03.04.011 - சிவன் - திரைப்பட நடிகை - சிலேடை

03.04 – சிவன் சிலேடைகள்

2006-03-26

3.4.11 - சிவன் - திரைப்பட நடிகை - சிலேடை

-------------------------------------------------------------

நீர்முடி மேல்விழ நின்றுநடம் ஆடிவரும்

ஓர்நாரி பாதியுடல் ஒண்துகில் - சேர்கோலம்

காணவன்பர் கூட்டம் கருது(ம்)மிகக் காக்குமண்ட

வாணன் நடிகை வணம்.

நீர் - 1) தண்ணீர்; 2) கங்கை;

ஓர் - 1) ஒரு; 2) ஒப்பற்ற

நாரி - 1) பெண்; 2) உமாதேவி;

ஒண்மை - ஒளி; அழகு;

துகில் - நல்லாடை;

கருதுதல் - விரும்புதல்; எண்ணுதல்;

காத்தல் = 1) எதிர்பார்த்தல்; காத்திருத்தல் (to wait); 2) பாதுகாத்தல்;

அண்டவாணன் - எங்கும் நிறைந்த இறைவன்;

வணம் - வண்ணம் - குணம்; தன்மை;

திரைப்பட நடிகை:

(திரைப்படங்களில்) தண்ணீர் தலைமேல் விழ (அருவியின் கீழ்) நின்று (நனைந்து) ஆடிப் பாடி வருகின்ற ஒரு பெண்; அழகிய துணி பாதி உடலில் (மட்டும்) சேரும் கோலத்தைக் காண ரசிகர் கூட்டம் விரும்பும்; அந்த ரசிகர் கூட்டம் (படத்தைக் காணவும், டிக்கெட் வாங்கவும்) மிகவும் எதிர்பார்த்துக் காத்திருக்கும்;

சிவன்:

கங்கை திருமுடிமேல் விழ நின்று (தாங்கிக்), கூத்து ஆடி வருபவன்; ஒப்பற்ற உமாதேவி திருமேனியில் பாதியாகி, அந்தப் பாதியில் அழகிய நல்லாடை சேரும் கோலமான அர்த்தநாரீஸ்வர வடிவத்தைத் தரிசிக்க அடியார்குழாம் மிக விரும்பும்; (அத்தகைய அடியார்களைக்) காக்கின்றவன் எங்கும் நிறைந்த சிவபெருமான்;

வி. சுப்பிரமணியன்

-------------------------------- -------------------------------