S.131 - சிவன் - செய்யுள் - சிலேடை

2011-11-22

S.131 - சிவன் - செய்யுள் - சிலேடை

----------------

சீர்மலியு மாலடியிற் சேர்ந்திருக்கு மெப்போது

மார்க்குந் தளைவிள்ளும் பேராமே - ஏர்திகழப்

பூணுந் தொடையு மரவம் புகலவருந்

தாணு தமிழ்ச்செய்யுள் தான்.

சொற்பொருள்:

சீர் - 1. செய்யுளின் உறுப்புகளுள் ஒன்று; / 2. பெருமை; புகழ்;

ஆல் - 1. ஓர் அசைச் சொல்; / 2. ஆலமரம்;

அடி - 1. செய்யுளின் உறுப்புகளுள் ஒன்று; / 2. கீழே;

ஆர்க்கும் - 1. பிணிக்கும்; 2. யார்க்கும்;

தளை - 1. செய்யுளின் உறுப்புகளுள் ஒன்று; / 2. பந்தம்; வினைக்கட்டு;

விள்ளுதல் - 1. சொல்லுதல்; / 2. நீங்குதல்;

ஏர் - அழகு;

தொடை - 1. செய்யுளின் உறுப்புகளுள் ஒன்று; / 2. மாலை;

புகல்தல் - சொல்லுதல்;

அரவம் - 1. ஓசை; / 2. பாம்பு;

தாணு - சிவன்; மலை; தூண்;

செய்யுள்:

சீர் மலியுமால் அடியில் சேர்ந்திருக்கும்; எப்போதும்

ஆர்க்கும் தளை விள்ளும் பேராமே; ஏர் திகழப்

பூணும் தொடையும்; அரவம் புகல வரும்;

தாணு தமிழ்ச்செய்யுள் தான்.

சீர் மலியுமால் அடியில் சேர்ந்திருக்கும் - அடிகளில் சேர்ந்திருக்கும் சீர்கள் நிறைந்திருக்கும்;

எப்போதும் ஆர்க்கும் தளை விள்ளும் பேராமே - சீர்களைப் பிணைக்கும் தளைகள் (வெண்டளை, கலித்தளை, ஆசிரியத்தளை, முதலியன) பாடலின் பெயரைச் சொல்லும் (வெண்பா, கலிப்பா, ஆசிரியப்பா, முதலியன).

ஏர் திகழப் பூணும் தொடையும் - அழகுறப் பலவித தொடைகளும் (எதுகைத்தொடை, மோனைத்தொடை, முதலியன) இருக்கும்.

அரவம் புகல வரும் - சொன்னால் ஓசை வரும்;

தமிழ்ச்செய்யுள் - தமிழில் உள்ள செய்யுள்;

சிவன்:

சீர் மலியும்; ஆல் அடியில் சேர்ந்திருக்கும்; எப்போதும்

ஆர்க்கும் தளை விள்ளும் பேராமே; ஏர் திகழப்

பூணும் தொடையும் அரவம்; புகல அரும்

தாணு தமிழ்ச்செய்யுள் தான்.

சீர் மலியும் - பெருமை (/ புகழ்) மிகுந்திருக்கும்;

ஆல்அடியில் சேர்ந்திருக்கும் - கல்லாலமரத்தின்கீழ் வீற்றிருப்பான்;

எப்போதும் ஆர்க்கும் தளை விள்ளும் பேராமே - எந்நாளும் எத்தகையவருக்கும் அவர்களைப் பிணித்துள்ள அவர்களது பந்தங்களை அவன் பெயர் நீக்கும்; (நாமஜபத்தின் பலன்); (சம்பந்தர் தேவாரம் - 3.49.6 -"மந்தரம் அன பாவங்கள் மேவிய பந்தனையவர்தாமும் பகர்வரேல் சிந்தும் வல்வினை செல்வமும் மல்குமால் நந்தி நாமம் நமச்சிவாயவே");

ஏர் திகழப் பூணும் தொடையும் அரவம் - அவன் அழகுற அணியும் மாலையும் பாம்பு;

புகல அரும்-தாணு - சொல்லற்கு அரியவன் (சொல்லொணாப் புகழ் உடையவன்), தாணு எனப்படும் சிவபெருமான்;

வி. சுப்பிரமணியன்

----------- -----------