுடுநீற்றன்

மணிகண் டனிடம் வழுவூரே.


பணிகின்றவர்தம் பய(ம்) நீக்கிப் - வணங்கும் அடியார்களது அச்சத்தைப் போக்கி;

பிணி வல்வினை தீர்த்தருள் பெம்மான் - அவர்களது உடல்நோய்களையும் அவர்களைப் பிணித்துள்ள வலிய வினையையும் தீர்த்தருளும் பெருமான்; (பிணிவல்வினை - 1. உடற்பிணியும் வலிய வினையும்; 2. பிணித்துள்ள வலிய வினை);

துணி-வெண்-பிறையன் - ஒளிவீசும் நிலாத்துண்டத்தைச் சூடியவன்;

சுடுநீற்றன் - சுட்ட திருநீற்றைப் பூசியவன்;

மணிகண்டன் இடம் வழுவூரே - நீலகண்டன் உறையும் தலம் வழுவூர்;


வி. சுப்பிரமணியன்

----------- --------------


Thursday, May 28, 2026

P.497 - வழுவூர் - இளங்கிளை நாயகி

2020-02-12

P.497 - வழுவூர்

--------------

(சந்த வஞ்சிவிருத்தம் - தானன தானன தனதான - சந்தம்;

விளம் விளம் புளிமாங்காய் - வாய்பாடு)

(சம்பந்தர் தேவாரம் - 1.112.1 - "இன்குரல் இசைகெழும் யாழ்முரலத்")


முற்குறிப்பு: இந்தப் பதிகத்தில் அடியீற்றுச்சீர் "தனதான" என்ற சந்தம். (மேலே சுட்டிய சம்பந்தர் தேவாரத்தில் அடியீற்றுச்சீர் "தானதனா" என்ற சந்தம்).

* (ம்) - புணர்ச்சியில் மகர-ஒற்றுக் கெடும் இடம்;


1)

இளங்கிளை நாயகி இடமானான்

களங்கறை திகழிறை கழல்பேணி

உளங்குளிர் அடியவர் உறுமூராம்

வளங்கிளர் குளமணி வழுவூரே.


இளங்கிளை நாயகி இடம் ஆனான் - இளங்கிளை நாயகி என்ற திருநாமத்தை உடைய உமையை இடப்பாகமாக உடையவன்; (* இளங்கிளை நாயகி - இத்தலத்து இறைவி திருநாமம்);

களம் கறை திகழ் இறை கழல் பேணி உளம் குளிர் அடியவர் உறும் ஊர் ஆம் - கண்டத்தில் கறை திகழும் இறைவனது திருவடியைப் போற்றி உள்ளம் மகிழும் பக்தர்கள் அடையும் ஊர் ஆவது; (களம் - கழுத்து); (உறுதல் - அடைதல்);

வளம் கிளர் குளம் அணி வழுவூரே - வளமும் அழகும் மிகுந்த குளம் திகழும் வழுவூர்; (கிளர்தல் - மிகுதல்; விளங்குதல்);


2)

மானையும் ஏந்திய மணிகண்டன்

தேனலர் சூடிய சிவனெம்மான்

ஆனையை உரிசெய்த அரனூராம்

வானணை கோபுர வழுவூரே.


மானையும் ஏந்திய மணிகண்டன் - (மழு, சூலம், உடுக்கை முதலியவற்றோடு) மானையும் கையில் ஏந்திய நீலகண்டன்; (மானையும் - உம் - எச்சவும்மை);

தேன்-அலர் சூடிய சிவன் எம்மான் - தேன்மலர்களைச் சூடிய சிவன், எம் தலைவன்;

ஆனையை உரிசெய்த அரன் ஊர் ஆம் - யானையைத் தோலுரித்த ஹரன் உறையும் ஊர் ஆவது;

வான் அணை கோபுர வழுவூரே - வானத்தைச் சென்றடையுமாறு உயர்ந்த (/ மேகம் அடைகின்ற உயர்ந்த) கோபுரம் திகழும் வழுவூர்; (வான் - ஆகாயம்; மேகம்);


3)

உணவிடும் எனமிக உழல்தேவன்

கணைதொடு மதனுடல் பொடிசெய்தான்

பண(ம்)மதி சூடிய பரனூராம்

மண(ம்)மலி பொழிலணி வழுவூரே.


"உணவு இடும்" என மிக உழல் தேவன் - (கையில் மண்டையோட்டை ஏந்தி) "உணவு இடுங்கள்" என்று பிச்சைக்குத் திரியும் தேவன்;

கணை தொடு மதன் உடல் பொடிசெய்தான் - மலர்க்கணையை ஏவிய மன்மதனது உடலைச் சாம்பலாக்கியவன்; (மதன் - காமன்);

பணம் மதி சூடிய பரன் ஊர் ஆம் - நாகத்தையும் சந்திரனையும் சூடிய பரமன் உறையும் ஊர் ஆவது; (பணம் - பாம்பின் படம்; நாகம்);

மண(ம்)மலி பொழில் அணி வழுவூரே - மணம் கமழும் சோலை திகழும் வழுவூர்;


4)

எரியன நிறமணி எழில்மேனிப்

பெரியவன் இணையிலி பிணியில்லான்

கரியதன் அதளுரி கரனூராம்

வரியளி அறைபொழில் வழுவூரே.


எரி அன நிறம் அணி எழில் மேனிப் பெரியவன் - தீப் போன்ற நிறம் திகழும் அழகிய திருமேனியை உடைய பெரியவன்; (எரி - நெருப்பு); (அன - அன்ன - போன்ற);

இணையிலி - ஒப்பற்றவன்;

பிணி இல்லான் - பந்தங்களும் நோய்களும் இல்லாதவன்;

கரியதன் அதள் உரி கரன் ஊர் ஆம் - யானையின் தோலை உரித்த கையினன் உறையும் தலம் ஆவது; (கரி - யானை); (அதள் - தோல்); (சம்பந்தர் தேவாரம் - 1.20.4 - "பெருவலியினன் நலமலிதரு கரன்");

வரி-அளி அறை பொழில் வழுவூரே - வரிவண்டுகள் ஒலிக்கின்ற சோலை திகழும் வழுவூர்; (அளி - வண்டு); (அறைதல் - ஒலித்தல்);


5)

புயலன மணியது புனைகண்டன்

அயிலுறு வேலினன் அடையாதார்

எயிலெரி சிலைவளை இறையூராம்

வயலிடைக் கயலுகள் வழுவூரே.


புயல் அன மணியது புனை-கண்டன் - மேகம் போன்ற கரிய மணியைக் கண்டத்தில் அணிந்தவன்; (புயல் - மேகம்); (அன - அன்ன - போன்ற);(மணியது - மணி; அது - பகுதிப்பொருள்விகுதி); (புனைதல் - அணிதல்);

அயில் உறு வேலினன் - கூர்மை மிக்க சூலத்தை ஏந்தியவன்; (அயில் - கூர்மை);

அடையாதார் எயில் எரி சிலை வளை இறை ஊர் ஆம் - பகைவர்களது முப்புரங்களை எரித்த வில்லை வளைத்த இறைவன் உறையும் தலம் ஆவது; (அடையாதார் - பகைவர்); (எயில் - கோட்டை); (சிலை - மலை; வில்);

வயலிடைக் கயல் உகள் வழுவூரே - வயலில் கயல்மீன்கள் பாய்கின்ற வழுவூர்; (உகளுதல் - தாவுதல்; ஓடித்திரிதல்);


6)

வெண்மழு வாளினன் விடையேறி

உண்மையில் உள்ளவன் ஒளிர்திங்கள்

அண்மையில் அரவணி அரனூராம்

வண்வயல் சூழ்தரு வழுவூரே.


வெண்மழு வாளினன் - ஒளிவீசும் மழுவை ஏந்தியவன்;

விடையேறி - இடபவாகனன்;

உண்மையில் உள்ளவன் - என்றும் இருப்பவன்; மெய்ப்பொருள்;

ஒளிர்-திங்கள் அண்மையில் அரவு அணி அரன் ஊர் ஆம் - ஒளிர்கின்ற சந்திரனுக்குப் பக்கத்தில் பாம்பை அணிந்த ஹரன் உறையும் தலம் ஆவது; (அண்மை - சமீபம்);

வண்வயல் சூழ்தரு வழுவூரே - வளம் மிக்க வயல் சூழ்ந்த வழுவூர்; (வண்மை - வளம்);


7)

மழவிடை ஊர்தியன் மணிநீரை

அழலன சடையிடை அடையண்ணல்

அழகிய மிடறுடை அரனூராம்

மழைநுழை பொழிலணி வழுவூரே.


மழவிடை ஊர்தியன் - இளைய எருதினை வாகனமாக உடையவன்;

மணிநீரை அழல் அன சடையிடை அடை அண்ணல் - தெளிந்த கங்கையாற்றைத் தீப் போன்ற செஞ்சடையில் அடைத்த பெருமான்; (மணிநீர் - பளிங்கு போலத் தெளிந்த நீர்); (அழல் - தீ);

அழகிய மிடறுடை அரன் ஊர் ஆம் - அழகிய நீலகண்டத்தை உடைய ஹரன் உறையும் தலம் ஆவது; (மிடறு - கண்டம்);

மழை நுழை பொழில் அணி வழுவூரே - மேகம் நுழைகின்ற சோலை சூழ்ந்த வழுவூர்; (மழை - மேகம்);


8)

கண்டிகழ் நெற்றியன் கயிலாயம்

பண்டிகழ் தசமுகன் படவூன்றிப்

பண்டிகழ் இசைமகிழ் பரனூராம்

வண்டறை பொழிலணி வழுவூரே.


கண் திகழ் நெற்றியன் கயிலாயம் - நெற்றிக்கண்ணனது கயிலைமலையை; (கண் + திகழ் = கண்டிகழ்);

பண்டு இகழ் தசமுகன் பட ஊன்றிப் - முன்பு இகழ்ந்து பேசிப் பெயர்த்து எறிய முயன்ற பத்துத்தலை இராவணனை அவன் மிகவும் வருந்தும்படி ஒரு விரலை ஊன்றி நசுக்கி; (பண்டு - பண்டை - முன்னாள்); (தசமுகற் பட ஊன்றிப் - தசமுகனைப் பட ஊன்றி; இரண்டாம்வேற்றுமைத்தொகையில் உயர்திணையில் ஈற்று ன் ஒற்று ற் என்று திரியும்);

பண் திகழ் இசை மகிழ் பரன் ஊர் ஆம் - (பின் இராவணன் பாடிய) பண் பொருந்திய இனிய கீதத்தை விரும்பிக் கேட்ட பரமன் உறையும் தலம் ஆவது; (பண் + திகழ் = பண்டிகழ்);

வண்டு அறை பொழில் அணி வழுவூரே - வண்டுகள் ஒலிக்கின்ற சோலை சூழ்ந்த வழுவூர்;


9)

பதியென அயனரி பகர்நாள்தாம்

துதிசெய ஓங்கிய சுடர்வண்ணன்

அதிசயன் நதிபுனை அரனூராம்

மதிதொடு பொழிலணி வழுவூரே.


"பதி" என அயன் அரி பகர்-நாள் தாம் துதிசெய ஓங்கிய சுடர்வண்ணன் - "நானே தலைவன்" என்று பிரமனும் திருமாலும் சொல்லி வாதுசெய்த அன்று அவர்கள் இருவரும் துதிக்கும்படி எல்லையின்றி ஓங்கிய ஜோதி-வடிவினன்; (பகர்தல் - சொல்தல்); (தாம் - அவர்);

அதிசயன், நதி புனை அரன் ஊர் ஆம் - அதிசயனும் கங்கையைச் சடையில் அணிந்தவனுமான ஹரன் உறையும் தலம் ஆவது; (சம்பந்தர் தேவாரம் - 3.23.3 - "ஐயன்நல் லதிசயன்");

மதி தொடு பொழில் அணி வழுவூரே - சந்திரன் தொடுமாறு உயர்ந்த சோலை சூழ்ந்த வழுவூர்;


10)

வஞ்சகர் சொல்நெறி மதியேன்மின்

நெஞ்சினில் அன்பொடு நினைவார்க்கே

அஞ்சல ளித்தருள் அரனூராம்

மஞ்சடை பொழிலணி வழுவூரே.


வஞ்சகர் சொல் நெறி மதியேன்மின் - வஞ்சகர்கள் சொல்லும் மார்க்கங்களை நீங்கள் மதிக்கவேண்டா; (சொன்னெறி - சொல் நெறி); (மின் - ஏவற்பன்மை விகுதி);

நெஞ்சினில் அன்பொடு நினைவார்க்கே அஞ்சல் அளித்தருள் அரன் ஊர் ஆம் - மனத்தில் அன்போடு நினைக்கின்ற பக்தர்களுக்கு அபயம் அளித்தருளும் ஹரன் உறையும் தலம் ஆவது;

மஞ்சு அடை பொழில் அணி வழுவூரே - மேகம் அடைகின்ற சோலை சூழ்ந்த வழுவூர்; (மஞ்சு - மேகம்);


11)

காமனைக் காய்ந்தவன் கழல்போற்றித்

தூமலர் இட்டவர் துயர்தீர்த்துச்

சேமம ளித்தருள் சிவனூராம்

மாமதில் சூழ்தரு வழுவூரே.


காமனைக் காய்ந்தவன் கழல் போற்றித் - மன்மதனைச் சுட்டெரித்தவனது திருவடியைப் போற்றித்;

தூ-மலர் இட்டவர் துயர் தீர்த்துச் - தூய மலர்களை இட்டு வணங்கும் பக்தர்களது துன்பத்தைத் தீர்த்து;

சேமம் அளித்தருள் சிவன் ஊர் ஆம் - அவர்களைக் காக்கின்ற சிவன் உறையும் தலம் ஆவது; (சேமம் - க்ஷேமம் - நல்வாழ்வு; இன்பம்; காவல்);

மா மதில் சூழ்தரு வழுவூரே - பெரிய மதிலால் சூழப்பெற்ற வழுவூர்;


வி. சுப்பிரமணியன்

----------- --------------


Tuesday, May 26, 2026

P.492 - பழனம் - நிசியில் நடமாடிய

2019-11-09

P.492 - பழனம்

(திருவையாறு அருகே உள்ள தலம்)

--------------

(சந்த வஞ்சிவிருத்தம் - தனனா தனனா தனதானா - சந்தம். முதற்சீர் தானா என்றும் வரலாம்)

(சம்பந்தர் தேவாரம் - 1.37.1 - "அரவச் சடைமேல் மதிமத்தம்")


1)

நிசியில் நடமா டியநாதா

சசியைச் சடைமேல் உடையானே

பசிதீர் வயல்சூழ் பழனத்தாய்

நசியா வினைதீர்த் தருளாயே.


நிசியில் நடம் ஆடிய நாதா - இருளில் திருக்கூத்து ஆடும் நாதனே;

சசியைச் சடைமேல் உடையானே - சந்திரனைச் சடைமேல் தரித்தவனே;

பசி தீர் வயல் சூழ் பழனத்தாய் - உலகின் பசியைத் தீர்க்கும் வயல் சூழ்ந்த திருப்பழனத்தில் உறைகின்ற பெருமானே;

நசியா வினை தீர்த்து அருளாயே - என் தீரா-வினையையெல்லாம் தீர்த்து அருள்வாயாக;


2)

பிறவா இறவாப் பெருமானே

நறவார் இதழிச் சடையானே

பறவைப் பொழில்சூழ் பழனத்தாய்

அறவா வினைதீர்த் தருளாயே.


பிறவா இறவாப் பெருமானே - பிறப்பும் இறப்பும் இல்லாத பெருமானே;

நறவு ஆர் இதழிச் சடையானே - தேன் பொருந்திய கொன்றைமலரைச் சடையில் அணிந்தவனே; (நறவு - தேன்); (இதழி - கொன்றை);

பறவைப்-பொழில் சூழ் பழனத்தாய் - பறவைகள் நிறைந்த சோலை சூழ்ந்த திருப்பழனத்தில் உறைகின்ற பெருமானே;

அறவா - அறவடிவினனே;

வினை தீர்த்து அருளாயே - என் வினையையெல்லாம் தீர்த்து அருள்வாயாக;


3)

குழையோர் செவியிற் புனைவானே

நிழலார் மழுவாட் படையானே

பழமார் பொழில்சூழ் பழனத்தாய்

பழவல் வினைதீர்த் தருளாயே.


குழை ஓர் செவியில் புனைவானே - ஒரு காதில் குழையை அணிந்தவனே;

நிழல் ஆர் மழுவாள்-படையானே - ஒளி திகழும் மழுவாயுதத்தை ஏந்தியவனே;

பழம் ஆர் பொழில் சூழ் பழனத்தாய் - பழங்கள் நிறைந்த சோலை சூழ்ந்த திருப்பழனத்தில் உறைகின்ற பெருமானே;

பழ-வல்வினை தீர்த்து அருளாயே - என் பழைய வலிய வினையையெல்லாம் தீர்த்து அருள்வாயாக;


4)

அடையார் புர(ம்)மூன் றவைதீயில்

உடன்வெந் தறவோர் கணையுய்த்தாய்

படர்கா விரிநீர்ப் பழனத்தாய்

தொடர்வல் வினைதீர்த் தருளாயே.


அடையார் புர(ம்) மூன்று அவை தீயில் உடன் வெந்து அற ஓர் கணை உய்த்தாய் - பகைவர்களது முப்புரங்களும் நெருப்பில் ஒரே சமயத்தில் உடனே வெந்து அழியும்படி ஒரு கணையை ஏவியவனே;

படர்-காவிரிநீர்ப் பழனத்தாய் - பரவிய காவிரியின் நீர் வளம் செய்கின்ற திருப்பழனத்தில் உறைகின்ற பெருமானே;

தொடர்-வல்வினை தீர்த்து அருளாயே - என்னைத் தொடர்கின்ற வலிய வினையையெல்லாம் தீர்த்து அருள்வாயாக;


5)

முனிவார் நமனைச் செறுகாலா

புனிதா புரிநூல் திகழ்மார்பா

பனியார் பொழில்சூழ் பழனத்தாய்

இனியாய் வினைதீர்த் தருளாயே.


முனிவு ஆர் நமனைச் செறு-காலா - கோபம் மிக்க காலனை அழித்த காலகாலனே; (முனிவு - கோபம்);

புனிதா - தூயனே;

புரிநூல் திகழ் மார்பா - முப்புரிநூலை மார்பில் அணிந்தவனே;

பனி ஆர் பொழில் சூழ் பழனத்தாய் - குளிர்ந்த சோலை சூழ்ந்த திருப்பழனத்தில் உறைகின்ற பெருமானே;

இனியாய் - இனியவனே;

வினை தீர்த்து அருளாயே - என் வினையையெல்லாம் தீர்த்து அருள்வாயாக;


6)

தயிர்பால் இவையா டியநாதா

உயிராய் உடலாய்த் திகழ்தேவா

பயிரார் வயல்சூழ் பழனத்தாய்

துயரார் வினைதீர்த் தருளாயே.


தயிர் பால் இவை ஆடிய நாதா - தயிர் பால் இவற்றால் அபிஷேகம் மகிழ்ந்த நாதனே;

உயிராய் உடலாய்த் திகழ் தேவா - உயிரும் உடலும் ஆன தேவனே; (சுந்தரர் தேவாரம் - 7.1.7 - "ஊனாய் உயிரானாய் உடலானாய் உலகானாய்");

பயிர் ஆர் வயல் சூழ் பழனத்தாய் - பயிர்கள் நிறைந்த வயல் சூழ்ந்த திருப்பழனத்தில் உறைகின்ற பெருமானே;

துயர் ஆர் வினை தீர்த்து அருளாயே - துயரில் பிணிக்கின்ற வினையையெல்லாம் தீர்த்து அருள்வாயாக; (ஆர்த்தல் - கட்டுதல்);


7)

கண்ணார் நுதலாய் கயிலாயா

அண்ணா மலையாய் அளிபாடும்

பண்ணார் பொழில்சூழ் பழனத்தாய்

திண்ணார் வினைதீர்த் தருளாயே.


கண் ஆர் நுதலாய் - நெற்றிக்கண்ணனே; (நுதல் - நெற்றி);

கயிலாயா - கயிலைமலையானே;

அண்ணாமலையாய் - அண்ணாமலையானே;

அளி பாடும் பண் ஆர் பொழில் சூழ் பழனத்தாய் - வண்டுகள் பாடும் இசை பொருந்திய சோலை சூழ்ந்த திருப்பழனத்தில் உறைகின்ற பெருமானே; (அளி - வண்டு);

திண் ஆர் வினை தீர்த்து அருளாயே - என் வலிய வினையையெல்லாம் தீர்த்து அருள்வாயாக; (திண் - வலிமை; உறுதி); (சம்பந்தர் தேவாரம் - 1.116.4 - "திண்ணிய தீவினை தீண்டப்பெறா திருநீலகண்டம்");


8)

பத்துத் தலையான் பலகாலம்

கத்தித் தொழவோர் விரல்வைத்தாய்

பத்தர்க் கருளும் பழனத்தாய்

அத்தா வினைதீர்த் தருளாயே.


பத்துத்-தலையான் பல காலம் கத்தித் தொழ ஓர் விரல் வைத்தாய் - பத்துத்தலை அரக்கனான இராவணன் நெடுங்காலம் ஓலமிட்டு அழுது தொழும்படி ஒரு திருப்பாதவிரலை ஊன்றியவனே;

பத்தர்க்கு அருளும் பழனத்தாய் - அன்பர்களுக்கு அருளும் திருப்பழனப் பெருமானே;

அத்தா - தந்தையே;

வினை தீர்த்து அருளாயே - என் வினையையெல்லாம் தீர்த்து அருள்வாயாக;


9)

பணியா அயன்மாற் கறிவொண்ணாத்

துணிமா மதியச் சடையானே

பணிமா லையினாய் பழனத்தாய்

பிணிவல் வினைதீர்த் தருளாயே.


பணியா அயன்-மாற்கு அறிவு ஒண்ணாத் - வழிபடாத பிரமன் திருமால் இவர்களால் அறியப்படாத; (மாற்கு - மால்+கு - திருமாலுக்கு); (அப்பர் தேவாரம் - இலிங்கபுராணத் திருக்குறுந்தொகை - 5.95.4 - "நெய்யும் பாலுங்கொண் டாட்டி நினைந்திலர் பொய்யும் பொக்கமும் போக்கிப் புகழ்ந்திலர் ஐயன் வெய்ய அழல்நிற வண்ணனை மெய்யைக் காணலுற்றார் அங்கு இருவரே"); (சம்பந்தர் தேவாரம் - 1.3.9 - "இருவர்க்கு அறிவொண்ணா வடிவாகும்");

துணி-மா-மதியச் சடையானே - சடைமேல் நிலாத்துண்டத்தை அணிந்தவனே; (துணி - துண்டம்);

பணி-மாலையினாய் - பாம்பை மாலையாக அணிந்தவனே; (பணி - நாகம்);

பழனத்தாய் - திருப்பழனப் பெருமானே;

பிணி வல்வினை தீர்த்து அருளாயே - என் நோய்களையும் என்னைப் பிணித்துள்ள வலிய வினையையும் தீர்த்து அருள்வாயாக; (பிணி வல்வினை - 1. பிணியும் வல்வினையும் (உம்மைத்தொகை); 2. பிணித்துள்ள வல்வினை (வினைத்தொகை));


10)

நாகா பரணா அருளென்னா

ஆகா தவருக் கிலனானாய்

பாய்கா விரிநீர்ப் பழனத்தாய்

போகா வினைதீர்த் தருளாயே.


"நாகாபரணா அருள்" என்னா ஆகாதவருக்கு இலன் ஆனாய் - "நாகாபரணனே, அருள்வாயாக" என்று போற்றி வழிபடாத வீணர்களுக்கு அருள் இல்லாதவனே; (ஆகாதவன் - பகைவன்; பிரயோஜனம் அற்றவன்);

பாய் காவிரிநீர்ப் பழனத்தாய் - காவிரிநீர் பாயும் திருப்பழனத்தில் உறைகின்ற பெருமானே;

போகா வினை தீர்த்து அருளாயே - தீரா வினையையெல்லாம் தீர்த்து அருள்வாயாக;


11)

தவளப் பொடிபூ சியமார்பா

துவளங் கொடிமா தொருகூறா

பவளச் சடையாய் பழனத்தாய்

அவலப் பிணிதீர்த் தருளாயே.


தவளப்-பொடி பூசிய மார்பா - வெண்ணீற்றை மார்பில் பூசியவனே; (தவளம் - வெண்மை);

துவள் அம் கொடி மாது ஒரு கூறா - துவள்கின்ற அழகிய கொடி போன்ற உமையை ஒரு கூறாக உடையவனே; (அம் - அழகு);

பவளச்-சடையாய் - பவளம் போன்ற செஞ்சடையானே;

பழனத்தாய் - திருப்பழனப் பெருமானே;

அவலப்-பிணி தீர்த்து அருளாயே - என் துன்பப் பிணியைத் தீர்த்து அருள்வாயாக; (அவலம் - துன்பம்);


வி. சுப்பிரமணியன்

----------- --------------