06.01.122 - சிவன் - கண்ணன் - சிலேடை

06.01 – சிவன் சிலேடைகள்

2010-08-30

06.01.122 - சிவன் - கண்ணன் - சிலேடை

-----------------------------------------------

கோலமாம் கார்கண்ட வண்ணம் குழலூதும்

சீலமாம் ஆனாயன் சேவிக்கு - மாலமர்

நாகமுடி மேலாடும் நம்பிமத வேள்பயந்த

வேகமலி வெள்ளேற்றன் விண்டு.

சொற்பொருள்:

கோலம் - அழகு;

காணுதல் - பெறுதல்; ஒத்திருத்தல்; பார்த்தல்;

கார் கண்ட வண்ணம் - 1. கருமை பொருந்திய நிறம்; / 2. கழுத்தின் நிறம் கருமை;

ஆனாயன் - 1. மாட்டிடையன்; / 2. ஆனாய நாயனார்;

சேவிக்குமாலமர் - 1. சேவிக்கும் மால் அமர்; / 2. சேவிக்கும் ஆல் அமர்;

ஆல் - ஆலமரம்; ஆலகால விஷம்;

அமர்தல் - இருத்தல்; விரும்புதல்;

அமர் - போர்;

நாகமுடிமேல் - 1. நாகத்தின் தலைமேல்; / 2. நாகம் தலைமேல்; (இலக்கணக் குறிப்பு: புணர்ச்சியில் இவ்விடத்தில் மகர ஒற்றுக் கெடும்);

ஆடுதல் - 1. செய்தல்; கூத்தாடுதல்; / 2. அசைதல்;

நம்பி - ஆணிற் சிறந்தவன்; கடவுள்;

பயத்தல் - 1. பெறுதல் (To beget, generate, give birth to); / 2. அஞ்சுதல்;

விண்டு - விஷ்ணு;

கண்ணன்:

கோலம் ஆம் கார் கண்ட வண்ணம் - கருமை பொருந்திய நிறம் அழகு ஆகும்;

குழல் ஊதும் சீலம் ஆம் - புல்லாங்குழல் வாசிப்பவன்;

ஆனாயன் - ஆன் ஆயன் - மாட்டிடையன்;

சேவிக்கும் மால் - பக்தர்கள் வணங்கும் திருமால்;

அமர் நாக முடிமேல் ஆடும் நம்பி - 1. நாம் விரும்புகின்ற காளிங்க நர்த்தனன்; 2. பாம்பின் தலைமேல் ஆடிப் போர்செய்தவன்; (அமராடுதல் - போர்செய்தல்);

மதவேள் பயந்த - மன்மதனைப் பெற்ற;

விண்டு - விஷ்ணு;

சிவன்:

கோலம் ஆம் கார் கண்ட வண்ணம் - கண்ட வண்ணம் கோலம் ஆம் கார் - கழுத்தின் நிறம் அழகு ஆகும் கருமை;

குழல் ஊதும் சீலம் ஆம் ஆனாயன் சேவிக்கும் - புல்லாங்குழல் ஊதி இசையால் வழிபட்ட ஆனாய நாயனார் வணங்கிய;

ஆல் அமர், நாகம் முடிமேல் ஆடும் நம்பி - கல்லால நீழலில் வீற்றிருக்கின்ற (/ஆலகால விடத்தை விரும்பிய), தலைமேல் பாம்பு அசைகின்ற பெருமான்;

மதவேள் பயந்த - மன்மதன் (பாணம் ஏவுவதற்கு) அஞ்சிய;

வேகம் மலி வெள் ஏற்றன் - விரைந்து செல்லும் வெள்ளை இடபத்தை வாகனமாக உடைய சிவபெருமான்.

வி. சுப்பிரமணியன்

-------------------------------- -------------------------------