Showing posts with label சாட்டியக்குடி. Show all posts
Showing posts with label சாட்டியக்குடி. Show all posts

Friday, March 28, 2025

P.364 - சாட்டியக்குடி - வெண்பிறை சூடியை

2016-11-29

P.364 - சாட்டியக்குடி

---------------------------------

(கலிவிருத்தம் - விளம் விளம் மா கூவிளம் - வாய்பாடு; மூன்றாம் சீர் குறிலில் முடியும்)

(அப்பர் தேவாரம் - 4.11.1 - "சொற்றுணை வேதியன்")

(சம்பந்தர் தேவாரம் - 3.22.1 - "துஞ்சலும் துஞ்சலி லாத")


1)

வெண்பிறை சூடியை விடைய தேறியை

விண்பணி நாதனை வேத கீதனைத்

தண்பொழில் சூழ்தரு சாட்டி யக்குடி

எண்குணத் தீசனை எண்ணு நெஞ்சமே.


வெண்பிறை சூடியை - வெண்திங்களைச் சூடையவனை;

விடையது ஏறியை - இடபவாகனனை;

விண் பணி நாதனை - தேவர்கள் தொழும் தலைவனை;

வேத-கீதனைத் - வேதங்களைப் பாடியருளியவனை;

தண்-பொழில் சூழ்தரு சாட்டியக்குடி - குளிர்ந்த சோலை சூழ்ந்த சாட்டியக்குடியில் உறைகின்ற; (தருதல் - ஒரு துணைவினை);

எண்குணத்து ஈசனை எண்ணு நெஞ்சமே - எண்குணங்கள் உடைய ஈசனை, நெஞ்சே நீ எண்ணு;


2)

விண்ணவர் போற்றிட வேலை நஞ்சையுண்

அண்ணலை அரையினில் அரவ நாணனைத்

தண்ணிள மதியனைச் சாட்டி யக்குடிப்

பெண்ணொரு பாகனைப் பேணு நெஞ்சமே.


வேலை நஞ்சை உண் அண்ணலை - கடல்-விஷத்தை உண்ட பெருமானை;

தண்-இள-மதியனை - குளிர்ந்த இளம்பிறையை அணிந்தவனை; (அப்பர் தேவாரம் - 4.88.6 - "திருவுடைத் தேச மதியனை");


3)

பொருமத கரியுரி போர்த்த வீரனை

ஒருமழ விடையனை உரகத் தாரனைத்

தருமலர்ப் பொழிலணி சாட்டி யக்குடிக்

கருமுகிற் கண்டனைக் கருது நெஞ்சமே.


பொரு-மத-கரி உரி போர்த்த வீரனை - போர் செய்த மதயானையின் தோலைப் போர்த்த வீரனை;

ஒரு மழ-விடையனை - ஒப்பற்ற இள-எருதினை வாகனமாக உடையவனை;

உரகத் தாரனைத் - பாம்பை மாலையாக அணிந்தவனை;

தரு-மலர்ப்-பொழில் அணி சாட்டியக்குடிக் - மரங்களில் மலர் நிறைந்த சோலை சூழ்ந்த சாட்டியக்குடியில் உறைகின்ற;

கருமுகில்-கண்டனைக் கருது நெஞ்சமே - கரிய மேகம் போன்ற கண்டத்தை உடைய பெருமானை, மனமே, எண்ணுவாயாக / விரும்புவாயாக;


4)

செய்யனை மெய்யனைத் தீயை ஏந்திய

கையனைக் காமனைக் காய்ந்த கண்ணனைத்

தையலொர் கூறனைச் சாட்டி யக்குடி

மையணி கண்டனை மறவல் நெஞ்சமே.


செய்யனை மெய்யனைத் - செம்மேனியனை, மெய்ப்பொருளை;

தீயை ஏந்திய கையனைக் - கையில் நெருப்பை ஏந்தியவனை;

காமனைக் காய்ந்த கண்ணனைத் - மன்மதனை எரித்த நெற்றிக்கண்ணனை;

தையல் ஒர் கூறனைச் - மாது ஒரு பாகனை;

சாட்டியக்குடி மை அணி கண்டனை மறவல் நெஞ்சமே - திருச்சாட்டியக்குடியில் உறைகின்ற நீலகண்டனை, மனமே, மறவாதே; (மறவல் - மறவாதே என்ற ஏவல் - மறவாது நினை); (அப்பர் தேவாரம் - 5.57.1 - "கோளிலி மன்னனே அடியேனை மறவலே");


5)

கலனென அயன்சிரம் கையில் ஏந்திய

தலைவனைத் தந்தையும் தாயும் இல்லியைச்

சலமலை சடையனைச் சாட்டி யக்குடி

மலைமகள் கணவனை மறவல் நெஞ்சமே.


கலன் என அயன் சிரம் கையில் ஏந்திய தலைவனைத் - பிச்சைப்பாத்திரமாகப் பிரமனது மண்டையோட்டைக் கையில் ஏந்திய தலைவனை;

தந்தையும் தாயும் இல்லியைச் - தாய்தந்தை இல்லாதவனை;

சலம் அலை சடையனைச் - கங்கைநதி அலைகின்ற (/ அலைக்கின்ற) சடையை உடையவனை;

சாட்டியக்குடி மலைமகள் கணவனை மறவல் நெஞ்சமே - திருச்சாட்டியக்குடியில் உறைகின்றவனும் பார்வதி நாயகனும் ஆன சிவபெருமானை, மனமே, மறவாதே; (மறவல் - மறவாதே என்ற ஏவல் - மறவாது நினை);


6)

ஆழ்கடல் நஞ்சினை ஆர்ந்த கண்டனைச்

சூழ்பவர்க் கின்னருள் சொரியும் வள்ளலைத்

தாழ்பொழில் சூழ்தரு சாட்டி யக்குடிப்

போழ்மதிச் சடையனைப் போற்று நெஞ்சமே.


ஆழ்கடல் நஞ்சினை ஆர்ந்த கண்டனைச் - ஆழம் மிக்க கடலில் தோன்றிய விஷத்தை உண்ட கண்டம் உடையவனை;

சூழ்பவர்க்கு இன்னருள் சொரியும் வள்ளலைத் - வலம்செய்யும் பக்தர்களுக்கு இனிய அருளைப் பொழியும் வள்ளலை;

தாழ்-பொழில் சூழ்தரு சாட்டியக்குடிப் - தாழும் சோலைகள் சூழும் திருச்சாட்டியக்குடியில் உறைகின்ற;

போழ்-மதிச் சடையனைப் போற்று நெஞ்சமே - திங்கள்-துண்டத்தை அணிந்த சடையனை, மனமே, போற்றுவாயாக; (போழ் - பிளவு; துண்டம்); (சம்பந்தர் தேவாரம் - 3.4.2 - "போழிள மதிவைத்த புண்ணியனே");


7)

தொடைபல சாத்திய தொண்ட ரைக்கொல

அடைநமன் தனையுதைத் தருள்செய் அண்ணலைச்

சடைமிசை அரவனைச் சாட்டி யக்குடி

விடையமர் வேந்தனை விரவு நெஞ்சமே.


தொடை பல சாத்திய தொண்டரைக் கொல அடை - பல மாலைகளைச் சாத்தி வழிபட்ட மார்க்கண்டேயரைக் கொல்ல அவரை அணுகிய;

நமன்தனை உதைத்து அருள்செய் அண்ணலைச் - காலனை உதைத்து அருளிய தலைவனை;

சடைமிசை அரவனைச் - சடைமேல் பாம்பை அணிந்தவனை;

சாட்டியக்குடி விடை அமர் வேந்தனை விரவு நெஞ்சமே - திருச்சாட்டியக்குடியில் உறைகின்ற இடபவாகனனை, மனமே, பொருந்துவாயாக; (விரவுதல் - பொருந்துதல்; அடைதல்; கலத்தல்);


8)

சிந்தைசெய் யாதுயர் சிலம்பு பேர்த்தவன்

வெந்துயர் கொண்டழ விரலை ஊன்றிவாள்

தந்தபி ரான்தனைச் சாட்டி யக்குடி

எந்தையை நித்தலும் எண்ணு நெஞ்சமே.


சிந்தை-செய்யாது உயர் சிலம்பு பேர்த்தவன் - கொஞ்சமும் யோசியாமல் உயர்ந்த கயிலைமலையைப் பெயர்த்த இராவணன்; (சிலம்பு - மலை); (பெரியபுராணம் - திருநாவுக்கரசர் புராணம் - 12.21.360 - "செப்பருங் கயிலைச்சிலம்படி")

வெந்துயர் கொண்டு அழ விரலை ஊன்றி - மிக வருந்தி அழும்படி ஒரு விரலை ஊன்றி அவனை நசுக்கி;

வாள் தந்த பிரான்தனைச் - (பின் அவன் போற்றிப் பாட இரங்கி அவனுக்கு) ஒரு வாளையும் அருள்செய்த தலைவனை;

சாட்டியக்குடி எந்தையை நித்தலும் எண்ணு நெஞ்சமே - திருச்சாட்டியக்குடியில் உறைகின்ற இடபவாகனனை, மனமே, எந்நாளும் எண்ணுவாயாக;


9)

பனிமல ரோனரி பரவு சோதியைப்

புனிதனை வெண்பொடி பூசு மூர்த்தியைத்

தனிவிடைப் பாகனைச் சாட்டி யக்குடி

இனிதுறை ஏந்தலை எண்ணு நெஞ்சமே.


பனிமலரோன் அரி பரவு சோதியைப் - குளிர்ந்த தாமரைப்பூவில் இருக்கும் பிரமனும் திருமாலும் துதிக்கின்ற ஜோதி வடிவனை; (சம்பந்தர் தேவாரம் - 3.92.9 - "அரவணை யவனொடு பனிமலரோனுங் காணா");

புனிதனை, வெண்பொடி பூசு மூர்த்தியைத் - தூயனைத், திருநீற்றைப் பூசிய கடவுளை;

தனி விடைப்பாகனைச் - ஒப்பற்ற இடபவாகனனை;

சாட்டியக்குடி இனிது உறை ஏந்தலை எண்ணு நெஞ்சமே - திருச்சாட்டியக்குடியில் இனிதே உறைகின்ற பெருமானை, மனமே, எண்ணுவாயாக;


10)

புதுநெறி என்றுரை பொய்யர் சொல்லிடும்

அதுநெறி அன்றென அறிமின் ஆறணி

சதுரனை மணங்கமழ் சாட்டி யக்குடி

மதிபுனை மைந்தனை வாழ்த்தி வாழ்மினே.


புது நெறி என்று உரை பொய்யர் சொல்லிடும் அது நெறி அன்று என அறிமின் - புதிய மார்க்கம் என்று உரைக்கின்ற பொய்யர்கள் சொல்லும் அது உய்தி தரும் மார்க்கம் அன்று என்று அறியுங்கள்; (மின் - முன்னிலை ஏவல் பன்மை விகுதி);

ஆறு அணி சதுரனை - கங்கையை அணிந்த சமர்த்தனை;

மணம் கமழ் சாட்டியக்குடி மதி புனை மைந்தனை வாழ்த்தி வாழ்மினே - (மலர்ச்சோலைகளிலிருந்து வீசுகின்ற) வாசனை கமழ்கின்ற திருச்சாட்டியக்குடியில் உறைகின்ற சந்திரசேகரனை வாழ்த்தி இன்புற்று வாழுங்கள்; (மைந்தன் - இளைஞன்; வீரன்);


11)

இமையவர் தலைவனை ஏல வார்குழல்

உமையவள் கொழுநனை ஒண்ம ழுப்படை

தமருகம் ஏந்தியைச் சாட்டி யக்குடிக்

கமழ்சடைக் கடவுளைக் கருத உய்தியே.


இமையவர் தலைவனை - தேவர் கோனை;

ஏல வார்-குழல் உமையவள் கொழுநனை - மயிர்ச்சாந்து அணிந்த நீண்ட கூந்தலை உடைய உமாதேவிக்குக் கணவனை;

ஒண்-மழுப்படை தமருகம் ஏந்தியைச் - ஒளிவீசும் மழுவாயுதத்தையும் உடுக்கையையும் கையில் ஏந்தியவனை;

சாட்டியக்குடிக் கமழ்-சடைக் கடவுளைக் கருத உய்தியே - திருச்சாட்டியக்குடியில் உறைகின்ற, வாசம் கமழும் சடையை உடைய பெருமானை, விரும்பி எண்ணினால் உய்வு கிட்டும்; (கருதுதல் - விரும்புதல்; எண்ணுதல்); (உய்தி - ஈடேற்றம்)


வி. சுப்பிரமணியன்

----------- --------------


Saturday, February 1, 2025

P.352 - சாட்டியக்குடி - வெண்மலை போலொரு

P.352 - சாட்டியக்குடி - வெண்மலை போலொரு


2016-07-02

P.352 - சாட்டியக்குடி

---------------------------------

(கலிவிருத்தம் - விளம் விளம் மா கூவிளம் - வாய்பாடு; மூன்றாம் சீர் குறிலில் முடியும்)

(அப்பர் தேவாரம் - 4.11.1 - "சொற்றுணை வேதியன்")

(சம்பந்தர் தேவாரம் - 3.22.1 - "துஞ்சலும் துஞ்சலி லாத")


1)

வெண்மலை போலொரு விடைவி ரும்பியை

எண்வடி வுடையனை ஈறில் ஈசனைத்

தண்வயல் புடையணி சாட்டி யக்குடி

ஒண்மதி சூடியை உன்னு நெஞ்சமே.


வெண்மலை போல் ஒரு விடை விரும்பியை - வெண்ணிறம் உடைய ஒரு மலை போன்ற இடபத்தை ஊர்தியாக விரும்பியவனை;

எண்வடிவு உடையனை - அஷ்டமூர்த்தங்கள் உடையவனை;

ஈறு இல் ஈசனைத் - முடிவு (அந்தம்) இல்லாத ஈசனை;

தண்-வயல் புடை அணி சாட்டியக்குடி ஒண்-மதி சூடியை உன்னு நெஞ்சமே - குளிர்ந்த வயல்களால் சூழப்பட்ட திருச்சாட்டியக்குடியில் உறைகின்ற, ஒளிவீசும் சந்திரனை அணிந்த பெருமானை, நெஞ்சே, நீ நினை. (உன்னுதல் - நினைதல்);


2)

அக்கரம் அஞ்சுரை அன்பு மாணிதன்

துக்கம் அழித்தவன் சூல பாணியன்

தக்கனைத் தலையரி சாட்டி யக்குடி

முக்கணன் சீர்தனை முன்னு நெஞ்சமே.


அக்கரம் அஞ்சு உரை அன்பு மாணிதன் துக்கம் அழித்தவன் - பஞ்சாட்சரம் ஓதி வழிபட்ட, பக்தி மிகுந்த மார்க்கண்டேயருடைய மனக்கலக்கத்தைத் தீர்த்தவன்; (காலனை உதைத்தவன்); (அக்கரம் - அக்ஷரம்); (மாணி - இங்கே, மார்க்கண்டேயர்);

சூல-பாணியன் - திரிசூலத்தை ஏந்தியவன்; (பாணி - கை); (பெரியபுராணம் - காரைக்காலம்மையார் புராணம் - 12.24.55 - "சூலபாணியனார் மேவும் படரொளிக் கயிலை");

தக்கனைத் தலை அரி - தக்கனது தலையை வெட்டிய; (அரிதல் - வெட்டுதல்);

சாட்டியக்குடி முக்கணன் சீர்தனை முன்னு நெஞ்சமே - திருச்சாட்டியக்குடியில் உறைகின்ற, முக்கட்-பெருமானின் புகழை, நெஞ்சே, நீ எண்ணு. (முன்னுதல் - கருதுதல்; எண்ணுதல்);


3)

அழுதடை சுரர்களுக் கருள்மி டற்றனைத்

தொழுதவர் துணைவனைத் துடிம ருங்கினள்

தழுவிய நாதனைச் சாட்டி யக்குடி

மழுவனை நாடொறும் வாழ்த்து நெஞ்சமே.


அழுது அடை சுரர்களுக்கு அருள் மிடற்றனைத் - அழுது சரண்புகுந்த தேவர்களுக்கு அருளிய நீலகண்டனை; (சுரர் - தேவர்); (மிடறு - கண்டம்);

தொழுதவர் துணைவனைத் - தொழும் பக்தர்களுக்குத் துணையாக உள்ளவனை;

துடி-மருங்கினள் தழுவிய நாதனைச் - உடுக்குப் போலச் சிற்றிடை உடைய உமை தழுவிய தலைவனை; (துடி - உடுக்கு); (மருங்கு - இடை);

சாட்டியக்குடி மழுவனை நாள்தொறும் வாழ்த்து நெஞ்சமே - திருச்சாட்டியக்குடியில் உறைகின்ற, மழுவாள் ஏந்திய பெருமானைத் தினந்தோறும், நெஞ்சே, நீ போற்று.


4)

நாவியல் பாவினர் நந்தி வட்டமும்

தூவிய கையினர் துதிசெய் தூயவன்

சாவிலன் நோயிலன் சாட்டி யக்குடி

மேவிய வேதியன் வினைகள் தீர்ப்பனே.


நா இயல் பாவினர், நந்திவட்டமும் தூவிய கையினர் துதிசெய் தூயவன் - நாவில் பாமாலைகள் பொருந்தியவர்களும், நந்தியாவட்டம் முதலிய பூக்களைத் தூவிய கையினர்களும் வழிபடும் புனிதன்; (இயல்தல் = பொருந்துதல்; தங்குதல்); (நந்திவட்டம் - நந்தியாவட்டம் என்ற பூ);

சாவு இலன், நோய் இலன் - நோய்களும் இறப்பும் இல்லாதவன்;

சாட்டியக்குடி மேவிய வேதியன் வினைகள் தீர்ப்பனே - திருச்சாட்டியக்குடியில் உறைகின்ற வேதமுதல்வன் நம் வினைகளைத் தீர்ப்பான்;


5)

புதியவன் பழையவன் பொலிந்த வேணியில்

நதியினன் அரையினில் நாகக் கச்சினன்

சதுர்மறை நாவினன் சாட்டி யக்குடி

பதியென நின்றவன் பத்தர்க் கன்பனே.


புதியவன் பழையவன் - காலத்தைக் கடந்தவன்;

பொலிந்த வேணியில் நதியினன் - அழகிய சடையில் கங்கையை உடையவன்;

அரையினில் நாகக்-கச்சினன் - அரைக்கச்சாகப் பாம்பைக் கட்டியவன்;

சதுர்மறை நாவினன் - நான்கு வேதங்களையும் பாடியவன்;

சாட்டியக்குடி பதி என நின்றவன் பத்தர்க்கு அன்பனே - திருச்சாட்டியக்குடியில் நீங்காது உறைகின்ற பெருமான் பக்தர்களுக்கு அன்பு உடையவன்; (பதி - உறைவிடம்; கோயில்; தலம்);


6)

கையினிற் சூலனைக் கரிய கண்டனைச்

செய்யனைச் செஞ்சடைத் திங்கள் சூடியைத்

தையலொர் பங்கனைச் சாட்டி யக்குடி

ஐயனைக் கைதொழும் அன்பர்க் கின்பமே.


கையினில் சூலனைக் - கையில் சூலத்தை ஏந்தியவனை;

கரிய கண்டனைச் - நீலகண்டனை;

செய்யனைச் - செம்மேனியனை; (செய்யன் - சிவந்த நிறம் உடையவன்);

செஞ்சடைத் திங்கள் சூடியைத் - செஞ்சடையில் சந்திரனைச் சூடியவனை;

தையல் ஒர் பங்கனைச் - உமையை ஒரு பங்கில் உடையவனை; (ஒர் - ஓர்; குறுக்கல் விகாரம்);

சாட்டியக்குடி ஐயனைக் கைதொழும் அன்பர்க்கு இன்பமே - திருச்சாட்டியக்குடியில் உறைகின்ற தலைவனைக் கைகூப்பி வணங்கும் பக்தர்களுக்கு என்றும் இன்பமே.


7)

கங்குலிற் பிணமெரி காட்டில் கூத்தமர்

சங்கரன் ஐங்கரன் தாதை ஓர்புறம்

சங்கணி கையினன் சாட்டி யக்குடி

அங்கணன் அடிதொழும் அன்பர்க் கின்பமே.


கங்குலில் பிணம் எரி காட்டில் கூத்து அமர் சங்கரன் - இருளில் சுடுகாட்டில் திருநடம் செய்து மகிழும் சங்கரன்; (கங்குல் - இரவு); (அமர்தல் - மகிழ்தல்; விரும்புதல்); (சங்கரன் - சிவன் திருநாமம் - நன்மை செய்பவன்);

ஐங்கரன் தாதை - விநாயகனுக்குத் தந்தை; (தாதை - தந்தை);

ஓர் புறம் சங்கு அணி கையினன் - ஒரு பக்கம் கையில் வளையல் அணிந்தவன் - உமைபங்கன்; (சங்கு - சங்கினால் செய்த கைவளை); (சம்பந்தர் தேவாரம் - 3.81.1 - "சங்கமரும் முன்கை மடமாதை ஒருபால் உடன் விரும்பி");

சாட்டியக்குடி அங்கணன் அடிதொழும் அன்பர்க்கு இன்பமே - திருச்சாட்டியக்குடியில் உறைகின்ற, அருள்நோக்கம் உடைய பெருமான் திருவடியை வணங்கும் பக்தர்களுக்கு என்றும் இன்பமே.


8)

தருக்கிய தசமுகன் தனைய டர்த்தவர்

கருப்புவிற் காமனைக் காய்ந்த கண்ணினர்

தருக்களிற் குயில்பயில் சாட்டி யக்குடி

இருக்குரை எந்தையை எண்ண இன்பமே.


தருக்கிய தசமுகன்-தனை அடர்த்தவர் - ஆணவம் மிக்க இராவணனை நசுக்கியவர்; (தருக்குதல் - ஆணவம் கொள்ளுதல்); (தசமுகன் - பத்துமுகம் உடைய இராவணன்);

கருப்பு-வில் காமனைக் காய்ந்த கண்ணினர் - கரும்பை வில்லாக ஏந்திய மன்மதனைச் சுட்டெரித்த நெற்றிக்கண்ணர்;

தருக்களில் குயில் பயில் சாட்டியக்குடி, இருக்கு உரை எந்தையை எண்ண இன்பமே - (சோலையில்) மரங்களில் குயில்கள் தங்கி ஒலிக்கின்ற திருச்சாட்டியக்குடியில் உறைகின்ற, ரிக்வேதம் ஓதும் எம் தந்தையைப் போற்றி எண்ணும் பக்தர்களுக்கு என்றும் இன்பமே. (தரு - மரம்); (பயில்தல் - தங்குதல்; ஒலித்தல்); (இருக்கு - ரிக்வேதம்; வேதம்); (* ரிக்வேதநாதர் - இத்தல இறைவன் திருநாமம்);


9)

கடலிடைத் துயிலரி கமலன் என்றிவர்

அடையவொண் ணாச்சுடர் ஆகி நின்றவன்

சடைமிசைப் பிறையினன் சாட்டி யக்குடி

உடையவன் புகழ்தனை ஓத இன்பமே.


கடலிடைத் துயில் அரி கமலன் என்றிவர் - பாற்கடலில் பள்ளிகொள்ளும் திருமால், தாமரையில் உறையும் பிரமன் என்ற இவர்களால்; (என்றிவர் - என்ற இவர்; "என்ற" என்பதில் ஈற்று அகரம் தொக்கது); (சம்பந்தர் தேவாரம் - 3.33.1 - "நீரிடைத் துயின்றவன்");

அடைய ஒண்ணாச் சுடர் ஆகி நின்றவன் - அடைய இயலாத ஜோதி ஆகி ஓங்கியவன்;

சடைமிசைப் பிறையினன் - சடையின்மேல் சந்திரனை அணிந்தவன்;

சாட்டியக்குடி உடையவன் புகழ்தனை ஓத இன்பமே - திருச்சாட்டியக்குடியில் உறைகின்ற, சுவாமியின் புகழைப் பாடும் பக்தர்களுக்கு என்றும் இன்பமே. (உடையவன் - உடையான் - சுவாமி);


10)

காரணி நெஞ்சினர் கத்து சொற்கொளேல்

நீரணி சடையினன் நீறு கொன்றையந்

தாரணி மார்பினன் சாட்டி யக்குடிப்

பூரணன் பொன்னடி போற்ற இன்பமே.


கார் அணி நெஞ்சினர் கத்து சொல் கொளேல் - கருமை பொதிந்த மனம் உடைய வஞ்சகர்கள் கத்துகின்ற சொற்களை மதிக்கவேண்டா; (கார் - கருமை; வஞ்சம்; அஞ்ஞானம்); (கத்துதல் - கூவுதல்; பிதற்றுதல்); (கொளேல் - கொள்ளேல் - மதிக்கவேண்டா);

நீர் அணி சடையினன் - கங்கையைச் சடையில் அணிந்தவன்;

நீறு கொன்றையந் தார் அணி மார்பினன் - திருநீற்றையும் கொன்றைமாலையையும் மார்பில் அணிந்தவன்; (தார் - மாலை);

சாட்டியக்குடிப் பூரணன் பொன்னடி போற்ற இன்பமே - திருச்சாட்டியக்குடியில் உறைகின்ற, குறைவில்லாத பெருமானின் பொற்பாதத்தை வழிபடும் பக்தர்களுக்கு என்றும் இன்பமே.


11)

வனிதையை ஒருபுடை வைத்த மாண்பினன்

குனிமதி மாசுணம் குலவு சென்னியன்

தனிமணி மிடறினன் சாட்டி யக்குடி

இனிதுறை எந்தையை ஏத்த இன்பமே.


வனிதையை ஒரு-புடை வைத்த மாண்பினன் - உமாதேவியை ஒரு பக்கத்தில் பாகமாக ஏற்ற பெருமை உடையவன்; (மாண்பு - பெருமை; அழகு);

குனி-மதி மாசுணம் குலவு சென்னியன் - வளைந்த பிறையும் பாம்பும் நெருங்கி இருக்கின்ற திருமுடியினன்; (குனிதல் - வளைதல்; வணங்குதல்); (மாசுணம் - பாம்பு); (குலவுதல் - விளங்குதல்; நெருங்கி உறவாடுதல்);

தனி மணி மிடறினன் - ஒப்பற்ற நீலமணிகண்டம் உடையவன்; (தனி - ஒப்பற்ற); (மிடறினன் - மிடற்றினன் - கண்டம் உடையவன்);

சாட்டியக்குடி இனிது உறை எந்தையை ஏத்த இன்பமே - திருச்சாட்டியக்குடியில் மகிழ்ந்து உறைகின்ற, எம் தந்தையைத் துதிக்கும் பக்தர்களுக்கு என்றும் இன்பமே.


வி. சுப்பிரமணியன்

----------- --------------


Monday, December 26, 2022

P.297 - சாட்டியக்குடி - வேத நாவன்

2015-07-30

P.297 - சாட்டியக்குடி

(திருவாரூர்க்குத் தென்கிழக்கே 20 கிமீ தூரத்தில் உள்ள தலம்)

----------------------------------

(கலிவிருத்தம் - மா மா மா கூவிளம் - வாய்பாடு)

(சம்பந்தர் தேவாரம் - 1.23.1 - "மடையில் வாளை பாய")


1)

வேத நாவன் கங்கை வேணியன்

காதல் மாதோர் பாகன் கண்ணுதல்

தாதை ஏர்கொள் சாட்டி யக்குடி

நாதன் அன்பர் வினைகள் நாசமே.


வேதநாவன் - வேதங்களைப் பாடியருளியவன்;

கங்கை-வேணியன் - கங்கையைச் சடையில் உடையவன்; (வேணி - சடை);

காதல் மாது ஓர் பாகன் - அன்புடைய உமையை ஒரு பாகமாக உடையவன்;

கண்ணுதல் - நெற்றிக்கண்ணன்; (நுதல் - நெற்றி); (அப்பர் தேவாரம் - 6.83.4 - "கச்சி மேய கண்ணுதலை");

தாதை - (நம்) தந்தை;

ஏர்கொள் சாட்டியக்குடி நாதன் அன்பர் வினைகள் நாசமே - அழகிய சாட்டியக்குடியில் உறையும் தலைவனான சிவபெருமான் அடியவர்களது வினைகள் அழியும்; (ஏர் - அழகு);


2)

சந்தத் தமிழை மகிழும் சங்கரன்

அந்தி வண்ணத் தழகன் ஐங்கரன்

தந்தை ஏர்கொள் சாட்டி யக்குடி

எந்தை அன்பர்க் கிடர்கள் இல்லையே.


சந்தத்-தமிழை மகிழும் சங்கரன் - சந்தப்பாமாலைகளை விரும்பும் சங்கரன்; ( சந்தம்- அழகு; செய்யுளின் ஓசைநயம்); (சங்கரன் - நன்மை செய்பவன்);

அந்தி-வண்ணத்து அழகன் - சந்தியாகால வானம் போலச் செம்மேனி உடைய அழகன்;

ஐங்கரன் தந்தை - ஐந்து கைகளையுடைய கணபதிக்குத் தந்தை;

ஏர்கொள் சாட்டியக்குடி எந்தை அன்பர்க்கு இடர்கள் இல்லையே - அழகிய சாட்டியக்குடியில் உறையும் எம் தந்தையான சிவபெருமான் அடியவர்களது துன்பங்கள் தீரும்; (ஏர் - அழகு);(எந்தை - எம் தந்தை); (இடர் - துன்பம்);


3)

மெய்யன் நீறு பூசும் வேதியன்

செய்யன் மதனை நீறு செய்தவன்

தையல் பங்கன் சாட்டி யக்குடி

ஐயன் அன்பர்க் கல்லல் இல்லையே.


மெய்யன் - மெய்ப்பொருள் ஆனவன்;

நீறு பூசும் வேதியன் - திருநீற்றைப் பூசிய வேதம் ஓதுபவன்; (வேதியன் - வேதத்தைச் சொன்னவன்; வேதத்தின் பொருளாவான்; வேதத்தில் விளங்குபவன்);

செய்யன் - செம்மேனியன்; (செய் - சிவப்பு);

மதனை நீறு செய்தவன் - மன்மதனைச் சாம்பலாக்கியவன்;

தையல் பங்கன் - அர்த்தநாரீஸ்வரன்; (தையல் - பெண்);

சாட்டியக்குடி ஐயன் அன்பர்க்கு அல்லல் இல்லையே - சாட்டியக்குடியில் உறையும் தலைவனான சிவபெருமான் அடியவர்களது துன்பங்கள் தீரும்; (ஐயன் - தலைவன்);


4)

மழவெள் விடையன் வாச மாமலர்க்

குழலி பாகம் ஆகும் கொள்கையான்

தழலின் உருவன் சாட்டி யக்குடிக்

குழகன் அன்பர்க் கின்பம் கூடுமே.


மழ-வெள்-விடையன் - இளைய வெண்ணிர இடபத்தை ஊர்தியாக உடையவன்;

வாச மாமலர்க்-குழலி பாகம் ஆகும் கொள்கையான் - அழகிய வாசமலர்களை அணிந்த கூந்தலை உடைய உமையை ஒரு பாகமாக மகிழ்ந்தவன்;

தழலின் உருவன் - ஜோதிவடிவினன்;

சாட்டியக்குடிக் குழகன் அன்பர்க்கு இன்பம் கூடுமே - சாட்டியக்குடியில் உறையும் அழகனான சிவபெருமான் அடியவர்களுக்கு இன்பம் பெருகும்; (குழகன் - இளைஞன்; அழகன்);


5)

ஓத்தை ஓதி ஓம்பு மாணியைக்

காத்துப் பாசம் ஏந்து காலனைச்

சாய்த்த பாதன் சாட்டி யக்குடித்

தீர்த்தன் அன்பர் செல்வர் ஆவரே.


ஓத்தை ஓதி ஓம்பு மாணியைக் காத்துப் - வேதத்தை ஓதி வழிபாடு செய்த மார்க்கண்டேயரைக் காத்து; (ஓத்து - வேதம்); (ஓம்புதல் - பேணுதல்);

பாசம் ஏந்து காலனைச் சாய்த்த பாதன் - பாசத்தைக் கையில் ஏந்தும் காலனைக் காலால் உதைத்தவன்; (சாய்த்தல் - அழித்தல்);

சாட்டியக்குடித் தீர்த்தன் அன்பர் செல்வர் ஆவரே - சாட்டியக்குடியில் உறையும் பரிசுத்தனான சிவபெருமான் அடியவர்களுக்குச் செல்வம் பெருகும்; (தீர்த்தன் - பரிசுத்தன்); (அப்பர் தேவாரம் - 5.65.1 - "தேவர் கோவினும் செல்வர்கள் ஆவரே"); (சம்பந்தர் தேவாரம் - 3.49.6 - "பகர்வரேல் சிந்தும் வல்வினை செல்வமும் மல்குமால்");


6)

கடலின் நஞ்சுண் கண்டன் காரிருள்

சுடலை தன்னில் ஆடும் சுந்தரன்

சடையன் ஏர்கொள் சாட்டி யக்குடி

விடையன் அன்பர் வினைகள் வீடுமே.


கடலின் நஞ்சு உண் கண்டன் - பாற்கடலில் தோன்றிய ஆலகாலத்தை உண்ட நீலகண்டன்;

காரிருள் சுடலை-தன்னில் ஆடும் சுந்தரன் - நள்ளிருளில் சுடுகாட்டில் கூத்து ஆடும் அழகன்; (காரிருள் - மிகுந்த இருள்);

சடையன் - சடையினன்;

ஏர்கொள் சாட்டியக்குடி விடையன் அன்பர் வினைகள் வீடுமே - அழகிய சாட்டியக்குடியில் உறையும் இடபவாகனனான சிவபெருமான் அடியவர்களது வினைகள் அழியும்; (வீடுதல் - அழிதல்);


7)

கால காலன் திங்கட் கண்ணியன்

நீல கண்டன் நெற்றிக் கண்ணினன்

சால அழகன் சாட்டி யக்குடிச்

சூலன் அன்பர்க் கில்லை துன்பமே.


காலகாலன் - காலனுக்கே காலன்;

திங்கட்-கண்ணியன் - சந்திரனை முடிக்கு அணியும் மாலையாகச் சூடியவன்; (கண்ணி - தலையில் அணியும் மாலைவகை);

நீலகண்டன், நெற்றிக்-கண்ணினன் - கரிய கண்டன், முக்கண்ணன்;

சால அழகன் - மிக அழகு உடையவன்;

சாட்டியக்குடிச் சூலன் அன்பர்க்கு இல்லை துன்பமே - சாட்டியக்குடியில் உறையும் சூலபாணியான சிவபெருமான் அடியவர்களது துன்பங்கள் அழியும்;


8)

மலையைப் பேர்த்தான் பத்து வாய்களும்

அலற ஊன்றி அருள்செய் அங்கணன்

தலையில் ஆற்றன் சாட்டி யக்குடித்

தலைவன் அன்பர் வினைகள் சாயுமே.


மலையைப் பேர்த்தான் பத்து-வாய்களும் அலற ஊன்றி அருள்செய் அங்கணன் - கயிலைமலையைப் பெயர்த்த இராவணனுடைய பத்துத்-தலைகளில் இருந்த வாய்கள் எல்லாம் அலறும்படி ஒரு விரலை ஊன்றி நசுக்கிப் பின்னர் அருள்செய்த அருட்கண் உடையவன்; (அங்கணன் - அருள்நோக்கம் உடையவன்);

தலையில் ஆற்றன் - கங்காதரன்;

சாட்டியக்குடித் தலைவன் அன்பர் வினைகள் சாயுமே - சாட்டியக்குடியில் உறைகின்ற தலைவனான சிவபெருமானது பக்தர்களது வினைகள் அழியும்; (சாய்தல் - அழிதல்); (அப்பர் தேவாரம் - 5.19.8 - "கங்கையான் உறையுங் கரக்கோயிலைத் தம் கையால் தொழுவார் வினை சாயுமே");


9)

மேலும் கீழும் தேடி வேதனும்

மாலும் வாடி வாழ்த்து வான்சுடர்

சாலப் பழையன் சாட்டி யக்குடிச்

சூலப் படையன் தொண்டர்க் கின்பமே.


மேலும் கீழும் தேடி வேதனும் மாலும் வாடி வாழ்த்து வான்சுடர் - முடியும் அடியும் தேடிப் பிரமனும் திருமாலும் வாடி வணங்க நின்ற பெருஞ்சோதி; (வேதன் - பிரமன்); (வான் - வானம்; பெருமை); (சுடர் - ஜோதி);

சாலப் பழையன் - மிகவும் தொன்மையானவன்;

சாட்டியக்குடிச் சூலப்-படையன் தொண்டர்க்கு இன்பமே - சாட்டியக்குடியில் உறையும் சூலபாணியின் தொண்டர்களுக்கு இன்பமே வந்தடையும்;


10)

வழியை மாற்ற இழிவு வார்த்தைகள்

மொழியும் மூர்க்கர் தம்மை நீங்குமின்

உழுவை உரியன் சாட்டி யக்குடி

தொழவல் வினைதீர்ந் தின்பம் சூழுமே.


வழியை மாற்ற இழிவு வார்த்தைகள் மொழியும் மூர்க்கர்-தம்மை நீங்குமின் - நெறியை மாற்றப் புமொழிகள் பேசும் மூடர்களை நீங்குங்கள்; (மூர்க்கன் - மூடன்);

உழுவை உரியன் - புலித்தோலைக் கட்டியவன்; (உழுவை - புலி); (உரி - தோல்);

சாட்டியக்குடி தொழ வல்வினை தீர்ந்து இன்பம் சூழுமே - சாட்டியக்குடியில் உறையும் சிவபெருமானை வணங்கினால் வல்வினைகள் தீர்ந்து இன்பம் பெருகும்;


11)

பனிவெண் மலையன் சீறு பாந்தளும்

குனிவெண் பிறையும் குலவு சென்னியன்

தனியன் ஏர்கொள் சாட்டி யக்குடி

இனியன் அன்பர்க் கில்லை துன்பமே.


பனி-வெண்-மலையன் - பனி சூழ்ந்த வெள்ளிமலையில் (கயிலைமலையில்) உறைபவன்;

சீறு-பாந்தளும் குனி-வெண்-பிறையும் குலவு சென்னியன் - சீறும் பாம்பும் வளைந்த வெண்திங்களும் சேர்ந்து இருக்கும் திருமுடியினன்; (பாந்தள் - பாம்பு); (குனிதல் - வளைதல்);

தனியன் - ஒப்பற்றவன்;

ஏர்கொள் சாட்டியக்குடி இனியன் அன்பர்க்கு இல்லை துன்பமே - அழகிய சாட்டியக்குடியில் உறையும் சிவபெருமான் அன்பர்களுக்குத் துன்பம் இல்லை;


வி. சுப்பிரமணியன்

----------- --------------