Showing posts with label தஞ்சாவூர் இராசராசேச்சரம். Show all posts
Showing posts with label தஞ்சாவூர் இராசராசேச்சரம். Show all posts

Tuesday, April 26, 2022

T.127 - தஞ்சாவூர் இராசராசேச்சரம் - மந்திரம் ஒன்றையும்

2010-09-18

T.127 - தஞ்சாவூர் இராசராசேச்சரம் - மந்திரம் ஒன்றையும்

-----------------

(வண்ணவிருத்தம்;

தந்தன தந்தன .. தனதான)


மந்திரம் ஒன்றையும் .. அறியாமல்

.. .. வந்தடை பண்டைய .. வினைமூடி

.. வஞ்சக ஐம்புலன் .. நசையாலே

.. .. வன்பிணி மண்டிட .. அழிவேனோ

சந்திரன் மென்சடை .. அணிவோனே

.. .. சங்கர தஞ்சையில் .. அடியார்கள்

.. சந்தம ணங்கமழ் .. தமிழ்பாடத்

.. .. தந்தரு ளும்பெரு .. வுடையானே

கந்தனை அன்றருள் .. எரியாரும்

.. .. கண்டிக ழுந்திரு .. நுதலானே

.. கஞ்சனும் விண்டுவு(ம்) .. மிகநேடிக்

.. .. கம்பமு றும்படி .. எழுசோதீ

சந்தத(ம்) நின்பெயர் .. நினைமாணி

.. .. தன்புடை வந்தடை .. நமன்மாளத்

.. தண்டனை தந்திடு .. கழலானே

.. .. சங்கரி ஒன்றிய .. பெருமானே.


பதம் பிரித்து:

மந்திரம் ஒன்றையும் அறியாமல்,

.. .. வந்து அடை பண்டைய வினை மூடி,

.. வஞ்சக ஐம்புலன் நசையாலே,

.. .. வன்-பிணி மண்டிட அழிவேனோ?

சந்திரன் மென்சடை அணிவோனே;

.. .. சங்கர; தஞ்சையில் அடியார்கள்

.. சந்த-மணம் கமழ் தமிழ் பாடத்

.. .. தந்தருளும் பெருவுடையானே;

கந்தனை அன்று அருள் எரி ஆரும்

.. .. கண் திகழும் திருநுதலானே;

.. கஞ்சனும் விண்டுவு(ம்) மிக நேடிக்

.. .. கம்பம் உறும்படி எழு சோதீ;

சந்தத(ம்) நின் பெயர் நினை மாணி

.. .. தன் புடை வந்து அடை நமன் மாளத்

.. தண்டனை தந்திடு கழலானே;

.. .. சங்கரி ஒன்றிய பெருமானே.


* (ம்) - புணர்ச்சியில் மகர-ஒற்றுக் கெடும் இடம்;

மந்திரம் ஒன்றையும் அறியாமல் - வேதமந்திரங்கள் எவற்றையும் அறியாமல்; (சுந்தரர் தேவாரம் - 7.100.3 - "மந்திரம் ஒன்றறியேன்");

வந்து அடை பண்டைய வினை மூடி - என்னை வந்து அடைகின்ற பழவினைகள் சூழ்ந்து மூடி;

வஞ்சக ஐம்புலன் நசையாலே, வன்-பிணி மண்டிட அழிவேனோ - வஞ்சம் செய்யும் ஐம்புலன் ஆசைகளால் கொடிய பிணி மிகுந்து, நான் அழிந்துவிவிடாதபடி என்னைக் காத்தருள்வாயாக; (நசை - ஆசை);

சந்திரன் மென்சடை அணிவோனே - சந்திரனை மென்மையான சடையில் அணிந்தவனே; (சம்பந்தர் தேவாரம் - 1.13.3 - "செம்மென்சடை யவைதாழ்வுற");

சங்கர - சங்கரனே; (சங்கரன் - சுகத்தைச் செய்பவன் - சிவன் திருநாமம்);

தஞ்சையில் அடியார்கள் சந்த-மணம் கமழ் தமிழ் பாடத் தந்தருளும் பெருவுடையானே - தஞ்சாவூரில் அடியவர்கள் அழகும் ஓசைநயமும் மிக்க தமிழ்ப்பாமாலைகளைப் பாடி வணங்க, அவர்களுக்கு அருள்புரியும் பெருவுடையானே; (சந்தம் - செய்யுளின் வண்ணம்; சந்தனம்; அழகு); (சந்தமணம் கமழ் தமிழ் - "சந்தத் தமிழ், மணம் கமழ் தமிழ்" என்று இயைக்க); (தந்தருளுதல் - ஈதல்; கொடுத்தல்); (* பெருவுடையான் - பிரகதீஸ்வரன் - தஞ்சைப் பெரியகோயில் ஈசன் திருநாமம்);

கந்தனை அன்று அருள் எரி ஆரும் கண் திகழும் திருநுதலானே - முன்பு முருகனை அருளிய தீப் பொருந்திய கண் திகழும் நெற்றியை உடையவனே; (எரி - நெருப்பு); (நுதல் - நெற்றி);

கஞ்சனும் விண்டுவும் மிக நேடிக் கம்பம் உறும்படி எழு சோதீ - பிரமனும் திருமாலும் மிகவும் தேடி நடுங்கும்படி ஓங்கிய ஜோதிவடிவினனே; (கஞ்சன் - பிரமன்); (விண்டு - விஷ்ணு); (நேடுதல் - தேடுதல்); (கம்பம் - நடுக்கம்; அச்சம்);

சந்ததம் நின் பெயர் நினை மாணி-தன் புடை வந்து அடை நமன் மாளத் தண்டனை தந்திடு கழலானே - எப்பொழுதும் உன் திருநாமத்தைத் தியானித்த மார்க்கண்டேயரிடம் வந்தடைந்த காலனே இறக்கும்படி காலனைத் தண்டித்த திருப்பாதனே; (சந்ததம் - எப்பொழுதும்); (மாணி - மார்க்கண்டேயர்); (புடை - பக்கம்; ஏழாம் வேற்றுமையுருபு); (கழலான் - கழல் அணிந்த திருவடி உடையவன்);

சங்கரி ஒன்றிய பெருமானே - உமை ஒரு பாகமாக இணைந்த பெருமானே;


வி. சுப்பிரமணியன்

----------- --------------

Wednesday, August 19, 2015

01.61 – தஞ்சாவூர் (தஞ்சை இராசராசேச்சரம்)


01.61 –
தஞ்சாவூர் (தஞ்சை இராசராசேச்சரம்)



2010-02-02
தஞ்சைப் பெருங்கோயில் (தஞ்சாவூர் இராசராசேச்சரம்)
------------------------------------
(கலிவிருத்தம் - "மா மாங்காய் மா மாங்காய்" - என்ற வாய்பாடு)
(சம்பந்தர் தேவாரம் - 1.80.1 - கற்றாங் கெரியோம்பிக் கலியை வாராமே)



1)
கீதம் பலபாடிப் பாதம் தொழுவோரின்
ஏதம் அவைதீர்க்கும் ஈசன்; எருதேறி;
தாதை உறைகின்ற தஞ்சைப் பெருங்கோயில்
பாதை அறிநெஞ்சே பற்றா வினைதானே.



ஏதம் - துன்பம்; குற்றம்; பாவம்;
எருதேறி - இடப வாகனன்;
தாதை - தந்தை;
தஞ்சைப் பெருங்கோயில் பாதை அறிநெஞ்சே - தஞ்சையில் உள்ள பெருவுடையார் கோயில் நற்கதி அடைவிக்கும் நெறி என்று உணர்; அக்கோயிலுக்கு செல்லும் வழியை அறி ('அங்குச் சென்று தொழு' என்பது குறிப்பு);
பற்றா வினைதானே - வினைகள் நம்மைப் பற்றமாட்டா;



2)
மதிசூ டரன்பாதம் மறவா மனச்சோழன்,
பதிகம் நிதமோதப் பலரை நியமித்துப்
பதிக்குப் பணிசெய்த தஞ்சைப் பெருங்கோயில்
துதிக்கும் அடியாரைத் தொடரா துயர்தானே.



* தஞ்சைப் பெரிய கோயிலைக் கட்டுவித்து, அக்கோயிலில் தேவாரம் பாட 48 ஓதுவார்களை நியமித்த ராஜராஜசோழனைச் சுட்டியது.
மதிசூடு அரன் பாதம் மறவா மனச்சோழன் - சந்திரசேகரன் திருவடியை மனத்தில் என்றும் கொண்டிருந்த ராஜராஜசோழன்;
நிதம் - தினமும்;
பதி - தலைவன்; கடவுள்;



3)
உம்பர் பெருமானார் உமையாள் ஒருகூறர்
வம்பு மலர்ப்பாதர் மறைகள் மொழிநாதர்
சம்பு உறைகின்ற தஞ்சைப் பெருங்கோயில்
நம்பி அடைநெஞ்சே நாளும் வருமின்பே.



உம்பர் - தேவர்;
வம்பு - வாசனை; புதுமை;
வம்பு மலர்ப்பாதர் - வாசமலர் போன்ற திருப்பாதத்தினர்; நாண்மலர் போன்ற திருவடியினர்;
சம்பு - [சுகத்தைத் தருபவன்] சிவன்;
நம்புதல் - விரும்புதல்;
நாளும் - தினமும்;



4)
கையில் அனலேந்திக் கானில் நடமாடும்
செய்ய திருப்பாதன் சேவில் வரும்நாதன்
தையல் ஒருகூறன் தஞ்சைப் பெருங்கோயில்
ஐயன் அடிபோற்றி அல்லல் அறுநெஞ்சே.



கையில் அனல் ஏந்தி - கையில் தீயை ஏந்தி;
கானில் நடமாடும் - சுடுகாட்டில் திருநடம் செய்யும்;
செய்ய - சிவந்த;
சே - எருது;
தையல் ஒரு கூறன் - உமையைத் திருமேனியில் ஒரு கூறாக உடையவன்;



5)
கழலைத் துதிபாடிக், காவாய் எனும்தேவர்
விழையும் அமுதீந்தான்; விமலன்; விழிதன்னில்
தழலன் உறைகின்ற தஞ்சைப் பெருங்கோயில்
நிழலை அடைநெஞ்சே நெருங்கா வினைதானே.



காவாய் - காத்தருள்வாய்;
விழிதன்னில் தழலன் - (நெற்றிக்)கண்ணில் தீ உடையவன்;
நிழல் - தானம்; புகலிடம்; (பல பாடல்களில் நீழல் எனவும் வரும்);



6)
விரித்தான் மறையெல்லாம்; விண்ணில் புரம்வேவச்
சிரித்தான்; திகழ்கின்ற திங்கள் சடைமீது
தரித்தான் உறைகின்ற தஞ்சைப் பெருங்கோயில்
கரத்தால் தொழுவாரைக் காலன் அணுகானே.



விரித்தல் - விளக்கி உரைத்தல்;
விரித்தான், சிரித்தான், தரித்தான் - விரித்தவன், சிரித்தவன், தரித்தவன்;



7)
கொங்கு மலரோடு குளிர்ந்த கிரணஞ்சேர்
திங்கள் அதனோடு திரைசேர் நதியென்றும்
தங்கும் சடையானின் தஞ்சைப் பெருங்கோயில்
உங்கை குவித்தேத்தின் உறுநோய் அடையாவே.



கொங்கு - வாசனை;
திரை - அலை;
உம் கை குவித்து ஏத்தின் - உங்கள் கைகளைக் கூப்பித் தொழுதால்;
உறுநோய் - பெருநோய்கள்; பிராரத்த வினையால் வரும் துன்பம்;



8)
மலையை அசைத்தானை மலர்போல் விரல்வைத்துப்
பலநாள் அழவைத்துப் பரிவோ டருள்செய்த
தலைவன் உறைகின்ற தஞ்சைப் பெருங்கோயில்
தலையால் தொழுவார்கள் தவியார் தரைமீதே.



மலையை அசைத்தானை - கயிலையைப் பெயர்க்க முயன்ற இராவணனனை;
மலர்போல் விரல்வைத்து - (கயிலைமலைமேல்) மலர் போல விரலைச் சிறிதே ஊன்றி;
பரிவோடு அருள் செய்த – இரங்கி அருள்புரிந்த;
தலையால் தொழுவார்கள் தவியார் தரைமீதே - தலைதாழ்த்தி வணங்கும் பக்தர்கள் இம்மண்ணுலகில் தவிக்கமாட்டார்கள்;



9)
சுழலார் நதியோடு தூவெண் மதிசூடி
கழலை அயன்மாலும் காணா வணம்அன்று
தழலாய் நிமிர்ந்தானின் தஞ்சைப் பெருங்கோயில்
தொழலே வினைதீர்ந்து சுகிக்கும் வழியாமே.



சுழல் ஆர் நதியோடு தூ வெண் மதிசூடி கழலை - சுழல்கள் இருக்கும் கங்கை ஆற்றோடு தூய வெண் திங்களையும் அணிந்த பெருமான் திருவடியை;
அயன் மாலும் காணா வணம் அன்று தழலாய் நிமிர்ந்தானின் - பிரமனும் திருமாலும் காண இயலாதவாறு அன்று சோதியாகி உயர்ந்தவன் உறைகின்ற;
தஞ்சைப் பெருங்கோயில் தொழலே வினை தீர்ந்து சுகிக்கும் வழி ஆமே - தஞ்சைப் பெருங்கோயிலைத் தொழுவதே, வினைகள் நீங்கி இன்புறும் வழி ஆகும்; (சுகித்தல் - சுகமாய் இருத்தல்);



10)
அவமே மொழிவீணர் அவர்சொல் பொருளல்ல;
பவநோய் தனைத்தீர்க்கும் பரமன், கறைக்கண்டன்,
தவள விடையானின் தஞ்சைப் பெருங்கோயில்
எவர்போற் றினும்வேண்டும் எல்லாம் பெறுவாரே.



அவமே மொழி வீணர் - பயனற்ற சொற்களையே பேசுகின்ற கீழோர்; (அவம் - பயனின்மை; கேடு);
அவர் சொல் பொருள் அல்ல – அவர்கள் சொற்களைப் மதிக்கவேண்டா; (பொருள் - தத்துவம்; மெய்ம்மை; நன்குமதிக்கப்படுவது);
பவநோய்தனைத் தீர்க்கும் பரமன் - பிறவிப்பிணியைத் தீர்க்கும் பெருமான்; (பவநோய் - பிறவிப்பிணி);
கறைக்கண்டன் - நீலகண்டன்;
தவள விடையான் - வெள்ளை எருதின்மேல் வருபவன்; (தவளம் - வெண்மை);



11)
உவமை இலனாகி உமையோ டிணைவானைப்,
புவனம் படைத்தானைப், பூதப் படையானைத்,
தவமார் பதியான தஞ்சைப் பெருங்கோயில்
சிவனைத் தொழுவார்க்குச் செம்மை திடமாமே.



உவமை இலன் ஆகி உமையோடு இணைவானை - ஒப்பு எதுவும் இல்லாதவன் ஆகி, உமை ஒரு பங்கனாகும் ஈசனை; (இணைதல் - சேர்தல் - To join, unite);
புவனம் படைத்தானைப், பூதப் படையானை - உலகங்களைப் படைத்தவனைப், பூதப்படை உடையவனை;
தவம் ஆர் பதியான தஞ்சைப் பெருங்கோயில் சிவனை - தவம் பெருகும் இடமான தஞ்சைப் பெருங்கோயிலில் உறையும் சிவனை;;
தொழுவார்க்குச் செம்மை திடமாமே - வணங்கும் அடியவர்களுக்கு நற்கதி நிச்சயம்; (திடம் - நிச்சயம்);



அன்புடன்,

வி. சுப்பிரமணியன்