06.01.124 - சிவன் - தேசியக் கொடி (national flag) - சிலேடை

06.01 – சிவன் சிலேடைகள்

2010-09-25

06.01.124 - சிவன் - தேசியக் கொடி (national flag) - சிலேடை

-----------------------------------------------

மாலை இறக்குவதாற் காலை உயர்த்துவதாற்

கோலத்தைக் கண்டுலகு கும்பிடுஞ் - சீலத்தான்

மாவேறு வண்ணத்தால் வானோங்கு கம்பத்தான்

மாவாறு சூடி கொடி.

சொற்பொருள்:

மால் - திருமால்; அறியாமை;

இறக்குதல் - இறங்கச்செய்தல்; அடக்குதல்;

உலகு - உலகம் - 1. (நாடு முதலிய) நிலப்பகுதி; நாட்டுமக்கள்; 2. பெரியோர்; நன்மக்கள்; ("உலகம் என்பது உயர்ந்தோர் மாட்டே" - சேந்தன் திவாகர நிகண்டு);

சீலம் - தன்மை;

மா - 1. அழகிய; 2. விலங்கு; (இங்கே, எருது); பெரிய;

வேறு - பிறிது (வெவ்வேறு); சிறப்புடையது;

வண்ணம் - குணம்; நிறம்;

கம்பம் - தூண்; கச்சி ஏகம்பம்; (ஏகாம்பரேஸ்வரர் கோயில்);

இலக்கணக் குறிப்பு: புணர்ச்சி விதி: 'ல்' - இதனை அடுத்து மகரத்தில் தொடங்கும் சொல் வந்தால், அந்த 'ல்', 'ன்' ஆகத் திரியும். உதாரணம்: சொல் + மாலை = சொன்மாலை;

தேசியக் கொடி (national flag):

மாலை இறக்குவதால் - சாயங்காலத்தில் இறக்குவார்கள்;

காலை உயர்த்துவதால் - காலை வேளையில் ஏற்றுவார்கள்;

கோலத்தைக் கண்டு உலகு கும்பிடும் சீலத்தால் - அதனைக் கண்டு நாட்டுமக்கள் வணங்குவார்கள்;

மா வேறு/ஏறு வண்ணத்தால் - அழகிய சிறந்த நிறம் கொண்டது; அழகு ஏறும் நிறம் உடையது;

வான் ஓங்கு கம்பத்தால் - உயர்ந்த கம்பத்தில் திகழும்;

கொடி - தேசியக்கொடி;

சிவன்:

மாலை இறக்குவதால் - அடி தேடிய திருமாலை மண் அகழ்ந்து கீழே செல்லச்செய்ததால்; (-- அல்லது -- அறியாமையை அடக்குவதால்/அழிப்பதால்);

காலை உயர்த்துவதால் - நடமிடும்போது திருவடியைத் தூக்குவதால்;

கோலத்தைக் கண்டு உலகு கும்பிடும் சீலத்தால் - திருவுருக் கண்டு மக்கள் வணங்கும் தன்மையால்;

மா ஏறு வண்ணத்தால் - இடபத்தின்மேல் ஏறும் குணத்தால்;

வான் ஓங்கு கம்பத்தான் - வானில் சோதியாய் நீண்ட, கச்சி ஏகம்பத்தில் இருப்பவன்; (-- அல்லது -- வானில் உயர்ந்த ஒளித்தூண் ஆனவன்);

மா ஆறு சூடி - பெரிய கங்கையைச் சூடியவன்;

வி. சுப்பிரமணியன்

-------------------------------- -------------------------------