P.520 - பேரளம் - வீழ்புனல் தேக்கிய

2020-09-07

P.520 - பேரளம்

-----------

(கலிவிருத்தம் - விளம் விளம் மா கூவிளம் - வாய்பாடு; மூன்றாம் சீர் குறிலில் முடியும்)

(அப்பர் தேவாரம் - 4.11.1 - "சொற்றுணை வேதியன்")

(சம்பந்தர் தேவாரம் - 3.22.1 - "துஞ்சலும் துஞ்சலி லாத")

1)

வீழ்புனல் தேக்கிய வேணி வெண்மதி

வாழ்பதி செய்திட வல்ல ஈசனைச்

சூழ்பொழிற் பேரளச் சுயம்பு நாதனைத்

தாழ்பவர் தம்வினை சாய்தல் திண்ணமே.

வீழ்-புனல் தேக்கிய வேணி - வானிலிருந்து இழிந்த கங்கையை அடைத்த சடையை; (வேணி - சடை);

வெண்மதி வாழ் பதி செய்திட வல்ல ஈசனைச் - வெண்திங்கள் வாழும் இடம் ஆக்க வல்ல ஈசனை; (பதி - உறைவிடம்; ஊர்);

சூழ்-பொழிற் பேரளச் சுயம்புநாதனைத் - சோலை சூழ்ந்த பேரளத்தில் எழுந்தருளிய சுயம்புநாதனை; (* சுயம்புநாதன் - பேரளத்தில் இறைவன் திருநாமம்);

தாழ்பவர்தம் வினை சாய்தல் திண்ணமே - வணங்கும் பக்தர்களது வினை அழிதல் நிச்சயம்;

2)

பாலனார் அஞ்சிடப் பாசம் வீசிய

காலனார் தமையுதை கருணை வாரியைச்

சோலையார் பேரளச் சுயம்பு நாதனை

ஆலமார் கண்டனை அடைதி நெஞ்சமே.

பாலனார் அஞ்சிடப் பாசம் வீசிய காலனார்தமை உதை கருணை வாரியைச் - மார்க்கண்டேயர் அஞ்சும்படி பாசத்தை வீசிய காலனை உதைத்த கருணைக்கடலை; (வாரி - கடல்);

சோலை ஆர் பேரளச் சுயம்புநாதனை - சோலை நிறைந்த பேரளத்தில் எழுந்தருளிய சுயம்புநாதனை; (ஆர்தல் - நிறைதல்; பொருந்துதல்);

ஆலம் ஆர் கண்டனை அடைதி நெஞ்சமே - ஆலகாலத்தை உண்டு அணிந்த நீலகண்டனை நெஞ்சே அடைவாயாக; (ஆர்தல் - உண்ணுதல்; அணிதல்); (அடைதி - சரண்புகுவாய்; அடைவாய்); (சுந்தரர் தேவாரம் - 7.54.8 - "வாடி நீயிருந்து என் செய்தி மனமே"); (இலக்கணக் குறிப்பு - "இ" - முன்னிலை ஒருமை வினைமுற்று விகுதி; நடத்தி - என்பது நடப்பாய் என்று பொருள்படும்; செய்தி - செய்வாய்; நினைதி - நினைப்பாய்; எண்ணுதி - எண்ணுவாய்);

3)

நன்மையார் திருப்பெயர் நாளும் எண்ணிடும்

தன்மையார்க் கன்பனைச் சாம வேதனைத்

தொன்மையார் பேரளச் சுயம்பு நாதனைப்

புன்மைதீர் போதனைப் போற்று நெஞ்சமே.

நன்மை ஆர் திருப்பெயர் நாளும் எண்ணிடும் தன்மையார்க்கு அன்பனைச் - நன்மை மிக்க திருநாமத்தைத் தினமும் தியானிக்கும் அன்பர்களுக்கு அன்பனை;

சாமவேதனைத் - சாமவேதத்தில் விருப்பமுடையவனை; (சம்பந்தர் தேவாரம் - 3.56.2 - "சடையினன் சாமவேதன்");

தொன்மை ஆர் பேரளச் சுயம்புநாதனைப் - பழமை மிக்க பேரளத்தில் எழுந்தருளிய சுயம்புநாதனை;

புன்மை தீர் போதனைப் - சிறுமைகளைத் தீர்க்கும் ஞானவடிவினனை;

போற்று நெஞ்சமே - நெஞ்சே போற்றுவாயாக;

(* பேரளத் தலக்குறிப்பு நூலில் கூறப்படும் தலவரலாற்றுச் செய்தி: கார்ஷணாஜினி என்ற முனிவர் ஈசனது எல்லா நாமங்களையும் சொல்லி வழிபட எண்ணி இத்தலத்தில் தவம்செய்தார். ஈசன் அவ்வண்ணமே அருள்செய்தான். அதன் காரணமாகப், "பெயர்களுக்கு இருப்பிடம்" என்ற தலப்பெயர். (பேரளம் = பேர் + அளம்));

4)

இணையடி பணிசுரர்க் கிரங்கி வெந்நுனைக்

கணைதொடு வீரனைக் கம்பம் தீர்த்தருள்

துணைவனைப் பேரளச் சுயம்பு நாதனைப்

பிணைமலர் கொடுதொழப் பெருகும் இன்பமே.

இணையடி பணி சுரர்க்கு இரங்கி வெந்-நுனைக் கணை தொடு வீரனைக் - இருதிருவடிகளைப் பணிந்த தேவர்களுக்கு இரங்கி, (முப்புரங்களை எரிக்க) நுனியில் தீயை உடைய கணையை எய்த வீரனை; (வெம்மை - சூடு); (நுனை - முனை; நுனி);

கம்பம் தீர்த்தருள் துணைவனைப் - நடுக்கத்தைத் தீர்த்து அருளும் துணைவனை; (கம்பம் - நடுக்கம் - அச்சம்);

பேரளச் சுயம்புநாதனைப் - பேரளத்தில் எழுந்தருளிய சுயம்புநாதனை;

பிணைமலர்கொடு தொழப் பெருகும் இன்பமே - தொடுத்த மலரால் தொழுதால் இன்பம் பெருகும்;

5)

குழையணி காதனைக் கோதில் சீருடைப்

பழையனைப் பணிந்தவர் பாவம் தீர்த்திடும்

தொழிலனைப் பேரளச் சுயம்பு நாதனை

அழலினை ஏந்தியை அடைதி நெஞ்சமே.

குழை அணி காதனைக் - காதில் குழையை அணிந்தவனை;

கோது-இல் சீருடைப் பழையனைப் - குற்றமற்ற புகழை உடைய தொன்மையானவனை;

பணிந்தவர் பாவம் தீர்த்திடும் தொழிலனைப் - வணங்கியவர்களது பாவத்தைத் தீர்க்கும் தொழிலை உடையவனை; (சுந்தரர் தேவாரம் - 7.1.9 - "தொழுவாரவர் துயராயின தீர்த்தல்லுன தொழிலே");

பேரளச் சுயம்புநாதனை - பேரளத்தில் எழுந்தருளிய சுயம்புநாதனை;

அழலினை ஏந்தியை - கையில் நெருப்பை ஏந்தியவனை;

அடைதி நெஞ்சமே - நெஞ்சே, அடைவாயாக;

6)

திவாகரர் கோடியிற் றேசன் தாள்தொழு(து)

அவாவினை அறுத்தவர்க்(கு) அபயம் நல்கிடும்

சுவாமியைப் பேரளச் சுயம்பு நாதனைப்

பவானிதன் கொழுநனைப் பரவி வாழ்மினே.

திவாகரர் கோடியின் தேசன் தாள் தொழுது - கோடி சூரியரினும் ஒளி மிக்கவனது திருவடியைத் தொழுது; (திவாகரன் - சூரியன்); (இன் - ஐந்தாம்வேற்றுமை உருபு); (தேசன் - ஒளிவடிவினன்); (கோடியிற்றேசன் = கோடியின் தேசன் - கோடியைவிட ஒளியுடையவன்);

அவாவினை அறுத்தவர்க்கு அபயம் நல்கிடும் சுவாமியைப் - தங்கள் ஆசைகளைத் துறந்தவர்களுக்கு (பற்றுகளை அறுத்தவர்களுக்கு) அபயம் அருளும் சுவாமியை; (அவா - ஆசை);

பேரளச் சுயம்புநாதனைப் - பேரளத்தில் எழுந்தருளிய சுயம்புநாதனை;

பவானிதன் கொழுநனைப் - பவானி என்ற திருநாமம் உடைய உமைக்குக் கணவனை; (* பவானி - இத்தலத்து இறைவி திருநாமம்);

பரவி வாழ்மினே - துதித்து உய்யுங்கள்; (மின் - முன்னிலைப் பன்மை ஏவல் விகுதி);

7)

வண்டமர் கணைதொடு மதனை நீறுசெய்

அண்டனை ஆதியை அரனை வெண்டிங்கள்

துண்டணி பேரளச் சுயம்பு நாதனைத்

தெண்டிரைச் சடையனைச் சிந்தி நெஞ்சமே.

வண்டு அமர் கணைதொடு மதனை நீறுசெய் அண்டனை - வண்டுகள் விரும்பும் மலர்க்கணையை ஏவிய மன்மதனைச் சாம்பலாக்கிய கடவுளை; (அண்டன் - எல்லா அண்டங்களுக்கும் தலைவன்);

ஆதியை - முதல்வனை;

அரனை - ஹரனை;

வெண்திங்கள்-துண்டு அணி - திருமுடிமேல் வெண்பிறையை அணிந்த; (திங்கட்டுண்டு - திங்கள்+துண்டு);

பேரளச் சுயம்புநாதனைத் - பேரளத்தில் எழுந்தருளிய சுயம்புநாதனை;

தெண்திரைச் சடையனைச் சிந்தி நெஞ்சமே - தெளிந்த அலைகளையுடைய கங்கையைச் சடையில் உடையவனை, நெஞ்சே, சிந்திப்பாயாக;

8)

கத்திட அரக்கனைக் கயிலைக் கீழ்முடி

பத்தடர் பரமனைப் பால்வெண் ணீறணி

சுத்தனைப் பேரளச் சுயம்பு நாதனை

நித்தனை நாள்தொறும் நினைதி நெஞ்சமே.

கத்திட அரக்கனைக் கயிலைக்கீழ் முடி பத்து அடர் பரமனைப் - ஓலமிட்டு அழும்படி இராவணனைக் கயிலைமலையின்கீழ் அவனது பத்து-முடிகளையும் நசுக்கிய பரமனை; (அடர்த்தல் - நசுக்குதல்);

பால்-வெண்ணீறு அணி சுத்தனைப் - பால் போன்ற திருவெண்ணீற்றைப் பூசிய தூயனை;

பேரளச் சுயம்புநாதனை - பேரளத்தில் எழுந்தருளிய சுயம்புநாதனை;

நித்தனை - அழிவற்றவனை; (நித்தன் - நித்தியன் - என்றும் உள்ளவன்);

நாள்தொறும் நினைதி நெஞ்சமே - நெஞ்சே நீ தினந்தோறும் நினைவாயாக;

9)

தேன்றிகழ் மலரணி தேவ தேவனைக்

கோன்றனை அரியயன் குறுகொ ணாதுயர்

தோன்றலைப் பேரளச் சுயம்பு நாதனை

மான்றனை ஏந்தியை வாழ்த்தி வாழ்மினே.

தேன் திகழ் மலர் அணி தேவதேவனைக் - தேன் திகழும் மலர்களை அணிந்த தேவதேவனை; (தேன்றிகழ் = தேன்+திகழ்);

கோன்-தனை - தலைவனை;

அரி அயன் குறுகொணாது உயர் தோன்றலைப் - திருமால் பிரமன் இவர்களால் அடைய இயலாதபடி எல்லையின்றி நீண்ட தலைவனை; (குறுகொணாது - குறுக ஒணாது - ஈற்றகரம் தொக்கது); (குறுகுதல் - அணுகுதல்); (ஒண்ணுதல் - இயலுதல்); (தோன்றல் - தலைவன்);

பேரளச் சுயம்புநாதனை - பேரளத்தில் எழுந்தருளிய சுயம்புநாதனை;

மான்-தனை ஏந்தியை வாழ்த்தி வாழ்மினே - கையில் மானை ஏந்திய பெருமானை வாழ்த்தி உய்யுங்கள்; (மின் - ஏவற்பன்மை விகுதி);

10)

குறையறி வுடையவர் குற்றக் கொள்கையர்

அறைவன பொருளல அரனை ஆவடு

துறையனைச் பேரளச் சுயம்பு நாதனைப்

பிறையணி இறைவனைப் பேணி உய்ம்மினே.

குறையறிவு உடையவர் குற்றக்-கொள்கையர் அறைவன பொருள் அல - தெளிந்த அறிவு இல்லாதவர்களும் குற்றமுடைய கொள்கைகளை உடையவர்களும் சொல்லும் பொய்ம்மொழிகள் பொருளற்றவை; (அறைதல் - சொல்லுதல்);

அரனை - ஹரனை;

ஆவடுதுறையனைச் - திருவாவடுதுறையில் உறைபவனை;

பேரளச் சுயம்புநாதனை - பேரளத்தில் எழுந்தருளிய சுயம்புநாதனை;

பிறை அணி இறைவனைப் பேணி உய்ம்மினே - பிறையை அணிந்த இறைவனைப் போற்றி உய்யுங்கள்;

11)

சாலநைந் திமையவர் சங்க ராவென

வேலனைப் பயந்தருள் விமல னைப்புலித்

தோலனைப் பேரளச் சுயம்பு நாதனைச்

சூலனைத் துதிசெயத் துன்பம் நீங்குமே.

சால நைந்து இமையவர் "சங்கரா" என - (சூரபத்மனின் துன்புறுத்தலால்) மிகவும் வாடி வருந்திய தேவர்கள், "சங்கரனே! அருளாய்" என்று இறைஞ்ச; (நைதல் - வாடுதல்; மனம் வருந்துதல்);

வேலனைப் பயந்து-அருள் விமலனைப் - அவர்களுக்கு இரங்கி, வேலை ஏந்தும் முருகனைப் பெற்றருளிய தூயனை; (பயத்தல் - மகப் பெறுதல்);

புலித்தோலனைப் - புலித்தோலை ஆடையாகக் கட்டியவனை;

பேரளச் சுயம்புநாதனைச் - பேரளத்தில் எழுந்தருளிய சுயம்புநாதனை;

சூலனைத் துதிசெயத் துன்பம் நீங்குமே - சூலபாணியைத் துதித்தால் நம் துன்பம் தீரும்;

வி. சுப்பிரமணியன்

-----------