S.146 - சிவன் - கொழுக்கட்டை - சிலேடை

(பிள்ளையார் சதுர்த்தியை ஒட்டி)

2014-08-29

S.146 - சிவன் - கொழுக்கட்டை - சிலேடை

-------------

வெந்தபொடி மேல்மிளிரும் விண்டால் இனிமைதரும்

சிந்தைமகிழ் பூரணம் தென்படுமே - கந்தனுக்

கண்ணன் கரங்கூடும் அன்பரையஞ் சேலெனும்முக்

கண்ணன் கொழுக்கட்டை காண்.

சொற்பொருள்:

பொடி - 1. மாவு; / 2. திருநீறு;

விள்ளுதல் - 1. பிளத்தல்; / 2. சொல்லுதல்;

பூரணம் - 1. கொழுக்கட்டையினுள் இருக்கும் தேங்காய்ப்பூரணம்; / 2. நிறைவு; முழுமை;

அண்ணன் - தமையன்;

கரம் கூடுதல் - 1. கையில் பொருந்துதல்; / 2. கரங்கள் ஒன்றாக இணைதல் (தொழுதல்);

அஞ்சேல் எனும் - 1. அஞ்சு ஏல் எனும்; / 2. அஞ்சேல் (அஞ்சாதே) எனும்;

ஏல் - 1. ஏற்றுக்கொள்; / 2. எதிர்மறை ஏவல்ஒருமை விகுதி;

கொழுக்கட்டை:

வெந்தபொடி மேல் மிளிரும் - வெளியே வெந்த மாவு இருக்கும்;

விண்டால் இனிமை தரும் சிந்தை மகிழ் பூரணம் தென்படுமே - பிளந்தால் இனிமை தருவதும் மனத்திற்கு மகிழ்ச்சியைத் தருவதுமான பூரணம் புலப்படும்;

கந்தனுக்கு அண்ணன் கரம் கூடும் - விநாயகர் கையில் சேரும்;

அன்பரை அஞ்சு ஏல் எனும் - பிரியர்களை (ஒன்றிரண்டு கொழுக்கட்டையே போதும் என்று எண்ணவிடாமல்) ஐந்து ஏற்றுக்கொள் என்னும்;

சிவன்:

வெந்தபொடி மேல் மிளிரும் - சுட்ட திருநீறு மேனிமேல் திகழும்;

விண்டால் இனிமை தரும் சிந்தை மகிழ் பூரணம் தென்படுமே - (திருநாமத்தையும் திருப்புகழையும்) சொன்னால் இனிமை தருகின்ற, மனம் மகிழ்கின்ற நிறைவு புலப்படும்; ("பூரணம் தென்படுமே" - "பூரணனாகிய சிவபெருமான் காட்சி தருவான்" என்றும் பொருள்படும்);

கந்தனுக்கு அண்ணன் கரம் கூடும் - விநாயகன் தனது கரங்களைச் சேர்த்து வணங்கும் தந்தை;

கரம் கூடும் அன்பரை அஞ்சேல் எனும் முக்கண்ணன் - கைகளைக் கூப்பித் தொழும் பக்தர்களை, "அஞ்சேல்" என்று அபயம் தரும் நெற்றிக்கண்ணன்; ("கரம் கூடும்" என்ற சொற்றொடரை இடைநிலைத்தீவகமாக இப்படி இருபக்கமும் இயைத்துப் பொருள்கொள்ளலாம்);

பிற்குறிப்புகள்:

1) ஈசனை "நிறைவு" என்று சுட்டும் பிரயோக உதாரணம்: - திருவாசகம் - 8.22.5 - "குறைவிலா நிறைவே கோதிலா அமுதே";

2) "விண்டால் இனிமைதரும் சிந்தைமகிழ் பூரணம் தென்படுமே" - "பூரணனாகிய சிவபெருமான் காட்சி தருவான்" என்றும் பொருள்படும்; அப்பர் தேவாரம் - 4.112.9 - "சிவனெனும் நாமம் ... இவன் எனைப் பன்னாள் அழைப்பொழியான் என்று எதிர்ப்படுமே";

3) "ஏல்" என்ற பிரயோக உதாரணம்: - ஔவையார் - நல்வழி - "ஒருநாள் உணவை ஒழியென்றால் ஒழியாய் இருநாளுக்கு ஏலென்றால் ஏலாய்";

வி. சுப்பிரமணியன்

----------- -----------