Showing posts with label கருகாவூர் (திருக்கருகாவூர்). Show all posts
Showing posts with label கருகாவூர் (திருக்கருகாவூர்). Show all posts

Saturday, December 19, 2015

02.50 – கருகாவூர் (திருக்கருகாவூர்)


02.50 –
கருகாவூர் (திருக்கருகாவூர்)



2012-05-16
திருக்கருகாவூர்
--------------------
(பன்னிரண்டு பாடல்கள்). (12 songs in this padhigam)
(நாலடித் தரவு கொச்சகக் கலிப்பா)
(சம்பந்தர் தேவாரம் - 2.48.1 - "கண்காட்டு நுதலானும் கனல்காட்டும் கையானும்")



1)
வன்னமயில் வாகனற்கும் மாவேழ முகத்தாற்கும்
அன்னையவள் தன்னோடும் அஞ்சடையன் அமருமிடம்
அன்னநடை மாதரொடும் அவர்கணவர் வலம்வந்து
சென்னிமிசைக் கைகூப்பும் திருக்கருகா வூர்தானே.



வன்னம் - வர்ணம்/வருணம் - அழகு;
வாகனற்கு - வாகனனுக்கு;
முகத்தாற்கு - முகத்தானுக்கு ;
அம் சடை - அழகிய சடை;
அமர்தல் - விரும்புதல்; இருத்தல்;


அழகிய மயிலை வாகனமாக உடைய முருகனுக்கும் அழகிய யானைமுகம் உடைய விநாயகனுக்கும் தாயான உமையோடு அழகிய சடையினனான சிவபெருமான் விரும்பி உறையும் தலம், அன்னம் போன்ற நடையை உடைய பெண்களும் அவர்தம் கணவர்களும் பிரதட்சிணம் செய்து உச்சிமேல் கைகூப்பி வணங்கும் திருக்கருகாவூர் ஆகும்.



2)
சார்ந்தவர்க்குத் தண்ணருள்செய் தன்மையினான் தாழ்சடையன்
ஆர்ந்தவிடம் அடைகண்டன் அன்னையொடும் அமருமிடம்
நேர்ந்துகொண்டு நாளுமிக நேரிழையார் கணவரொடு
சேர்ந்துவலம் செய்துமகிழ் திருக்கருகா வூர்தானே.



சார்ந்தவர் - சரண்புகுந்தவர்கள்;
தண்ணருள் - இனிய அருள்;
ஆர்ந்த விடம் - உண்ட நஞ்சு; (ஆர்தல் - உண்ணுதல்; பரவுதல் (To spread over));
அடை - அடைதல் / அடைத்தல்;
அன்னை - உமையம்மை;
நேர்ந்துகொள்ளுதல் - பிரார்த்தனை செய்துகொள்ளுதல் (To take a vow);
நேரிழை - பெண்; (Lady, as adorned with fine jewels);



3)
முரண்புரங்கள் மூன்றினையும் முறுவலொன்றால் எரித்தருள்வான்
இரண்டொடுமூன் றெழுத்தானான் இமையவளோ டமருமிடம்
சுருண்டகுழல் மங்கையர்கள் சுற்றத்தார் புடைசூழத்
திரண்டுவந்து துதிசெய்யும் திருக்கருகா வூர்தானே.



முரண் புரங்கள் மூன்று - பகைத்த முப்புரங்கள்;
இரண்டொடு மூன்று எழுத்து - அஞ்செழுத்து - திருவைந்தெழுத்து;
இமையவள் - இமவான் மகளான பார்வதி;
(திருப்புகழ் - பழநி - "சுருளளக பார .... இளையகுற மாது பங்க பழநிமலை நாத கந்த இமையவள்த னால்ம கிழ்ந்த ...... பெருமாளே";
திருப்புகழ் - திருத்தணிகை - "முகத்தைமி னுக்கிக ளசடிகள் பொருப்பிலி மக்கிரி பதிபெறு மிமையவ ளபிராமி ......" - பொருப்பில் இமக் கிரி பதி பெறும் இமையவள் - மலைகளுள் சிறந்த இமயமலை அரசன் பெற்ற இமயவல்லி);
புடைசூழ்தல் - சுற்றியிருத்தல்;



----- Q&A on this song ------
(Q: //இரண்டொடுமூன் றெழுத்தானான்// -- விளக்கியருளவும்.
A: My response:
கிட்டத்தட்ட ஐந்தாண்டுகளுக்குமுன் 2008-இல் நான் இட்ட திருநாகேச்சரப் பதிகப் பாடல் ஒன்றில் - "அஞ்செழுத் தாகிய அரனே போற்றி" என்ற வரி வந்திருந்தது. அதை ஒட்டி அச்சமயம் நிகழ்ந்த ஓர் உரையாடலில் ஓர் அன்பர் அளித்த விளக்கம்:
"ஐந்தெழுத்து தமிழன்று. சமஸ்கிருதமும் அன்று. அதுவே சிவன்‍தான்!"
--------------- ---------



4)
பேயினிய உருவேண்டிப் பெற்றநல் அடியாரைத்
தாயிவரென் றுரைசெய்தான் உமையோடு தங்குமிடம்
வாயினிக்க அஞ்செழுத்தை மகிழ்ந்தோதி மைந்தரொடு
சேயிழையார் வலம்செய்யும் திருக்கருகா வூர்தானே.



பேய் இனிய உரு - இனிய பேய் உரு; (இனிது - நன்மையானது);
(பெரியபுராணம்: காரைக்கால் அம்மையார் புராணம் - 12.24.29 -
"ஈங்கிவன் ... ஆங்குநின் தாள்கள் போற்றும் பேய்வடி வடியே னுக்குப்
பாங்குற வேண்டும் என்று பரமர்தாள் பரவி நின்றார்.
--- பாங்கு - நன்மை);
மைந்தன் - கணவன்; மகன்;


பேய் உருவே இனிய உருவென்று ஈசனிடம் வேண்டிப் பெற்றுக்கொண்ட நல்ல பக்தர் - காரைக்கால் அம்மையார் - தலையால் கயிலைமலையில் ஏறும்போது, பார்வதி 'இவர் யார்' என்று ஈசனிடம் வினவியபோது - 'இவர் நம்மைப் பேணும் தாய்' என்று சொன்னான். அப்பெருமான் உமையம்மையோடு எழுந்தருளியிருக்கும் தலம், வாயாரத் திருவைந்தெழுத்தைச் சொல்லிப் பெண்கள் தம் கணவரோடு பிரதட்சிணம் செய்யும் திருக்கருகாவூர் ஆகும்.



5)
தீயொருகண் திகழ்பெருமான் செஞ்சடையிற் கங்கையினான்
தாயொருபங் கமர்கின்ற தந்தையவன் தங்குமிடம்
போயொருகால் பொன்னடியைப் போற்றியவர் மனமகிழ்ந்து
சேயொடுவந் தினிதேத்தும் திருக்கருகா வூர்தானே.



ஒரு கண்ணில் தீயைத் தாங்கியவன்; செஞ்சடையில் கங்கையைத் தாங்கியவன்; உமையம்மையாரைத் தன் திருமேனியில் ஒரு பாகமாக விரும்பும் தந்தையான சிவபெருமான் எழுந்தருளியிருக்கும் தலம், முன்னொருமுறை சென்று பொன்னடியை வாழ்த்தியவர்கள் (தாங்கள் விரும்பும் வரம் பெற்று) மனம் மகிழ்ந்து தங்கள் குழந்தையோடு வந்து வழிபாடு செய்யும் திருக்கருகாவூர் ஆகும்.



6)
பால்விரும்பும் பாலகற்குப் பாற்கடலே ஈந்தபிரான்
மால்விடைமேல் ஏறுமரன் மாதோடு மகிழுமிடம்
சூல்விளங்கித் தம்குடும்பம் தழைத்திருக்கத் துணைவரொடும்
சேல்விழியார் வலம்செய்யும் திருக்கருகா வூர்தானே.



பாலகற்கு - பாலகன்+கு - பாலகனுக்கு;
(9.29.9 - திருப்பல்லாண்டு - "பாலுக்குப் பாலகன் வேண்டி அழுதிடப் பாற்கடல் ஈந்தபிரான்" - பாலை உண்பதற்கு வியாக்கிரபாத முனிவர் புதல்வனாகிய உபமன்யு என்ற சிறுவன் விரும்பிப் பால் பெறாது அழுது வருந்த, அவனுக்குப் பாற்கடலையே அழைத்து வழங்கிய பெருமான்) ;


மால் விடை - பெரிய இடபம்; திருமாலாகிய விடை எனலும் ஆம்;
(உதாரணம்: சேரமான் பெருமாள் நாயனார் அருளிய பொன்வண்ணத்தந்தாதி - 11.6.1 - "பொன்வண்ணம் எவ்வண்ணம் .... வெள்ளிக்குன்றம் தன் வண்ணம் எவ்வண்ணம் அவ்வண்ணம் மால்விடை ....":
திருவாசகம் - திருச்சாழல் - 8.12.15 - "கடகரியும் பரிமாவும் ... தழலெரித்த அந்நாளில் இடபமதாய்த் தாங்கினான் திருமால்காண் சாழலோ.")
சூல் - கருப்பம் (Conception, pregnancy);


(இலக்கணக் குறிப்பு : மகன்+கு = மகற்கு - உதாரணங்கள்:
திருக்குறள்-110: "எந்நன்றி கொன்றார்க்கும் உய்வுண்டாம் உய்வில்லை
செய்ந்நன்றி கொன்ற மகற்கு."
சம்பந்தர் தேவாரம் - 3.39.9: "பூமகற்கும் அரிக்குமோர்வரு புண்ணியன்னடி போற்றிலார் ......" - பூமகன் - பிரமன்)






7)
அருந்துவிடம் திகழ்கண்டன் ஆளான அடியவர்கட்கு
அருந்துணைவன் உமைபிரியா ஆகத்தன் அமருமிடம்
பொருந்துமண வாழ்வினில்நற் புத்திரபாக் கியம்வேண்டித்
திருந்திழையார் வலம்செய்யும் திருக்கருகா வூர்தானே.



அருந்துவிடம் திகழ்கண்டன் - உண்ட விஷம் நீலமணி போலத் திகழ்கின்ற கண்டத்தை உடையவன்;
ஆள் - அடிமை; (அப்பர் தேவாரம் - 6.67.1 - "ஆளான அடியவர்கட் கன்பன்" - தனக்கு அடிமையான அன்பர்களுக்குத் தானும் அன்பன்);
அடியவர்கட்கு அரும் துணைவன் - பகதர்களுக்குச் சிறந்த துணைவன்;
உமை பிரியா ஆகத்தன் அமருமிடம் - உமைபங்கன் விரும்பி உறையும் இடம்; (ஆகம் - மேனி);
பொருந்துதல் - மனம் இசைவாதல்; தகுதியாதல்;
திருந்திழை - பெண் (Woman, as adorned with jewels);



8)
வல்லரக்கன் தனையன்று மலர்விரலிட் டடர்த்தருளும்
எல்லையிலாப் புகழாளன் ஏந்திழையோ டமருமிடம்
மெல்லிடையார் அவர்கணவர் வேண்டுகிற மக்களெனும்
செல்வமுறத் தேடிவரும் திருக்கருகா வூர்தானே.



வல்லரக்கன்தனை அன்று மலர்விரல் இட்டு அடர்த்து அருளும் - வலிய இராவணனை மலர்ப்பாதத் திருவிரலை ஊன்றி நசுக்கிய; (அடர்த்தல் - நசுக்குதல்;
ஏந்திழை - பெண் (Woman beautifully decked with jewels) - இங்கே, பார்வதி;
மெல்லிடையார் அவர்கணவர் - உம்மைத்தொகை - மெல்லிய இடையை உடைய பெண்களும் அவர்கள் கணவர்களும்;



9)
அற்றையொரு வளர்தீயாய் அயன்மாலுக் கரிதானான்
நற்றவர்கள் போற்றுமரன் நங்கையொடும் அமருமிடம்
நெற்றிமிசை நீறணிந்து நெஞ்சத்தில் பேரணிந்து
சிற்றிடையார் துதிசெய்யும் திருக்கருகா வூர்தானே.



அற்றை - அன்று;


முன்னொருநாள் எல்லையின்றி வளர்ந்த சோதியாகிப் பிரமனுக்கும் திருமாலுக்கும் அடைவதற்கு அரியவன் ஆனான். நல்ல தவம்செய்வோர்கள் போற்றும் சிவபெருமான் பார்வதியோடு எழுந்தருளியிருக்கும் தலம், நெற்றியில் திருநீறும் மனத்தில் திருநாமமும் தரித்துச் சிற்றிடையுடைய பெண்கள் வழிபடும் திருக்கருகாவூர் ஆகும்.



10)
கைதவமே தவமாகக் கருதீனர் அறியாதான்
மைதவழும் கயிலாயன் மாதோடு மகிழுமிடம்
கொய்தமலர் கொண்டுபல கோதைமார் பூசனைகள்
செய்துமகிழ் வெய்துபதி திருக்கருகா வூர்தானே.



கைதவம் - வஞ்சகம்;
கருது ஈனர் - கருதுகிற இழிந்தோர்;
மை - கரிய மேகம்;
கோதைமார் - பெண்கள்;
மகிழ்வு எய்து பதி - மகிழ்ச்சி அடையும் தலம்;



11)
பெற்றமுகந் தேறுகிற பிரான்ஆறு முகத்தானைப்
பெற்றுகந்த ஈசனுமை பிரியாதான் பேணுமிடம்
சுற்றிவந்து துணையடிமேல் தூமலரின் தொடைசாத்திச்
சிற்றிடையார் துதிசெய்யும் திருக்கருகா வூர்தானே.



பெற்றம் உகந்து ஏறுகிற பிரான் - இடபத்தை வாகனமாக விரும்பும் தலைவன்;
ஆறுமுகத்தானைப் பெற்று உகந்த ஈசன் - ஆறுமுகம் உடைய முருகனைப் பெற்று மகிழ்ந்த ஈசன்;
உமை பிரியாதான் பேணும் இடம் - உமையம்மையைப் பிரியாதவன் விரும்பி எழுந்தருளியிருக்கும் தலம்;
சுற்றிவந்து துணையடிமேல் தூமலரின் தொடை சாத்திச் - பிரதட்சிணம் செய்து, இரு திருவடிகள்மேல் சிறந்த பூக்களால் தொடுக்கப்பட்ட மாலைகளைச் சாத்தி;
சிற்றிடையார் துதிசெய்யும் திருக்கருகாவூர்தானே - சிற்றிடையுடைய பெண்கள் வழிபடும் திருக்கருகாவூர் ஆகும்.



12)
மனமடிமேல் வைத்திருந்த மாணியிடம் வருநமனை
முனமடியால் உதைத்தவன்மென் முலையாளோ டமருமிடம்
தனமடிமேல் பிள்ளையொன்று தவழ்கின்ற வரம்வேண்டித்
தினமடியார் திரள்கின்ற திருக்கருகா வூர்தானே.



பதம் பிரித்து:
மனம் அடிமேல் வைத்திருந்த மாணியிடம் வருநமனை
முனம் அடியால் உதைத்தவன் மென்முலையாளோடு அமரும் இடம்
தன மடிமேல் பிள்ளை ஒன்று தவழ்கின்ற வரம் வேண்டித்
தினம் அடியார் திரள்கின்ற திருக்கருகாவூர்தானே.


மாணி - அந்தணச் சிறுவன் - இங்கே, மார்க்கண்டேயர்;
தன - தன்னுடைய; (அ - ஆறாம் வேற்றுமை உருபு);
இலக்கணக் குறிப்பு : தன மடிமேல் ... அடியார் - ஒருமை பன்மை மயக்கம்;


ஈசன் திருவடிமேல் தன் மனத்தை வைத்திருந்த மார்க்கண்டேயரிடம் வந்த எமனை முன்பு தன் தாளால் உதைத்த சிவபெருமான், மென்மையான முலையினளான உமையம்மையோடு விரும்பி வீற்றிருக்கும் தலம், தன் மடிமீது ஒரு பிள்ளை தவழவேண்டும் என்ற வரம்வேண்டித் தினமும் அடியார்கள் கூடுகிற திருக்கருகாவூர் ஆகும்.



அன்போடு,
வி. சுப்பிரமணியன்



பிற்குறிப்பு :
1) யாப்புக்குறிப்பு :
  • நாலடித் தரவு கொச்சகக் கலிப்பா.
  • அடிதோறும் 4 காய்ச்சீர்கள் ; விளச்சீர்களும் வரலாம்;
  • ஒரோவிடத்தில் மாச்சீர் வரலாம்; அப்படி மாச்சீர் வரின் அதனை அடுத்த சீர் நிரையசையில் தொடங்கும்;
2) சம்பந்தர் தேவாரம் - 2.48.1 -
"கண்காட்டு நுதலானும் கனல்காட்டும் கையானும்
பெண்காட்டும் உருவானும் பிறைகாட்டும் சடையானும்
பண்காட்டும் இசையானும் பயிர்காட்டும் புயலானும்
வெண்காட்டில் உறைவானும் விடைகாட்டும் கொடியானே")
3) திருக்கருகாவூர் - முல்லைவனநாதர் கோயில் தகவல்கள் - தினமலர் தளத்தில்: http://temple.dinamalar.com/New.php?id=672
திருக்கருகாவூர் - தேவாரம் ஆர்க் தளத்தில் : http://www.thevaaram.org/thirumurai_1/koil_view.php?koil_idField=72

-------------- --------------

Sunday, December 6, 2015

02.49 – கருகாவூர் (திருக்கருகாவூர்)


02.49 –
கருகாவூர் (திருக்கருகாவூர்)



2012-05-16
திருக்கருகாவூர்
--------------------
(கலிவிருத்தம் - 'தேமா தேமா புளிமா புளிமாங்காய்' - வாய்பாடு.
ஒரோவிடத்தில் மா வருமிடத்தில் வேறு மாச்சீர் வரலாம்;
ஒரோவிடத்தில், புளிமாங்காய் வருமிடத்தில் விளச்சீரோ வேறு காய்ச்சீரோ வரலாம்).
(சம்பந்தர் தேவாரம் - 1.27.1 - "முந்தி நின்ற வினைக ளவைபோகச்")



1)
பண்ணார் பாடல் மகிழ்ந்து பரிசீவான்
பெண்ணார் மேனிப் பெருமான் பிறைசூடி
கண்ணார் நெற்றிக் கடவுள் கருகாவூர்
எண்ணாய் நெஞ்சே இலையோர் இடர்தானே.



பண் - இசை;
ஆர்தல் - பொருந்துதல்;
பரிசு - பரிசில்;
பண் ஆர் பாடல் மகிழ்ந்து பரிசு ஈவான் - இசை பொருந்திய பாடல்கள் பாடுவோர்க்குப் பேரருள் செய்பவன்;
(திருவாசகம் - திருவம்மானை - 8.8.8 -
பண்சுமந்த பாடற் பரிசு படைத்தருளும்
பெண்சுமந்த பாகத்தன் பெம்மான் பெருந்துறையான் ...... )
கண் ஆர் நெற்றிக் கடவுள் - நெற்றிக்கண் உடைய கடவுள் - சிவபெருமான்;
எண்ணாய் நெஞ்சே = மனமே, நீ எண்ணுவாயாக;
இலை ஓர் இடர்தானே - (அப்படி நீ எண்ணினால் நமக்கு) ஒரு துன்பமும் இல்லை;



2)
நீர்கொள் கற்றைச் சடையன் நிலன்வானும்
பேர்கள் சொல்லிப் பரவும் பெருமானார்
கார்கொள் கண்டன் உறையும் கருகாவூர்
சேர்க நெஞ்சே சிதையும் வினைதானே.



நீர்கொள் கற்றைச் சடையன் - கங்கையை அடைத்த சடைக்கற்றை உடையவன்;
பரவுதல் - துதித்தல்;
நிலன் வானும் பேர்கள் சொல்லிப் பரவும் பெருமானார் - பூலோக மக்களும் தேவர்களும் பல திருநாமங்களையும் சொல்லித் துதிக்கின்ற பெருமான்;
கார்கொள் கண்டன் - கரிய கண்டன்;
சிதையும் - அழியும்;



3)
தாதார் கொன்றை சடையிற் புனைதந்தை
மீதூர் நாகம் சரமாய் மிளிர்ஈசன்
காதோர் தோட்டன் கருதும் கருகாவூர்
நீதீ தோட நினையாய் மடநெஞ்சே.



தாது ஆர் கொன்றை - மகரந்தம் பொருந்திய கொன்றைப்பூ;
மீதூர்தல் - மீது ஊர்தல் - மேனிமேல் நகர்தல்; மிகுதல்;
சரம் - மாலை;
காது ஓர் தோட்டன் - காதில் ஒரு தோடு அணிந்தவன் - அர்த்தநாரீஸ்வரன்;
கருதும் கருகாவூர் - விரும்பி உறையும் திருக்கருகாவூர்;
கருகாவூர் நீ தீது ஓட நினையாய் மடநெஞ்சே - பேதைமனமே! தீயவை நீங்குவதற்காக, நீ சிவபெருமான் எழுந்தருளியிருக்கும் திருக்கருகாவூரை நினைவாயாக;


குறிப்பு: தோடு அணிந்தவன் என்ற பொருளில் தோட்டன், தோடன் என்ற இரு சொற்களும் பாடல்களில் வரக்கூடும்; உதாரணம்:
(அப்பர் தேவாரம் - 5.23.2 - "வீதி வேல்நெடுங் .... வெண் தோட்டராய்க் காதில் வெண்குழை வைத்தவெங் கள்வரே." -- வெண் தோட்டராய் - வெண்மையான ஒளி செய்கின்ற தோடணிந்தவராய்);


(சம்பந்தர் தேவாரம் - 3.78.4 -
"காடர்கரி காலர்கனல் கையரனல் மெய்யருடல் செய்யர்செவியில் தோடர்தெரி கீளர் ....." -- செவியில் தோடர் - காதில் தோட்டையணிந்தவர்);



4)
பித்தன் வானோர் அமுது பெறஅன்று
கைத்த நஞ்சுண் மிடறன் கருகாவூர்
அத்தன் பாதம் பணியும் அடியார்கட்கு
எய்த்தல் இல்லா இனிய நிலைதானே.



கைத்த நஞ்சு உண் மிடறன் - கசப்பான விஷத்தை உண்ட கண்டத்தை உடையவன்;
அத்தன் - தந்தை;
எய்த்தல் - வருந்துதல்;



5)
செங்கண் ஏற்றன் வடியார் திரிசூலன்
மங்கை பாகன் அரவம் மதியோடு
கங்கை தங்கு சடையன் கருகாவூர்
அங்கை கூப்பிப் பணிவார் அடியாரே.



செங்கண் ஏற்றன் - சினத்தால் கண் சிவந்த இடபத்தின்மேல் ஏறுபவன்;
வடி ஆர் திரிசூலன் - கூர்மையான திரிசூலத்தை ஏந்துபவன்;
அங்கை கூப்பி - கைகளைக் குவித்து;



6)
இட்ட மாக இடுகா னிடையாடும்
நட்டன் நாணா அரையில் ஒருநாகம்
கட்டும் ஈசன் கவினார் கருகாவூர்ச்
சிட்டன் தாள்சேர் மனமே திருவாமே.



இட்டமாக இடுகானிடை ஆடும் - விரும்பிச் சுடுகாட்டில் ஆடுகின்ற;
நட்டன் - திருநடம் செய்பவன்; கூத்தன்;
நாணா - நாணாக;
கவின் ஆர் கருகாவூர்ச் சிட்டன் - அழகிய திருக்கருகாவூரில் எழுந்தருளியிருக்கும் சிஷ்டன்;
திரு ஆம் - நன்மை உண்டாகும்;



7)
காட்டில் வேடர் விழியைக் கவர்வேடன்
ஓட்டை ஏந்தி உழலும் ஒருவன்கண்
காட்டும் நெற்றிக் கடவுள் கருகாவூர்
நாட்ட மாகித் தொழுதால் நலமாமே.



வேடர் - கண்ணப்பர்;
வேடன் - வேஷதாரி; (தன் கண்ணில் இரத்தம் கசிவதுபோல் நடித்தவன்);
ஓட்டை ஏந்தி உழலும் ஒருவன் - பிரமனது மண்டையோட்டை ஏந்திப் பிச்சைக்குத் திரியும் ஒப்பற்றவன்;
கண் காட்டும் நெற்றிக் கடவுள் - நெற்றிக்கண்ணை உடைய கடவுள்;
நாட்டம் - விருப்பம்; நோக்கம்;



8)
மால தாகி மலையை எடுத்தான்தான்
சால நையத் தனிமெல் விரலூன்றும்
கால காலன் கவினார் கருகாவூர்ச்
சூலன் பாதம் தொழுவார் துயர்போமே.



மால் - அறியாமை; ஆணவம்;
மால் அது ஆகி மலையை எடுத்தான்தான் - அறியாமையும் செருக்கும் மிகுந்து கயிலையைப் பெயர்க்க முயன்ற இராவணன்;
சால நைய - மிகவும் வருந்த;
தனி மெல் விரல் - ஒரே ஒரு மென்மையான விரலை;
கால காலன் -காலனுக்குக் காலனாய் அவனை அழித்தருளியவன்;
கவினார் கருகாவூர்ச் சூலன் - அழகிய திருக்கருகாவூரில் உறையும் சூலபாணி;



9)
மானே என்னா மலரோன் அரிகாணார்
ஆனூர் அண்ணல் அவன்பொன் னடிபோற்றக்
கானார் சோலைக் கவினார் கருகாவூர்
போனாற் பொல்லா வினைகள் பொடியாமே.



மான் - பெரியோன் (Great person or being);
மலரோன் - பிரமன்;
அரி - திருமால்;
மானே என்னா மலரோன் அரி காணார் - பெருமானே என்று போற்றாத பிரமனும் விஷ்ணுவும் (அடியும் முடியும்) காணமாட்டார்;
ஆன் ஊர் அண்ணல் - இடப வாகனன்;
அவன் பொன்னடி போற்றக் கான் ஆர் சோலை கவின் ஆர் கருகாவூர் போனால் - அப்பெருமானின் பொன்னடியை வழிபட, மணம் கமழும் சோலைகள் திகழும் அழகிய திருக்கருகாவூருக்குச் சென்றால்;
பொல்லா வினைகள் பொடி ஆம் - தீவினகள் எல்லாம் சாம்பலாகும்;



10)
ஆய்தல் செய்ய அறியாச் சமயத்தார்
வாய்சொல் பொய்கள் தமைநீர் மதியேன்மின்
காய்கண் காட்டும் நுதலான் கருகாவூர்
போய்முன் வீழிற் பொல்லா வினைபோமே.



ஆய்தல் - ஆராய்தல்; (சம்பந்தர் தேவாரம் - 1.11.5 - "ஆயாதன சமயம்பல அறியாதவன்");
வாய் சொல் பொய்கள்தமை நீர் மதியேன்மின் - அவர்களின் வாய்கள் சொல்லும் பொய்களை நீங்கள் மதியாதீர்;
காய் கண் காட்டும் நுதலான் - எரிக்கும் நெற்றிக்கண் உடையவன்;
வீழில் - விழுந்து தொழுதால்;


11)
தீக்கண் ஒன்று திகழும் சிவனெம்மான்
தாக்கும் ஆனை உரிவை தரியீசன்
காக்கும் கடவுள் கருதும் கருகாவூர்
தீர்க்கும் அன்பர் திருவில் வினைதானே.



எம் மான் - எம்பெருமான்;
தாக்கும் ஆனை உரிவை தரி ஈசன் - போர் செய்த யானையின் தோலைப் போர்த்த ஈசன்;
காக்கும் கடவுள் கருதும் கருகாவூர் - மூவுலகங்களையும் இரட்சிக்கும் சிவபெருமான் விரும்பி உறையும் தலமான திருக்காவூர்;
தீர்க்கும் அன்பர் திரு இல் வினைதானே - வந்து வழிபடும் பக்தர்களுடைய பாவங்களைத் தீர்க்கும்; (திரு இல் வினை - நன்மை இல்லாத வினைகள் - பாவங்கள்);
(அப்பர் தேவாரம் - 6.95.5 -
"திருக்கோயி லில்லாத திருவி லூரும்
.. திருவெண்ணீ றணியாத திருவி லூரும்
....." ---- திரு இல் ஊர் - நன்மை இல்லாத ஊர்);
(சம்பந்தர் தேவாரம் - 1.116.8 -
"கருவைக் கழித்திட்டு வாழ்க்கை கடிந்துங் கழலடிக்கே
உருகி மலர்கொடு வந்துமை யேத்துதும் நாமடியோம்
செருவி லரக்கனைச் சீரி லடர்த்தருள் செய்தவரே
திருவிலித் தீவினை தீண்டப்பெ றாதிரு நீலகண்டம்."
---- திருவிலித்தீவினை - திரு இல் இத் தீவினை;)



அன்போடு,
வி. சுப்பிரமணியன்



பிற்குறிப்பு :
1) யாப்புக்குறிப்பு:
  • கலிவிருத்தம் - 'தேமா தேமா புளிமா புளிமாங்காய்' - என்ற வாய்பாடு
  • சம்பந்தரின் 1.27 பதிகத்தில் பொதுவாக 'மா தேமா புளிமா புளிமாங்காய்' என்ற அமைப்பு.
  • ஒரோவிடத்தில் மா வருமிடத்தில் வேறு மாச்சீர் வரலாம்; ஒரோவிடத்தில், புளிமாங்காய் வருமிடத்தில் விளச்சீரோ வேறு காய்ச்சீரோ வரலாம்.
2) சம்பந்தர் தேவாரம் - 1.27.11 -
"மாட மல்கு மதில்சூழ் காழிமன்
சேடர் செல்வ ருறையுந் திருப்புன்கூர்
நாட வல்ல ஞான சம்பந்தன்
பாடல் பத்தும் பரவி வாழ்மினே.")
3) திருக்கருகாவூர் - முல்லைவனநாதர் கோயில் தகவல்கள் - தினமலர் தளத்தில்: http://temple.dinamalar.com/New.php?id=672திருக்கருகாவூர் - தேவாரம் ஆர்க் தளத்தில் : http://www.thevaaram.org/thirumurai_1/koil_view.php?koil_idField=72

-------------- --------------