N.018 - சுந்தரர் துதி - வாடும் மனமே

2011-08-05

N.018 - சுந்தரர் துதி - சுந்தரர் குருபூஜை - ஆடிச் சுவாதி - 2011

----------------

(வெண்பா)

(10 பாடல்கள் - எல்லாம் ஒரே ஈற்றடி)

1)

வாடும் மனமே வழியறிவாய் மன்றினுள்

ஆடும் பரமன் அடிமையெனத் - தேடியிடம்

வந்து வழக்காடி ஆட்கொண்ட மாபத்தர்

சுந்தரர் சொல்லே துணை.

தேடியிடம் - இடம் தேடி;

மா-பத்தர் - பெரும்பக்தர்;

2)

மனமே மகிழ வழியிது கேளாய்;

வினைதீர்ந்து செல்வம் விளையும்; - புனற்சடையன்

தந்தபொன்னை ஆற்றிலிட்(டு)ஆ ரூர்க்குளத்தில் தானெடுத்த

சுந்தரர் சொல்லே துணை.

3)

காலனுக்(கு) அஞ்சிக் கலங்கும் மனமேஓர்

பாலனுக்கா அன்றவன்மேல் பாய்ந்தவெஞ் - சூலனுக்குச்

சந்ததம் சந்தத் தமிழ்மாலை சாத்திய

சுந்தரர் சொல்லே துணை.

பாய்ந்தவெஞ்சூலன் - பாய்ந்த எம் சூலன்; பாய்ந்த வெம் சூலன்; (வெம்மை - கொடுமை; கோபம்; பராக்கிரமம்);

சந்ததம் - எப்பொழுதும்;

சாத்துதல் - அணிதல்;

4)

முன்பு முதலையுண்ட பாலகனைப் பெற்றவர்கள்

இன்புற இங்(கு)எமனை ஈயச்சொல் - அன்புருவாம்

தந்தையே என்றுதமிழ் பாடித் தருவித்த

சுந்தரர் சொல்லே துணை.

தருவித்தல் - வருவித்தல்;

(* சுந்தரர் தேவாரம் - 7.92.4 - "புக்கொளியூர் அவினாசியே கரைக்கால் முதலையைப் பிள்ளை தரச்சொல்லு காலனையே");

5)

சங்கிலிக்குச் செய்த சபதத்தை மீறியதால்

தங்கண் இழந்து தடுமாறி - அங்கணன்முன்

நொந்தழு(து) ஆரூரில் நோக்கமடைந்(து) இன்புற்ற

சுந்தரர் சொல்லே துணை.

நோக்கம் - பார்வை;

(* சுந்தரர் தேவாரம் - 7.95.2 - "என்கண் கொண்டீர் நீரே பழிப்பட்டீர் மற்றைக் கண்தான் தாராதொழிந்தால் வாழ்ந்துபோதீரே");

6)

மனைவியின் கோபத்தை மாற்ற எனக்கிங்

குனையன்றி உற்றார்ஆர் உள்ளார் - எனவிரவில்

நந்தியவன் தூது நடந்துதவும் நல்லடியார்

சுந்தரர் சொல்லே துணை.

பதம் பிரித்து:

"மனைவியின் கோபத்தை மாற்ற, எனக்கு இங்கு

உனை அன்றி உற்றார் ஆர் உள்ளார்?" - என, இரவில்

நந்தி-அவன் தூது நடந்து உதவும் நல்-அடியார்

சுந்தரர் சொல்லே துணை.

என - என்று சொல்ல;

நந்தி - சிவபெருமான்; (7.92.7 - "நந்தி உனை வேண்டிக்கொள்வேன் நரகம் புகாமையே" - "நந்தி" என்னும் வடசொல், "இன்பம் உடையவன்" எனப் பொருள்படும்);

7)

போவாரைக் கொள்ளைகொள் இம்முருகன் பூண்டியில்

மேவாமல் வேறூர் விரும்பாயோ - நாவார

வந்தித்(து) அரனருளால் மாண்பொருளைப் பெற்றுமகிழ்

சுந்தரர் சொல்லே துணை.

"என்று" நாவார வந்தித்து - "என்று" என்ற சொல்லை வருவித்துப் பொருள்கொள்க.

மேவுதல் - உறைதல்;

மாண்பொருள் - மிகுந்த பொருள்;

(* சுந்தரர் தேவாரம் - 7.49.1 - "முருகன்பூண்டி மாநகர்வாய் இடுகு நுண்ணிடை மங்கைதன்னொடும் எத்துக் கிங்கிருந்தீர் எம்பிரானீரே");

8)

காவிரி வெள்ளத்தை நீந்திக் கடக்ககில்லேன்

பூவிரிகா ஐயாறா ஓவெனக் - கூவியழை

செந்தமிழால் நீர்விலகிச் செல்வழி நல்கமகிழ்

சுந்தரர் சொல்லே துணை.

கடக்ககில்லேன் - கடக்கும் ஆற்றல் இல்லேன்;

"பூ-விரி-கா ஐயாறா ஓ" எனக் கூவி அழை - பூக்கள் மலரும் சோலை திகழும் திருவையாற்றுப் பெருமானே! ஓலம்" என்று கூவி அழைத்த;

(* சுந்தரர் தேவாரம் - 7.77.9 - "எதிர்த்து நீந்தமாட்டேன் நான் .. .. ஐயாறுடைய அடிகேளோ!");

9)

அந்தமில் ஐயன் அருந்துணைவன் என்றுதனைத்

தந்தருள் செய்த தகைமையினால் - நிந்தையைப்போல்

கந்தமலி பாவால் கழலிணையைப் பாடியருள்

சுந்தரர் சொல்லே துணை.

அந்தம் இல் ஐயன் - முடிவு இல்லாத தலைவன்;

அரும் துணைவன் - அரிய தோழன்;

கந்தமலிபா - கந்தம் மலி பா - மணம் மிகுந்த பாமாலை;

10)

முனிவரெலாம் மால்நான் முகன்வர வேற்கும்

இனியவன்ஆர் என்றுவியப் பெய்தத் - தனிவிடையார்

நந்தமர் ஊரனெனும் நம்பி நலந்திகழும்

சுந்தரர் சொல்லே துணை.

தனி விடையார் - ஒப்பற்ற இடபத்தை ஊர்தியாகக் கொண்டவர்;

நந்தமர் ஊரன் - நம் தமர் ஊரன் - நம் தோழன், "ஆரூரன்" என்னும் பெயரினன்;

நம்பி - ஆணிற் சிறந்தோன்;

(* சுந்தரர் தேவாரம் - 7.100.9 -

இந்திரன் மால்பிரமன் எழிலார்மிகு தேவரெல்லாம்

வந்தெதிர் கொள்ளஎன்னை மத்தயானை அருள்புரிந்து,

மந்திர மாமுனிவர் "இவன் ஆர்" என, எம்பெருமான்

"நந்தமர் ஊரண்" என்றான் நொடித்தான்மலை உத்தமனே.)

வி. சுப்பிரமணியன்

----------- -----------