Showing posts with label மா கூவிளம் விளம் விளம் விளம் மாங்காய். Show all posts
Showing posts with label மா கூவிளம் விளம் விளம் விளம் மாங்காய். Show all posts

Thursday, May 28, 2026

P.496 - வீரவநல்லூர் - பூ மிடைந்த நன்மாலைகள்

2020-01-30

P.496 - வீரவநல்லூர்

(தாமிரபரணிக்-கரையில் உள்ள ஊர்)

-----------------

(அறுசீர் விருத்தம் - மா கூவிளம் விளம் விளம் விளம் மாங்காய் - வாய்பாடு;

முதற்சீர் ஈற்றில் குறில் / குறில்+ஒற்று)

(சம்பந்தர் தேவாரம் - 2.106.1 - "என்ன புண்ணியம் செய்தனை");

* (ம்) - புணர்ச்சியில் மகர-ஒற்றுக் கெடும் இடம்;


1)

பூமி டைந்தநன் மாலைகள் புனைந்தவர் புகழ்மலி திருநாமம்

நாமி டைந்திட நாள்தொறும் தொழுதெழ நம்வினை அவைதீர்ப்பார்

பூமி நாதனார் மரகதக் கொடியுடன் புரிந்துறை பதியென்பர்

வீமி கும்பொழில் தனிற்சிறை வண்டறை வீரவ நல்லூரே.


பூ மிடைந்த நன்மாலைகள் புனைந்து, அவர் புகழ் மலி திருநாமம் நா மிடைந்திட - பூக்கள் செறிந்த நல்ல மாலைகளைத் தொடுத்துச் சூட்டி, அவரது புகழ் மிக்க திருப்பெயரை நாவில் அணிந்து; (மிடைதல் - செறிதல்; நிறைதல்; கலத்தல்);

நாள்தொறும் தொழுதெழ நம் வினை-அவை தீர்ப்பார் - தினமும் வழிபட்டால் நம் வினைகளையெல்லாம் தீர்ப்பவரான;

பூமிநாதனார் மரகதக்கொடியுடன் புரிந்து உறை பதி என்பர் - பூமிநாதர் மரகதவல்லியுடன் விரும்பி உறைகின்ற தலம் என்பர்; (புரிதல் - விரும்புதல்); (கொடி - கொடி போன்ற பெண்); (* பூமிநாதர், மரகதாம்பிகை - வீரவநல்லூரில் இறைவன் இறைவி திருநாமங்கள்); (பெரியபுராணம் - திருநாவுக்கரசர் புராணம் - 12.21.379 - "மரகதக் கொடியுடன் விளங்கும் தெள்ளு பேரொளிப் பவளவெற்பென இடப்பாகம் கொள்ளு மாமலையாளுடன்"); (சம்பந்தர் தேவாரம் - 2.9.6 - "மழபாடியைப் புரிந்து கைதொழுமின்");

வீ மிகும் பொழில்தனில் சிறைவண்டு அறை வீரவநல்லூரே - மலர்கள் நிறைந்த சோலையில் அழகிய சிறகுகளை உடைய வண்டுகள் ஒலிக்கின்ற வீரவநல்லூர்; (வீ - மலர்; பூ); (சிறை - சிறகு); (அறைதல் - ஒலித்தல்);


2)

தீதி லாமலர் மாலைகள் இட்டவர் சேவடிப் புகழ்நாமம்

ஓதி நாள்தொறும் உருகிடும் அன்பருக் குறுதுணை எனநிற்பார்

காதி னிற்குழை தோடணி சுந்தரர் கருதிடும் பதியென்பர்

மேதி னிப்பசி தீர்வயல் புடையணி வீரவ நல்லூரே.


தீது இலா மலர்மாலைகள் இட்டு, அவர் சேவடிப்-புகழ் நாமம் ஓதி நாள்தொறும் உருகிடும் அன்பருக்கு உறுதுணை என நிற்பார் - சிறந்த பூமாலைகளைச் சூட்டி, அவரது சிவந்த திருவடிப் புகழையும் திருநாமத்தையும் தினமும் ஓதி மனம் உருகுகின்ற பக்தர்களுக்கு உற்ற துணையாகிக் காப்பவர்; (புகழ்நாமம் - புகழும் நாமமும் - உம்மைத்தொகை);

காதினில் குழை தோடு அணி சுந்தரர் கருதிடும் பதி என்பர் - ஒரு காதில் குழையும், ஒரு காதில் தோடும் அணிந்த அழகரான சிவபெருமானார் விரும்பி உறையும் தலம் என்பர்;

மேதினிப்-பசி தீர் வயல் புடை அணி வீரவநல்லூரே - உலகின் பசியைத் தீர்க்கின்ற வயல்கள் சூழ்ந்த வீரவநல்லூர்; (மேதினி - பூமி);


3)

பறிம லர்த்தொடை பதமலர் இட்டவர் பழவினை அவைதீர்ப்பார்

மறியை வன்னியை ஏந்திய மாண்பினர் மலைமகள் ஒருபங்கர்

பொறிய ராவினைப் புலியதள் மிசையசை புகழினர் பதியென்பர்

வெறிக மழ்ந்திடும் பொழில்புடை சூழ்தரும் வீரவ நல்லூரே.


பறி-மலர்த்தொடை பதமலர் இட்டவர் பழவினை-அவை தீர்ப்பார் - அன்று பறித்த புதிய மலர்களால் தொடுத்த மாலையைத் திருவடித்தாமரையில் சூட்டியவர்களது பழைய வினையைத் தீர்ப்பவர்; (பறிமலர் - பறித்த மலர்; வினைத்தொகை);

மறியை வன்னியை ஏந்திய மாண்பினர் - மான்கன்றையும் நெருப்பையும் கையில் ஏந்தியவர்; (மறி - மான் முதலியவற்றின் கன்று); (வன்னி - தீ);

மலைமகள் ஒரு பங்கர் - உமையை ஒரு பாகமாக உடையவர்;

பொறி-அராவினைப் புலி-அதள்மிசை அசை புகழினர் பதி என்பர் - புள்ளிகளையுடைய பாம்பைப் புலித்தோல் ஆடையின்மேல் கட்டிய புகழுடைய சிவபெருமானார் உறையும் தலம் என்பர்; (பொறி - புள்ளி); (அரா - பாம்பு); (அதள் - தோல்); (அசைத்தல் - கட்டுதல்); (அப்பர் தேவாரம் - 4.35.6 - "பொறியர வரையில் ஆர்த்து");

வெறி கமழ்ந்திடும் பொழில் புடை சூழ்தரும் வீரவநல்லூரே - மணம் கமழும் சோலைகளால் சூழப்பெற்ற வீரவநல்லூர்; (வெறி - வாசனை); (தருதல் - ஒரு துணைவினை);


4)

அக(ம்)ம கிழ்ந்தடி தொழுதெழும் அடியவர் அருவினை அவைதீர்ப்பார்

உகளு(ம்) மான்மறி ஒண்மழு ஏந்தினார் உம்பர்கள் இடர்தீர

இகலி யார்புர(ம்) மூன்றையும் எய்தவர் இனிதுறை பதியென்பர்

மிகுவ ளந்தரும் பொருநையின் தென்கரை வீரவ நல்லூரே.


அக(ம்)மகிழ்ந்து அடி தொழுதெழும் அடியவர் அருவினைஅவை தீர்ப்பார் - உளம் மகிழ்ந்து திருவடியை வழிபடும் பக்தர்களது அரிய வினைகளையெல்லாம் தீர்ப்பவர்;

உகளும் மான்மறி ஒண்-மழு ஏந்தினார் - தாவுகின்ற மான்கன்றையும் ஒளியுடைய மழுவையும் ஏந்தியவர்; (உகள்தல் - தாவுதல்); (சம்பந்தர் தேவாரம் - 2.109.4 - "நீள்வயற் கயலுகள் கோட்டூர்");

உம்பர்கள் இடர் தீர இகலியார் புரம் மூன்றையும் எய்தவர் இனிது உறை பதி என்பர் - தேவர்களது துன்பம் தீரும்படி, அவர்களைப் பகைத்த அசுரர்களது முப்புரங்களையும் ஒரு கணையால் எய்து அழித்தவரான சிவபெருமானார் இனிதே உறையும் தலம் என்பர்; (உம்பர் - தேவர்); (இகலியார் - பகைவர்);

மிகுவளம் தரும் பொருநையின் தென்கரை வீரவநல்லூரே - மிகுந்த வளத்தைத் தருகின்ற தாமிரபரணி ஆற்றின் தென்கரையில் உள்ள வீரவநல்லூர்;


5)

கரவி லாதடி கைதொழு காதலர் கருதிய வரமீவார்

அரவை நாணென வில்லினில் ஆர்த்தவர் அணிகழல் அவையார்ப்ப

இரவில் ஆடிடும் எல்லையில் கூத்தினர் இனிதுறை பதியென்பர்

விரைக மழ்ந்திடும் பொழில்புடை சூழ்தரும் வீரவ நல்லூரே.


கரவு இலாது அடி கைதொழு காதலர் கருதிய வரம் ஈவார் - வஞ்சம் இன்றித் திருவடியை வணங்கும் அன்பர்கள் விரும்பிய வரங்களை அருள்பவர்; (கரவு - வஞ்சம்); (காதலர் - அன்பர்);

அரவை நாண் என வில்லினில் ஆர்த்தவர் - முப்புரத்தை எரித்த நாளில், மேருமலை என்ற வில்லில் வாசுகி என்ற பாம்பை நாணாகக் கட்டியவர்;

அணிகழல்அவை ஆர்ப்ப இரவில் ஆடிடும் எல்லை-இல் கூத்தினர் இனிது உறை பதி என்பர் - அணிந்த அழகிய கழல்கள் ஒலிசெய்ய நள்ளிருளில் அளவில்லாத திருநடம் செய்யும் சிவபெருமானார் இனிதே உறையும் தலம் என்பர்; (அணி - அழகு; அணிதல் - பூண்தல்); (ஆர்த்தல் - ஒலித்தல்); (எல்லை - அளவு; முடிவு);

விரை கமழ்ந்திடும் பொழில் புடை சூழ்தரும் வீரவநல்லூரே - மணம் கமழும் சோலைகளால் சூழப்பெற்ற வீரவநல்லூர்; (விரை - வாசனை);


6)

களையி ழந்துகண் குழிவதன் முன்னமே கழல்தொழும் அடியார்தம்

தளையை மாய்த்துயர் செல்வமும் தருபவர் சடைமிசை மதிசூடி

இளைய வெள்விடை ஏறிய இறையவர் இனிதுறை பதியென்பர்

விளையு(ம்) நெல்திகழ் வயல்புடை சூழ்தரும் வீரவ நல்லூரே.


களை இழந்து கண் குழிவதன் முன்னமே கழல் தொழும் அடியார்தம் தளையை மாய்த்து உயர் செல்வமும் தருபவர் - தங்கள் உடல் பொலிவிழந்து கண்கள் குழியும் முதுமைக்காலம் வருவதன் முன்னரே திருவடியை வழிபடுகின்ற அடியவர்களுடைய பந்தங்களை அழித்து உயர்ந்த செல்வத்தையும் தருபவர்;

சடைமிசை மதிசூடி - சடையின்மேல் பிறைச்சந்திரனைச் சூடியவர்;

இளைய வெள்விடை ஏறிய இறையவர் இனிது உறை பதி என்பர் - இளைய வெண்ணிற இடபத்தை வாகனமாக உடைய சிவபெருமானார் இனிதே உறையும் தலம் என்பர்; (சம்பந்தர் தேவாரம் - 3.18.6 - "நீள்சடை இறையவர்");

விளையும் நெல் திகழ் வயல் புடை சூழ்தரும் வீரவநல்லூரே - நெற்பயிர் செழித்து வளரும் வயல்களால் சூழப்பெற்ற வீரவநல்லூர்;


7)

தங்க ரங்களைக் கூப்பிய அடியவர் தாழ்வற அருள்செய்வார்

மங்கை மாரிடும் உண்பலி தேர்ந்துழல் மாசுண அரைநாணார்

கங்கை நுங்கிய சடையினர் விடையினர் கருதிடும் பதியென்பர்

வெங்க ளைச்சிறை வண்டுகள் உண்டறை வீரவ நல்லூரே.


தம் கரங்களைக் கூப்பிய அடியவர் தாழ்வு அற அருள்செய்வார் - தம் கைகளைக் குவித்து வணங்கிய அடியவர்களது குறைகளெல்லாம் தீர அருள்செய்பவர்;

மங்கைமார் இடும் உண்பலி தேர்ந்துழல் மாசுண அரைநாணார் - பெண்கள் இடும் பிச்சையை ஏற்று உழலும், பாம்பை அரைநாணாகக் கட்டியவர்; ("பிச்சையேற்று உழலும், திகம்பரராகிப் பாம்பை அரையில் கட்டிய, நாணமற்றவர்" என்றும் பொருள்கொள்ள நின்றது); (பலி - பிச்சை); (மாசுணம் - பாம்பு); (நாணார் - 1. நாணாக உடையவர்; 2. வெட்கப்படாதவர்);

கங்கை நுங்கிய சடையினர் - கங்கையை விழுங்கிய சடையை உடையவர்; (நுங்குதல் - விழுங்குதல்; ஆரப் பருகுதல்);

விடையினர் கருதிடும் பதி என்பர் - இடபவாகனரான சிவபெருமானார் விரும்பி உறையும் தலம் என்பர்;

வெங்களைச் சிறைவண்டுகள் உண்டு அறை வீரவநல்லூரே - விரும்பத்தக்க தேனை அழகிய சிறகுகளையுடைய வண்டுகள் உண்டு ஒலிக்கின்ற (சோலை சூழ்ந்த) வீரவநல்லூர்; (வெம்மை - விருப்பம்); (களை - கள்ளை - இடைக்குறை; கள் - பூவிலிருக்கும் தேன்); (சம்பந்தர் தேவாரம் - 1.26.1 - "வெங்கள் விம்மு வெறியார் பொழிற்சோலை");


8)

வேக மாய்மலை பேர்த்தவன் வீரிட விரல்கொடு நெரிபாதர்

நாக(ம்) மாமதி செஞ்சடை வைத்தவர் நான்மறை மொழிநாவர்

பாக(ம்) மாதமர் பண்பினர் வெண்மழுப் படையினர் பதியென்பர்

மேக(ம்) நல்கிய புனலடை வயலணி வீரவ நல்லூரே.


வேகமாய் மலை பேர்த்தவன் வீரிட விரல்கொடு நெரி-பாதர் - சினம் உடையவனாகிக் கயிலைமலையைப் பெயர்த்த இராவணன் பெரிதும் கத்தி அழும்படி திருப்பாதவிரலால் அவனை நசுக்கியவர்; (வேகம் - கோபம்); (வீரிடுதல் - திடீரென்று கத்துதல்); (கொடு - மூன்றாம்வேற்றுமை உருபு); (நெரித்தல் - நசுக்குதல்);

நாகம் மாமதி செஞ்சடை வைத்தவர் - பாம்பையும் அழகிய திங்களையும் சிவந்த சடையின்மேல் ஒன்றாக வைத்தவர்;

நான்மறை மொழி நாவர் - நால்வேதங்களைப் பாடியருளியவர்;

பாகம் மாது அமர் பண்பினர் - ஒரு பாகத்தில் உமாதேவியை விரும்பியவர்; (அமர்தல் - விரும்புதல்; இருத்தல்);

வெண்மழுப் படையினர் பதி என்பர் - வெண்மையான மழுவாயுதத்தை ஏந்திய சிவபெருமானார் உறையும் தலம் என்பர்;

மேகம் நல்கிய புனல் அடை வயல் அணி வீரவநல்லூரே - மேகம் பொழிந்த நீர் அடைகின்ற வயல்கள் நிறைந்த வீரவநல்லூர்;


9)

முன்ம யக்கொடு மாலயன் நேடிட மூளெரி எனநீண்டார்

தென்மொ ழித்தொடை கொண்டடி போற்றிடும் சீலர்தம் வினைதீர்ப்பார்

புன்ச டைப்பிறை புற்றர வம்புனை புண்ணியர் பதியென்பர்

மென்சி றைக்கரு வண்டறை பொழிலணி வீரவ நல்லூரே.


முன் மயக்கொடு மால் அயன் நேடிட மூள் எரி என நீண்டார் - முன்னொருநாள் அறிவின் மயக்கத்தால் திருமாலும் பிரமனும் தேடும்படி மூண்டெழுந்த ஜோதிப்பிழம்பாகி ஓங்கியவர்; (நேடுதல் - தேடுதல்);

தென்மொழித்தொடை-கொண்டு அடி போற்றிடும் சீலர்தம் வினை தீர்ப்பார் - இனிய தமிழ்ப்பாமாலைகளால் திருவடியை வழிபடும் சீலர்களது வினையைத் தீர்ப்பவர்; (தென் - இனிமை; தெற்கு); (தென்மொழி - தமிழ்); (தொடை - செய்யுள்; மாலை);

புன்சடைப் பிறை புற்றரவம் புனை புண்ணியர் பதி என்பர் - செஞ்சடையில் பிறையையும் புற்றில் வாழும் இயல்புடைய பாம்பையும் அணிந்த புண்ணியமூர்த்தியான சிவபெருமானார் உறையும் தலம் என்பர்; (புன்மை - புகர் நிறம்); (புனைதல் - அணிதல்);

மென்சிறைக்- கருவண்டு அறை பொழில் அணி வீரவநல்லூரே - மெல்லிய சிறகுகளையுடைய கரிய வண்டுகள் ஒலிக்கின்ற சோலை சூழ்ந்த வீரவநல்லூர்; (சிறை - சிறகு); (சம்பந்தர் தேவாரம் - 2.78.11 - "மென்சிறைவண் டியாழ்முரல் விளநகர்த்துறை மேவிய");


10)

மிண்டு நெஞ்சினர் வெற்றுரை பேசிடும் வீணர்சொல் விடுவீரே

மண்டும் அன்புடை மாணியைக் காத்திட மறலியை உதைபாதர்

அண்ட நாயகர் அடியவர் இடர்களை அங்கணர் பதியென்பர்

விண்ட போதமர் வண்டறை பொழிலணி வீரவ நல்லூரே.


மிண்டு-நெஞ்சினர் வெற்றுரை பேசிடும் வீணர் சொல் விடுவீரே - கல்நெஞ்சர்களும் பொருளற்ற சொற்களைப் பேசுபவர்களுமான வீணர்களது பேச்சை நீங்கள் மதிக்கவேண்டா; (மிண்டு - திண்மை; குற்றம்); (விடுவீர் - இங்கே, விடுமின் - விடுங்கள் - என்ற பொருளில்);

மண்டும் அன்புடை மாணியைக் காத்திட மறலியை உதை-பாதர் - மிகுகின்ற அன்புடைய மார்க்கண்டேயரைக் காப்பதற்காகக் காலனை உதைத்த திருப்பாதர்; (மண்டுதல் - அதிகமாதல்); (மறலி - இயமன்); (அப்பர் தேவாரம் - 6.74.10 - "வன்கூற்றின் உயிர்மாள உதைத்தான்தன்னை");

அண்ட-நாயகர் - அண்டங்களுக்கெல்லாம் தலைவர்; (சம்பந்தர் தேவாரம் - 3.120.10 - "அண்டநாயகன் தான் அமர்ந்து வீற்றிருந்த");

அடியவர் இடர் களை அங்கணர் பதி என்பர் - அடியார்களது துன்பத்தைத் தீர்க்கும் அருட்கண்ணுடைய சிவபெருமானார் உறையும் தலம் என்பர்; (அங்கணன் - அருட்கண்ணுடையவன் - சிவன்);

விண்ட போது அமர் வண்டு அறை பொழில் அணி வீரவநல்லூரே - மலர்ந்த பூக்களை விரும்பும் வண்டுகள் ஒலிக்கின்ற சோலை சூழ்ந்த வீரவநல்லூர்; (விள்ளுதல் - மலர்தல்); (போது - பூ); (அமர்தல் - விரும்புதல்);


11)

வேலை ஏந்திய மைந்தனைப் பெற்றவர் விண்ணவர் தொழுதேத்த

வேலை நஞ்சணி மிடறினர் வேள்பட நோக்கிய பெருமானார்

காலை ஞாயிறு காட்டிய மேனியர் கருதிடும் பதியென்பர்

மேலை வெற்பினில் வீழ்புனல் அடைவயல் வீரவ நல்லூரே.


வேலை ஏந்திய மைந்தனைப் பெற்றவர் - வேலை ஏந்திய முருகனை மகனாகப் பெற்றவர்;

விண்ணவர் தொழுதேத்த வேலை-நஞ்சு அணி மிடறினர் - தேவர்கள் வணங்கி ஏத்தப் பாற்கடலில் தோன்றிய ஆலகாலத்தை உண்டு கண்டத்தில் அணிந்தவர்; (வேலை - கடல்); (மிடறு - கண்டம்);

(இலக்கணக் குறிப்பு : "விண்ணவர் தொழுதேத்த" என்ற சொற்றொடரை இடைநிலைத்-தீவகமாக இருபுறமும் இயைத்தும் பொருள்கொள்ளலாம்; விண்ணவர் தொழுதேத்த வேலை ஏந்திய மைந்தனைப் பெற்றவர் & விண்ணவர் தொழுதேத்த வேலை-நஞ்சு அணி மிடறினர்);

வேள் பட நோக்கிய பெருமானார் - மன்மதன் அழியும்படி நெற்றிக்கண்ணால் பார்த்த பெருமானார்; (சம்பந்தர் தேவாரம் - 2.85.8 - "வேள்பட விழிசெய்தன்று");

காலை-ஞாயிறு காட்டிய மேனியர் கருதிடும் பதி என்பர் - விடியற்காலத்து இளஞ்சூரியன் போன்ற செம்மேனியரான சிவபெருமானார் விரும்பி உறையும் தலம் என்பர்; (காலை - விடியற்காலம்); (அப்பர் தேவாரம் - 6.97.2 - "எரிகின்ற இளஞாயி றன்ன மேனி");

மேலை-வெற்பினில் வீழ்-புனல் அடை-வயல் வீரவநல்லூரே - மேற்கே உள்ள மலையில் விழுந்த மழைநீர் (தாமிரபரணி ஆறாகி) வந்து அடைகின்ற வயல் சூழ்ந்த வீரவநல்லூர்; (மேலை - மேற்கில் உள்ள); (வெற்பு - மலை); (வீழ்தல் - விழுதல்);


வி. சுப்பிரமணியன்

-------------- --------------


Tuesday, April 1, 2025

P.374 - பாதிரிப்புலியூர் - கூடு வஞ்சகர்

2016-12-22

P.374 - பாதிரிப்புலியூர் (திருப்பாதிரிப்புலியூர்)

---------------------------------

(அறுசீர் விருத்தம் - மா கூவிளம் விளம் விளம் விளம் மாங்காய் - வாய்பாடு;

முதற்சீர் ஈற்றில் குறில்/குறில்+ஒற்று)

(சம்பந்தர் தேவாரம் - 2.106.1 - "என்ன புண்ணியம் செய்தனை");


1)

கூடு வஞ்சகர் எவ்வழி அன்பரைக் கொல்வழி என்றெண்ணி

ஆடு வண்திரை ஆழியில் விழுத்தினும் அகத்தினில் அரன்நாமம்

பாடு நாவினுக் கரசருக் கருளிய பாதிரிப் புலியூரன்

தோடு காட்டிய செவியனின் தொண்டரைத் தொல்வினை தொடராவே.


கூடு வஞ்சகர் எவ்வழி அன்பரைக் கொல்-வழி என்று எண்ணி - மிகுந்த வஞ்சனை உடைய சமணர்கள் திரண்டு எப்படித் திருநாவுக்கரசரைக் கொல்வது என்று சிந்தித்து; (கூடுதல் - மிகுதல்; திரளுதல்);

ஆடு வண்-திரை ஆழியில் விழுத்தினும் - அலைகள் ஆடுகின்ற ஆழ்கடலில் தள்ளியபொழுதும்; (விழுத்துதல் - விழுத்தல் - விழச்செய்தல்);

அகத்தினில் அரன் நாமம் பாடு நாவினுக்கு அரசருக்கு அருளிய பாதிரிப் புலியூரன் - தம் உள்ளத்தில் ஹரன் திருநாமமான நமச்சிவாய என்ற திருவைந்தெழுத்தைப் பாடிய திருநாவுக்கரசருக்கு அருள்செய்த, திருப்பாதிரிப்புலியூரில் உறைகின்ற சிவபெருமான்; (* அப்பர் தேவாரம் - 4.11.1 - "சொற்றுணை வேதியன்" பதிக வரலாற்றைக் காண்க);

தோடு காட்டிய செவியனின் தொண்டரைத் தொல்வினை தொடராவே - ஒரு காதில் தோட்டினை அணிந்த ஈசன் அடியவர்களைப் பழவினைகள் தொடர்ந்துவந்து பற்றமாட்டா; (தொல் வினை - பழைய வினை);


2)

கரவு மிக்கவெஞ் சமணர்கள் ஒருபெருங் கல்லினொ டுடல்பூட்டித்

திரையில் ஆழ்த்தினும் செஞ்சடை அண்ணலின் திருப்பெயர் எழுத்தஞ்சே

பரவு நாவினுக் கரசருக் கருளிய பாதிரிப் புலியூரன்

இரவில் ஆடிடும் ஏந்தலின் தொண்டரை இருவினை எய்தாவே.


கரவு மிக்க வெஞ்-சமணர்கள் ஒரு பெரும்-கல்லினொடு உடல் பூட்டித் திரையில் ஆழ்த்தினும் - வஞ்சம் மிக்க கொடிய சமணர்கள் ஒரு பெரிய கல்லோடு திருநாவுக்கரசரின் மேனியைக் கட்டிக் கடலில் தள்ளியபொழுதும்; (கரவு - வஞ்சனை); (திரை - கடல்); (பூட்டுதல் - பிணைத்தல்; இறுகக்கட்டுதல்); (அப்பர் தேவாரம் - 5.72.7 - "கல்லினோடெனைப் பூட்டி அமண்கையர் ஒல்லை நீர்புக நூக்க");

செஞ்சடை அண்ணலின் திருப்பெயர் எழுத்தஞ்சே பரவு - சிவந்த சடையை உடைய பெருமானின் திருநாமத்து எழுத்து ஐந்தையும் துதித்த;

நாவினுக்கு அரசருக்கு அருளிய பாதிரிப் புலியூரன் - திருநாவுக்கரசருக்கு அருள்செய்த, திருப்பாதிரிப்புலியூரில் உறைகின்ற சிவபெருமான்;

இரவில் ஆடிடும் ஏந்தலின் தொண்டரை இருவினை எய்தாவே - நள்ளிருளில் கூத்தாடும் தலைவன் அடியவர்களை வல்வினை அடையமாட்டா;


3)

திணிந்த நெஞ்சுடை அமணர்கள் கொன்றிடத் திரையிடை எறிந்தாலும்

துணிந்த நெஞ்சொடு தூயவெண் ணீறணி சுந்தரன் துணைத்தாளே

பணிந்த நாவினுக் கரசருக் கருளிய பாதிரிப் புலியூரன்

மணந்த மாதொரு பாகனின் தொண்டரை வல்வினை வருத்தாவே.


திணிந்த நெஞ்சுடை அமணர்கள் கொன்றிடத் திரையிடை எறிந்தாலும் - கல்-நெஞ்சம் உடைய சமணர்கள் திருநாவுக்கரசரைக் கொல்வதற்காக அவரைக் கடலில் வீசியபொழுதும்; (திணிதல் - இறுகுதல்); (அமணர் - சமணர்); (திரை - கடல்);

துணிந்த நெஞ்சொடு தூய வெண்-நீறு அணி சுந்தரன் துணைத்-தாளே பணிந்த - கலக்கம் இல்லாத மனத்தால் தூய திருநீற்றைப் பூசும் அழகனான சிவபெருமானது காக்கின்ற இரு-திருவடிகளையே வணங்கிய; (துணை - இரண்டு; உதவி; காப்பு);

நாவினுக்கு அரசருக்கு அருளிய பாதிரிப் புலியூரன் - திருநாவுக்கரசருக்கு அருள்செய்த, திருப்பாதிரிப்புலியூரில் உறைகின்ற சிவபெருமான்;

மணந்த மாதொரு பாகனின் தொண்டரை வல்வினை வருத்தாவே - உமாதேவியை ஒரு பாகமாக உடையவன் அடியவர்களை வல்வினைகள் துன்புறுத்தமாட்டா; (மணந்த மாது - மனைவி - உமாதேவி); (வருத்துதல் - வருந்தச்செய்தல்);


4)

குற்ற நெஞ்சினர் கடலிடை வீசினும் கொள்கையில் நிலைநின்றே

ஒற்றை வெள்விடை ஊர்தியன் பேர்தனை உறுதுணை எனநெஞ்சால்

பற்று நாவினுக் கரசருக் கருளிய பாதிரிப் புலியூரன்

வற்றல் ஓட்டினை ஏந்தியின் தொண்டரை வல்வினை வருத்தாவே.


குற்ற நெஞ்சினர் கடலிடை வீசினும் - குற்றம் மிக்க மனத்தை உடைய சமணர்கள் திருநாவுக்கரசரைக் கடலில் வீசியபொழுதும்;

கொள்கையில் நிலைநின்றே - தம் கொள்கையில் உறுதியாக இருந்து;

ஒற்றை வெள்விடை ஊர்தியன் பேர்தனை உறுதுணை என நெஞ்சால் பற்று - ஒப்பற்ற வெள்ளை ஏற்றை வாகனமாக உடைய பெருமானது திருநாமத்தை உற்ற துணை என்று மனத்தால் பற்றிய;

நாவினுக்கு அரசருக்கு அருளிய பாதிரிப் புலியூரன் - திருநாவுக்கரசருக்கு அருள்செய்த, திருப்பாதிரிப்புலியூரில் உறைகின்ற சிவபெருமான்;

வற்றல் ஓட்டினை ஏந்தியின் தொண்டரை வல்வினை வருத்தாவே - கையில் வாடிய மண்டையோட்டை ஏந்திய சிவபெருமான் அடியவர்களை வல்வினைகள் துன்புறுத்தமாட்டா; (ஓடு - மண்டையோடு); (வருத்துதல் - வருந்தச்செய்தல்);


5)

உன்னி வஞ்சகர் கல்லினைப் பூட்டியோர் உததியில் எறிந்தக்கால்

கன்னல் தேனென இனிமையைப் பயந்திடும் கண்ணுதல் திருநாமம்

பன்னு நாவினுக் கரசருக் கருளிய பாதிரிப் புலியூரன்

சென்னி மேற்பிறை சூடியின் தொண்டரைத் தீவினை சேராவே.


உன்னி வஞ்சகர் கல்லினைப் பூட்டி ஓர் உததியில் எறிந்தக்கால் - வஞ்சனையுடைய சமணர்கள் திருநாவுக்கரசரைக் கொல்லும் உபாயத்தை எண்ணி ஒரு கல்லோடு அவரைக் கட்டிக் கடலில் எறிந்தபொழுது; (உன்னுதல் - எண்ணுதல்); (ஓர் - அசை); (உததி - கடல்);

கன்னல் தேன் என இனிமையைப் பயந்திடும் கண்ணுதல் திருநாமம் - கரும்பும் தேனும் போல இனிமையைத் தரும் நெற்றிக்கண்ணன் திருநாமத்தை; (கன்னல் - கரும்பு); (பயத்தல் - அளித்தல்); (பன்னுதல் - பாடுதல்; புகழ்தல்; சொல்லுதல்);

பன்னு நாவினுக்கு அரசருக்கு அருளிய பாதிரிப் புலியூரன் - பாடிய திருநாவுக்கரசருக்கு அருள்செய்த, திருப்பாதிரிப்புலியூரில் உறைகின்ற சிவபெருமான்;

சென்னிமேல் பிறைசூடியின் தொண்டரைத் தீவினை சேராவே - திருமுடிமேல் சந்திரனைத் தரித்த சிவபெருமான் அடியவர்களைப் பாவங்கள் வந்தடையமாட்டா;


6)

வாசம் ஆர்மலர் வாளிகள் ஐந்துடை மன்மதன் ஆகத்தை

நாசம் ஆக்கிய கண்ணமர் நெற்றியன் நற்றவ மாணிக்காப்

பாசம் ஏந்திய கூற்றினைக் காய்ந்தவன் பாதிரிப் புலியூரன்

ஈசன் ஆர்கழல் ஏத்திடு தொண்டரை இருவினை எய்தாவே.


வாசம் ஆர் மலர் வாளிகள் ஐந்துடை மன்மதன் ஆகத்தை நாசம் ஆக்கிய - மணம் மிக்க ஐந்து பூக்களை அம்புகளாகக் கொண்ட காமனது உடலை எரித்து அழித்த;

கண் அமர் நெற்றியன் - நெற்றிக்கண்ணன்;

நற்றவ மாணிக்காப் பாசம் ஏந்திய கூற்றினைக் காய்ந்தவன் - நல்ல தவமுனிவரான மார்க்கண்டேயருக்காகப் பாசம் ஏந்திவந்த காலனை உதைத்தவன்; (மாணி - இங்கே, மார்க்கண்டேயர்); (மாணிக்கா - மாணிக்காக – கடைக்குறை);

பாதிரிப் புலியூரன் - திருப்பாதிரிப்புலியூரில் உறைகின்ற சிவபெருமான்;

ஈசன் ஆர்-கழல் ஏத்திடு தொண்டரை இருவினை எய்தாவே - இறைவனது ஒலிக்கின்ற கழல் அணிந்த திருவடியை வழிபடும் அடியவர்களைப் பாவங்கள் வந்தடையமாட்டா; (ஆர்த்தல் - ஒலித்தல்);


7)

கொன்றை கூவிளம் சூடிய வேணியன் கொடியிடை உமைகாண

மன்றில் ஆடியொர் வேட்டுவ னாயடர் வனத்திடை வில்லேந்திப்

பன்றி எய்தொரு பாண்டவற் கருளிய பாதிரிப் புலியூரன்

வென்றி வெள்விடை ஊர்தியன் தொண்டரை வெவ்வினை மேவாவே.


கொன்றை கூவிளம் சூடிய வேணியன் - சடையில் கொன்றைமலரையும் வில்வத்தையும் சூடியவன்; (கூவிளம் - வில்வம்); (வேணி - சடை);

கொடியிடை உமை காண மன்றில் ஆடி - கொடி போல் இடையை உடைய உமாதேவி காணும்படி அம்பலத்தில் ஆடுகின்றவன்; (ஆடி - ஆடுபவன்); (சுந்தரர் தேவாரம் - 7.69.2 - "கொடியிடை உமையவள் காண ஆடிய அழகா");

ஒர் வேட்டுவனாய் அடர் வனத்திடை வில் ஏந்திப் - ஒரு வேடன் கோலத்தில் அடர்ந்த காட்டில் வில்லை ஏந்தி; (ஒர் - ஓர் - குறுக்கல் விகாரம்);

பன்றி எய்து ஒரு பாண்டவற்கு அருளிய பாதிரிப் புலியூரன் - ஒரு பன்றியை எய்து, பாண்டவர்களில் ஒருவனான அர்ஜுனனுக்கு அருள்செய்தவன், திருப்பாதிரிப்புலியூரில் உறைகின்ற சிவபெருமான்; (பாண்டவற்கு = பாண்டவன்+கு - பாண்டவனுக்கு);

வென்றி வெள்விடை ஊர்தியன் தொண்டரை வெவ்வினை மேவாவே - வெற்றியுடைய வெள்ளை இடபத்தை வாகனமாக உடையவன் அடியவர்களைப் பாவங்கள் வந்தடையமாட்டா; (வென்றி - வெற்றி); (வெவ்வினை - கொடிய வினை); (மேவுதல் - அடைதல்; பொருந்துதல்);


8)

மயலி னால்மலை பேர்த்தவன் வலிகெட மலரடி விரலொன்றைக்

கயிலை மேற்சிறி தூன்றிய இறையவன் கங்குலில் திருநட்டம்

பயில வல்லவன் பாலன நீற்றினன் பாதிரிப் புலியூரன்

புயலின் நேர்மிட றுடையவன் தொண்டரைப் பொருவினை நண்ணாவே.


மயலினால் மலை பேர்த்தவன் வலி கெட - ஆணவத்தால் கயிலைமலையைப் பெயர்த்த இராவணனது வலிமை அழியும்படி; (மயல் - அறியாமை; ஆணவம்); (வலி - வலிமை);

மலரடி விரல் ஒன்றைக் கயிலைமேல் சிறிது ஊன்றிய இறையவன் - தன் தாமரைப்பாதத்து விரல் ஒன்றைக் கயிலைமலைமேல் சற்றே ஊன்றிய இறைவன்;

கங்குலில் திருநட்டம் பயில வல்லவன் - இருளில் திருக்கூத்து இயற்றுபவன்; (கங்குல் - இரவு); (திருப்பல்லாண்டு - 9.29.9 - "நட்டம் பயில வல்லானுக்கே பல்லாண்டு கூறுதுமே");

பாலன நீற்றினன் - பால் போன்ற வெண்திருநீற்றைப் பூசியவன்; (பாலன - 1. பால் அன்ன - போல் போன்ற வெண்மையான; 2. காக்கின்ற); (பாலனம் - பாதுகாப்பு); (பாலன நீறு - பூசியவரைக் காக்கும் திருநீறு); (திருமந்திரம் - ஆறாம் தந்திரம் - திருநீறு - 10.6.10.1 - "கங்காளன் பூசும் கவசத் திருநீற்றை");

பாதிரிப் புலியூரன் - திருப்பாதிரிப்புலியூரில் உறைகின்ற சிவபெருமான்;

புயலின் நேர் மிடறு உடையவன் தொண்டரைப் பொருவினை நண்ணாவே - மேகம் போல் கருமை திகழும் கண்டம் உடையவன் அடியவர்களைப் பாவங்கள் வந்தடையமாட்டா; (புயல் - மேகம்); (நேர்தல் - ஒத்தல்); (பொருதல் - போர்செய்தல்; தாக்குதல்); (நண்ணுதல் - நெருங்குதல்; அடைதல்; பொருந்துதல்);


9)

நாதன் ஆரென நீடிய வாதுசெய் நளிர்மலர் உறைகின்ற

வேதன் நாரணன் என்றிவர் நேடிய வெவ்வழல் அன்போடு

பாதம் ஏத்திடும் பத்தருக் கெளியவன் பாதிரிப் புலியூரன்

போத கத்துரி போர்த்தவன் தொண்டரைப் பொருவினை நண்ணாவே.


"நாதன் ஆர்" என நீடிய வாதுசெய் - "யார் தலைவன்" என்று மிகவும் வாதிட்ட;

நளிர்-மலர் உறைகின்ற வேதன் நாரணன் என்றிவர் நேடிய வெவ்வழல் - குளிர்ந்த தாமரைமேல் உறைகின்ற பிரமன் திருமால் என்ற இவ்விருவரும் தேடிய பெருஞ்சோதி; (நளிர்தல் - குளிர்தல்); (என்றிவர் - என்ற இவர்; என்ற என்பதில் ஈற்று அகரம் தொகுத்தல் ஆயிற்று); (அழல் - நெருப்பு);

அன்போடு பாதம் ஏத்திடும் பத்தருக்கு எளியவன் - பக்தியோடு திருவடியை வழிபடுவார்களால் எளிதில் அடையப்படுபவன்;

பாதிரிப் புலியூரன் - திருப்பாதிரிப்புலியூரில் உறைகின்ற சிவபெருமான்;

போதகத்து உரி போர்த்தவன் தொண்டரைப் பொருவினை நண்ணாவே - யானைத்தோலைப் போர்த்த ஈசன் அடியவர்களைப் பாவங்கள் வந்தடையமாட்டா; (போதகம் - யானை); (உரி - தோல்); (பொருதல் - போர்செய்தல்; தாக்குதல்); (நண்ணுதல் - நெருங்குதல்; அடைதல்; பொருந்துதல்); (சம்பந்தர் தேவாரம் - 3.5.8 - "போதகத்துரி போர்த்தவன் பூந்தராய் காதலித்தான்");


10)

கறையை நெஞ்சினில் வைத்தவர் கைதவர் கத்திடும் சொல்நீங்கும்

இறைவ காத்தருள் என்றிமை யோர்தொழ இரங்கியவ் வெயில்மூன்றும்

பறைய நக்கவன் பாம்பரை ஆர்த்தவன் பாதிரிப் புலியூரன்

மறையை ஓதிய நாவினன் தொண்டரை வல்வினை வருத்தாவே.


கறையை நெஞ்சினில் வைத்தவர் கைதவர் கத்திடும் சொல் நீங்கும் - குற்றம் நிறைந்த நெஞ்சம் உடையவர்களும் வஞ்சகர்களும் கத்துகின்ற சொற்களை நீங்கள் நீங்குங்கள் (மதிக்கவேண்டா); (கறை - மாசு; குற்றம்); (கைதவர் - வஞ்சகர்);

"இறைவ காத்து அருள்" என்று இமையோர் தொழ, இரங்கி - "இறைவனே! எம்மைக் காவாய்" என்று தேவர்கள் தொழவும், அவர்களுக்கு இரங்கி;

அவ்-எயில் மூன்றும் பறைய நக்கவன் - அந்த முப்புரங்களும் அழியும்படி சிரித்தவன்; (எயில் - கோட்டை); (பறைதல் - அழிதல்); (நகுதல் - சிரித்தல்);

பாம்பு அரை ஆர்த்தவன் - நாகத்தை அரைநாணாகக் கட்டியவன்; (ஆர்த்தல் - கட்டுதல்);

பாதிரிப் புலியூரன் - திருப்பாதிரிப்புலியூரில் உறைகின்ற சிவபெருமான்;

மறையை ஓதிய நாவினன் தொண்டரை வல்வினை வருத்தாவே - வேதங்களைப் பாடிய அருளிய சிவபெருமான் அடியவர்களை வல்வினைகள் துன்புறுத்தமாட்டா; (வருத்துதல் - வருந்தச்செய்தல்);


11)

நாகப் பள்ளிகொள் அரிக்கொரு சக்கரம் நல்கிய மாதேவன்

மேகம் போல்திகழ் மணிமிட றுடையவன் மெல்லிடை மலைமங்கை

பாகம் ஆயவன் பாய்புலித் தோலினன் பாதிரிப் புலியூரன்

வேக மால்விடை ஊர்தியன் தொண்டரை வெவ்வினை மேவாவே.


நாகப் பள்ளிகொள் அரிக்கு ஒரு சக்கரம் நல்கிய மாதேவன் - பாம்பின்மேல் பள்ளிகொள்ளும் திருமாலுக்குச் சக்கராயுதத்தை அளித்த மகாதேவன்; (அப்பர் தேவாரம் - 4.4.10 - "நாகப் பள்ளிகொள்வான் உள்ளத்தானும்")

மேகம் போல் திகழ் மணிமிடறு உடையவன் - மேகம் போல் விளங்குகின்ற அழகிய கரிய கண்டத்தை உடையவன்; (மணி - அழகு; நீலமணி);

மெல்லிடை மலைமங்கை பாகம் ஆயவன் - சிற்றிடை உடையவளும் மலையரசன் மகளுமான உமாதேவியை ஒரு பாகமாக உடையவன்;

பாய்-புலித் தோலினன் - பாயும் புலியின் தோலை ஆடையாக அணிந்தவன்;

பாதிரிப் புலியூரன் - திருப்பாதிரிப்புலியூரில் உறைகின்ற சிவபெருமான்;

வேக-மால்-விடை ஊர்தியன் தொண்டரை வெவ்வினை மேவாவே - விரைவும் சினமும் உடைய பெரிய எருதை வாகனமாக உடையவன் அடியவர்களைப் பாவங்கள் வந்தடையமாட்டா; (வேகம் - விரைவு; கோபம்); (வெவ்வினை - கொடிய வினை); (மேவுதல் - அடைதல்; பொருந்துதல்);


வி. சுப்பிரமணியன்

----------- --------------


Wednesday, February 3, 2021

P.256 - திருத்தவத்துறை - சேம வைப்பென

2014-12-01

P.256 - திருத்தவத்துறை (லால்குடி)

(லால்குடியில் உள்ள சப்தரிஷீஸ்வரர் கோயில்)

---------------------------

(அறுசீர் விருத்தம் - மா கூவிளம் விளம் விளம் விளம் மாங்காய் - வாய்பாடு;

முதற்சீர் ஈற்றில் குறில் / குறில்+ஒற்று)

(சம்பந்தர் தேவாரம் - 2.106.1 - "என்ன புண்ணியம் செய்தனை");


1)

சேம வைப்பென உள்ளவன் சேவடி தினந்தொழு தெழுகின்ற

தூம னத்தினர் தொல்வினைத் தொடரினைத் துடைத்தருள் புரிநாதன்

நாமம் ஆயிரம் உடையவன் விடையவன் நச்சர வரைநாணன்

சாம வேதியன் தண்வயல் புடையணி தவத்துறைப் பெருமானே.


சேமவைப்பு என உள்ளவன் சேவடி தினம் தொழுதெழுகின்ற - (பக்தர்களுக்கு) வைப்புநிதியாக உள்ள ஈசனது சிவந்த திருவடியைத் தினமும் வழிபடும்; (சேமவைப்பு - சேமநிதி - வைப்புப்பொருள்);

தூ-மனத்தினர் தொல்வினைத் தொடரினைத் துடைத்து அருள்புரி நாதன் - தூய நெஞ்சுடைய பக்தர்களது பழவினைப் பந்தத்தை அழித்து அருளும் தலைவன்; (துடைத்தல் - நீக்குதல்; அழித்தல்);

நாமம் ஆயிரம் உடையவன் - ஆயிரம் திருப்பெயர்கள் உடையவன்;

விடையவன் - இடபவாகனன்;

நச்சரவு அரைநாணன் - விஷப்பாம்பை அரைநாணாகக் கட்டியவன்; (அர / அரவு - பாம்பு);

சாமவேதியன் - சாமவேதம் ஓதுபவன்;

தண்-வயல் புடை-அணி தவத்துறைப் பெருமானே - குளிர்ந்த வயல் சூழ்ந்த திருத்தவத்துறையில் (லால்குடியில்) உறைகின்ற பெருமான்;


2)

செந்த மிழ்த்தொடை செப்பிய நாவராய்த் திருவடி பணிவார்தம்

பந்தம் அற்றிடப் பரிந்தருள் கின்றவன் பாற்கடல் விடமுண்ட

அந்தம் இல்புகழ் உடையவன் ஆல்நிழல் அருமறை விரிபண்பன்

தந்தை தாயிலி தனிவிடை ஊர்தியன் தவத்துறைப் பெருமானே.


செந்தமிழ்த்தொடை செப்பிய நாவராய்த் திருவடி பணிவார்தம் பந்தம் அற்றிடப் பரிந்து அருள்கின்றவன் - தமிழ்ப்-பாமாலைகள் ஓதி வணங்கும் பக்தர்களது பந்தம் தீர இரங்கி அருள்பவ்ன்;

பாற்கடல் விடம் உண்ட அந்தம் இல் புகழ் உடையவன் - ஆலகாலத்தை உண்ட முடிவற்ற புகழ் உடையவன்;

ஆல்நிழல் அருமறை விரி-பண்பன் - கல்லாலமரத்தின்கீழ் அரிய வேதங்களை உபதேசித்தவன்; (விரித்தல் - உபதேசித்தல்);

தந்தை-தாயிலி - தனக்குத் தந்தை தாய் இல்லாதவன்;

தனி விடை ஊர்தியன் - ஒப்பற்ற இடபவாகனத்தை உடையவன்; (தனி - ஒப்பற்ற);

தவத்துறைப் பெருமானே - திருத்தவத்துறையில் (லால்குடியில்) உறைகின்ற பெருமான்;


3)

கண்ப னித்திடக் கரதலங் குவிந்திடக் கரைமனம் உடையார்தம்

திண்ப வத்தொடர் சிந்திட இனிதருள் செய்திடும் திருவாளன்

விண்ப ராவிட வெங்கணை ஒன்றினால் மேவலர் புரமெய்தான்

தண்பு னல்சடைத் தாங்கிய சதுரினன் தவத்துறைப் பெருமானே.


கண் பனித்திடக் கரதலம் குவிந்திடக் கரைமனம் உடையார்தம் – கண்கள் நீர் கசியக், கைகள் குவியக், கரையும் மனம் உடைய பக்தர்களது; (சேரமான் பெருமாள் நாயனார் அருளிய பொன்வண்ணத்தந்தாதி - 11.6.11 - “நெஞ்சந் தளிர்விடக் கண்ணீர் அரும்ப முகம்மலர அஞ்செங் கரதலங் கூம்ப");

திண்-பவத்தொடர் சிந்திட இனிது அருள் செய்திடும் திருவாளன் - வலிய பிறவித்தொடர் தீரும்படி இன்னருள் செய்யும் திருவுடையவன்; (சிந்துதல் - அழிதல்);

விண் பராவிட வெங்கணை ஒன்றினால் மேவலர் புரம் எய்தான் - தேவர்கள் துதிக்க இரங்கிச் சுடுகணை ஒன்றால் பகைவர்களது முப்புரங்களை எய்தவன்; (பராவுதல் - பரவுதல் - ஏத்துதல்); (மேவலர் - மேவார் - பகைவர்);

தண்புனல் சடைத் தாங்கிய சதுரினன் - குளிர்ந்த கங்கையைச் சடையில் தாங்கிய வல்லமையுடையவன்;

தவத்துறைப் பெருமானே - திருத்தவத்துறையில் (லால்குடியில்) உறைகின்ற பெருமான்;


4)

ஐய னேஉனை அன்றியார் துணையெனும் அன்பருக் கருளண்ணல்

செய்ய மேனியன் திங்களை அரவினைச் செஞ்சடை அணிதேவன்

மைய ணிந்தமா மிடறினன் வெண்பொடி மார்பினன் மழுவாளன்

தைய லாள்தனைப் பங்கமர் அருத்தியன் தவத்துறைப் பெருமானே.


"ஐயனே; உனை அன்றி யார் துணை?" எனும் அன்பருக்கு அருள் அண்ணல் - "ஐயனே! உன்னைத் தவிர வேறு யார் என் துணை?" என்று இறைஞ்சும் பக்தர்களுக்கு அருளும் தலைவன்;

செய்ய மேனியன் - செம்மேனியன்; (செய்ய - சிவந்த);

திங்களை அரவினைச் செஞ்சடை அணி-தேவன் - சந்திரனையும் பாம்பையும் சிவந்த சடையில் அணிந்த தேவன்;

மை அணிந்த மா-மிடறினன் - அழகிய நீலகண்டம் உடையவன்; (மிடறு - கண்டம்); (மிடறினன் - மிடற்றினன்);

வெண்பொடி மார்பினன் - வெண்ணீற்றைத் திருமார்பில் பூசியவன்;

மழுவாளன் - மழுவை ஏந்தியவன்;

தையலாள்தனைப் பங்கு அமர்- அருத்தியன் - உமையை ஒரு பாகமாக விரும்பும் அன்புடையவன்; (அருத்தி - அன்பு; ஆசை);

தவத்துறைப் பெருமானே - திருத்தவத்துறையில் (லால்குடியில்) உறைகின்ற பெருமான்;


5)

வேந்த னேஒரு வெள்விடை ஏறிய வெல்கொடி உடையானே

ஏந்த லேயென இணையடி தொழுபவர் இன்புற அருள்நம்பன்

மாந்து நஞ்சினை மணிசெய வல்லவன் மாசுணம் அரையார்த்தான்

சாந்த மாகவெண் ணீற்றினைப் பூசிய தவத்துறைப் பெருமானே.


"வேந்தனே; ஒரு வெள்விடை ஏறிய வெல்கொடி உடையானே - "அரசனே; ஒப்பற்ற இடபச்சின்னம் திகழும் வெற்றிக்கொடி உடையவனே;

ஏந்தலே" என இணையடி தொழுபவர் இன்புற அருள்-நம்பன் - "பெருமை மிக்கவனே" என்று போற்றி இருதிருவடிகளை வணங்கும் பக்தர்கள் இன்பம் அடைய அருளும் நம்பன்; (நம்பன் - சிவன் திருநாமம் - விரும்பத் தக்கவன்);

மாந்து நஞ்சினை மணிசெய வல்லவன் - உண்ட விஷத்தை அரிய மணி ஆக்கியவன்; (மாந்துதல் - உண்ணுதல்); (செய - செய்ய; இடைக்குறை-விகாரம்);

மாசுணம் அரை ஆர்த்தான் - வரிகள் உடைய பாம்பை அரையில் அரைநாணாகக் கட்டியவன்; (மாசுணம் - பாம்பு); (ஆர்த்தல் - கட்டுதல்);

சாந்தமாக வெண்ணீற்றினைப் பூசிய - சந்தனம்போல் திருநீற்றைப் பூசிய; (சாந்தம் - சந்தனம்); (சுந்தரர் தேவாரம் - 7.49.9 - "சாந்தமாக வெண்ணீறு பூசி");

தவத்துறைப் பெருமானே - திருத்தவத்துறையில் (லால்குடியில்) உறைகின்ற பெருமான்;


6)

அக்கும் ஆமையும் அணிதிரு மார்பினன் அயன்சிரம் கரமேந்தி

நக்க னாய்ப்பலி தேர்ந்துழல் பெருமையன் நம்பனை மதியாத

தக்கன் வேள்வியைத் தகர்த்தவன் தழல்வணன் சடையினிற் சலமேற்றான்

சக்க ரத்தினாற் சலந்தர னைச்செறு தவத்துறைப் பெருமானே.


அக்கும் ஆமையும் அணி- திருமார்பினன் - திருமார்பில் எலும்பையும் ஆமையோட்டையும் அணிந்தவன்; (அக்கு - எலும்பு); (ஆமை - ஆமையின் ஓடு);

அயன்சிரம் கரம் ஏந்தி நக்கனாய்ப் பலிதேர்ந்து உழல் பெருமையன் - பிரமனது மண்டையோட்டைக் கையில் ஏந்தித் திகம்பரனாய் பிச்சையேற்று உழலும் பெருமை உடையவன்; (நக்கன் - ஆடை அணியாதவன்); (பலி தேர்தல் - யாசித்தல்);

நம்பனை மதியாத தக்கன் வேள்வியைத் தகர்த்தவன் - சிவனை இகழ்ந்து தக்கன் செய்த வேள்வியை அழித்தவன்; (நம்பன் - சிவன் திருநாமம் - விரும்பத்தக்கவன்);

தழல்வணன் - தீவண்ணன்;

சடையினில் சலம் ஏற்றான் - சடையில் கங்கையை ஏற்றவன்; (சலம் - ஜலம் - கங்கை);

சக்கரத்தினால் சலந்தரனைச் செறு- - சக்கரத்தால் ஜலந்தராசுரனை அழித்த; (செறுதல் - அழித்தல்);

தவத்துறைப் பெருமானே - திருத்தவத்துறையில் (லால்குடியில்) உறைகின்ற பெருமான்;


7)

வாளி ஐந்துடை மன்மதன் அனங்கனா மாறிட விழிசெய்தான்

தோளில் வெண்பொடி துலங்கிடு சுந்தரன் சுடர்மதி புனையீசன்

வாளி லங்கிய மைவிழி பங்கினன் மாணியின் உயிர்காக்கத்

தாளி னால்நமன் தன்னக லத்துதை தவத்துறைப் பெருமானே.


வாளி ஐந்துடை மன்மதன் அனங்கனா மாறிட விழிசெய்தான் - ஐந்து அம்புகளை உடைய காமன் அனங்கனாக (= உருவம் அற்றவனாக) மாறும்படி நெற்றிக்கண்ணால் நோக்கி அவனை எரித்தவன்; (வாளி - அம்பு); (விழிசெய்தல் - கண்ணைத் திறந்து பார்த்து எரித்தல்); (சம்பந்தர் தேவாரம் - 2.85.8 - "வேள்பட விழிசெய்தன்று");

தோளில் வெண்பொடி துலங்கிடு சுந்தரன் - புஜங்களில் வெண்ணீற்றைப் பூசிய அழகன்;

சுடர்மதி புனை ஈசன் - ஒளிவீசும் திங்களை அணிந்த ஈசன்;

வாள் இலங்கிய மைவிழி பங்கினன் - ஒளியுடைய மையணிந்த கண்களையுடைய உமையை ஒரு பங்கில் உடையவன்; (வாள் - ஒளி);

மாணியின் உயிர் காக்கத் தாளினால் நமன்தன் அகலத்து உதை - மார்க்கண்டேயரது உயிரைக் காக்கும்பொருட்டுத் திருவடியால் காலனது மார்பில் உதைத்த; (மாணி - மார்க்கண்டேயர்); (அகலம் - மார்பு);

தவத்துறைப் பெருமானே - திருத்தவத்துறையில் (லால்குடியில்) உறைகின்ற பெருமான்;


8)

மிண்ட னாய்அரு வெற்பெறி அரக்கனை வீரிட விரலூன்றித்

தொண்ட னாய்அவன் துணையடி இசைகொடு துதிசெய வரமீந்தான்

பண்டை நான்மறை பாடிய நாவினன் பசுபதி அடிபோற்றித்

தண்ட மிழ்த்தொடை சாத்திடு வார்க்கருள் தவத்துறைப் பெருமானே.


மிண்டனாய் அருவெற்பு எறி- அரக்கனை வீரிட விரல் ஊன்றித் - கல்நெஞ்சனாகிக் கயிலைமலையைப் பெயர்த்து வீச முயன்ற இராவணன் வீரிட்டு அழும்படி அவனைத் திருப்பாதவிரல் ஊன்றி நசுக்கி; (மிண்டன் - கல்நெஞ்சன்); (அருவெற்பு - கயிலைமலை); (வீரிடுதல் - திடீரெனக் கத்துதல்);

தொண்டனாய் அவன் துணையடி இசைகொடு துதிசெய வரம் ஈந்தான் - (பின்) அவன் பக்தனாகி இருதிருவடிகளை இசையால் துதித்துப் பாடக் கேட்டு இரங்கி வரங்கள் கொடுத்தவன்; (துணை - இரட்டை);

பண்டை நான்மறை பாடிய நாவினன் - தொன்மையான நால்வேதங்களைப் பாடியருளியவன்; (பண்டை - பழமை);

பசுபதி - உயிர்களுக்கெல்லாம் தலைவன்;

அடிபோற்றித் தண்-தமிழ்த்தொடை சாத்திடுவார்க்கு அருள்- - அவன் திருவடியைப் போற்றிக் குளிர்ந்த தமிழ்ப்பாமாலைகளைச் சூட்டும் பக்தர்களுக்கு அருள்கின்ற;

தவத்துறைப் பெருமானே - திருத்தவத்துறையில் (லால்குடியில்) உறைகின்ற பெருமான்;


9)

பூவின் மேலயன் புள்ளமர் அரியிவர் போற்றிய உயர்சோதி

ஆவின் அஞ்சுகந் தாடினான் அரையினில் ஐந்தலை அரவார்த்தான்

தேவி பங்கினன் மூவிலை வேலினன் தேசினன் பிறவில்லான்

சாவி லாதவன் தாள்பணி வார்க்கருள் தவத்துறைப் பெருமானே.


பூவின்மேல் அயன் புள் அமர் அரி இவர் போற்றிய உயர்-சோதி - தாமரைமேல் உறையும் பிரமனும் பறவையை (கருடனை) வாகனமாக உடைய திருமாலும் போற்றிய எல்லையின்றி உயர்ந்த ஜோதி;

ஆவின்-அஞ்சு உகந்து ஆடினான் - பசுவிடத்துப் பெறப்படும் ஐந்து பொருள்களால் அபிஷேகம் செய்யப்பெறுபவன்; (ஆவினஞ்சு - ஆனஞ்சு - பஞ்சகவ்வியம்); (உகத்தல் - மகிழ்தல்; விரும்புதல்);

அரையினில் ஐந்தலை அரவு ஆர்த்தான் - ஐந்து தலைகளையுடைய பாம்பை அரையில் கட்டியவன்; (ஆர்த்தல் - கட்டுதல்);

தேவி-பங்கினன் - உமைபங்கன்;

மூவிலை-வேலினன், தேசினன் - திரிசூலன், ஒளியுருவினன்; (தேசு - தேஜஸ் - ஒளி);

பிறவு இல்லான், சாவு இலாதவன் - பிறப்பும் இறப்பும் இல்லாதவன்; (பிறவு - பிறப்பு); (1.110.1 - "பெருந்தகை பிறவினொ டிறவுமானான்");

தாள் பணிவார்க்கு அருள்- - திருவடியை வணங்கும் பக்தர்களுக்கு அருள்கின்ற;

தவத்துறைப் பெருமானே - திருத்தவத்துறையில் (லால்குடியில்) உறைகின்ற பெருமான்;


10)

அவமு ரைத்தலை அறமென நினைபவர் அலப்பலை மதியேன்மின்

சிவன்ம லர்க்கழல் தினந்தொறும் நினைந்தவன் திருப்பெயர் தனையோதிப்

பவம றுத்தருள் பரம்பர னேயெனப் படகெனக் கரைசேர்ப்பான்

தவமி யற்றிய எழுவருக் கருளிய தவத்துறைப் பெருமானே.


அவம் உரைத்தலை அறம் என நினைபவர் அலப்பலை மதியேன்மின் - அவமொழிகள் பேசுவதையே சிறந்த அறம் என்று நினைக்கும் புன்னெறியாளர்களது பிதற்றலை நீங்கள் மதிக்கவேண்டா; (நினைதல் - எண்ணுதல்); (அலப்பல் - பிதற்றல்); (மதியேன்மின் - நீங்கள் மதிக்கவேண்டா);

சிவன் மலர்க்கழல் தினந்தொறும் நினைந்து அவன் திருப்பெயர்தனை ஓதிப் - சிவபெருமானது மலரடியைத் தினமும் எண்ணி அவன் திருநாமத்தைச் சொல்லி;

"பவம் அறுத்தருள் பரம்பரனே" எனப், படகு எனக் கரைசேர்ப்பான் - "பிறவிகளைத் தீர்த்தருள்க, மிகவும் மேலானவனே" என்று இறைஞ்சினால், (வினைக்கடலில் / பிறவிக்கடலில்) படகு போல வந்து நம்மை உய்விப்பவன் (/ உய்விப்பான்); (திருவாசகம் - கோயில் மூத்த திருப்பதிகம் - 8.21.5 - "கரைசேர் அடியார் களிசிறப்ப");

தவம் இயற்றிய எழுவருக்கு அருளிய - சப்தரிஷிகளுக்கு அருள்செய்த; (* இத்தலவரலாற்றைச் சுட்டியது; சப்தரிஷீஸ்வரர் - இத்தலத்து ஈசன் திருநாமம்);

தவத்துறைப் பெருமானே - திருத்தவத்துறையில் (லால்குடியில்) உறைகின்ற பெருமான்;


11)

இடையில் வஞ்சியும் நடையினில் அன்னமும் இணையென உடையாள்கோன்

படையிற் பாரிடம் பலவுடை இறையவன் பலிபெற மடவார்கள்

கடையில் நிற்பவன் கடிமலர்க் கொன்றையும் கங்கையும் அணிகின்ற

சடையில் ஒண்மதி தங்கிட அருளிய தவத்துறைப் பெருமானே.


இடையில் வஞ்சியும் நடையினில் அன்னமும் இணையென உடையாள்கோன் - கொடி போன்ற இடையும் அன்னம் போன்ற நடையும் உடைய உமைக்குக் கணவன்; (வஞ்சி - கொடி);

படையில் பாரிடம் பலவுடை இறையவன் - பலபூதங்கள் இருக்கும் படையை உடைய இறைவன்; (பாரிடம் - பூதம்); (இறையவன் - இறைவன்); (சம்பந்தர் தேவாரம் - 1.11.1 - "பல பூதப்படை யுடையான்"); (சம்பந்தர் தேவாரம் - 3.56.1 - "இறையவன் ஈசன் எந்தை");

பலி பெற மடவார்கள் கடையில் நிற்பவன் - பிச்சை பெறப் பெண்களின் வீட்டுவாசலில் வந்து நிற்பவன்; (பலி - பிச்சை); (கடை - வாயில்);

கடிமலர்க் கொன்றையும் கங்கையும் அணிகின்ற சடையில் ஒண்மதி தங்கிட அருளிய - வாசம் மிகுந்த கொன்றைமலரையும் கங்கையையும் அணிந்த சடையில் ஒளியுடைய சந்திரன் வாழ அருள்செய்த; (கடி - வாசனை);

தவத்துறைப் பெருமானே - திருத்தவத்துறையில் (லால்குடியில்) உறைகின்ற பெருமான்;


வி. சுப்பிரமணியன்

------------- -------------