04.48 - குறுக்கை வீரட்டம் (கொருக்கை) - ஒளி இலங்கும் பிறை

04.48 - குறுக்கை வீரட்டம் (கொருக்கை) - ஒளி இலங்கும் பிறை

2014-01-29

குறுக்கை வீரட்டம் (கொருக்கை)

----------------------

(சந்தக் கலிவிருத்தம் - தானனா தானனா தானனா தானனா)

(சம்பந்தர் தேவாரம் - 3.36.1 - "சந்தமா ரகிலொடு")

(சுந்தரர் தேவாரம் - 7.37.2 - "பறக்குமெங் கிள்ளைகாள்")

1)

ஒளியிலங் கும்பிறை உச்சிமேல் சூடினார்

துளியிலங் கும்மணி கண்டனார் தொண்டராய்

அளிபவர்க் கருள்புரி அண்ணலார் உறைவது

குளிர்பொழில் சூழ்திருக் குறுக்கைவீ ரட்டமே.

ஒளி இலங்கும் பிறை உச்சிமேல் சூடினார் - ஒளி திகழும் பிறையைத் தலைமேல் சூடியவர்; (இலங்குதல் - பிரகாசித்தல்); (சூடினார் - சூடியவர்);

துளி இலங்கும் மணிகண்டனார் - விடம் மிளிர்கின்ற நீலகண்டர்; (துளி - விடம்); (சம்பந்தர் தேவாரம் - 2.88.1 - "துளிமண்டி உண்டு நிறம்வந்த கண்டன்");

தொண்டராய் அளிபவர்க்கு அருள்புரி அண்ணலார் உறைவது - பக்தர்களாகி உருகுகின்றவர்களுக்கு அருளும் பெருமானார் உறையும் தலம் ஆவது; (அளிதல் - குழைதல்; அன்புகொள்தல்);

குளிர் பொழில் சூழ் திருக்குறுக்கை வீரட்டம் - குளிர்ந்த சோலை சூழ்ந்த திருக்குறுக்கை வீரட்டம்;

2)

ஏலவார் குழலியை இட(ம்)மகிழ் ஈசனார்

காலனார் ஆருயிர் காலவே காய்ந்தொரு

பாலனார்க்(கு) அருள்புரி பரமனார் உறைவது

கோலமார் பொழிலணி குறுக்கைவீ ரட்டமே.

ஏல-வார்-குழலியை இட(ம்) மகிழ் ஈசனார் - மணம் கமழும் நீண்ட கூந்தலை உடைய உமையை இடப்பக்கம் ஒரு பங்காக விரும்பிய ஈசர்;

காலனார் ஆருயிர் காலவே காய்ந்து - காலன் தனது அரிய உயிரைக் கக்கும்படி (= இறக்கும்படி அவனை) உதைத்து; (கால்தல் - கக்குதல்); (காய்தல் - கோபித்தல்; அழித்தல்);

ஒரு பாலனார்க்(கு) அருள்புரி பரமனார் உறைவது - ஒப்பற்ற மார்க்கண்டேயருக்கு அருளிய பரமர் உறையும் தலம்;

கோலம் ஆர் பொழில் அணி குறுக்கை வீரட்டம் - அழகிய சோலை சூழ்ந்த திருக்குறுக்கை வீரட்டம்;

3)

சங்கரா காவெனத் தாளடைந் தார்வினை

அங்கிரா வண்ணமின் னருள்புரி அங்கணர்

பொங்கரா மாலையைப் பூண்டவர் உறைவது

கொங்கறாப் பொழிலணி குறுக்கைவீ ரட்டமே.

"சங்கரா, கா" எனத் தாள் அடைந்தார் வினை அங்கு இரா-வண்ணம் இன்னருள்புரி அங்கணர் - "சங்கரனே, காத்தருளாய்" என்று திருவடியைச் சரணடைந்தவர்களது வினையையெல்லாம் அழித்து இனிது அருளும் அருள்நோக்கம் உடையவர்; (இரா வண்ணம் - இல்லாதபடி; தீருமாறு);

பொங்கு-அரா மாலையைப் பூண்டவர் உறைவது - சீறும் பாம்பை மாலையாக அணிந்த பெருமானார் உறையும் தலம் ஆவது;

கொங்கு அறாப் பொழில் அணி குறுக்கை வீரட்டம் - வாசனை எப்போதும் கமழும் சோலை சூழ்ந்த குறுக்கை வீரட்டம்; (கொங்கு - வாசனை; தேன்); (அறுதல் - தீர்தல்; இல்லாமற்போதல்);

4)

அயிலுறு வேலினார் அலைகடல் நஞ்சினால்

புயலுறு கண்டனார் போழ்மதி இண்டையார்

எயிலெரி நகையினார் ஏற்றனார் உறைவது

குயில்பயில் பொழிலணி குறுக்கைவீ ரட்டமே.

அயில் உறு வேலினார் - கூர்மை திகழும் மூவிலைவேல் (= திரிசூலம்) ஏந்தியவர்; (உறுதல் - இருத்தல்);

புயல் உறு கண்டனார் - மேகம் போல் திகழும் கண்டம் உடையவர்; (உறுதல் - ஒத்தல்);

போழ்-மதி இண்டையார் - திங்கள்-துண்டத்தை முடிமேல் இண்டை மாலையாக உடையவர்; (போழ் - துண்டம்);

எயில் எரி நகையினார் - முப்புரங்களைச் சிரித்து எரித்தவர்;

ஏற்றனார் உறைவது - இடபவாகனம் உடையவர் உறையும் தலம்;

குயில் பயில் பொழில் அணி குறுக்கை வீரட்டம் - குயில்கள் ஒலிக்கும் சோலை சூழ்ந்த குறுக்கை வீரட்டம்;

5)

தக்கனார் வேள்வியைத் தகர்த்தவர் தரையினில்

சக்கரம் ஒன்றினால் சலந்தரற் றடிந்தவர்

அக்கரா மாலையார் ஐயனார் உறைவது

கொக்கிரை தேர்வயற் குறுக்கைவீ ரட்டமே.

தக்கனார் வேள்வியைத் தகர்த்தவர் - தக்கன் செய்த யாகத்தை அழித்தவர்; (சம்பந்தர் தேவாரம் - 3.92.7 - "தக்கனார் வேள்வியைச் சாடிய சதுரனார்");

தரையினில் சக்கரம் ஒன்றினால் சலந்தரற் றடிந்தவர் - நிலத்தில் ஒரு சக்கரத்தை வரைந்து அதுகொண்டு சலந்திரனை அழித்தவர்; (தடிதல் - அழித்தல்); (சலந்தரற் றடிந்தவர் = சலந்தரனைத் தடிந்தவர்; உயர்திணையில் இரண்டாம் வேற்றுமைத்தொகையில் பொருளின் தெளிவு கருதி ன் ஒற்று ற் ஒற்றாகத் திரியும்);

அக்கு அரா மாலை ஆர் ஐயனார் உறைவது - எலும்பையும் பாம்பையும் மாலையாக அணிந்த தலைவர் உறையும் தலம் ஆவது;

கொக்கு இரை தேர் வயல் குறுக்கை வீரட்டம் - கொக்குகள் இரைதேரும் (நீர்வளம் மிக்க) வயல் சூழ்ந்த குறுக்கை வீரட்டம்;

6)

சாவிலார் பிறப்பிலார் நோவிலார் தமக்கொரு

கோவிலார் அன்பருள் கோயிலாக் கொண்டவர்

மாவிடை ஊர்தியார் மகிழ்வது பூங்குயில்

கூவிடும் சோலைசூழ் குறுக்கைவீ ரட்டமே.

சாவு இலார் பிறப்பு இலார் நோவு இலார் - இறத்தல், பிறத்தல், துன்பம் இவை இல்லாதவர்;

தமக்கு ஒரு கோ இலார் - தமக்கு ஒரு தலைவன் இல்லாதவர்; (அப்பர் தேவாரம் - 6.98.1 - "தாமார்க்கும் குடியல்லாத் தன்மையான சங்கரன்");

அன்பர் உள் கோயிலாக் கொண்டவர் - பக்தர்களது நெஞ்சத்தைக் கோயிலாகக் கொண்டவர்;

மா-விடை ஊர்தியார் மகிழ்வது - பெரிய இடபத்தை வாகனமாக உடையவர் விரும்பி உறையும் தலம் ஆவது;

பூங்குயில் கூவிடும் சோலை சூழ் குறுக்கை வீரட்டம் - அழகிய குயில்கள் கூவும் சோலை சூழ்ந்த திருக்குறுக்கை வீரட்டம்;

7)

மாமலர் ஐந்தினை வாளியாக் கொண்டவக்

காமனை அனங்கனாக் காய்ந்தமுக் கண்ணினார்

தூமறை பாடினார் தோடொரு காதணி

கோமக னாரிடம் குறுக்கைவீ ரட்டமே.

மா-மலர் ஐந்தினை வாளியாக் கொண்ட அக்-காமனை அனங்கனாக் காய்ந்த முக்கண்ணினார் - அழகிய ஐந்து மலர்களை அம்பாகக் கொண்ட அந்த மன்மதனை உருவமற்றவன் ஆகும்படி சினந்து எரித்த நெற்றிக்கண்ணர்; (வாளி - அம்பு); (அனங்கன் - உடல் அற்றவன்; மன்மதன்); (வாளியா, அனங்கனா - வாளியாக, அனங்கனாக);

தூ மறை பாடினார் - தூய வேதங்களைப் பாடியவர்;

தோடு ஒரு காது அணி கோமகனார் இடம் குறுக்கை வீரட்டமே - ஒரு காதில் தோடு அணிகின்ற (உமையொரு பங்கரான) தலைவர் உறையும் தலம் ஆவது திருக்குறுக்கை வீரட்டம்; (கோமகன் - அரசன்);

8)

நெற்றியிற் கண்ணினார் நீள்மலை பேர்த்திடப்

பற்றினான் மணிமுடி பத்தையும் நெரித்தவர்

மற்றிசை கேட்டொரு வாளொடு நாளருள்

கொற்றவ னாரிடம் குறுக்கைவீ ரட்டமே.

நீள்-மலை பேர்த்திடப் பற்றினான் மணிமுடி பத்தையும் நெரித்தவர் - நீண்ட கயிலைமலையைப் பெயர்க்க முயன்ற இராவணனது கிரீடம் அணிந்த பத்துத்தலைகளையும் நசுக்கியவர்;

மற்று இசை கேட்டு ஒரு வாளொடு நாள் அருள் - பிறகு, அவன் பாடிய கீதத்தைக் கேட்டு அவனுக்கு ஒரு வாளையும் நீண்ட ஆயுளையும் அருள்செய்த; (மற்று - பின்னர்); (நாள் - ஆயுள்);

கொற்றவனார் - அரசர்; தலைவர்;

9)

நாறுபங் கயத்தயன் நாரணன் உம்பரில்

ஏறுபுள் மண்ணகழ் ஏனமாய் நேடிய

வீறுடைச் சோதியார் வேயன தோளியோர்

கூறுடை யாரிடம் குறுக்கைவீ ரட்டமே.

நாறு பங்கயத்து அயன் நாரணன் - மணம் கமழும் தாமரைமேல் இருக்கும் பிரமனும் திருமாலும்;

உம்பரில் ஏறு புள் மண் அகழ் ஏனமாய் நேடிய வீறுடைச் சோதியார் - வானில் ஏறும் அன்னமாயும் நிலத்தை அகழ்ந்த பன்றியாயும் தேடிய பெருமைமிக்க ஜோதி வடிவினர்; (உம்பர் - வான்); (புள் - பறவை); (ஏனம் - பன்றி); (வீறு - பெருமை);

வேய் அன தோளி ஓர் கூறு உடையார் - மூங்கில் போன்ற புயத்தை உடைய உமையை ஒரு கூறாகக் கொண்டவர்;

10)

மாற்றிவம் வழியென வாயில்வந் துரைப்பவர்

கூற்றினில் மயங்கிடேல் குறைவிலா தருள்பவர்

ஆற்றினைப் புனைந்தவர் அடியவர் பாலடை

கூற்றுதைத் தாரிடம் குறுக்கைவீ ரட்டமே.

"மாற்றி வம் வழி" என வாயில்வந்து உரைப்பவர் கூற்றினில் மயங்கிடேல் - "உங்கள் நெறியை மாற்றி வாருங்கள்" என்று வீட்டுவாசலில் வந்து சொல்பவர்களது வார்த்தைகளில் மயங்கவேண்டா; (வம் - வம்மின் - வாருங்கள்); (வழி - நெறி; மார்க்கம்); (கூற்று - சொற்கள்); (மயங்கிடேல் - மயங்கவேண்டா);

குறைவிலாது அருள்பவர் - வேண்டிய வரங்களையெல்லாம் அருள்பவர்;

ஆற்றினைப் புனைந்தவர் - கங்கையை அணிந்தவர்;

அடியவர்பால் அடை கூற்று உதைத்தார் இடம் - மார்க்கண்டேயரிடம் வந்தடைந்த இயமனை உதைத்தவரான சிவபெருமானார் உறையும் தலம் ஆவது;

குறுக்கை வீரட்டமே - திருக்குறுக்கை வீரட்டம்;

11)

தீர்த்தனார் சென்னியில் சேவடி இரண்டையும்

ஏத்தினார் இடர்களை இல்லையென் றாக்கினார்

சேர்த்தினார் அரவொடு திங்களைக் கானிடைக்

கூத்தனார் மேயது குறுக்கைவீ ரட்டமே.

தீர்த்தனார் சென்னியில் - முடிமேல் கங்கையைத் தாங்கியவர்;

சேவடி இரண்டையும் ஏத்தினார் இடர்களை இல்லை என்று ஆக்கினார் - சிவந்த இரு-பாதங்களைப் போற்றுவார்களுடைய துன்பங்களையெல்லாம் இல்லாமற் செய்பவர்;

சேர்த்தினார் அரவொடு திங்களை - பாம்போடு திங்களைச் சேர்த்தவர்; (சம்பந்தர் தேவாரம் - 2.78.5 - "திங்களைப் பொங்கராக் கங்கையோடுடன் சேர்த்தினார்");

கானிடைக் கூத்தனார் மேயது குறுக்கை வீரட்டமே - சுடுகாட்டில் திருநடம் செய்யும் சிவபெருமானார் எழுந்தருளி இருக்கும் தலம் குறுக்கை வீரட்டம்.

வி. சுப்பிரமணியன்

------------ ------------------