08.01 – சிவன் சிலேடைகள்
2016-03-15
08.01.149 - சிவன் - விமானம் - சிலேடை
----------------------------------
உள்ளமர்ந்த பாரோர்கட் கும்பரூர் இன்பளிக்கும்
வெள்ளிய பூச்சிருக்கும் மிக்கொலித்துத் - தெள்ளு
திரைமேலே ஓடுகின்ற சீரார் விமானம்
குரைகழலால் கூற்றுதைத்த கோன்.
சொற்பொருள்:
உள் - 1. உள்ளே; / 2. உள்ளம்;
அமர்தல் - 1. இருத்தல் (உட்கார்தல்); / 2. விரும்புதல்;
உம்பர் - 1. ஆகாயம்; / 2. தேவர்; தேவலோகம்; சிவலோகம்;
ஊர் - 1. Going, riding; ஊர்கை. / 2. வசிக்கும் ஊர்; இடம்;
ஊர்தல் - நகர்தல்; To ride, as a horse; to drive, as a vehicle; ஏறிநடத்துதல்.
இன்பு - இன்பம்;
வெள்ளி - வெண்மை;
பூச்சு - 1. Coating, gilding, plating, tinning; plastering; மேற் பூசுகை; / 2. Daubing, smearing, anointing; தடவுகை;
தெள்ளுதல் - தெளிவாதல்;
திரை - 1. கடல்; / 2. நதி; அலை;
மேல் - 1. ஏழாம் வேற்றுமை உருபு; / 2. தலை;
ஏ - அசை;
ஓடுதல் - 1. விரைந்து செல்லுதல்; / 2. நதி பாய்தல்;
விமானம்:
உள் அமர்ந்த பாரோர்கட்கு உம்பர் ஊர் இன்பு அளிக்கும் - உள்ளே உட்கார்ந்திருக்கும் மனிதர்களுக்கு வானில் செல்கின்ற இன்பத்தைத் தரும்;
வெள்ளிய பூச்சு இருக்கும் - வெள்ளைநிற வர்ணம் பூசிய தோற்றம் இருக்கும்;
மிக்கு ஒலித்துத் தெள்ளு திரைமேலே ஓடுகின்ற சீர் ஆர் விமானம் - மிகவும் ஒலியெழுப்பிக் கடல்மேலும் பறக்கின்ற பெருமை உடைய விமானம்; (திரைமேலே - உம்மைத்தொகையாக - திரைமேலும்); (உம் - எச்சவும்மை - நிலத்தின்மேலும் கடலின்மேலும்);
சிவன்:
உள் அமர்ந்த பாரோர்கட்கு உம்பரூர் இன்பு அளிக்கும் - மனம் விரும்பிய மண்ணுலகினருக்கு வானுலக இன்பம் (= சிவலோகத்தில் வாழும் பேரின்பம்) தருவான்;
வெள்ளிய பூச்சு இருக்கும் - வெண்ணிறத் திருநீற்றைப் பூசியவன்;
மிக்கு ஒலித்துத் தெள்ளு திரை மேலே ஓடுகின்ற சீர் ஆர் - மிகவும் ஒலிசெய்து தெளிந்த அலைகளையுடைய கங்கை தலையில் பாயும் புகழ் உடைய;
குரைகழலால் கூற்று உதைத்த கோன் - ஒலிக்கின்ற கழல் அணிந்த திருவடியால் காலனை உதைத்த பெருமான்;
வி. சுப்பிரமணியன்
-------------------------------- -------------------------------
