Showing posts with label மணஞ்சேரி (திருமணஞ்சேரி). Show all posts
Showing posts with label மணஞ்சேரி (திருமணஞ்சேரி). Show all posts

Tuesday, October 23, 2018

04.56 - மணஞ்சேரி - கொங்கலர் சூடும்

04.56 - மணஞ்சேரி - கொங்கலர் சூடும்

2014-03-22

மணஞ்சேரி (திருமணஞ்சேரி)

------------------

(சந்தக் கலித்துறை - தானன தான தானன தான தனதான)

(தானன என்ற இடத்தில் தனதன என்றும் வரலாம்)

(சம்பந்தர் தேவாரம் - 1.98.1 - "நன்றுடையானைத் தீயதிலானை")


1)

கொங்கலர் சூடும் குழலியொர் பங்கன் குளிராரும்

திங்களைச் சென்னித் திகழ்ந்திட வைத்த திருவாளன்

மங்கையர் மைந்தர் வந்தடி போற்றும் மணஞ்சேரிச்

சங்கரன் அன்பர் தங்களுக் கின்பம் தருவானே.


கொங்கு அலர் சூடும் குழலி ஒர் பங்கன் - வாசமலர்களை அணிந்த கூந்தலை உடைய உமையை ஒரு பங்கில் உடையவன்; (கொங்கு - வாசனை);

குளிர் ஆரும் திங்களைச் சென்னித் திகழ்ந்திட வைத்த திருவாளன் - குளிர்ந்த சந்திரனைத் தன் தலைமேல் திகழவைத்த செல்வன்;

மங்கையர் மைந்தர் வந்து அடி போற்றும் மணஞ்சேரிச் சங்கரன் - இளம்பெண்களும் அவர்கள் கணவர்களும் வந்து வழிபாடு செய்கின்ற திருமணஞ்சேரியில் உறைகின்ற சங்கரன்; (மைந்தன் - இளைஞன்); (சங்கரன் - சிவன் திருநாமம் - சுகத்தைச் செய்பவன்);

அன்பர் தங்களுக்கு இன்பம் தருவானே - தன் பக்தர்களுக்கு இன்பம் அளிப்பவன் / அளிப்பான்;

(அப்பர் தேவாரம் - 4.32.3 - "ஓதுவார்கள் தங்களுக் கருளும் எங்கள் தத்துவன்");


2)

யாதொரு நேரும் அற்றவன் அங்கை அழலேந்தி

போதொடு வாசப் புகையொடு கண்ணிற் பொழிவோடு

மாதர்க ளோடு மைந்தர்கள் போற்றும் மணஞ்சேரிக்

காதொரு தோடன் கழல்தொழு வார்கள் கவலாரே.


யாதொரு நேரும் அற்றவன் - எவ்வித ஒப்பும் இல்லாதவன்; (நேர் - ஒப்பு);

அங்கை அழல் ஏந்தி - கையில் தீயை ஏந்துபவன்;

போதொடு வாசப்-புகையொடு கண்ணில் பொழிவோடு மாதர்களோடு மைந்தர்கள் போற்றும் - பெண்களும் ஆண்களும் கண்கள் கசியப், பூக்கள் தூபம் இவற்றால் வழிபாடு செய்கின்ற; (போது - பூ); (வாசப்-புகை - தூபம்);

மணஞ்சேரிக் காது ஒரு தோடன் கழல் தொழுவார்கள் கவலாரே - திருமணஞ்சேரியில் உறைகின்றவனும் ஒரு காதில் தோடு அணிந்தவனுமான சிவபெருமானது திருவடியைத் தொழும் பக்தர்களது கவலைகள் தீரும்; (கவலார் - வருத்தம் அடையமாட்டார்);


3)

தேரினில் ஏறித் திரிபுரம் செற்ற சிலைவில்லான்

ஆரியன் அன்பர் கோரிய வெல்லாம் அருளின்ப

வாரியன் நீல மணிதிகழ் கண்டன் மணஞ்சேரி

நாரியொர் பாலன் பேர்சொலக் காலன் நணுகானே.


சிலைவில்லான் - மேருமலையை வில்லாக ஏந்தியவன்; (சிலை - மலை);

ஆரியன் - பெரியோன்; ஆசிரியன்; (திருவாசகம் - சிவபுராணம் - அடி-64 - "பாசமாம் பற்றறுத்துப் பாரிக்கும் ஆரியனே");

அன்பர் கோரிய எல்லாம் அருள் இன்ப வாரியன் - பக்தர்கள் வேண்டிய எல்லா வரங்களையும் அருள்கின்ற இன்பக்கடல் ஆனவன்; (கோருதல் - விரும்புதல்; வேண்டிக்கொள்ளுதல்); (வாரி - கடல்); (திருவாசகம் - 8.8.2 - "பேராசை வாரியனைப் பாடுதுங்காண் அம்மானாய்");

நாரி ஒர் பாலன் - பெண்ணை ஒரு பக்கத்தில் உடையவன்; (அப்பர் தேவாரம் - 5.98.5 - "உமைபாகம் ஓர் பாலராய்"); (அப்பர் தேவாரம் - 4.88.1 - "மலைமகள் தன்னுடைய பாலனை");

நணுகான் - நெருங்கமாட்டான்;


4)

பையர வோடு பான்மதி வைத்துப் பகைதீர்த்துத்

தையலொர் பாகம் தாங்கிய கோனைச் சடையானை

மையணி கண்ணர் மாலைகள் பாடு மணஞ்சேரிச்

செய்யனை நாடும் சிந்தையி னார்க்குத் தெளிவாமே.


பையரவோடு பால்மதி வைத்துப் பகைதீர்த்துத் - படத்தை உடைய நாகப்பாம்போடு பால் போன்ற வெண்திங்களைப் பகையின்றி ஒன்றாக வாழவைத்து;

தையல் ஒர் பாகம் தாங்கிய கோனை - உமையை ஒரு பாகமாக உடைய தலைவனை;

மை அணி கண்ணர் மாலைகள் பாடு - மை தீட்டப்பெற்ற கண்களையுடைய பெண்கள் பாமாலைகள் பாடித் துதிக்கின்ற; (பாடுதல் - துதித்தல்); (மாலை - சொல்மாலை; பாமாலை);

மணஞ்சேரிச் செய்யனை - திருமணஞ்சேரியில் உறைகின்ற செம்மேனிப் பெருமானை;

நாடும் சிந்தையினார்க்குத் தெளிவாமே - விரும்பி வழிபடும் பக்தர்களுக்குத் தெளிவு உண்டாகும் (= அறியாமை தீரும்);


5)

இண்டைகள் கட்டி இணையடி போற்றும் இணையில்மார்க்

கண்டரைக் காத்துக் காலனைச் செற்ற கரிகாடன்

வண்டமிழ் வாயர் மகிழ்வொடு போற்றும் மணஞ்சேரிக்

கொண்டலங் கண்டன் குரைகழல் போற்றக் குறைபோமே.


இண்டை - ஒருவித மாலை;

இணை இல் மார்க்கண்டர் - ஒப்பற்ற மார்க்கண்டேயர்;

காலனைச் செற்ற - இயமனை உதைத்து அழித்த;

கரிகாடன் - சுடுகாட்டில் இருப்பவன்;

வண்டமிழ் வாயர் - வண்தமிழ் வாயர் - தேவாரம் திருவாசகம் முதலியன பாடுபவர்கள்;

கொண்டலங் கண்டன் - மேகம் போல் அழகிய கண்டத்தை உடையவன்; (அம் - அழகு);

குரைகழல் போற்றக் குறை போமே - அப்பெருமானுடைய (ஒலிக்கின்ற கழலை அணிந்த) திருவடியை வழிபட்டால் குறைகள் தீரும்;


6)

சிர(ம்)மலி மாலை திகழ்முடி மீது திரையாறு

விரவிடு கின்ற வேணியி னானை விடையானை

மர(ம்)மலி சோலை வயல்புடை சூழ்ந்த மணஞ்சேரி

வரதனை வாழ்த்த மங்கல(ம்) மல்கு(ம்) மகிழ்வாமே.


சிரம் மலி மாலை திகழ் முடிமீது திரை-ஆறு விரவிடுகின்ற வேணியினானை - தலைமாலை அணிந்த திருமுடியின்மேல் அலைமோதும் கங்கை பொருந்துகின்ற சடையானை;

விடையானை - இடப-வாகனனை;

மரம் மலி சோலை வயல் புடை சூழ்ந்த மணஞ்சேரி வரதனை - மரங்கள் நிறைந்த சோலையும் வயலும் சூழ்ந்த திருமணஞ்சேரியில் உறைகின்ற வரதனை; (வரதன் - வரம் அருள்பவன்)

வாழ்த்த மங்கலம் மல்கும் மகிழ்வு ஆமே - போற்றி வழிபட்டால், திரு மிகும், இன்புற்று வாழலாம்;


7)

தளைகளி லாத தன்மையன் எந்தை தனிநாதன்

வளையொரு கையன் வல்விடம் உண்ட மணிகண்டன்

வள(ம்)மலி கின்ற வயல்புடை சூழ்ந்த மணஞ்சேரி

இளமதி சூடி இணையடி ஏத்த இடர்போமே.


தளைகள் இலாத தன்மையன் - மும்மலக்கட்டு அற்றவன்; (சுதந்திரன்);

எந்தை தனி நாதன் - எம் தந்தை, ஒப்பற்ற தலைவன்; (தனி - ஒப்பில்லாத);

வளை ஒரு கையன் - ஒரு கையில் வளையல் அணிந்தவன் - உமைபங்கன்;

வல்விடம் உண்ட மணிகண்டன் - கொடிய நஞ்சை உண்ட நீலகண்டன்;

வளம் மலிகின்ற வயல் புடை சூழ்ந்த மணஞ்சேரி - வளம் மிக்க வயல் சூழ்ந்த திருமணஞ்சேரியில் உறைகின்ற;

இளமதி சூடி இணையடி ஏத்த இடர் போமே - இளம்பிறையை அணிந்த பெருமானது இரு-திருவடிகளைத் துதித்தால் துன்பம் நீங்கும்;


8)

அருவரை பேர்த்தான் ஐயிரு வாய்கள் அழுதேத்தத்

திருவிரல் ஒன்றைச் சிறிதள வூன்று சிவனெம்மான்

வருமடி யார்கள் மனமகிழ் வெய்து மணஞ்சேரி

எருதமர் ஈசன் இணையடி ஏத்த இடர்போமே.


அரு-வரை பேர்த்தான் ஐயிரு-வாய்கள் அழுது ஏத்தத் - கயிலைமலையை பெயர்த்தவனான இராவணனது பத்துவாய்களும் அழுது துதிபாடும்படி; (வரை - மலை);

திருவிரல் ஒன்றைச் சிறிது அளவு ஊன்று சிவன் எம்மான் - திருப்பாத விரல் ஒன்றைச் சிறிதளவே ஊன்றிய சிவன், எம் தலைவன்;

வரும் அடியார்கள் மனமகிழ்வு எய்து மணஞ்சேரி - வந்து வழிபடும் பக்தர்கள் மனத்தில் இன்பம் அடைகின்ற திருமணஞ்சேரியில் உறைகின்ற;

எருது அமர் ஈசன் இணையடி ஏத்த இடர் போமே - இடபத்தை ஊர்தியாக விரும்பும் ஈசனது இரு-திருவடிகளைப் போற்றினால் துன்பம் தீரும்;


9)

வேணுவை ஏந்தி மேய்த்தவன் வேதன் மிகநேடி

நாணுற ஓங்கு நம்பனை நட்டம் நவில்வானை

வாணுதல் மாதர் மலர்கொடு போற்று மணஞ்சேரித்

தாணுவை நெஞ்சில் தரித்தவர்க் கில்லை தடுமாற்றே.


வேணுவை ஏந்தி மேய்த்தவன் - வேணுகோபாலன் - திருமால்; (வேணு - புல்லாங்குழல்);

வேதன் - பிரமன்;

மிக நேடி நாணுற ஓங்கு நம்பனை - அவ்விருவரும் அடிமுடி மிகவும் தேடி நாணும்படி எல்லையின்றி ஓங்கிய சிவனை; (நேடுதல் - தேடுதல்); (நம்பன் - சிவன் திருநாமம் - விரும்பத்தக்கவன்);

நட்டம் நவில்வானை - திருநடம் செய்பவனை;

வாணுதல் மாதர் மலர்கொடு போற்று மணஞ்சேரித் தாணுவை - ஒளியுடைய நெற்றியுடைய பெண்கள் பூவால் வழிபாடு செய்யும் திருமணஞ்சேரித் தாணுவை; (வாணுதல் - வாள் நுதல் - ஒளிபொருந்திய நெற்றி); (தாணு - ஸ்தாணு - சிவன் திருநாமங்களுள் ஒன்று);

தடுமாற்று - தடுமாற்றம் - மனக்கலக்கம்;


10)

வீண்மொழி பேசும் மிண்டர்கள் என்றும் விரவாதான்

நாண்மலர்ப் பாதன் நங்கையொர் பங்கன் நலம்நாடி

வாண்முக மாதர் வந்தடி போற்று மணஞ்சேரி

நீண்மதி சூடி நினைபவர் நெஞ்சில் நிறைவானே.


மிண்டர் - கல்நெஞ்சர்;

விரவாதான் - விரவாதவன்; சேராதவன்; (விரவுதல் - அடைதல்; கலத்தல்); (அப்பர் தேவாரம் - 6.46.8 - "மெய்யானைப் பொய்யரொடு விரவாதானை");

நாண்மலர்ப் பாதன் - புதிதாகப் பூத்த மலர் போன்ற பாதத்தை உடையவன்;

நங்கை ஒர் பங்கன் - உமைபங்கன்;

வாண்முக மாதர் - வாள்-முக-மாதர் - ஒளி பொருந்திய முகத்தை உடைய பெண்கள்;

நீண்மதி சூடி - நீள்மதி சூடி - திங்களை அணிந்தவன்;


11)

வெண்டிரை ஆரும் வேலையு மிழ்ந்த விடமுண்ட

கண்டனை நெற்றிக் கண்ணனை வீரக் கழலானை

வண்டறை கின்ற வண்பொழில் சூழ்ந்த மணஞ்சேரி

அண்டனை அண்டும் அன்பரை அல்லல் அடையாவே.


வெண் திரை ஆரும் வேலை உமிழ்ந்த விடம் உண்ட கண்டனை - வெண்ணிற அலைகள் பொருந்திய கடலான பாற்கடல் உமிழ்ந்த ஆலகால விடத்தை உண்ட நீலகண்டனை;

வீரக் கழலானை - வீரக்கழலை அணிந்த திருப்பாதனை;

வண்டு அறைகின்ற வண்-பொழில் சூழ்ந்த மணஞ்சேரி - வண்டுகள் ஒலிக்கின்ற வளம் மிக்க சோலைகளால் சூழப்பெற்ற திருமணஞ்சேரியில் உறைகின்ற;

அண்டனை அண்டும் அன்பரை அல்லல் அடையாவே - சிவபெருமானைச் சரண்புகுந்த பக்தர்களைத் துன்பங்கள் நெருங்கா; (அண்டன் - சிவன்); (அண்டுதல் - சரண்புகுதல்);


வி. சுப்பிரமணியன்

-------------- --------------

Monday, September 17, 2018

04.49 - மணஞ்சேரி - கயிலாயத்தர்

04.49 - மணஞ்சேரி - கயிலாயத்தர்

2014-02-02

4.49 - மணஞ்சேரி (திருமணஞ்சேரி)

-------------------------

(அறுசீர் விருத்தம் - மா மா மா மா மா காய் - வாய்பாடு)

(சம்பந்தர் தேவாரம் - 1.69.1 - "பூவார் மலர்கொண்டு")

(சுந்தரர் தேவாரம் - 7.95.1 - "மீளா அடிமை")


1)

கயிலா யத்தர் கங்கைச் சடையர் காதல் உடையார்கள்

இயலால் இசையால் ஏத்தி வாழ்த்தும் எண்டோள் முக்கண்ணர்

மயிலார் சாயல் குயிலார் மொழியாள் கூறர் மணஞ்சேரிப்

புயலார் கண்டர் பொற்றாள் போற்றப் போகும் வினைநோயே.


காதல் - அன்பு; பக்தி; இயலால் இசையால் - இயல்தமிழ், இசைத்தமிழ் இவற்றால்; எண்-தோள் முக்கண்ணர் - எட்டுப் புயங்களும் மூன்று கண்களும் உடையவர்; மயில் ஆர் சாயல் குயில் ஆர் மொழியாள் - மயில் போன்ற சாயலும் குயில் போன்ற மொழியையும் உடைய உமை; (* இத்தலத்து இறைவி திருநாமம் - கோகிலாம்பாள்; கோகிலம் - குயில்); புயல் ஆர் கண்டர் பொற்றாள் போற்றப் போகும் வினைநோயே - மேகம் போன்ற நிறம் உடைய கண்டத்தை உடையவரது பொன்னடியை வழிபட்டால் வினைநோய் தீரும்;


2)

உள்ளம் ஒன்றி ஓம்பு மாணி உயிருக் கரணானார்

வெள்ளம் தாங்கும் வேணி மீது வெள்ளை மதிபுனைவார்

வள்ளிக் குறத்தி மணாளன் தாதை வளமார் மணஞ்சேரி

வள்ளல் பாதம் வணங்கி வாழ்த்த மல்கும் மங்கலமே.


உள்ளம் ஒன்றி ஓம்பு மாணி உயிருக்கு அரண் ஆனார் - மனம் ஒன்றி வழிபட்ட மார்க்கண்டேயரது உயிரைக் காத்தவர்; (மாணி - இங்கே மார்க்கண்டேயர்); (அரண் - பாதுகாவல்);

வெள்ளம் - நீர்; கங்கை; வெள்ளை மதி - வெண்பிறை; (சம்பந்தர் தேவாரம் - 3.106.2 - "வெள்ளை மதியஞ் சூடி");

வள்ளிக்-குறத்தி மணாளன் தாதை - வள்ளி மணாளனான முருகனுக்குத் தந்தை;

வளம் ஆர் மணஞ்சேரி வள்ளல் பாதம் வணங்கி வாழ்த்த மல்கும் மங்கலமே - வளம் பொருந்திய திருமணஞ்சேரியில் உறைகின்ற வள்ளலான சிவபெருமானது திருவடியை வணங்கித் துதித்தால் நன்மை மிகும்; (மல்குதல் - செழித்தல்; மிகுதல்); (மங்கலம் - நன்மை; சுபம்); (* இத்தலத்து இறைவன் திருநாமம் - அருள்வள்ளல்நாதர்);


3)

பொன்னி றத்தர் புலியின் தோலர் பூத கணநாதர்

சென்னி மீது திங்கள் நாகம் சிரங்கள் திகழ்மாலை

வன்னி கொன்றை மத்தம் அணிந்த மைந்தர் மணஞ்சேரி

மன்னி நின்ற வள்ளல் பாதம் வணங்க வருமின்பே.


பொன் நிறத்தர் - பொன்னார் மேனியர்; சிரங்கள் திகழ்மாலை - தலைமாலை; மண்டையோட்டு மாலை; வன்னி கொன்றை மத்தம் - வன்னியிலை, கொன்றைமலர், ஊமத்தம்பூ; மைந்தர் - இளைஞர்; அழகர்; மன்னுதல் - நிலைத்து இருத்தல்;


4)

பாசம் வீசு கூற்றைச் செற்றுப் பத்தற் கருள்செய்த

நேசர் நீற்றர் நீல கண்டர் நிகரொன் றில்லாதார்

வாசப் பொழிலும் வயலும் சூழந்த வளமார் மணஞ்சேரி

ஈசர் பாதம் ஏத்த எய்தும் இன்ப நிலைதானே.


பாசம் வீசு கூற்றைச் செற்றுப் பத்தற்கு அருள்செய்த நேசர் - சுருக்கை வீசிய காலனை உதைத்துப் பக்தனுக்கு அருளிய அன்பர்; (பாசம் - காலன் கையில் இருக்கும் சுருக்குக்கயிறு); (செறுதல் - அழித்தல்); (பத்தற்கு - பத்தன்+கு - பக்தனுக்கு - மார்க்கண்டேயருக்கு); (நேசர் - அன்பு உடையவர்);

நிகர் ஒன்று இல்லாதார் - எவ்வித ஒப்பும் இல்லாதவர்; (நிகர் - ஒப்பு);


5)

நடமா டிறைவர் நம்பர் உம்பர் நடுக்கம் அதுதீர்த்த

விடமார் மிடற்றர் வேத நாவர் வெண்ணூல் திகழ்மார்பர்

மடமான் விழியாள் மங்கை பங்கர் வளமார் மணஞ்சேரி

இடமா உடையார் எழிலார் பாதம் ஏத்த மகிழ்வாமே.


நடம் ஆடு இறைவர் நம்பர் - திருநடம் செய்யும் இறைவர், விரும்பத்தக்கவர்; (நம்பன் - சிவன் திருநாமங்களுள் ஒன்று);

உம்பர் நடுக்கம் அது தீர்த்த விடம் ஆர் மிடற்றர் - தேவர்களது அச்சத்தைத் தீர்த்த நீலகண்டர்; (உம்பர் - தேவர்); (நடுக்கமது - நடுக்கம் - அச்சம்; அது - பகுதிப்பொருள்விகுதி);

விடம் ஆர் மிடற்றர் - நஞ்சு பொருந்திய கண்டம் உடையவர்;

வேத நாவர் - வேதங்களைப் பாடியருளியவர்;

வெண்ணூல் திகழ் மார்பர் - மார்பில் வெண்மையான பூணூலை அணிந்தவர்;

மடமான் விழியாள் மங்கை பங்கர் - அழகிய இளமான் போன்ற பார்வையை உடைய உமையை ஒரு பங்கில் உடையவர்; (மடம் - அழகு; மென்மை); (சம்பந்தர் தேவாரம் - 1.70.1 - "மான்விழியாள் தேவி பாகமா");

வளம் ஆர் மணஞ்சேரி இடமா உடையார் எழில் ஆர் பாதம் ஏத்த மகிழ்வு ஆமே - வளம் மிக்க திருமணஞ்சேரியை இடமாக உடையவரது அழகிய பாதத்தைப் போற்றினால் இன்பம் வந்தடையும்;


6)

எங்கும் திரிந்த எயில்கள் மூன்றை எரிக்க நகைசெய்தார்

அங்கி ருந்த அன்பர் மூவர்க் கருள்செய் பெருமானார்

மங்கை பங்கர் கங்கை முடியர் வளமார் மணஞ்சேரி

அங்கண் அடிகள் அடியார் வரங்கள் அடைந்து மகிழ்வாரே.


எங்கும் திரிந்த எயில்கள் மூன்றை எரிக்க நகைசெய்தார் - முப்புரங்களைச் சிரித்து எரித்தவர்;

அங்கு இருந்த அன்பர் மூவர்க்கு அருள்செய் பெருமானார் - சிவபூஜையைக் கைவிடாத மூன்று அசுரர்களுக்கு அருள்செய்தவர்; சம்பந்தர் தேவாரம் - 1.69.1 - "மூவார் புரங்கள் எரித்த அன்று மூவர்க் கருள்செய்தார்");

அங்கண் அடிகள் - அழகிய கருணை நோக்குடைய கடவுள்; (திருவாசகம் - திருவெம்பாவை - 8.7.17 - "அங்கண் அரசை");


7)

காரார் கண்டர் ஆரா அமுதர் கண்ணார் நுதலீசர்

நீரார் சடைமேல் நிரம்பா மதியர் நீறு திகழ்மார்பர்

வாரார் கொங்கை மங்கை பங்கர் வளமார் மணஞ்சேரி

ஊரார் பாதம் ஓம்ப வரங்கள் உகந்து தருவாரே.


கார் ஆர் கண்டர் - கரிய கண்டர்; (கார் - கருமை); (ஆர்தல் - பொருந்துதல்);

ஆரா அமுதர் - தெவிட்டாத அமுதம் போன்றவர்;

கண் ஆர் நுதல் ஈசர் - நெற்றிக்கண் உடைய ஈசர்; (நுதல் - நெற்றி);

நீர் ஆர் சடைமேல் நிரம்பா மதியர் - கங்கைச்சடைமேல் பிறையை அணிந்தவர்;

நீறு திகழ் மார்பர் - மார்பில் திருநீற்றைப் பூசியவர்;

வார் ஆர் கொங்கை மங்கை பங்கர் - கச்சு அணிந்த முலையினளான உமையை ஒரு பங்கில் உடையவர்; (வார் - முலைக்கச்சு);

வளம் ஆர் மணஞ்சேரி ஊரார் பாதம் ஓம்ப வரங்கள் உகந்து தருவாரே - வளம் மிக்க திருமணஞ்சேரி என்ற தலத்தில் எழுந்தருளியவரது திருவடியைப் போற்றினால் அவர் வரங்கள் அருள்வார்; (ஓம்புதல் - பேணுதல்; போற்றுதல்); (சம்பந்தர் தேவாரம் - 2.15.1 - "திருக்காறாயில் ஊரானே என்பவர் ஊனம் இலாதாரே");


8)

பிழையே செய்த பேதை அரக்கன் பெரிதும் அழவூன்றும்

குழையார் காதர் கொக்கின் இறகர் கொன்றைச் சடைநாதர்

மழையார் கண்டர் மலையான் மருகர் வளமார் மணஞ்சேரி

உழையோர் கையர் உபய பாதம் உன்ன உயர்வாமே.


பிழையே செய்த பேதை அரக்கன் பெரிதும் அழ ஊன்றும் குழை ஆர் காதர் - குற்றமே செய்த அறிவற்ற இராவணன் மிக அழும்படி அவனைப் பாதவிரல் ஒன்றை ஊன்றி நசுக்கியவர், காதில் குழையை அணிந்தவர்; (பேதை - அறிவிலி);

கொக்கின் இறகர் - கொக்கிறகு என்ற பூவைச் சூடியவர்; கொக்கு வடிவில் நின்ற அசுரனை அழித்து அவன் இறகினைச் சூடியவர்; (அப்பர் தேவாரம் - 5.80.5 - "கொக்கிறகர் குளிர்மதிச் சென்னியர்");

கொன்றைச்சடை நாதர் - சடையில் கொன்றைமலரை அணிந்த தலைவர்;

மழை ஆர் கண்டர் - மேகம் போன்ற கண்டம் உடையவர்; (ஆர்தல் - ஒத்தல்);

மலையான் மருகர் - இமவானுக்கு மருமகன்; (அப்பர் தேவாரம் - 6.38.1 - "மலையான் மருகனாய் நின்றாய் நீயே");

வளம் ஆர் மணஞ்சேரி உழை ஓர் கையர் - வளம் மிக்க திருமணஞ்சேரி என்ற தலத்தில் எழுந்தருளிய, மானை ஒரு கையில் ஏந்தியவரது;

உபய பாதம் உன்ன உயர்வு ஆமே - இரு-திருவடிகளைத் தியானித்தால் மேன்மை விளையும்; (உபயம் - இரண்டு); (உன்னுதல் - சிந்தித்தல்);


9)

நறையார் மலரான் நாகத் தணையான் நண்ணற் கருஞ்சோதி

பிறையார் முடியர் கறையார் கண்டர் பிரியார் உமையாளை

மறையார் நாவர் மறியார் கரத்தர் வளமார் மணஞ்சேரி

உறைவார் நாமம் உரைப்பார் குறைதீர்த் துவகை அளிப்பாரே.


நறை ஆர் மலரான் - தாமரைப்பூவில் இருக்கும் பிரமன்;

நாகத்து அணையான் - பாம்புப்-படுக்கையில் துயிலும் திருமால்;

நண்ணற்கு அரும்-சோதி - அடைய ஒண்ணாத ஜோதி வடிவினர்;

பிறை ஆர் முடியர் - சந்திரசேகரர்;

கறை ஆர் கண்டர் - நீலகண்டர்;

பிரியார் உமையாளை - உமைபங்கர்;

மறி ஆர் கரத்தர் - மான்கன்றை ஏந்தியவர்;

வளம் ஆர் மணஞ்சேரி உறைவார் நாமம் உரைப்பார் குறைதீர்த்து உவகை அளிப்பாரே - வளம் மிக்க திருமணஞ்சேரி என்ற தலத்தில் எழுந்தருளியவரது திருப்பெயரை ஓதும் அடியவர்களது குறைகளைத் தீர்த்து அவர்களுக்கு இன்பம் தருவார்; (உவகை - மகிழ்ச்சி);


10)

குணங்கள் இல்லார் கூறும் குற்றக் கொள்கை மதியேன்மின்

பணங்கள் ஆரும் பரமர் சூலப் படையர் விடையேறி

மணங்கொள் சோலை வயல்கள் புடைசூழ் வளமார் மணஞ்சேரி

அணங்கொர் பாகர் அடியை அடைந்தால் அல்லல் அடையாவே.


குணங்கள் இல்லார் கூறும் குற்றக் கொள்கை மதியேன்மின் - நற்குணம் இல்லாதவர்கள் சொல்கின்ற குற்றம் பொருந்திய கொள்கைகளை நீங்கள் மதிக்கவேண்டா; (மதியேன்மின் - நீங்கள் மதிக்கவேண்டா);

பணங்கள் ஆரும் பரமர் - நாகங்களை அணிந்த பரமர்; (பணம் - நாகப்பாம்பு);

சூலப் படையர் - சூலபாணி;

விடையேறி - இடபவாகனம் உடையவர்;

மணங்கொள் சோலை வயல்கள் புடை சூழ் வளம் ஆர் மணஞ்சேரி - மணம் கமழும் சோலையும் வயல்களும் சூழ்ந்த வளம் மிக்க திருமணஞ்சேரியில் உறைகின்ற;

அணங்கு ஒர் பாகர் அடியை அடைந்தால் அல்லல் அடையாவே - உமைபங்கரது திருவடியைச் சரண்புகுந்தால் நம்மைத் துன்பம் அடையா; (அணங்கு - பெண்); (ஒர் - ஓர்; குறுக்கல் விகாரம்);


11)

தொண்டர் தம்மைத் தோன்றாத் துணையாய்த் தொடரும் பெருமானார்

அண்ட ரண்டர் ஆலம் உண்ட அரிய மணிகண்டர்

வண்டு மகிழும் மணமார் சோலை மல்கு மணஞ்சேரி

கண்டு போற்றிக் கைகள் கூப்பக் கைம்மேற் பலனாமே.


தொண்டர்தம்மைத் தோன்றாத் துணையாய்த் தொடரும் பெருமானார் - அடியார்களை என்றும் நீங்காத தோன்றாத்துணைவர்; (அப்பர் தேவாரம் - 4.94.1 - "தோன்றாத் துணையாய் இருந்தனன் தன் அடியோங்களுக்கே");

அண்டரண்டர் - தேவதேவர்; (அண்டர் - தேவர்);

ஆலம் உண்ட அரிய மணிகண்டர் - ஆலகாலத்தை உண்டு அரிய கரிய மணிபோல் விடக்கறை திகழும் நீலகண்டர்;

வண்டு மகிழும் மணம் ஆர் சோலை மல்கு மணஞ்சேரி - வண்டுகள் மகிழ்கின்ற மணம் மிக்க சோலை நிறைந்த திருமணஞ்சேரியை;

கண்டு போற்றிக் கைகள் கூப்பக் கைம்மேற் பலன் ஆமே - தரிசித்துக் கைகூப்பி வழிபட்டால் உடனடிப்பலன் கிட்டும்;


வி. சுப்பிரமணியன்

------ --------