03.04.012 - சிவன் - சிலேடை - சிலேடை

03.04 – சிவன் சிலேடைகள்

2006-03-28

3.4.12 - சிவன் - சிலேடை - சிலேடை

---------------------------------------------

இருவிதமாய்த் தோன்றியென்றும் ஏற்ற பொருளைத்

தரும்போற்றி அன்பரெலாம் சால்பு கருதி

மொழிவரே கற்றார்கள் முன்னும் சிலேடை

அழிவென்றும் இல்லா அரன்.

ஏற்ற - தகுந்த;

பொருள் - 1) சொல்லின் அர்த்தம்; 2) வஸ்து; திரவியம்; செல்வம்;

போற்றுதல் - புகழ்தல்; துதித்தல்;

சால்பு - மேன்மை;

கருதுதல் - எண்ணுதல்; விரும்புதல்;

கற்றார் - கற்றவர்;

முன்னுதல் - கருதுதல் (To think, contemplate);

என்றும் - எக்காலத்தும்; ஒருநாளும்;

சிலேடை:

இரண்டு விதமாகத் தோன்றி எப்போதும் தகுந்த அர்த்தத்தைத் தரும். ("செம்மொழிச் சிலேடை, பிரிமொழிச் சிலேடை என்று இருவகை ஆகும்" என்றும் பொருள்கொள்ளலாம்); சொல்நயம் விரும்பும் அன்பர்கள் அதன் மேன்மையை விரும்பிப் புகழ்ந்து பேசுவார்கள்; கற்றவர்கள் எண்ணுகின்ற சிலேடை.

சிவன்:

அர்த்தநாரீஸ்வரனாக ஆண் பெண் என இருவிதமாய்த் தோன்றுவான். ("உரு அரு என்று இருவிதம் ஆனவன்" என்றும் பொருள்கொள்ளலாம்); எப்போதும் (பக்தர்களுக்குத்) தகுந்த பொருளை அளிப்பான். பக்தர்கள் அவன் பெருமையை, மேன்மையை மனத்திற்கொண்டு போற்றிப் பாடுவார்கள்; கற்றவர்கள் தியானிக்கின்ற, ஒருநாளும் அழிவு இல்லாத ( = என்றும் இருக்கும்) அரன்.

வி. சுப்பிரமணியன்

-------------------------------- -------------------------------