S.117 - சிவன் - சோப்பு (soap) - சிலேடை

2010-08-01

S.117 - சிவன் - சோப்பு (soap) - சிலேடை

------------------

மெய்யுற வாகிநம் மேலுளம லம்போகச்

செய்யுந் தினமலம்பு வார்கழல் - கைசேர்த்து

நானிலத்தோர் போற்றுவார் நல்ல சவுக்காரம்

கூனிலவைச் சூடிய கோன்.

சொற்பொருள்:

மெய் - 1. உடல்; / 2. உண்மை;

உறுதல் - படுதல்; பொருந்துதல்;

உறவு - சுற்றம்; நட்பு;

மலம் - 1. அழுக்கு; / 2. ஆணவம் முதலான மும்மலங்கள்;

அலம்புதல் - 1. கழுவுதல்; / 2. ஒலித்தல்;

வார்தல் - நீளுதல்;

கழல் - பாதம் (ஆகுபெயர்);

கழல் கைசேர்த்து - 1. உம்மைத்தொகை - கழலும் கையும் சேர்த்து; / 2. இரண்டாம் வேற்றுமைத்தொகை - கழலைக் கைசேர்த்து;

கூன் - வளைவு;

சோப்பு (soap):

மெய் உற ஆகி, நம்மேல் உள மலம் போகச்-செய்யும் - உடலில் பட அமைந்து, நம்மேல் இருக்கும் அழுக்குகளைப் போக்கும்;

தினம் அலம்புவார் கழல் கை சேர்த்து நானிலத்தோர் - உலகோர் தினமும் (அதுகொண்டு) கைகால் கழுவுவார்கள்;

போற்றுவார் - (அதன் அவசியத்தை உணர்ந்து) அதனைப் பாராட்டுவர்;

நல்ல சவுக்காரம் - நலம் அளிக்கும் சோப்பு.

சிவன்:

மெய் உறவு ஆகி நம்மேல் உள மலம் போகச் செய்யும் - உண்மையான சுற்றம் ஆகி, நம் உயிரைப் பிணித்துள்ள மும்மலங்களைப் போக்குவான்;

தினம் அலம்பு-வார்-கழல் கைசேர்த்து நானிலத்தோர் போற்றுவார் - ஒலிக்கின்ற நீண்ட கழல் அணிந்த திருவடியை உலகோர் நாள்தோறும் கைகுவித்து வணங்குவார்கள்;

கூன்-நிலவைச் சூடிய கோன் - வளைந்த பிறையை அணிந்த தலைவன்;

வி. சுப்பிரமணியன்

------------- -------------