Showing posts with label வஞ்சித்துறை. Show all posts
Showing posts with label வஞ்சித்துறை. Show all posts

Saturday, August 1, 2026

P.505 - நாரையூர் - வேதம் ஓதிய

2020-06-16

P.505 - நாரையூர்

-----------------

(வஞ்சித்துறை - தான தானன - சந்தம்) (திருவிருக்குக்குறள் அமைப்பு)

(சம்பந்தர் தேவாரம் - 1.92.1 - "வாசி தீரவே")

முற்குறிப்பு -

1. இப்பாடல்களில் 4 சிறிய அடிகள். அடியின் சிறுமை கருதி, இங்கே, ஒவ்வொரு வரியிலும் 2 அடிகள் இடப்பட்டுள்ளன.

2. படிப்போர்-வசதி கருதிச், சில இடங்களில் புணர்ச்சி பிரித்துக் காட்டப்பட்டுள்ளது.

* (ம்) - புணர்ச்சியில் மகரஒற்றுக் கெடும் இடம்;


1)

வேதம் ஓதிய .. நாதன் நாரையூர்ப்

போதன் தாள்தொழ .. ஏதம் இல்லையே.


வேதம் ஓதிய நாதன் - வேதங்களைப் பாடியருளிய தலைவன்;

நாரையூர்ப் போதன் - திருநாரையூரில் உறைகின்ற ஞானவடிவினன்; (போதன் - ஞானி);

தாள் தொழ ஏதம் இல்லையே - அப்பெருமானது திருவடியை வழிபட்டால் துன்பம் தீரும்; (ஏதம் - துன்பம்);


2)

உம்பர் ஏத்திடு(ம்) .. நம்பன் நாரையூர்

இன்பன் அன்பர்தம் .. துன்ப(ம்) நீங்குமே.


உம்பர் ஏத்திடும் நம்பன் - தேவர்களால் தொழப்படும் சிவபெருமான்;

நாரையூர் இன்பன் - திருநாரையூரில் உறைகின்ற இன்ப-வடிவினன்;

அன்பர்தம் துன்பம் நீங்குமே - அப்பெருமானது பக்தர்களது துன்பம் தீரும்;


3)

கானில் ஆடிடும் .. ஞானன் நாரையூர்

மானன் னாம(ம்)நம் .. ஊன(ம்) நீக்குமே.


கானில் ஆடிடும் ஞானன் - சுடுகாட்டில் ஆடுகின்ற ஞானவடிவினன்;

நாரையூர் மான் நன்னாமம் நம் ஊனம் நீக்குமே - திருநாரையூரில் உறைகின்ற பெருமானது நல்ல திருநாமம் நம் குற்றங்களையும் வினைகளையும் தீர்க்கும்; (மான் - பெரியோன்); (சம்பந்தர் தேவாரம் - 1.127.1 - "பிரம புரத்துறை பெம்மா னெம்மான்");


4)

நீறு பூசிபூ .. நாறு நாரையூர்

ஆறு சூடிபேர் .. கூறும் இன்பமே.


நீறு-பூசி - திருநீற்றைப் பூசியவன்;

பூ நாறு நாரையூர் - பூக்கள் மணம் வீசுகின்ற திருநாரையூரில் உறைகின்ற;

ஆறு-சூடி பேர் கூறும் - கங்காதரனது திருப்பெயரைச் சொல்லுங்கள்;

இன்பமே - இன்பம் வந்தடையும்; ("இன்பமே" என்பதை இருமுறை இயைத்துத், "திருநாமத்தைக் கூறும் இன்பமே இன்பம்" என்றும் பொருள்கொள்ளலாம்); (சம்பந்தர் தேவாரம் - 1.80.4 - "சிற்றம்பல(ம்) மேய இறைவன் கழல் ஏத்தும் இன்பம் இன்பமே");


5)

எல்லை அற்றவன் .. நல்லன் நாரையூர்ச்

செல்வன் நாமமே .. சொல்ல இன்பமே.


எல்லை அற்றவன் - அளவில்லாதவன்; அழிவற்றவன்;

நல்லன் - நன்மை செய்பவன்;

நாரையூர்ச் செல்வன் நாமமே சொல்ல இன்பமே - திருநாரையூரில் உறைகின்ற செல்வனான சிவபெருமானது திருப்பெயரைச் சொன்னால் இன்பமே வந்தடையும்;


6)

செக்கர் மேனியன் .. நக்கன் நாரையூர்

முக்கண் மூர்த்திபேர் .. துக்க(ம்) நீக்குமே.


செக்கர் மேனியன் - செம்மேனியன்; (செக்கர் - சிவப்பு);

நக்கன் - திகம்பரன்;

நாரையூர் முக்கண் மூர்த்தி பேர் துக்கம் நீக்குமே - திருநாரையூரில் உறைகின்ற முக்கட்பெருமானது திருநாமம் நம் துக்கத்தைத் தீர்க்கும்;


7)

மதியன் வேணியில் .. நதியன் நாரையூர்ப்

பதிநன் னாமமே .. துதிமின் நன்மையே.


மதியன் வேணியில் நதியன் - சடையில் கங்கையையும் சந்திரனையும் அணிந்தவன்; ("வேணியில்" - இடைநிலைத்தீவகமாக இருபக்கமும் இயைக்க நின்றது);

நாரையூர்ப் பதி நன்னாமமே துதிமின் - திருநாரையூரில் உறைகின்ற தலைவனது நல்ல திருப்பெயரையே துதியுங்கள்; (பதி - தலைவன்);

நன்மையே - நன்மையே வந்தடையும்;


8)

வரையி டந்தவன் .. சிரமொர் பத்தடர்

அரவன் நாரையூர் .. பரவி உய்ம்மினே.


வரை இடந்தவன் சிரம் ஒர் பத்து அடர் - கயிலைமலையைப் பெயர்த்த இராவணனது தலைகள் பத்தையும் நசுக்கியவனும்; (வரை - மலை); (இடத்தல் - பெயர்த்தல்); (ஒர் - ஓர்; குறுக்கல் விகாரம்); (அடர்த்தல் - நசுக்குதல்);

அரவன் நாரையூர் பரவி உய்ம்மினே - பாம்புகளை அணிந்தவனுமான சிவபெருமானது திருநாரையூரைப் போற்றி உய்யுங்கள்;


9)

வேதன் மால்தொழு .. பாதன் ஏறமர்

நாதன் நாரையூர் .. ஓதி உய்ம்மினே


வேதன் மால் தொழு பாதன் - பிரமனும் திருமாலும் தொழுகின்ற திருப்பாதன்;

ஏறு அமர் நாதன் - இடபத்தை வாகனமாக விரும்பிய தலைவன்;

நாரையூர் ஓதி உய்ம்மினே - அப்பெருமான் உறையும் திருநாரையூரைப் போற்றி உய்யுங்கள்;


10)

பொய்யர் சொல்விடும் .. செய்யன் நாரையூர்

ஐயன் நாமமே .. உய்வு நல்குமே.


பொய்யர் சொல் விடும் - பொய்யர்களது பேச்சை மதியாமல் நீங்குங்கள்;

செய்யன் - செம்மேனியன்; (செய் - சிவப்பு);

நாரையூர் ஐயன் நாமமே உய்வு நல்குமே - திருநாரையூரிள் உறைகின்ற தலைவனான சிவபெருமானது திருநாமமே உய்தியை அளிக்கும்;


11)

மணிமி டற்றினன் .. அணிகொள் நாரையூர்

பணியும் அன்பர்தம் .. பிணிகள் நீங்குமே


மணி மிடற்றினன் - நீலமணி போல் திகழும் கண்டத்தை உடையவன்;

அணிகொள் நாரையூர் - அப்பெருமான் உறைகின்ற அழகிய திருநாரையூரை;

பணியும் அன்பர்தம் பிணிகள் நீங்குமே - வழிபடும் பக்தர்களது பிணிகளெல்லாம் நீங்கும்; (பிணி - வினை; நோய்; பற்று);


வி. சுப்பிரமணியன்

----------- --------------

Monday, April 27, 2026

P.476 - பொது - பரம்பொருளு(ம்)நீ

2019-06-30

P.476 - பொது

--------------------

(வஞ்சித்துறை - தனாதனதனா தனாதனதனா)

(சந்தக் கலிவிருத்தம் - தனான தனனா தனான தனனா)

(Sanskrit Meter - ஜலோத்ததகதி (जलोद्धतगतिः) (jalōddhatagatiḥ)

முற்குறிப்பு: படிப்போர் வசதி கருதிச் சந்தம் கெடாத இடங்களில் புணர்ச்சி பிரித்துக் காட்டப்பட்டுள்ளது;

* (ம்) - புணர்ச்சியில் மகர-ஒற்றுக் கெடும் இடம்;


1)

பரம்பொருளு(ம்)நீ பனிச்சடையினாய்

பெரும்புகழினாய் பிரான்அருளெனக்

கரம்குவிதரக் கழற்குருகினால்

வரம்தருபவன் வலஞ்சுழியனே.


"பரம்பொருளும் நீ; பனிச்-சடையினாய்; பெரும்-புகழினாய்; பிரான்; அருள்" எனக் - "நீயே பரம்பொருள்; கங்கையைச் சடையில் அணிந்தவனே; பெரும்புகழ் உடையவனே; பெருமானே; அருள்க" என்று;

கரம் குவிதரக் கழற்கு உருகினால் - கைகளைக் குவித்து உருகித் திருவடியை வழிபட்டால்; (தருதல் - ஒரு துணைவினை);

வரம் தருபவன் வலஞ்சுழியனே - வரம் அருள்பவன் திருவலஞ்சுழியில் உறைகின்ற ஈசன்;


2)

மடந்தை பிரியா மணாள அளவைக்

கடந்த புகழாய் கரந்தை புனைவாய்

குடந்தை உறைவாய் குவிந்து தொழுதேன்

தொடர்ந்த வினையைத் துரத்தி அருளே!


மடந்தை பிரியா மணாள - உமை ஒரு பாகம் ஆன மணவாளனே; (மடந்தை - பெண்);

அளவைக் கடந்த புகழாய் - எல்லையற்ற புகழ் உடையவனே;

கரந்தை புனைவாய் - கரந்தையை அணிந்தவனே;

குடந்தை உறைவாய் - குடமூக்கில் (கும்பகோணத்தில்) உறைகின்றவனே;

குவிந்து தொழுதேன் - மனம் ஒன்றி வழிபட்டேன்;

தொடர்ந்த வினையைத் துரத்தி அருளே - என்னைத் தொடரும் வினைகளை அழித்து அருள்வாயாக;


3)

தராய்நகரிலும் தவத்துறையிலும்

பராய்த்துறையிலும் பயில்பரமனே

குராமுடியினாய் கொடும்பழவினை

இராவணமெனக் கிரங்கியருளே.


தராய்நகரிலும் தவத்துறையிலும் பராய்த்துறையிலும் பயில்-பரமனே - பூந்தராயிலும் (சீகாழி), திருத்தவத்துறையிலும் (லால்குடியில் சப்தரிஷீஸ்வரர் கோயில்), திருப்பராய்த்துறையிலும் உறையும் பரமனே; (தராய் - பூந்தராய் - சீகாழியின் 12 பெயர்களுள் ஒன்று);

குரா-முடியினாய் - குராமலரைச் சூடிய திருமுடியினனே;

கொடும்-பழவினை இராவணம் எனக்கு இரங்கி அருளே - கொடிய பழைய வினைகளெல்லாம் தீரும்படி எனக்கு இரங்கி அருள்க;


4)

எதிர்த்தமதமா உரித்தவிறலாய்

நதிச்சடையிலே நடுக்கமதிலாக்

கதிர்ப்பிறையினாய் கறுத்தமிடறா

துதித்தவரிடர் துடைத்தருளவே.


எதிர்த்த மதமா உரித்த விறலாய் - தாக்கிய மதயானையைத் தோலுரித்த வெற்றியினனே; (மதமா - யானை); (விறல் - வெற்றி; வீரம்);

நதிச்சடையிலே நடுக்கமது இலாக் கதிர்ப்-பிறையினாய் - கங்கையைத் தரித்த சடையில் பயம் தீர்ந்த வெண்பிறையைச் சூடியவனே; (நடுக்கம் - அச்சம்; அது - பகுதிப்பொருள்விகுதி); (கதிர் - ஒளி; கிரணம்);

கறுத்த மிடறா - கரிய கண்டனே; (அப்பர் தேவாரம் - 4.93.3 - "கறுத்த மிடறுடையான்");

துதித்தவர் இடர் துடைத்து அருளவே - துதிக்கும் அன்பர்களது இடர்களை நீக்கி அருள்வாயாக;

(அருள - அருள்க; அ - வியங்கோள் விகுதி); (ஏ - ஈற்றசை);


5)

மடக்கொடியனாள் தனைப்பிரிகிலாய்

விடைப்பிரியனே மிகப்புனிதனே

கடற்பெருவிடம் களத்திடவலாய்

அடைக்கலமெனக் களித்தருளிடே.


மடக்கொடி அனாள்-தனைப் பிரிகிலாய் - இளங்கொடி போன்ற உமையைப் பிரியாதவனே; (அனாள் - அன்னாள்);

விடைப்-பிரியனே - இடபத்தை ஊர்தியாக விரும்பியவனே;

மிகப் புனிதனே - பரிசுத்தனே;

கடற்-பெருவிடம் களத்து இட வலாய் - பாற்கடலில் தோன்றிய ஆலகாலத்தைக் கண்டத்தில் இட்டவனே; (களம் - கண்டம்); (வலாய் - வல்லாய் - வல்லவனே);

அடைக்கலம் எனக்கு அளித்து அருளிடே - எனக்கு அடைக்கலம் தந்து காப்பாயாக;


6)

அணங்கையொருபால் அமர்ந்தபதியே

கணங்களிடையே நடங்கருதினாய்

மணங்கமழு(ம்)மா மலர்த்தொடையினாய்

வணங்குமடியேன் தனக்குமருளே.


அணங்கை ஒருபால் அமர்ந்த பதியே - உமையை ஒரு பக்கம் கூறாக விரும்பிய தலைவனே;

கணங்களிடையே நடம் கருதினாய் - பூதகணங்கள் சூழக் கூத்தாடுபவனே;

மணம் கமழு(ம்) மா-மலர்த்தொடையினாய் - வாசம் கமழும் அழகிய மலர்மாலையை அணிந்தவனே;

வணங்கும் அடியேன்-தனக்கும் அருளே - வணங்குகின்ற எனக்கும் அருள்வாயாக;


7)

செழும்பவளமார் திருச்சடையினாய்

எழும்பொழுதுநின் இணைக்கழல்நினை

தொழும்புடையவர்க் கருந்துணைவனே

அழுந்துவினையேற் கருள்புரிகவே.


செழும்-பவளம் ஆர் திருச்சடையினாய் - செழுமையான பவளம் போன்ற சடையை உடையவனே;

எழும் பொழுது நின் இணைக்கழல் நினை - துயிலெழும்பொழுது உன் இரு-திருவடிகளை நினைக்கின்ற; (இணைக்கழனினை - இணைக்கழல் நினை);

தொழும்பு உடையவர்க்கு அரும்-துணைவனே - அடிமை உடைய பக்தர்களுக்கு அரிய துணை ஆனவனே; (தொழும்பு - அடிமை);

அழுந்து வினையேற்கு அருள்புரிகவே - வினையில் ஆழும் எனக்கு அருள்வாயாக;


8)

விரித்தசடைமேல் விளங்கமதியைத்

தரித்தசதுரா தகாதவரெயில்

எரித்தநகையாய் இராவணனழ

நெரித்தகழலே நினைக்கவருளே.


விரித்த சடைமேல் விளங்க மதியைத் தரித்த சதுரா - விரித்த சடையின்மேல் சந்திரனை ஒளிவீசும்படி அணிந்த வல்லவனே;

தகாதவர் எயில் எரித்த நகையாய் - அசுரர்களது முப்புரங்களைச் சிரித்து எரித்தவனே;

இராவணன் அழ நெரித்த கழலே நினைக்க அருளே - இராவணன் அழும்படி அவனை நசுக்கிய உன் திருவடியையே நான் நினைக்கும்படி அருள்வாயாக; (நெரித்தல் - நசுக்குதல்);


9)

அயன்முகில்நிறத் தரிக்கரியவன்

புயங்கனொளிரும் பொடிப்புனைபவன்

கயம்புரிசடைக் கரந்தருளினான்

சுயம்புதனைநீர் தொழீர்மகிழவே.


அயன் முகில்-நிறத்து அரிக்கு அரியவன் - பிரமனாலும் மேகம் போன்ற நிறமுடைய திருமாலாலும் அறிய ஒண்ணாதவன்; (முகினிறத்தரி - முகில் நிறத்து அரி; சந்தியோடு நோக்கில் சந்தம் கெடாமையைக் காண்க);

புயங்கன் - பாம்புகளை அணிந்தவன்; (புயங்கம் - புஜங்கம் - பாம்பு);

ஒளிரும் பொடிப் புனைபவன் - ஒளியுடைய திருநீற்றைப் பூசியவன்; (இலக்கணக் குறிப்பு : குறிலிணைச் சொற்கள் வருமிடத்தில் வல்லொற்று மிகுவதும் உண்டு; தேவாரத்தில் "பொடிப்பூசி" என்று பல இடங்களில் வரக் காணலாம். அப்பர் தேவாரம் - 5.14.8 - "வெந்த வெண்பொடிப் பூசும் விகிர்தனார்");

கயம் புரிசடைக் கரந்து அருளினான் - கங்கையை முறுக்கிய சடையில் ஒளித்தவன்; (கயம் - நீர்நிலை); (கரத்தல் - மறைத்தல்);

சுயம்புதனை நீர் தொழீர் மகிழவே - சுயம்புமூர்த்தியாகிய அப்பெருமானை நீங்கள் தொழுங்கள்; இன்புறலாம்;


10)

தொழாத்துரிசினர் சொலைக்கருதிடேல்

விழாமலிதரும் வியன்மயிலையான்

குழாம்புகிலினிக் கொடும்பிறவிகள்

எழாவண(ம்)நமக் கிரங்குமவனே.


தொழாத் துரிசினர் சொலைக் கருதிடேல் - ஈசனை வழிபடாத குற்றமுடையவர்கள் பேசும் பேச்சை மதிக்கவேண்டா; (துரிசு - குற்றம்); (சொலை - சொல்லை);

விழா மலிதரும் வியன் மயிலையான் குழாம் புகில் - பல விழாக்கள் கொண்டாடப்பெறும் பெருமைமிக்க மயிலாப்பூரில் உறையும் பெருமானது அடியார்-குழாத்தைச் சேர்ந்தால்; (வியன் - பெருமை; சிறப்பு);

இனிக் கொடும்-பிறவிகள் எழாவண(ம்) நமக்கு இரங்கும் அவனே - இனிமேல் கொடிய பிறவிகள் வாராதபடி நமக்கு இரங்கி வினைகளைத் தீர்த்து அருள்வான் அப்பெருமான்; (வணம் - வண்ணம்); (இரங்கும் - செய்யும் என்ற வாய்பாட்டு வினைமுற்று);


11)

அழற்சடையில்நீர் அடைத்தசதுரன்

மழுப்படையினான் மலைச்சிலையினான்

கழுத்ததனிலோர் கறுத்தமணியான்

வழுத்துமடியார் மனத்துறைவனே.


அழற்சடையில் நீர் அடைத்த சதுரன் - தீப் போன்ற செஞ்சடையில் கங்கையை அடைத்த ஆற்றலுடையவன்; (சடையினீர் - சடையில் நீர்);

மழுப்படையினான் - மழுவை ஏந்தியவன்;

மலைச்சிலையினான் - மேருமலையை வில்லாக ஏந்தியவன்; (சிலை - வில்); (சம்பந்தர் தேவாரம் - 2.73.8 - "திரிபுரங்கள் செற்ற மலைச்சிலையனூரே");

கழுத்து அதனில் ஓர் கறுத்த மணியான் - கண்டத்தில் ஒப்பற்ற நீலமணியை உடையவன்;

வழுத்தும் அடியார் மனத்து உறைவனே - அப்பெருமான் துதிக்கும் பக்தர்களது நெஞ்சில் உறைவான்;


வி. சுப்பிரமணியன்

----------- --------------


Wednesday, March 4, 2026

P.468 - பொது - விடையை விரும்பும்

2019-04-16

P.468 - பொது

------------------

(வஞ்சித்துறை - தனதன தானா) (திருவிருக்குக்குறள் அமைப்பு)

(வடமொழியில் - ஶஶிவதனா - शशिवदना )


முற்குறிப்புகள் -

1. இப்பாடல்களில் 4 சிறிய அடிகள். அடியின் சிறுமை கருதி, இங்கே, ஒவ்வொரு வரியிலும் 2 அடிகள் இடப்பட்டுள்ளன.

2. படிப்போர் வசதி கருதிச், சந்தம் கெடாத இடங்களில் சொற்களை ஒட்டிச் சீர்பிரித்துக் காட்டப்பட்டுளது. புணர்ச்சியும் அவ்வாறே பிரித்துக் காட்டப்பட்டுள்ளது.


1)

விடையை விரும்பும் .. கடவுள் அவற்குச்

சுடலை அரங்கம் .. விடமு(ம்) மருந்தே.


விடையை விரும்பும் கடவுள் அவற்குச் - இடபவாகனான சிவபெருமானுக்கு; (அவற்கு = அவன் + கு = அவனுக்கு);

சுடலை அரங்கம் - சுடுகாடே கூத்தாடும் சபை;

விடமும் மருந்தே = நஞ்சும் அமுது ஆகும்;


2)

பரவிய மாணிக்(கு) .. அரணென நின்றான்

குரவணி குஞ்சிப் .. பரமனை வாழ்த்தே.


பரவிய மாணிக்கு அரண் என நின்றான் - வழிபாடு செய்த மார்க்கண்டேயருக்குக் காவல் ஆனவன்;

குரவு அணி குஞ்சிப் பரமனை வாழ்த்தே - குராமலரைத் திருமுடிமேல் அணிந்த சிவபெருமானை வாழ்த்து; (குரவு - குராமலர்); (குஞ்சி - சென்னி);


3)

தருநிழல் நால்வர்க்(கு) .. அருமறை ஓதும்

குருபரன் அன்பர்க்(கு) .. இருவினை தீர்வே


தரு-நிழல் நால்வர்க்கு அருமறை ஓதும் குருபரன் - கல்லால-மரத்தின்கீழ்ச் சனகாதி முனிவர்களுக்கு வேதப்பொருளை உபதேசித்த தட்சிணாமூர்த்தி;

அன்பர்க்கு இருவினை தீர்வே - அவனை வழிபடும் பக்தர்களுக்கு இருவினை நீக்கம் ஆகும்;


4)

கரியுரி போர்த்தான் .. வரியர வார்த்தான்

பெரியவன் நாமம் .. தரிமட நெஞ்சே.


கரியுரி போர்த்தான் - யானைத்தோலைப் போர்த்தவன்; (கரி - யானை); (உரி - தோல்);

வரியரவு ஆர்த்தான் - வரிகளையுடைய பாம்பை அரைநாணாகக் கட்டியவன்;

பெரியவன் நாமம் தரி மட-நெஞ்சே - மகாதேவன் அவன் திருநாமத்தைப், பேதைமனமே, நீ எண்ணு;


5)

கடிமலர் அம்பற் .. பொடிபட நோக்கும்

அடிகளை வாழ்த்தச் .. செடிவினை வீடே.


கடிமலர் அம்பற் பொடிபட நோக்கும் - வாசமலரை அம்பாக உடைய மன்மதனைச் சாம்பலாகும்படி பார்த்த; (கடி - வாசனை); (அம்பற் பொடிபட - அம்பனைப் பொடிபட; இலக்கணக் குறிப்பு: இரண்டாம் வேற்றுமைத்தொகையில் உயர்திணையில் பொருளின் தெளிவிற்காக முதற்சொல்லின் ஈற்றில் ன் - ற் என்று திரியும்);

அடிகளை வாழ்த்தச் செடிவினை வீடே - பெருமானை வாழ்த்தினால் தீவினைகள் நீங்கும்; (செடி - துன்பம்; தீமை);


6)

மறைமொழி நாவன் .. கறையணி கண்டன்

இறைவன் அளிப்பான் .. குறைகள் அறுத்தே.


மறைமொழி நாவன் - வேதங்களைப் பாடியருளியவன்;

கறை அணி கண்டன் - நீலகண்டன்;

இறைவன் அளிப்பான் குறைகள் அறுத்தே - இறைவனான சிவபெருமான் பக்தர்களது குறைகளைத் தீர்த்து அருள்வான்;


7)

முடிவிலி அண்ணல் .. பொடியணி பெம்மான்

அடியை அடைந்தோர் .. படியடை யாரே.


முடிவு-இலி அண்ணல் - நித்தியன் (சாவாது என்றும் இருப்பவன்), தலைவன்;

பொடி அணி பெம்மான் - திருநீற்றைப் பூசிய பெருமான்;

அடியை அடைந்தோர் படி அடையாரே - அவனது திருவடியைச் சரணடைந்தவர்கள் மீண்டும் பூமியில் பிறக்கமாட்டார்கள்; (படி - பூமி);


8)

வரையது பேர்த்தான் .. அழவிரல் ஊன்றும்

வரதனை முக்கட் .. பரமனை வாழ்த்தே.


வரையது பேர்த்தான் அழ விரல் ஊன்றும் வரதனை - கயிலைமலையைப் பெயர்த்த இராவணன் அழும்படி திருவடி விரலை ஊன்றி அவனை நசுக்கிய, (பின்னர் அவன் பாடிய இசையைக் கேட்டு) வரம் அருள்பவனை; (வரை - மலை; அது - பகுதிப்பொருள்விகுதி);

முக்கட் பரமனை வாழ்த்தே - முக்கண்ணனைப், பரமனை வாழ்த்துவாயாக;


9)

அயனரி காணா .. வியனெரி ஆனான்

பெயருரை செய்தால் .. துயரற லாமே.


அயன் அரி காணா வியன்-எரி ஆனான் - பிரமன் விஷ்ணு இவர்களால் தேடிக் காண இயலாத பெரிய ஜோதிப்பிழம்பு ஆனவன்; (வியன் - பெரிய); (எரி - தீ);

பெயர் உரை-செய்தால் துயர் அறல் ஆமே - அப்பெருமானது திருநாமத்தைச் சொன்னால் துன்பம் நீங்கும்;


10)

வழியறி யார்சொல் .. மொழிகளை நாடேல்

மழுவனை வாழ்த்தப் .. பழவினை வீடே.


வழி-அறியார் சொல் மொழிகளை நாடேல் - நல்ல நெறியை அறியாதவர்கள் சொல்லும் பேச்சைக் கேட்டு மயங்காதே; (நாடுதல் - விரும்புதல்; நினைத்தல்);

மழுவனை வாழ்த்தப் பழவினை வீடே - மழுவை ஏந்திய சிவபெருமானை வாழ்த்தினால் பழவினைகள் நீங்கும்;


11)

கருமணி கண்டன் .. பொருவிடை ஏறும்

பெருமையி னான்றன் .. திருவடி போற்றி.


கருமணி கண்டன் - நீலமணியைக் கண்டத்தில் உடையவன்;

பொரு-விடை ஏறும் பெருமையினான்-தன் திருவடி போற்றி - போர்செய்ய வல்ல இடபத்தின்மேல் ஏறும் பெருமையை உடையவனது திருவடிகளுக்கு வணக்கம்; (பொருதல் - போர்செய்தல்);


வி. சுப்பிரமணியன்

----------- --------------


Tuesday, August 5, 2025

P.429 - ஆமூர் (திருவாமூர்) - நீரார் சடையானை

2018-04-07

P.429 - ஆமூர் (திருவாமூர்)

---------------------------------

(வஞ்சித்துறை - தானா தனதானா; மா மாங்காய் - வாய்பாடு; திருவிருக்குக்குறள் அமைப்பு);

(சம்பந்தர் தேவாரம் - 1.93.1 - "நின்று மலர்தூவி")


முற்குறிப்பு - இப்பாடல்களில் 4 சிறிய அடிகள். அடியின் சிறுமை கருதி, இங்கே, ஒவ்வொரு வரியிலும் 2 அடிகள் இடப்பபட்டுள்ளன.


1)

நீரார் சடையானைச் சீரார் திருவாமூர்

பேராப் பெரியானை ஓராய் மடநெஞ்சே.


கங்கைச் சடையானைத், திரு மிக்க திருவாமூரை நீங்காத பெரியவனைப், பேதை மனமே, நீ எண்ணுவாயாக. (பேர்தல் - நீங்குதல்); (ஓர்தல் - எண்ணுதல்);


2)

சிறைவண் டறையோவா நறையார் பொழிலாமூர்

இறைவன் கழலேத்தப் பறையும் வினைதானே.


சிறகுகளையுடைய வண்டுகளின் ரீங்காரம் ஓயாத வாசப்பொழில் சூழ்ந்த திருவாமூரில் உறையும் இறைவனது திருவடியைப் போற்றினால் வினைகள் அழியும்.


3)

கானை இடமாக்கொள் மானை மணியாமூர்த்

தேனை வழிபட்டு வானைப் பெறலாமே.


சுடுகாட்டை இடமாகக் கொள்ளும் தலைவனை, அழகிய திருவாமூரில் உறையும் தேன் போன்ற சிவபெருமானை வழிபாடு செய்து சிவலோகம் பெறலாம். (கான் - சுடுகாடு); (மான் - தலைவன்); (மணி - அழகு);


4)

துணிவெண் பிறைசூடி அணிகொள் திருவாமூர்த்

துணைவன் கழலேத்தப் பிணிவல் வினைவீடே.


துணி-வெண்-பிறை சூடி - வெண்மையான நிலாத்துண்டத்தைச் சூடியவன்; (துணி - துண்டம்);

அணிகொள் திருவாமூர்த் துணைவன் - அழகிய திருவாமூரில் உறையும் துணைவன்;

கழல் ஏத்தப் பிணி வல்வினை வீடே - அவனது திருவடியை வணங்கினால் நம்மைப் பிணித்துள்ள வலிய வினைகள் நீங்கும்;


5)

சடையன் தனிவெள்ளை விடையன் திருவாமூர்

அடையும் அடியாரை அடையா வினைதானே.


தனி வெள்ளை விடையன் - ஒப்பற்ற வெண்ணிற இடபத்தை வாகனமாக உடையவன்;


6)

மையம் பொழிலாமூர் ஐயன் அரவாரும்

மெய்யன் அடிபோற்ற வெய்ய வினைவீடே.


மை-அம்-பொழில் ஆமூர் ஐயன் - கரிய அழகிய சோலை சூழ்ந்த திருவாமூரில் உறைகின்ற தலைவன்; (மை - கருமை); ( அம் - அழகு);

அரவு ஆரும் மெய்யன் - திருமேனிமேல் பாம்பை அணிந்தவன்;

அடி போற்ற வெய்ய வினை வீடே - அப்பெருமானது திருவடியை வழிபட்டால் கொடிய வினையெல்லாம் நீங்கும்;


7)

நீல மணிகண்டன் ஆலன் அணியாமூர்ச்

சூலன் துதிபாட மேலை வினைவீடே


நீலமணி கண்டன் - ஆலகாலம் நீலமணிபோலக் கண்டத்தில் திகழ்பவன்;

ஆலன் - கல்லால-மரத்தின்கீழ் இருப்பவன் - தட்சிணாமூர்த்தி;

அணி ஆமூர்ச் சூலன் துதிபாட மேலைவினை வீடே - அழகிய திருவாமூரில் உறையும் சூலபாணியைத் துதித்தால் நம் பழவினை (/ஆகாமியம்) நீங்கும்; (மேலை - முந்தின; அடுத்த; மேல்வினை - ஆகாமியம்);(அப்பர் தேவாரம் - 5.5.4 - "அண்ணாமலை கைதொழ ஓடிப் போகும்நம் மேலை வினைகளே");


8)

பொருப்பைப் பெயர்மூடன் செருக்கை அழியண்ணல்

தருக்கள் மலியாமூர்க் கருத்தன் கழல்காப்பே.


பொருப்பைப் பெயர் மூடன் செருக்கை அழி அண்ணல் - கயிலைமலையைப் பெயர்த்த மூடனான இராவணனது ஆணவத்தை அழித்த பெருமான்; (பொருப்பு - மலை);

தருக்கள் மலி ஆமூர்க் கருத்தன் கழல் காப்பே - மரங்கள் நிறைந்த திருவாமூரில் உறையும் கடவுளின் திருவடிகள் நம் துணை; (தரு - மரம்); (கருத்தன் - கர்த்தன் - கர்த்தா - கடவுள்; தலைவன்);


9)

அரியும் அயன்நேடும் எரியன் எழிலாமூர்ப்

பெரியன் புகழ்பாடப் பிரியும் வினைதானே.


அரியும் அயன் நேடும் எரியன் - திருமாலும் பிரமனும் தேடிய ஜோதிவடிவினன்; (அயன் - அயனும்; உம்மைத்தொகை); (குறிப்பு - அப்பர் தேவாரம் - 4.37.2 - "தூமமுந் தீபங் காட்டி"; திருவாசகம் - அருட்பத்து - 8.29.1 - "பங்கயத்து அயனுமால் அறியா நீதியே"; - இந்த இடங்களில் இரண்டே பொருள்களைச் சொன்னாலும் ஒன்றில் உம் வந்து இன்னொன்றில் உம் இன்றி வந்துள்ளன);


10)

பொய்யர்க் கருளாத ஐயன் அணியாமூர்ச்

செய்யன் கழல்போற்றி செய்ய நலமாமே


பொய்யர்க்கு அருளாத ஐயன் - பொய் பேசித் திரிகின்றவர்களுக்கு அருள் இல்லாத தலைவன்;

அணி ஆமூர்ச் செய்யன் - அழகிய திருவாமூரில் உறையும் செம்மேனியன்;

கழல் போற்றிசெய்ய நலம் ஆமே - அப்பெருமானது திருவடிகளை வழிபட்டால் நன்மை ஆகும்;


11)

அலைவன் புரமெய்த சிலையன் திருவாமூர்

நிலையன் அடியாரை விலகும் வினைதானே.


அலை-வன்-புரம் எய்த சிலையன் - எங்கும் திரிந்து அலைந்த வலிய கொடிய முப்புரங்களை மேருமலை-வில்லால் எய்தவன்; (வன்மை - வலிமை; கொடுமை); (சிலை - வில்; மலை);

திருவாமூர் நிலையன் - திருவாமூரில் உறைகின்றவன்;

அடியாரை விலகும் வினைதானே - (அப்பெருமானது அருளால்) அப்பெருமானது பக்தர்களை அவர்களது வினைகள் நீங்கும்;


வி. சுப்பிரமணியன்

----------- --------------