Showing posts with label தனதனனத் தனதான. Show all posts
Showing posts with label தனதனனத் தனதான. Show all posts

Saturday, August 8, 2020

03.05.113 – கயிலாயம் - பொருளை நினைத்து - (வண்ணம்)

03.05.113 – கயிலாயம் - பொருளை நினைத்து - (வண்ணம்)

2009-02-23

3.5.113) பொருளை நினைத்து - (கயிலாயம்)

----------------------------------------------------

(வண்ணவிருத்தம்;

தனதனனத் .. தனதான )

(இரவுபகற் பலகாலும் - திருப்புகழ் - திருவருணை)


பொருளைநினைத் .. ததனாலே

.. பொருமுமனத் .. தினனாகிப்

பெருமிடியுற் .. றுழலாமல்

.. பிறையவுனைத் .. தொழுவேனோ

கருதலர்முப் .. புரம்வேவக்

.. கணைதனையுய்த் .. தருள்வீரா

அருமறைமெய்ப் .. பொருளானாய்

.. அணிகயிலைப் .. பெருமானே.


பதம் பிரித்து:

பொருளை நினைத்து அதனாலே

.. பொருமு மனத்தினன் ஆகிப்,

பெரு-மிடி உற்று உழலாமல்,

.. பிறைய, உனைத் தொழுவேனோ;

கருதலர் முப்புரம் வேவக்

.. கணைதனை உய்த்து-அருள் வீரா;

அருமறை மெய்ப்பொருள் ஆனாய்;

.. அணி கயிலைப் பெருமானே.


பொருளை நினைத்து அதனாலே பொருமு மனத்தினன் ஆகிப் - நிலையில்லாத பொருளையே சதா எண்ணி அதனால் மனத்தில் பொறாமையும் துன்பமும் சேர; (பொருமுதல் - துன்புறுதல்; பொறாமைப்படுதல்);

பெரு மிடி உற்று உழலாமல் - மிகுந்த வறுமையும் துன்பமும் அடைந்து வருந்தாமல்; (மிடி - துன்பம்; வறுமை);

பிறைய, உனைத் தொழுவேனோ - பிறையை அணிந்தவனே, நான் உன்னைத் தொழுவேனோ? அருள்வாயாக; (பிறைய - பிறையனே - பிறைச்சந்திரனை அணிந்தவனே - என்ற விளி); (சம்பந்தர் தேவாரம் - 1.134.10 - "சடையன் பிறையன்");

கருதலர் முப்புரம் வேவக் கணைதனை உய்த்து அருள் வீரா - பகைவர்களது முப்புரங்களும் வெந்து அழியும்படி ஒரு கணையை ஏவி அருளிய வீரனே; (கருதலர் - பகைவர்); (உய்த்தல் - ஆயுதம் பிரயோகித்தல்);

அருமறை மெய்ப்பொருள் ஆனாய் - அரிய வேதங்கள் சொல்லும் மெய்ப்பொருள் ஆனவனே;

அணி கயிலைப் பெருமானே - அழகிய கயிலையில் உறைகின்ற பெருமானே; (அணி - அழகு); (சம்பந்தர் தேவாரம் - 2.11.2 - "அந்தணர் சேரும் அணிகாழி எம்மானை");


வி. சுப்பிரமணியன்

-------------------------------- -------------------------------

03.05.112 – கயிலாயம் - பெரிய வினைத்தொடர் - (வண்ணம்)

03.05.112 – கயிலாயம் - பெரிய வினைத்தொடர் - (வண்ணம்)

2009-02-23

3.5.112) பெரிய வினைத்தொடர் - (கயிலாயம்)

----------------------------------------------------

(வண்ணவிருத்தம்;

தனதனனத் .. தனதான )

(இரவுபகற் பலகாலும் - திருப்புகழ் - திருவருணை)


பெரியவினைத் .. தொடர்போகப்

.. பிணைமலரிட் .. டிருபோதும்

பரிவுமிகுத் .. துனதாளைப்

.. பணியவெனக் .. கருளாயே

அரிபிரமற் .. கரியானே

.. அடியவருக் .. கெளியானே

கரியமிடற் .. றமுதேஎம்

.. கயிலைமலைப் .. பெருமானே.


பதம் பிரித்து:

பெரிய வினைத்தொடர் போகப்,

.. பிணை-மலர் இட்டு இரு போதும்

பரிவு மிகுத்து உன தாளைப்

.. பணிய எனக்கு அருளாயே;

அரி பிரமற்கு அரியானே;

.. அடியவருக்கு எளியானே;

கரிய மிடற்று அமுதே; எம்

.. கயிலைமலைப் பெருமானே.


பெரிய வினைத்தொடர் போகப் - கொடிய வினையெல்லாம் நீங்குமாறு;

பிணை-மலர் இட்டு இரு போதும் பரிவு மிகுத்து உன தாளைப் பணிய எனக்கு அருளாயே - தொடுத்த மலர்களை இட்டு இருவேளையும் அன்போடு உன் திருவடியை நான் வழிபடுமாறு எனக்கு அருள்வாயாக; ("மலர்" = சொல்மலர் என்று கொண்டு, பிணைமலர் = பாமாலை என்றும் பொருள்கொள்ளல் ஆம்); (பிணைத்தல் - தொடுத்தல்); (இரு போதும் - (காலை மாலை / இரவு பகல்) இரு வேளையும்); (பரிவு - அன்பு; பக்தி); (உன தாள் - உனது திருவடி); (அ - ஆறாம் வேற்றுமை உருபு);

அரி பிரமற்கு அரியானே - திருமால் பிரமன் இவர்களால் அறிய ஒண்ணாதவனே;

அடியவருக்கு எளியானே - பக்தர்களால் எளிதில் அடையப்படுபவனே;

கரிய மிடற்று அமுதே - நீலகண்டனே! அமுதம் போல்பவனே; (மிடறு - கண்டம்);

எம் கயிலைமலைப் பெருமானே - எம் கயிலைநாதனே;


வி. சுப்பிரமணியன்

-------------------------------- -------------------------------

03.05.111 – இடைமருதூர் - கருவம் மனத்து எழ நாளும் - (வண்ணம்)

03.05.111 – இடைமருதூர் - கருவம் மனத்து எழ நாளும் - (வண்ணம்)

2009-02-23

3.5.111) கருவம் மனத்து எழ நாளும் - (இடைமருதூர் - திருவிடைமருதூர்)

--------------------------------------------------

(வண்ணவிருத்தம்;

தனதனனத் .. தனதான )

(இரவுபகற் பலகாலும் - திருப்புகழ் - திருவருணை)


கருவ(ம்)மனத் .. தெழநாளும்

.. கடுவினையைப் .. புரியாமல்

திருமலியத் .. தமிழாலே

.. திருவடியைப் .. புகழேனோ

உருவிலுமைக் .. கிடமீவாய்

.. ஒளிமதியைப் .. புனைவோனே

இருவினையைக் .. களைவோனே

.. இடைமருதிற் .. பெருமானே.


பதம் பிரித்து:

கருவம் மனத்து எழ, நாளும்

.. கடுவினையைப் புரியாமல்,

திரு மலியத் தமிழாலே

.. திருவடியைப் புகழேனோ;

உருவில் உமைக்கு இடம் ஈவாய்;

.. ஒளிமதியைப் புனைவோனே;

இருவினையைக் களைவோனே;

.. இடைமருதில் பெருமானே.


கருவம் மனத்து எழ நாளும் கடுவினையைப் புரியாமல் - மனத்தில் செருக்கு மிக, அதனால் தினமும் கொடிய செயல்களைச் செய்து உழலாமல்; (கருவம் - கர்வம்; செருக்கு); (கடுமை - கொடுமை);

திரு மலியத் தமிழாலே திருவடியைப் புகழேனோ - திரு மிகும்படி தேவாரம் முதலிய தமிழ்ப்பாமாலைகளால் உன் திருவடியைப் புகழ்வேனோ? அருள்வாயாக; (திரு - செல்வம்; பாக்கியம்; தெய்வத்தன்மை); (மலிதல் - மிகுதல்); (திருமலியத் தமிழாலே - 1. திரு மலியத் தமிழாலே; 2. திரு மலி அத்-தமிழாலே; "திரு மலி அத்-தமிழ்" = தேவாரம் திருவாசகம் முதலியன);

உருவில் உமைக்கு இடம் ஈவாய் - திருமேனியில் இடப்பாகத்தை உமைக்கு அளித்தவனே; (உரு - மேனி; வடிவு);

ஒளிமதியைப் புனைவோனே - ஒளி திகழும் சந்திரனை அணிந்தவனே; (அப்பர் தேவாரம் - 5.24.1 - "ஒற்றி யூரும் ஒளிமதி பாம்பினை");

இருவினையைக் களைவோனே - பக்தர்களது இருவினையைத் தீர்ப்பவனே; (இருவினை - புண்ணிய பாவங்கள்);

இடைமருதில் பெருமானே - திருவிடைமருதூரில் எழுந்தருளிய பெருமானே;


வி. சுப்பிரமணியன்

-------------------------------- -------------------------------

Friday, August 7, 2020

03.05.110 – இடைமருதூர் - சரிவழியைக் கருதாமல் - (வண்ணம்)

03.05.110 – இடைமருதூர் - சரிவழியைக் கருதாமல் - (வண்ணம்)

2009-02-23

3.5.110) சரிவழியைக் கருதாமல் - (இடைமருதூர் - திருவிடைமருதூர்)

--------------------------------------------------

(வண்ணவிருத்தம்;

தனதனனத் .. தனதான )

(இரவுபகற் பலகாலும் - திருப்புகழ் - திருவருணை)


சரிவழியைக் .. கருதாமல்

.. தவறுகளைத் .. தவிராமல்

திரியுமனத் .. தமியேனும்

.. தெளிவுதனைப் .. பெறுவேனோ

தெரிவைதனக் .. கிடமீவாய்

.. சிலைவளைவித் .. தரண்வேவ

எரிகணையைத் .. தொடுவோனே

.. இடைமருதிற் .. பெருமானே.


பதம் பிரித்து:

சரி வழியைக் கருதாமல்,

.. தவறுகளைத் தவிராமல்,

திரியும் மனத் தமியேனும்

.. தெளிவுதனைப் பெறுவேனோ;

தெரிவைதனக்கு இடம் ஈவாய்;

.. சிலை வளைவித்து அரண் வேவ

எரி கணையைத் தொடுவோனே;

.. இடைமருதில் பெருமானே.


சரி வழியைக் கருதாமல் - நல்ல வழியிற் செல்ல எண்ணாமல்;

தவறுகளைத் தவிராமல் - குற்றங்களை நீங்காமல்;

திரியும் மனத் தமியேனும் - அலைகின்ற மனத்தையுடைய கதியற்ற நானும்; (திரிதல் - அலைதல்; வேறுபடுதல்; கெடுதல்; மயங்குதல்); (தமியேன் - கதியற்ற நான்);

தெளிவுதனைப் பெறுவேனோ - தெளிவைப் பெறுவேனோ? அருள்வாயாக;

தெரிவைதனக்கு இடம் ஈவாய் - உமைக்குத் திருமேனியில் இடப்பக்கத்தை அளித்தவனே; (தெரிவை - பெண் - உமை); (இடம் - இடப்பக்கம்);

சிலை வளைவித்து அரண் வேவ எரி கணையைத் தொடுவோனே - வில்லை வளைத்து முப்புரங்களும் வெந்து அழியும்படி சுடுகின்ற அம்பை எய்தவனே; (சிலை - வில்; மலை); (வளைவித்தல் - வளைத்தல்);

இடைமருதில் பெருமானே - திருவிடைமருதூரில் எழுந்தருளிய பெருமானே;


வி. சுப்பிரமணியன்

-------------------------------- -------------------------------