Showing posts with label தானத் தானத் தனதான. Show all posts
Showing posts with label தானத் தானத் தனதான. Show all posts

Saturday, July 30, 2022

T.150 - பொது - மாதைக் காசை

2011-06-15

T.150 - பொது - மாதைக் காசை

--------------

(வண்ணவிருத்தம்;

தானத் தானத் .. தனதான)

(நாடித் தேடித் தொழுவார்பால் - திருப்புகழ் - திருவானைக்கா)


மாதைக் காசைத் .. தின(ம்)நாடி

.. மாயத் தேபுக் .. கழிவேனோ

வேதத் தாயைப் .. பணியாத

.. வீணர்க் கேதப் .. பிணிதீராய்

பாதச் சீரைத் .. தமிழாலே

.. பாடிப் பேணத் .. தவறாத

காதற் சீலர்க் .. கணியானே

.. கானத் தாடற் .. பெருமானே.


பதம் பிரித்து:

மாதைக் காசைத் தினம் நாடி,

.. மாயத்தே புக்கு அழிவேனோ;

வேதத்தாயைப் பணியாத

.. வீணர்க்கு ஏதப்-பிணி தீராய்;

பாதச் சீரைத் தமிழாலே

.. பாடிப் பேணத் தவறாத

காதற் சீலர்க்கு அணியானே;

.. கானத்து ஆடற் பெருமானே.


* (ம்) - புணர்ச்சியில் மகர-ஒற்றுக் கெடும் இடம்;

மாதைக் காசைத் தின(ம்) நாடி, மாயத்தே புக்கு அழிவேனோ - பெண், பொருள் என்ற ஓயா ஆசைகளால் மாயையுள் அழுந்தி அழியாதவாறு அருள்வாயாக; (மாயம் - மாயை);

வேதத்தாயைப் பணியாத வீணர்க்கு ஏதப்-பிணி தீராய் - வேதத்தில் விளங்கும் உன்னைப் பணியாத வீணர்களுக்குத் துன்பத்தைத் தரும் பிணியை (உடல்நோய் & பிறவிநோய்) நீக்காதவனே; (வேதத்தாய் - வேதங்களில் விளங்கும் நீ); (ஏதம் - துன்பம்); (பிணி - நோய்; பந்தம்; மும்மலக்கட்டு); (அப்பர் தேவாரம் - 6.12.5 - "வேதத்தாய் கீதத்தாய்"); (அப்பர் தேவாரம் - 4.11.6 - "சலமிலன் சங்கரன் சார்ந்தவர்க்கலால் நலமிலன்");

பாதச்-சீரைத் தமிழாலே பாடிப் பேணத் தவறாத காதற்-சீலர்க்கு அணியானே - உன் திருவடிப்-புகழைத் தமிழால் பாடிப் போற்றத் தவறாத அன்புடைய சீலர்களுக்கு அண்மையில் இருப்பவனே; (சீர் - புகழ்); (பேணுதல் - போற்றுதல்); (அணியான் - அணியன் - அருகே இருப்பவன்); (அப்பர் தேவாரம் - 6.57.3 - "வெய்யாய் தணியாய் அணியாய் போற்றி");

கானத்து ஆடற்-பெருமானே - சுடுகாட்டில் கூத்தாடலை உடைய பெருமானே; (கானம் - காடு - சுடுகாடு); (அப்பர் தேவாரம் - 6.55.4 - "கானத்தீ யாடல் உகந்தாய் போற்றி");


வி. சுப்பிரமணியன்

----------- -----------

Friday, August 7, 2020

03.05.109 – ஆனைக்கா - கூலிக்கே நித்தலும் ஆடி - (வண்ணம்)

03.05.109 – ஆனைக்கா - கூலிக்கே நித்தலும் ஆடி - (வண்ணம்)

2009-02-13

3.5.109) கூலிக்கே நித்தலும் ஆடி - ஆனைக்கா - (திருவானைக்கா)

--------------------------------------------------

(வண்ணவிருத்தம்;

தானத் தானத் .. தனதான )

(நாடித் தேடித் தொழுவார்பால் - திருப்புகழ் - திருவானைக்கா )


கூலிக் கேநித் .. தலுமாடிக்

.. கூனிச் சீவித் .. தழியாமல்

பாலிப் பாயைத் .. தமிழாலே

.. பாடிப் பாடிப் .. பணிவேனே

போலிப் பூசைக் .. கரியானே

.. போதத் தாருக் .. கெளியானே

ஆலித் தோடிப் .. புனல்சூழும்

.. ஆனைக் காவிற் .. பெருமானே.


பதம் பிரித்து:

கூலிக்கே நித்தலும் ஆடிக்

.. கூனிச் சீவித்து அழியாமல்,

பாலிப்பாயைத் தமிழாலே

.. பாடிப் பாடிப் பணிவேனே;

போலிப் பூசைக்கு அரியானே;

.. போதத்தாருக்கு எளியானே;

ஆலித்து ஓடிப் புனல் சூழும்

.. ஆனைக்காவில் பெருமானே.


கூலிக்கே நித்தலும் ஆடிக், கூனிச் சீவித்து அழியாமல் - பணத்திற்காகவே எப்பொழுதும் செயல்பட்டுத், தகுதியற்றவர்களுக்குக் குனிந்து அடிபணிந்து வாழ்ந்து அழியாமல்; (கூனுதல் - வளைதல்; முதுகுவளைதல்); (சீவித்தல் - உயிர்வாழ்தல்; ஜீவனம் பண்ணுதல்);

பாலிப்பாயைத் தமிழாலே பாடிப் பாடிப் பணிவேனே - காக்கின்ற உன்னைத் தமிழால் பலவாறு பாடித் தொழுவேன்; (பாலித்தல் - காத்தல்); (சுந்தரர் தேவாரம் - 7.34.1 – "தம்மையே புகழ்ந் திச்சை பேசினுஞ் சார்கினுந் தொண்டர் தருகிலாப் பொய்ம்மையாளரைப் பாடாதே யெந்தை புகலூர் பாடுமின் புலவீர்காள்");

போலிப் பூசைக்கு அரியானே - (உண்மையான பக்தி இல்லாத) போலிப் பூசை செய்பவர்களால் அடையப்படாதவனே; (திருநாவுக்கரசர் தேவாரம் - 5.90.9 - "பொக்க(ம்) மிக்கவர் பூவு(ம்) நீருங் கண்டு நக்கு நிற்பர் அவர்தம்மை நாணியே);

போதத்தாருக்கு எளியானே - ஞானிகளால் எளிதில் அடையப்படுபவனே; (போதம் - ஞானம்; அறிவு);

ஆலித்து ஓடிப் புனல் சூழும் ஆனைக்காவில் பெருமானே - சப்தமிட்டு ஓடிக் காவிரி சூழ்கின்ற திருவானைக்காவில் எழுந்தருளிய பெருமானே; (ஆலித்தல் - ஒலித்தல்); (புனல் - நீர் - இங்கே, காவிரி);

வி. சுப்பிரமணியன்

-------------------------------- -------------------------------

03.05.108 – ஆனைக்கா - தேவைக்காகச் சிறியாரை - (வண்ணம்)

03.05.108 – ஆனைக்கா - தேவைக்காகச் சிறியாரை - (வண்ணம்)

2009-02-13

3.5.108) தேவைக்காகச் சிறியாரை - ஆனைக்கா - (திருவானைக்கா)

--------------------------------------------------

(வண்ணவிருத்தம்;

தானத் தானத் .. தனதான )

(நாடித் தேடித் தொழுவார்பால் - திருப்புகழ் - திருவானைக்கா )


தேவைக் காகச் .. சிறியாரைத்

.. தேடிச் சேவித் .. திழியாமல்

பாவைப் பாடிப் .. பரமாநின்

.. பாதப் போதைப் .. பணிவேனே

பாவைக் காகத் .. திடமீவாய்

.. பாசத் தோடப் .. படர்சூழும்

ஆவற் காலத் .. தருள்வோனே

.. ஆனைக் காவிற் .. பெருமானே.


பதம் பிரித்து:

தேவைக்காகச் சிறியாரைத்

.. தேடிச் சேவித்து இழியாமல்,

பாவைப் பாடிப், பரமா, நின்

.. பாதப்-போதைப் பணிவேனே;

பாவைக்கு ஆகத்து இடம் ஈவாய்;

.. பாசத்தோடு அப்-படர் சூழும்

ஆவற்காலத்து அருள்வோனே;

.. ஆனைக்காவில் பெருமானே.


தேவைக்காகச் சிறியாரைத் தேடிச் சேவித்து இழியாமல் - உலக வாழ்வின் தேவைகளுக்காக அற்பரை நாடிப் போய் வணங்கி அவர்கள் இட்ட பணியைச் செய்து இழிவுபடாமல்; (சேவித்தல் - பணிசெய்தல்; வணங்குதல்);

பாவைப் பாடிப், பரமா, நின் பாதப்-போதைப் பணிவேனே - பரமனே, பாமாலைகளைப் பாடி உன் திருவடித் தாமரையைத் தொழுவேன்; (பா - பாட்டு); (போது - மலர்); (திருவாசகம் - திருச்சதகம்-26 - "நாயினேன்றன் கண்ணிணை நின் திருப்பாதப் போதுக் காக்கி");

பாவைக்கு ஆகத்து இடம் ஈவாய் - உமைக்குத் திருமேனியில் இடப்பக்கத்தைத் தந்தவனே; (பாவை - பெண் - உமை); (ஆகம் - உடம்பு); (இடம் - இடப்பக்கம்);

பாசத்தோடு அப்-படர் சூழும் ஆவற்காலத்து அருள்வோனே - அந்த எமதூதர்கள் வந்து பாசம் வீசி உயிருக்கு ஆபத்து விளைவிக்கும் இறுதிநாளில் "அஞ்சேல்" என்று அருள்பவனே; (படர் - எமதூதர்); (ஆவற்காலம் - ஆபத் காலம் - ஆபத்துண்டாங்காலம்; இறுதிநாள்);

ஆனைக்காவில் பெருமானே - திருவானைக்காவில் எழுந்தருளிய பெருமானே;

வி. சுப்பிரமணியன்

-------------------------------- -------------------------------

03.05.107 – ஆனைக்கா - ஈனப் பாவப் பணிமேவி - (வண்ணம்)

03.05.107 – ஆனைக்கா - ஈனப் பாவப் பணிமேவி - (வண்ணம்)

2009-02-13

3.5.107) ஈனப் பாவப் பணிமேவி - ஆனைக்கா - (திருவானைக்கா)

--------------------------------------------------

(வண்ணவிருத்தம்;

தானத் தானத் .. தனதான )

(நாடித் தேடித் தொழுவார்பால் - திருப்புகழ் - திருவானைக்கா )


ஈனப் பாவப் .. பணிமேவி

.. ஈறுற் றீமத் .. தெரியாமுன்

நானற் றாளைப் .. புகழ்மாலை

.. நாவிற் சூடிப் .. பிழையேனோ

வானத் தேமுப் .. புரநூற

.. வாய்விட் டேநக் .. கவனேயோர்

ஆனைத் தோலைப் .. புனைவானே

.. ஆனைக் காவிற் .. பெருமானே.


பதம் பிரித்து:

ஈனப் பாவப் பணி மேவி,

.. ஈறு உற்று ஈமத்து எரியாமுன்,

நான் நற்றாளைப் புகழ்மாலை

.. நாவிற் சூடிப் பிழையேனோ;

வானத்தே முப்புரம் நூற

.. வாய்விட்டே நக்கவனே; ஓர்

ஆனைத் தோலைப் புனைவானே;

.. ஆனைக்காவில் பெருமானே.


ஈனப் பாவப் பணி மேவி - இழிந்த பாவச் செயல்களையே விரும்பிச் செய்து; (ஈனம் - இழிவு); (மேவுதல் - விரும்புதல்);

ஈறு உற்று ஈமத்து எரியாமுன் - (காலம் ஓடி) இறந்து, சுடுகாட்டில் எரிக்கப்படுவதன்முன்; (ஈறு - மரணம்; முடிவு); (ஈமம் - சுடுகாடு; சிதை);

நான் நற்றாளைப் புகழ்மாலை நாவில் சூடிப் பிழையேனோ - உன் நல்ல திருவடியைப் புகழும் பாமாலைகளை நான் என் நாவில் தரித்து உய்ய அருள்வாயாக; (சூடுதல் - தரித்தல்; அணிதல்); (பிழைத்தல் - உய்தல்);

வானத்தே முப்புரம் நூற வாய்விட்டே நக்கவனே - வானில் முப்புரங்களும் அழியும்படி வாய்விட்டுச் சிரித்தவனே; (நூறுதல் - அழித்தல்); (வாய்விடுதல் - உரக்கச் சத்தமிடுதல்); (நகுதல் - சிரித்தல்);

ஓர் ஆனைத் தோலைப் புனைவானே - ஒரு பெரிய யானையின் தோலைப் போர்த்தவனே; (புனைதல் - அணிதல்);

ஆனைக்காவில் பெருமானே - திருவானைக்காவில் எழுந்தருளிய பெருமானே;

வி. சுப்பிரமணியன்

-------------------------------- -------------------------------

Friday, July 24, 2020

03.05.106 – ஆனைக்கா - நாளைத் தேவைக்கு என - (வண்ணம்)

03.05.106 – ஆனைக்கா - நாளைத் தேவைக்கு என - (வண்ணம்)

2009-02-13

3.5.106) நாளைத் தேவைக்கு என - ஆனைக்கா - (திருவானைக்கா)

--------------------------------------------------

(வண்ணவிருத்தம்;

தானத் தானத் .. தனதான )

(நாடித் தேடித் தொழுவார்பால் - திருப்புகழ் - திருவானைக்கா )


நாளைத் தேவைக் .. கெனமாடே

.. நாடித் தீனர்க் .. களியாது

நாளைப் பாழுக் .. கிறையாமல்

.. நாவிற் பேரைத் .. தரியேனோ

தாளைப் பேணித் .. தொழுவார்பால்

.. தாயிற் சாலப் .. பரிவாகி

ஆளப் பாரைத் .. தருவோனே

.. ஆனைக் காவிற் .. பெருமானே.


பதம் பிரித்து:

நாளைத் தேவைக்கு என மாடே

.. நாடித், தீனர்க்கு அளியாது,

நாளைப் பாழுக்கு இறையாமல்

.. நாவில் பேரைத் தரியேனோ;

தாளைப் பேணித் தொழுவார்பால்

.. தாயிற் சாலப் பரிவாகி

ஆளப் பாரைத் தருவோனே;

.. ஆனைக்காவில் பெருமானே.


நாளைத் தேவைக்கு என மாடே நாடித் - பிற்காலத்திற்கு வேண்டும் என்று எப்பொழுதும் பொருள் திரட்டுவதிலேயே ஈடுபட்டு; (நாளை - அடுத்த தினம்); (மாடு - செல்வம்); (நாடுதல் - விரும்புதல்);

தீனர்க்கு அளியாது - வறியவர்களுக்கு ஒன்றும் கொடாமல்; (தீனர் - வறியவர்; யாசிப்பவர்);

நாளைப் பாழுக்கு இறையாமல் - ஆயுளை வீணாக்காமல்; (நாள் - வாழ்நாள்); (பாழுக்கிறைத்தல் - [பாழ் நிலத்துக்குத் தண்ணீரிறைத்தல்] வீணாகக் காரியஞ்செய்தல்);

நாவில் பேரைத் தரியேனோ - என் நாவில் உன் திருப்பெயரைத் தரித்து வாழ அருள்வாயாக;

தாளைப் பேணித் தொழுவார்பால் தாயிற் சாலப் பரிவாகி ஆளப் பாரைத் தருவோனே - உன் திருவடியைப் போற்றி வணங்கும் பக்தர்கள்மேல் தாயினும் மிகுந்த அன்புடையவன் ஆகி, அவர்களுக்கு நல்வாழ்வை அருள்பவனே; (பேணுதல் - போற்றுதல்); (சால - மிகவும்); (பரிவு - அன்பு); (பார் - உலகம்);

ஆனைக்காவில் பெருமானே - திருவானைக்காவில் எழுந்தருளியிருக்கும் சிவபெருமானே.


வி. சுப்பிரமணியன்

-------------------------------- -------------------------------


03.05.105 – ஆனைக்கா - ஓடிப் பாரிற் பலநாளும் - (வண்ணம்)

03.05.105 – ஆனைக்கா - ஓடிப் பாரிற் பலநாளும் - (வண்ணம்)

2009-02-13

3.5.105) ஓடிப் பாரிற் பலநாளும் - ஆனைக்கா - (திருவானைக்கா)

--------------------------------------------------

(வண்ணவிருத்தம்;

தானத் தானத் .. தனதான )

(நாடித் தேடித் தொழுவார்பால் - திருப்புகழ் - திருவானைக்கா )


ஓடிப் பாரிற் .. பலநாளும்

.. ஊனைப் பேணிப் .. பிணிமூடி

வாடிப் பாயிற் .. கிடவாமுன்

.. வாசத் தாளைத் .. தொழுவேனோ

பாடிச் சேவித் .. தடைவாரைப்

.. பாலித் தாரத் .. தருவோனே

ஆடக் கானைப் .. புரிவோனே

.. ஆனைக் காவிற் .. பெருமானே.


பதம் பிரித்து:

ஓடிப் பாரில் பல நாளும்,

.. ஊனைப் பேணிப், பிணி மூடி,

வாடிப் பாயிற் கிடவாமுன்

.. வாசத் தாளைத் தொழுவேனோ;

பாடிச் சேவித்து அடைவாரைப்

.. பாலித்து ஆரத் தருவோனே;

ஆடக் கானைப் புரிவோனே;

.. ஆனைக் காவில் பெருமானே.


ஓடிப் பாரில் பல நாளும் ஊனைப் பேணிப் - உலகில் நெடுநாள்கள் (அங்கும் இங்கும்) அலைந்து திரிந்து, உடலை ஓம்புதலிலேயே காலத்தைச் செலவழித்து; (ஊன் - உடம்பு);

பிணி மூடி, வாடிப், பாயிற் கிடவாமுன் வாசத் தாளைத் தொழுவேனோ - நோய்கள் சூழ்ந்துகொள்ள, அதனால் வருந்திப், படுத்த படுக்கையாகக் கிடப்பதன்முன்னமே, மணம் கமழும் உன் திருவடியை வணங்கும் பாக்கியம் பெறுவேனோ? அருள்வாயாக; (வாசம் - மணம்);

பாடிச் சேவித்து அடைவாரைப் பாலித்து ஆரத் தருவோனே - உன்னைப் பாடி வணங்கிச் சரண்புகுந்த பக்தர்களைக் காத்து அருளையும் வரங்களையும் நிறையக் கொடுப்பவனே; (அடைதல் - சரண்புகுதல்); (பாலித்தல் - காத்தல்); (ஆர்தல் - நிறைதல்; மிகுதல்);

ஆடக் கானைப் புரிவோனே - திருநடம் செய்வதற்குச் சுடுகாட்டை விரும்புகின்றவனே; (கான் - சுடுகாடு); (புரிதல் - விரும்புதல்);

ஆனைக் காவில் பெருமானே - திருவானைக்காவில் எழுந்தருளியிருக்கும் சிவபெருமானே.


வி. சுப்பிரமணியன்

-------------------------------- -------------------------------