Tuesday, August 24, 2021

P.266 - கொண்டீச்சரம் (திருக்கொண்டீஸ்வரம்) - பண்டரங்கனை

2014-12-28

P.266 - கொண்டீச்சரம் (திருக்கொண்டீஸ்வரம்)

(நன்னிலத்தை அடுத்து உள்ள தலம்)

-----------------------

(கலிவிருத்தம் - திருக்குறுந்தொகை அமைப்பில்)

(திருநாவுக்கரசர் தேவாரம் - 5.81.1 - "சிட்டனைச் சிவனை");

(திருஞானசம்பந்தர் தேவாரம் - 3.50.1 - "விரும்புந் திங்களும்");



1)

பண்ட ரங்கனைப் பார்வதி பங்கனை

அண்டர் அண்டனை அன்பின் உருவனைக்

கொண்டற் கண்டனைக் கொண்டீச் சரவனைத்

தொண்ட ராய்த்தொழு வார்க்கிலை துன்பமே.


பண்டரங்கனைப் - பாண்டரங்கக் கூத்தனை; (பண்டரங்கன் - பாண்டரங்கக் கூத்தாடுவோன்); (பாண்டரங்கம் - கூத்துப் பதினொன்றனுள் திரிபுரத்தை அழித்த போது சிவபிரான் வெண்ணீறணிந்து ஆடியது);

பார்வதி பங்கனை - உமைபங்கனை;

அண்டர-அண்டனை - தேவதேவனை;

அன்பின் உருவனைக் - அன்பே வடிவானவனை;

கொண்டற் கண்டனைக் - மேகம் போன்ற நிறம் திகழும் கண்டத்தை உடையவனை; (கொண்டல் - மேகம்); (திருக்கோவையார் - 23.10 - "திண்டோட்கொண்டற் கண்டன்");

கொண்டீச்சரவனைத் - திருக்கொண்டீச்சரத்தில் உறைகின்ற பெருமானை;

தொண்டராய்த் தொழுவார்க்கு இலை துன்பமே - தொண்டர்களாகி வணங்குபவர்களுக்குத் துன்பம் இல்லை;


2)

சூல னைப்புலித் தோலனை முப்புரி

நூல னைப்பத்து நூறு பெயரனைக்

கோல வார்சடைக் கொண்டீச் சரவனை

ஏலு மாறு வணங்குவார்க் கின்பமே.


சூலனைப், புலித்தோலனை, முப்புரி நூலனைப் - சூலபாணியைப், புலித்தோல் ஆடை அணிந்தவனை, பூணூல் திகழும் மார்பினனை;

பத்து நூறு பெயரனை - ஆயிரம் திருநாமங்கள் உடையவனை; (சம்பந்தர் தேவாரம் - 1.56.11 - "பாற்றுறை மேவிய பத்து நூறு பெயரனை");

கொண்டீச்சரவனை - திருக்கொண்டீச்சரத்தில் உறைகின்ற பெருமானை;

ஏலுமாறு வணங்குவார்க்கு இன்பமே - இயன்றவகையில் (/ பொருந்துமாறு) வணங்கும் பக்தர்களுக்கு இன்பமே; (அப்பர் தேவாரம் - 5.43.9 - "காலமான கழிவதன் முன்னமே ஏலுமாறு வணங்கிநின்று ஏத்துமின்");


3)

மன்றில் ஆடியை மாதவர் நெஞ்சினில்

நின்ற சோதியை நெற்றியிற் கண்ணனைக்

குன்ற வில்லியைக் கொண்டீச் சரவனைச்

சென்று வாழ்த்திடத் தீவினை தீருமே.


மன்றில் ஆடியை - அம்பலக் கூத்தனை;

மாதவர் நெஞ்சினில் நின்ற சோதியை - பெரும்-தவத்தோர் நெஞ்சில் குடிகொண்ட ஜோதிவடிவினனை;

நெற்றியில் கண்ணனைக் - நெற்றிக்கண் உடையவனை;

குன்ற-வில்லியைக் - மேருமலையை வில்லாக ஏந்தியவனை;

கொண்டீச்சரவனைச் - திருக்கொண்டீச்சரத்தில் உறைகின்ற பெருமானை;

சென்று வாழ்த்திடத் தீவினை தீருமே - சென்று வழிபட்டால் தீவினை நீங்கும்;


4)

பெற்றம் ஏறும் பிரானைப் பெருவிடம்

துற்ற கண்டனைத் தூமதி சூடியைக்

குற்றம் இல்லியைக் கொண்டீச் சரவனைப்

பற்றி னார்தம் பழவினை பாறுமே.


பெற்றம் ஏறும் பிரானைப் - இடபவாகனனை; (பெற்றம் - இடபம்);

பெருவிடம் துற்ற கண்டனைத் - ஆலகாலத்தை உண்ட நீலகண்டனை; (துற்றுதல் - உண்ணுதல்);

தூமதி சூடியைக் - வெண்மையான சந்திரனைச் சூடியவனை;

குற்றம் இல்லியைக் - மாசற்றவனை;

கொண்டீச்சரவனைப் - திருக்கொண்டீச்சரத்தில் உறைகின்ற பெருமானை;

பற்றினார்தம் பழவினை பாறுமே - சரணடைந்த பக்தர்களது பழைய வினை அழியும்; (பாறுதல் - அழிதல்);


5)

போதை இட்டடி போற்றிய வானவர்

வாதை தீர்த்த வரைச்சிலை ஏந்தியைக்

கோதை பங்கனைக் கொண்டீச் சரவனை

வேத னைத்தொழ வீடும் வினைகளே.


போதை இட்டு அடி போற்றிய வானவர் வாதை தீர்த்த வரைச்சிலை ஏந்தியைக் - பூக்களைத் தூவி வழிபட்ட தேவர்களது துன்பத்தை தீர்த்த, மேருவில் ஏந்தியவனை; (போது - மலர்); (வாதை - துன்பம்); (வரை - மலை); (சிலை - வில்);

கோதை பங்கனைக் - உமைபங்கனை; (கோதை - பெண்);

கொண்டீச்சரவனை - திருக்கொண்டீச்சரத்தில் உறைகின்ற பெருமானை;

வேதனைத் - வேதநாயகனை;

தொழ வீடும் வினைகளே - வழிபட்டால் வினை அழியும்; (வீடுதல் - அழிதல்);


6)

நாறு கூவிளம் நாகம் இளமதி

ஏறு செஞ்சடை ஏந்தலை மேனியிற்

கூறு பெண்ணனைக் கொண்டீச் சரவனைக்

கூறு வாரைக் குறுகா வினைகளே.


நாறு கூவிளம் நாகம் இளமதி ஏறு செஞ்சடை ஏந்தலை - மணம் கமழும் வில்வம், பாம்பு, பிறை இவற்றையெல்லாம் சிவந்த சடையின்மேல் அணிகின்ற தலைவனை; (கூவிளம் - வில்வம்); (ஏந்தல் - பெருமையிற் சிறந்தவன்);

மேனியில் கூறு பெண்ணனைக் - திருமேனியில் ஒரு பாதி பெண் ஆனவனை;

கொண்டீச்சரவனைக் - திருக்கொண்டீச்சரத்தில் உறைகின்ற பெருமானை;

கூறுவாரைக் குறுகா வினைகளே - துதிக்கும் பக்தர்களை வினைகள் நெருங்கமாட்டா; (குறுகுதல் - அணுகுதல்);


7)

அமரர் கோனை அடிதொழு மாணிக்கா

நமனைச் செற்றருள் நம்பனை மஞ்ஞையூர்

குமரன் தாதையைக் கொண்டீச் சரவனை

விமல னைத்தொழ வீடும் வினைகளே.


அமரர் கோனை - தேவர்கள் தலைவனை;

அடிதொழு மாணிக்கா நமனைச் செற்றருள் நம்பனை - வணங்கிய மார்க்கண்டேயரைக் காப்பதற்காகக் காலனை உதைத்த நம்பனை; (மாணிக்கா - மாணிக்காக - மார்க்கண்டேயருக்காக); (நம்பன் - சிவன் திருநாமம் - விரும்பத்தக்கவன்);

மஞ்ஞை ஊர் குமரன் தாதையைக் - மயில்மேல் ஏறும் முருகனுக்குத் தந்தையை; (மஞ்ஞை - மயில்); (ஊர்தல் - ஏறுதல்); (தாதை - தந்தை);

கொண்டீச்சரவனை - திருக்கொண்டீச்சரத்தில் உறைகின்ற பெருமானை;

விமலனைத் தொழ வீடும் வினைகளே - தூயனை வழிபட்டால் வினை அழியும்; (வீடுதல் - அழிதல்);


8)

இடிபோல் கத்தி எழில்மலை பேர்த்தவன்

முடிபத் திற்றிட ஊன்றிய மூர்த்தியைக்

கொடிமேல் ஏற்றனைக் கொண்டீச் சரவனை

அடிக ளைத்தொழும் அன்பருக் கின்பமே.


இடிபோல் கத்தி எழில்மலை பேர்த்தவன் - இடிபோலப் பெருமுழக்கம் செய்து அழகிய கயிலைமலையைப் பெயர்த்த இராவணனுடைய; (சம்பந்தர் தேவாரம் - 1.112.8 - "எழின்மலை எடுத்த வல்லிராவணன்றன் முழுவலி அடக்கிய முதல்வனகர்");

முடி பத்து இற்றிட ஊன்றிய மூர்த்தியைக் - பத்துத்தலைகளும் நசுங்கும்படி திருப்பாதவிரலை ஊன்றிய பெருமானை; (இறுதல் - அழிதல்);

கொடிமேல் ஏற்றனை - இடபச்-சின்னம் திகழும் கொடியை உடையவனை;

கொண்டீச்சரவனை - திருக்கொண்டீச்சரத்தில் உறைகின்ற பெருமானை;

அடிகளைத் தொழும் அன்பருக்கு இன்பமே. - இறைவனை வழிபடும் பக்தர்களுக்கு இன்பமே; (அடிகள் - கடவுள்);


9)

அரவின் மேல்துயில் அச்சுதன் நான்முகன்

பரவ நின்ற பரஞ்சுட ரைக்கொன்றை

குரவம் சூடிய கொண்டீச் சரவனை

விரவும் அன்பர்தம் வெவ்வினை வீடுமே.


அரவின்மேல் துயில் அச்சுதன் நான்முகன் பரவ நின்ற பரஞ்சுடரைக் - பாம்பின்மேல் பள்ளிகொள்ளும் திருமாலும் பிரமனும் (அடிமுடி தேடிப்) போற்றுமாறு ஓங்கிய மேலான ஜோதியை; (பரவுதல் - துதித்தல்);

கொன்றை குரவம் சூடிய - கொன்றைமலரையும் குராமலரையும் சூடிய;

கொண்டீச்சரவனை - திருக்கொண்டீச்சரத்தில் உறைகின்ற பெருமானை;

விரவும் அன்பர்தம் வெவ்வினை வீடுமே - அடையும் பக்தர்களது கொடியவினை அழியும்; (விரவுதல் - அன்பு கலந்து ஒன்றாதல்); (சம்பந்தர் தேவாரம் - 2.94.5 - "பரவுவாரையும் உடையார் ... விரவுவாரையும் உடையார்");


10)

அல்லி ருக்கும் அகத்தினர் பொய்ம்மொழி

புல்லர் புன்னெறி அல்லற் புகுத்துமால்

கொல்லை ஏற்றனைக் கொண்டீச் சரவனைச்

சொல்ல வல்லவர் தொல்வினை தீருமே.


அல் இருக்கும் அகத்தினர் - வஞ்சமும் அறியாமையும் நிறைந்த மனத்தை உடையவர்கள்; (அல் - இருள்; அறியாமை; மயக்கம்); (அகம் - மனம்);

பொய்ம்மொழி புல்லர் புன்னெறி - பொய்களையே உரைக்கும் கீழோர்களது சிறுநெறிகள்;

அல்லல் புகுத்துமால் - துன்பத்தில் சேர்க்கும்; (அல்லல் - துன்பம்); (ஆல் - அசைச்சொல்);

கொல்லை ஏற்றனைக் - இடபவாகனனை; (கொல்லை ஏறு - 1. "கொல்லேறு" என்பது ஐகாரச் சாரியை பெற்று , "கொல்லை ஏறு" என நின்றது. 2. கொல்லை - முல்லைநிலக்காடு; முல்லை நிலத்துக்குரிய இடபம். முல்லைக்குத் திருமால் தெய்வமாதலால் திருமாலை ஏறாக உடையவன் என்றும் அமையும்);

கொண்டீச்சரவனைச் - திருக்கொண்டீச்சரத்தில் உறைகின்ற பெருமானை;

சொல்ல வல்லவர் தொல்வினை தீருமே - துதிப்பவர்களது பழவினைகள் தீரும்;


11)

ஓட்டை ஏந்தி உழலும் ஒருவனை

நாட்டம் மூன்றுடை யானை நகையினாற்

கோட்டை மூன்றெரி கொண்டீச் சரவனைப்

பாட்டி னால்தொழு வார்வினை பாறுமே.


ஓட்டை ஏந்தி உழலும் ஒருவனை - பிரமனது மண்டையோட்டைக் கையில் ஏந்திப் பிச்சைக்குத் திரியும் ஒப்பற்றவனை;

நாட்டம் மூன்று உடையானை - முக்கண்ணனை; (நாட்டம் - கண்);

நகையினால் கோட்டை மூன்று எரி - சிரிப்பினால் முப்புரங்களை எரித்த; (நகை - சிரிப்பு);

கொண்டீச்சரவனைப் - திருக்கொண்டீச்சரத்தில் உறைகின்ற பெருமானை;

பாட்டினால் தொழுவார் வினை பாறுமே - துதிகள் பாடி வழிபடுவார்களது வினைகள் அழியும்; (பாறுதல் - அழிதல்); (சம்பந்தர் தேவாரம் - 1.57.5 - "வேற்காடு பாட்டினாற் பணிந்தேத்திட வல்லவர் ஓட்டினார் வினை ஒல்லையே");


வி. சுப்பிரமணியன்

----------- --------------

Monday, August 23, 2021

P.265 - கன்றாப்பூர் - தண்ணாரும் புனல்தங்கும்

2014-12-28

P.265 - கன்றாப்பூர் (கோயில் கண்ணாப்பூர்)

–--------------

(நாலடித் தரவு கொச்சகக் கலிப்பா)

(சம்பந்தர் தேவாரம் - 2.48.1 - "கண்காட்டு நுதலானும்")


1)

தண்ணாரும் புனல்தங்கும் சடையானைத் தடவரையன்

பெண்ணாரும் மேனியனைப் பிழைசெய்த மதனையெரி

கண்ணாரும் நெற்றியனைக் கன்றாப்பூர் நடுதறியைப்

பண்ணாரும் தமிழ்பாடிப் பணிவார்க்குப் பயமிலையே.


தண் ஆரும் புனல் தங்கும் சடையானைத் - குளிர்ச்சி பொருந்திய கங்கை தங்கிய சடையை உடையவனை; (சம்பந்தர் தேவாரம் - 1.27.1 - "திருப்புன்கூர்க் கங்கை தங்கு சடையார் அவர்போலும்");

தடவரையன் பெண் ஆரும் மேனியனைப் - மலைமகளை ஒரு பாகமாக உடையவனை; (தடவரை - பெரிய மலை);

பிழை செய்த மதனை எரி கண் ஆரும் நெற்றியனைக் - குற்றம் செய்த மன்மதனை எரித்த நெற்றிக்கண்ணனை;

கன்றாப்பூர் நடுதறியைப் - கன்றாப்பூரில் உறைகின்ற நடுதறியப்பனை; (* நடுதறியப்பன் - கன்றாப்பூரில் ஈசன் திருநாமம்);

பண் ஆரும் தமிழ் பாடிப் பணிவார்க்குப் பயம் இலையே - இசை பொருந்திய தமிழ்ப்பாமாலைகள் பாடி வழிபடும் பக்தர்களுக்கு அவன் அபயம் அளிப்பான்;


2)

மினலேந்து முகிலனைய மெல்லிடையாள் பங்கினனை

அனலேந்திக் கணங்களிசை ஆர்க்கநடம் ஆடிதனைக்

கனலேந்து கையானைக் கன்றாப்பூர் நடுதறியைப்

புனலேந்து சடையானைப் புகழ்வார்க்குத் துயரிலையே.


மினல் ஏந்து முகில் அனைய மெல்லிடையாள் பங்கினனை - மின்னலைத் தாங்கும் மேகம் போல் நிறமும் மெல்லிய இடையும் உடைய உமையம்மையை ஒரு பங்காக உடையவனை; (மினல் - மின்னல் - இடைக்குறை);

அனல் ஏந்திக் கணங்கள் இசை ஆர்க்க நடம் ஆடிதனைக் - கொள்ளித்தீயை ஏந்திப் பூதகணங்கள் இசை பாடக் கூத்து ஆடுபவனை; (ஆர்க்க - ஒலிக்க); (ஆடி - ஆடுபவன்); (சம்பந்தர் தேவாரம் - 1.98.7 - "பேயுயர் கொள்ளி கைவிளக்காகப் பெருமானார் தீயுகந்தாடல்");

கனல் ஏந்து கையானைக் - கையில் நெருப்பை ஏந்தியவனை;

கன்றாப்பூர் நடுதறியைப் - கன்றாப்பூரில் உறைகின்ற நடுதறியப்பனை;

புனல் ஏந்து சடையானைப் புகழ்வார்க்குத் துயர் இலையே - கங்கையைச் சடையில் தரித்தவனைத் துதிக்கும் பக்தர்களுக்குத் துயரம் இல்லை;


3)

மறைநாலின் பொருளானை வார்சடைமேல் வளர்கின்ற

பிறையானைப் பிறவாத பெருமானை நஞ்சுண்டு

கறையாரும் மிடற்றானைக் கன்றாப்பூர் நடுதறியை

மறவாது தினமேத்த வல்லார்கள் நல்லாரே.


மறைநாலின் பொருளானை - நால்வேதப்பொருள் ஆனவனை;

வார்சடைமேல் வளர்கின்ற பிறையானைப் - நீள்சடையின்மீது வரும் பிறையைச் சூடியவனை; (வார்தல் - நீள்தல்); (பெரியபுராணம் - 12.29.220 - "சென்னி வளர்வெண் பிறையணிந்த சிவனார்")

பிறவாத பெருமானை - பிறப்பு இல்லாத கடவுளை;

நஞ்சு உண்டு கறை ஆரும் மிடற்றானைக் - ஆலகாலத்தை உண்டு கரிய நிறத்தை ஏற்ற கண்டத்தை உடையவனை; (மிடறு - கண்டம்);

கன்றாப்பூர் நடுதறியை - திருக்கன்றாப்பூரில் உறையும் நடுதறியப்பனை;

மறவாது தினம் ஏத்த வல்லார்கள் நல்லாரே - தினமும் எண்ணித் துதிப்பவர்கள் நல்லவரே. (அப்பர் தேவாரம் - 6.61.1 - "வைகல் மறவாது வாழ்த்தி யேத்தி");


4)

அண்டத்துக் கிப்பாலாய் அப்பாலும் ஆயவனை

முண்டத்தில் நீற்றானை முந்நீரின் நஞ்சத்தைக்

கண்டத்தில் ஏற்றானைக் கன்றாப்பூர் நடுதறியைக்

கண்டத்த அருளென்று கைதொழுவார் கவலாரே.


அண்டத்துக்கு இப்பாலாய் அப்பாலும் ஆயவனை - இப்பிரபஞ்சத்தின் உள்ளும் புறமும் இருப்பவனை; (அப்பர் தேவாரம் - 6.4.3 - "அண்டத்துக்கு அப்பாலாய் இப்பாலானே அவனாகில் அதிகை வீரட்டனாமே");

முண்டத்தில் நீற்றானை - நெற்றியில் திருநீற்றைப் பூசியவனை; (முண்டம் - நெற்றி);

முந்நீரின் நஞ்சத்தைக் கண்டத்தில் ஏற்றானைக் - கடல்விஷத்தைக் கண்டத்தில் அணிந்தவனை; (முந்நீர் - கடல்);

கன்றாப்பூர் நடுதறியைக் கண்டு "அத்த அருள்" என்று கைதொழுவார் கவலாரே - திருக்கன்றாப்பூரில் நடுதறியப்பனைத் தரிசித்துத், "தந்தையே அருள்வாயாக" என்று கைகூப்பி வணங்கும் பக்தர்களுக்குக் கவலை இல்லை; (அத்தன் - தந்தை); (கவல்தல் - மனம்வருந்துதல்; கவலார் - கவலைப்படார்; மனம்வருந்தார்);


5)

பொங்கரவைத் தாராகப் புனைந்தானைப் போர்செய்த

வெங்கரியின் உரிபோர்த்த விகிர்தனைவெண் திரைமல்கு

கங்கையடை சடையானைக் கன்றாப்பூர் நடுதறியை

மங்கையிடம் மகிழ்வானை வாழ்த்தஅறும் வல்வினையே.


பொங்கு-அரவைத் தாராகப் புனைந்தானைப் - சீறும் பாம்பை மாலையாக அணீந்தவனை; (தார் - மாலை);

போர்செய்த வெங்கரியின் உரி போர்த்த விகிர்தனை - போரிட்ட கொடிய யானையின் தோலைப் போர்த்த மாறுபட்ட செயலினனை; (கரி - யானை); (விகிர்தன் - மாறுபட்ட செயலினன்);

வெண்-திரை மல்கு கங்கை அடை சடையானைக் - வெண்மையான அலை மிகுந்த கங்கையை அடைத்த சடையை உடையவனை; (அப்பர் தேவாரம் - 4.111.9 - "வெண்டிரைக் கங்கை விகிர்தா என் விண்ணப்பம்");

கன்றாப்பூர் நடுதறியை - திருக்கன்றாப்பூரில் உறையும் நடுதறியப்பனை;

மங்கை இடம் மகிழ்வானை - உமையை இடப்பாகமாக விரும்பியவனை;

வாழ்த்த அறும் வல்வினையே - வாழ்த்தி வழிபட்டால் வலிய வினைகள் தீரும்;


6)

பலதேவர் திரளாகப் பணிந்தேத்த அவர்க்கிரங்கிச்

சிலையாவோர் மலையேந்தித் திரிபுரங்கள் செற்றானைக்

கலையேந்து கையானைக் கன்றாப்பூர் நடுதறியை

மலர்தூவி வழிபடுவார் வல்வினைகள் மாயுமன்றே.


பல தேவர் திரளாகப் பணிந்து ஏத்த, அவர்க்கு இரங்கிச் சிலையா ஓர் மலை ஏந்தித் திரிபுரங்கள் செற்றானைக் - தேவரெல்லாம் கூடி வணங்கித் துதிக்க, அவர்களுக்கு இரங்கி, வில்லாக ஒப்பற்ற மேருமலையை ஏந்தி, முப்புரங்களை எரித்து அழித்தவனை; (சிலை - வில்); (ஓர் - ஒப்பற்ற); (செறுதல் - அழித்தல்);

கலை ஏந்து கையானைக் - கையில் மானை ஏந்தியவனை; (கலை - மான்);

கன்றாப்பூர் நடுதறியை - திருக்கன்றாப்பூரில் உறையும் நடுதறியப்பனை;

மலர் தூவி வழிபடுவார் வல்வினைகள் மாயுமன்றே - மலர்களைத் தூவி வழிபாடு செய்யும் பக்தர்களது வலிய வினையெல்லாம் அழியும்; (அப்பர் தேவாரம் - 4.39.4 - "வாசத்தால் வணங்க வல்லார் வல்வினை மாயுமன்றே");


7)

ஏலமலர்க் குழலாளுக் கிடப்பாகம் ஈந்தானைச்

சீலமிகு பாலனிடம் சீற்றமொடு வந்தடைந்த

காலனுயிர் காலவுதை கன்றாப்பூர் நடுதறியை

நீலமணி மிடற்றானை நினையவினை நெருங்காவே.


ஏல-மலர்க்-குழலாளுக்கு இடப்பாகம் ஈந்தானைச் - மயிர்ச்சாந்து அணிந்த, நறுமலர்களைச் சூடிய கூந்தலையுடைய உமாதேவிக்கு தன் திருமேனியில் இடப்பாகத்தைத் தந்தவனை; (ஏலம் - மயிர்ச்சாந்து); (குழல் - கூந்தல்); (சம்பந்தர் தேவாரம் - 1.107.3 - "ஏல மலர்க்குழலாள் ஒருபாகம் அமர்ந்தருளி");

சீல(ம்)மிகு பாலனிடம் சீற்றமொடு வந்தடைந்த காலன் உயிர் கால உதை - சிவபக்தியில் சிறந்த மார்க்கண்டேயரிடம் சீறி வந்தடைந்த காலன் தன் உயிரைக் கக்குமாறு அவனை உதைத்த; (கால்தல் - கக்குதல்); (சம்பந்தர் தேவாரம் - 2.31.4 - "காலனுயிர் காலவொரு காலால் கடந்தவன்");

கன்றாப்பூர் நடுதறியை - கன்றாப்பூரில் உறையும் நடுதறியப்பனை;

நீலமணி மிடற்றானை - நீலகண்டனை;

நினைய வினை நெருங்காவே - மறவாமல் எண்ணி வணங்கும் பக்தர்களை வினைகள் நெருங்கமாட்டா; (சம்பந்தர் தேவாரம் - 1.116.1 - "நாம் அடியோம் செய்வினை வந்தெமைத் தீண்டப்பெறா திருநீலகண்டம்");


8)

பொல்லாத இராவணனைப் பொருப்பின்கீழ் நசுக்கியருள்

வல்லானை நால்வர்க்கு மறைப்பொருளை விரித்துரைக்கக்

கல்லாலின் புடையமர்ந்த கன்றாப்பூர் நடுதறியைச்

சொல்லாலும் செயலாலும் தொழுவார்க்குத் துயரிலையே.


பொல்லாத இராவணனைப் பொருப்பின்கீழ் நசுக்கியருள் வல்லானை - கொடியவனான இராவணனைக் கயிலைமலையின் அடியில் நசுக்கியருளிய, ஆற்றல் உடையவனை; (பொருப்பு - மலை); (வல்லான் - சர்வவல்லமை உடையவன்);

நால்வர்க்கு மறைப்பொருளை விரித்து-உரைக்கக் கல்லாலின் புடை அமர்ந்த - சனகாதியர் நால்வர்க்கு வேதத்தின் பொருளை உபதேசிக்கக் கல்லாலமரத்தின்கீழ் இருந்த;

கன்றாப்பூர் நடுதறியை - கன்றாப்பூரில் உறையும் நடுதறியப்பனை;

சொல்லாலும் செயலாலும் தொழுவார்க்குத் துயர் இலையே - மனம், வாக்கு, காயம் இவை மூன்றாலும் வழிபடுபவர்களுக்குத் துயரம் இல்லை; (மனம் என்பது குறிப்பால் பெறப்பெற்றது);


9)

படந்திகழும் பாம்பணையான் பன்றியுருக் கொண்டுநிலம்

இடந்துசென்றும் அயன்விசும்பில் ஏறியும்கா ணாவண்ணம்

கடந்துநின்ற சோதியனைக் கன்றாப்பூர் நடுதறியை

மடந்தையொன்று மேனியனை வாழ்த்தஅறும் வல்வினையே.


படம் திகழும் பாம்பு-அணையான் பன்றி உருக்கொண்டு நிலம் இடந்துசென்றும் - படம் உடைய பாம்பைப் படுக்கையாக உடைய திருமால் ஒரு பன்றி உருவில் நிலத்தை அகழ்ந்துசென்றும்; (அணை - படுக்கை); (இடத்தல் - தோண்டுதல்);

அயன் விசும்பில் ஏறியும் - பிரமன் வானில் பறந்து உயர்ந்தும்; (விசும்பு - ஆகாயம்);

காணாவண்ணம் கடந்து நின்ற சோதியனைக் - அவர்களால் அடைய இயலாதபடி எல்லையின்றி நின்ற ஒளிப்பிழம்பை;

கன்றாப்பூர் நடுதறியை - கன்றாப்பூரில் உறையும் நடுதறியப்பனை;

மடந்தை ஒன்று மேனியனை - உமாதேவி ஒன்றுகின்ற திருமேனி உடையவனை; (ஒன்றுதல் - ஒன்றாகப் பொருந்துதல்);

வாழ்த்த அறும் வல்வினையே - வாழ்த்தினால் வலிய வினைகளெல்லாம் தீரும்;


10)

புதியவழி எனச்சொல்லிப் புன்னெறிகட் கழைக்கின்ற

மதியிலிகள் வஞ்சத்தில் மயங்கேன்மின் வார்சடைமேல்

கதிர்மதியம் புனைந்தானைக் கன்றாப்பூர் நடுதறியைப்

பதியையடி பணிகின்ற பத்தர்க்குப் பயமிலையே.


புதிய வழி எனச் சொல்லிப் புன்னெறிகட்கு அழைக்கின்ற மதியிலிகள் வஞ்சத்தில் மயங்கேன்மின் - புது மார்க்கம் என்று சொல்லிச் சிறுநெறிகளுக்குக் கூப்பிடுகின்ற அறிவீனர்களது வஞ்சத்தில் நீங்கள் மயங்கவேண்டா; (மயங்கேன்மின் - மயங்கேல்+மின்); (மின் - முன்னிலைப் பன்மை விகுதி);

வார்சடைமேல் கதிர்-மதியம் புனைந்தானைக் - னீள்சடைமேல் ஒளி திகழும் சந்திரனை அணிந்தவனை; (வார்தல் - நீள்தல்); (கதிர் - ஒளி; கிரணம்);

கன்றாப்பூர் நடுதறியை - கன்றாப்பூரில் உறையும் நடுதறியப்பனை;

பதியை அடி பணிகின்ற பத்தர்க்குப் பயம் இலையே - தலைவனான சிவபெருமானை வணங்கும் பக்தர்களுக்கு அவன் அபயம் அளிப்பான்;


11)

கவினாரும் பொழில்சூழ்ந்த கன்றாப்பில் நடுதறியை

அவிர்வேணி உடையானை அன்போடு தமிழ்பாடிச்

செவியாரச் சீர்கேட்கும் சிந்தையர்க்குப் புவிமீது

தவியாத நிலைதன்னைத் தந்தருள்வான் சங்கரனே.


கவின் ஆரும் பொழில் சூழ்ந்த கன்றாப்பில் நடுதறியை - அழகிய சோலை சூழ்ந்த கன்றாப்பூரில் உறைகின்ற நடுதறியப்பனை; (கவின் - அழகு);

அவிர்-வேணி உடையானை - பிரகாசிக்கும் சடை உடையவனை; (அவிர்தல் - பிரகாசித்தல்); (வேணி - சடை); (உடையான் - உடையவன்; சுவாமி);

அன்போடு தமிழ் பாடிச் - பக்தியோடு தமிழ்ப்-பாமாலைகளைப் பாடி;

செவியாரச் சீர் கேட்கும் சிந்தையர்க்குப் - காதார அவன் புகழைக் கேட்கின்ற மனம் உடையவர்களுக்கு;

புவிமீது தவியாத நிலைதன்னைத் தந்தருள்வான் சங்கரனே - இம்மண்மேல் தவிக்கின்ற நிலையை நீக்கிப், பிறவா நிலையைத் தந்து, சிவலோகம் அருள்வான் சங்கரனாகிய சிவபெருமான்;


வி. சுப்பிரமணியன்

----------- --------------

Monday, July 12, 2021

P.264 - சிக்கல் - ஆரா அமுதே

2014-12-27

P.264 - சிக்கல்

–--------------

(அறுசீர் விருத்தம் - மா மா காய் - அரையடி வாய்பாடு)

(சுந்தரர் தேவாரம் - 7.53.1 - "மருவார் கொன்றை மதிசூடி")

(அப்பர் தேவாரம் - 4.15.1 - "பற்றற் றார்சேர் பழம்பதியைப்")


1)

ஆரா அமுதே அருந்துணையே .. அமரர் வேண்டப் புரமெய்த

வீரா பன்றிப் பின்சென்று .. விசய னுக்குப் படையீந்தாய்

நீரார் சடையாய் அருளென்று .. நெகிழ்ந்து போற்றும் அடியார்தம்

தீரா நோயைத் தீர்த்தருளும் .. சிக்கல் வெண்ணெய்ப் பெருமானே.


"ஆரா அமுதே, அருந்துணையே - தெவிட்டாத அமுதமே, அரிய துணையே;

அமரர் வேண்டப் புரம் எய்த வீரா - தேவர்கள் இறைஞ்ச, அவர்களுக்கு இரங்கி முப்புரங்களை ஓரம்பால் எய்த வீரனே;

பன்றிப்பின் சென்று விசயனுக்குப் படை ஈந்தாய் - ஒரு பன்றியின்பின் வேடனாகிச் சென்று அர்ஜுனனுக்குப் பாசுபதாஸ்திரத்தை அருளியவனே; (விசயன் - விஜயன் - அர்ஜுனன்); (படை - ஆயுதம்);

நீர் ஆர் சடையாய் அருள்" என்று நெகிழ்ந்து போற்றும் அடியார்தம் - கங்கையைச் சடையில் தரித்தவனே அருள்வாயாக" என்று மனம் உருகித் துதிக்கும் பக்தர்களது;

தீரா நோயைத் தீர்த்தருளும், சிக்கல் வெண்ணெய்ப் பெருமானே - தீராத நோயைத் தீர்த்து அருள்வான், சிக்கலில் உறைகின்ற வெண்ணெய்ப்-பெருமான். (அருளும் - அருள்பவன்; செய்யும் என்ற வாய்பாட்டு வினைமுற்று);


2)

வானும் நிலனும் பணிந்தேத்தும் .. மங்கை பங்கன் தாவுகின்ற

மானும் மழுவும் கையேந்தி .. மாண்டார் உடல்கள் எரிகின்ற

கானும் நடம்செய் மன்றாகக் .. கருது கின்ற கறைக்கண்டன்

தேனும் பாலும் மகிழ்ந்தாடும் .. சிக்கல் வெண்ணெய்ப் பெருமானே.


வானும் நிலனும் பணிந்து ஏத்தும் மங்கைபங்கன் - மண்ணுலகும் விண்ணுலகும் வழிபாடு செய்கின்ற உமைபங்கன்;

தாவுகின்ற மானும் மழுவும் கையேந்தி - தாவும் மானையும் மழுவையும் கையில் ஏந்தியவன்;

மாண்டார் உடல்கள் எரிகின்ற கானும் நடம்செய் மன்றாகக் கருதுகின்ற கறைக்கண்டன் - இறந்தவர்களது உடல்கள் எரியும் சுடுகாட்டையும் கூத்தாடும் அரங்காகக் கருதும் நீலகண்டன்; (கான் - சுடுகாடு);

தேனும் பாலும் மகிழ்ந்து ஆடும் சிக்கல் வெண்ணெய்ப் பெருமானே - பால் தேன் இவற்றால் அபிஷேகம் விரும்பிய, சிக்கலில் உறைகின்ற வெண்ணெய்ப்-பெருமான்;


3)

என்ன சொல்லி அடியார்கள் .. ஏத்தி னாலும் இனிதேற்று

முன்னை வினையை வேரறுக்கும் .. முக்கட் பெருமான் சுந்தரர்க்குத்

தன்னைத் தோழன் எனத்தந்த .. தலைவன் கொன்றை மலரோடு

சென்னி மீது பிறைசூடும் .. சிக்கல் வெண்ணெய்ப் பெருமானே.


என்ன சொல்லி அடியார்கள் ஏத்தினாலும் இனிதேற்று முன்னை-வினையை வேரறுக்கும் முக்கட்-பெருமான் - பக்தர்கள் எப்படித் துதித்தாலும் இனிதே ஏற்றருளி அவர்களது பழவினையை அடியோடு தீர்க்கும் முக்கண்ணுடைய பெருமான்; (சம்பந்தர் தேவாரம் - 3.71.1 - "கோழை மிடறாக ... ஏழை-அடியாரவர்கள் யாவைசொன சொல்மகிழும் ஈசன்");

சுந்தரர்க்குத் தன்னைத் தோழன் எனத் தந்த தலைவன் - சுந்தரருக்குத் தன்னைத் தோழனாகத் தந்த தலைவன்;

கொன்றைமலரோடு சென்னிமீது பிறை சூடும் சிக்கல் வெண்ணெய்ப் பெருமானே - திருமுடிமேல் கொன்றைமலரையும் பிறையையும் சூடிய, சிக்கலில் உறைகின்ற வெண்ணெய்ப்-பெருமான்;


4)

விரையார் மலர்கொண் டடிபோற்றி .. விழுந்து வணங்கும் அடியார்க்குத்

தரைமேல் மீளா நிலையருளும் .. தலைவன் தேவர் தமைக்காக்க

வரையோர் வில்லாக் கையேந்தி .. மதில்மூன் றெரித்தான் கூவிளமும்

திரையார் நதியும் திகழ்சடையான் .. சிக்கல் வெண்ணெய்ப் பெருமானே.


விரை ஆர் மலர்கொண்டு அடிபோற்றி விழுந்து வணங்கும் அடியார்க்குத் - மணம் கமழும் பூக்களைத் தூவித் திருவடியை வழிபட்டு நிலமுற விழுந்து வணங்கும் பக்தர்களுக்கு; (விரை - வாசனை); (ஆர்தல் - நிறைதல்; பொருந்துதல்);

தரைமேல் மீளா நிலை அருளும் தலைவன் - இனி மண்ணுலகில் பிறவாமையை அருள்கின்ற பெருமான்;

தேவர்தமைக் காக்க வரை ஓர் வில்லாக் கை ஏந்தி மதில் மூன்று எரித்தான் - தேவர்களைக் காப்பதற்காக மேருமலையை ஒரு வில்லாகக் கையில் தாங்கி முப்புரங்களை எரித்தவன்; (வரை - மலை);

கூவிளமும் திரை ஆர் நதியும் திகழ் சடையான் - வில்வத்தையும் அலை மிக்க கங்கையையும் சடையில் அணிந்தவன்; (கூவிளம் - வில்வம்); (திரை - அலை);

சிக்கல் வெண்ணெய்ப் பெருமானே - சிக்கலில் உறைகின்ற வெண்ணெய்ப்-பெருமான்;


5)

மத்தா மலையைக் கடலிலிட்டு .. வானோர் கடைய நஞ்செழக்கண்(டு)

அத்தா அபயம் அருளாயென்(று) .. அரற்ற அதனை அமுதுண்டான்

முத்தார் நகையாள் ஒருகூறன் .. முளைவெண் மதியம் புனைசடையன்

செத்தார் எலும்பை அணிகின்ற .. சிக்கல் வெண்ணெய்ப் பெருமானே.


மத்தா மலையைக் கடலில் இட்டு வானோர் கடைய நஞ்சு எழக் கண்டு - மலையையே மத்தாகப் பாற்கடலில் ஊன்றித் தேவர்கள் கடைந்தபொழுது ஆலகாலம் பொங்கியெழக் கண்டு;

"அத்தா! அபயம் அருளாய்" என்று அரற்ற அதனை அமுதுண்டான் - "தந்தையே! அஞ்சல் அளித்து அருள்வாயாக" என்று அவர்கள் அழுது தொழ, அவர்களுக்கு இரங்கி அந்தக் கொடிய நஞ்சை அமுதாக உண்டவன்; (அத்தன் - தந்தை);

முத்து ஆர் நகையாள் ஒரு கூறன் - முத்துப் போன்ற பல் உடைய உமையை ஒரு பாகமாக உடையவன்; (ஆர்தல் - ஒத்தல்);

முளை-வெண்-மதியம் புனை சடையன் - இளவெண்பிறையைச் சடையில் அணிந்தவன்;

செத்தார் எலும்பை அணிகின்ற சிக்கல் வெண்ணெய்ப் பெருமானே - இறந்த பிரமவிஷ்ணுக்களின் எலும்பை மாலையாக அணிகின்ற, சிக்கலில் உறைகின்ற வெண்ணெய்ப்-பெருமான்;


6)

மறைகள் ஓதி வழிபட்ட .. வசிட்டர்க் கருள்செய் மாதேவன்

பறைகள் முழக்கிப் பாரிடங்கள் .. பாட இரவில் நடமாடும்

இறைவன் கையில் ஓடேந்தி .. இடுமின் பலியென் றுழலீசன்

சிறைவண் டார்க்கும் பொழில்சூழ்ந்த .. சிக்கல் வெண்ணெய்ப் பெருமானே.


மறைகள் ஓதி வழிபட்ட வசிட்டர்க்கு அருள்செய் மாதேவன் - வேதமந்திரங்களால் வழிபாடு செய்த வசிஷ்டருக்கு அருள்செய்த மகாதேவன்; (* வசிஷ்டர் காமதேனுவின் வெண்ணெயால் சிவலிங்கம் செய்து வழிபட்ட தலம் இது. சிக்கல் தலபுராணச் செய்தி);

பாரிடங்கள் பாட இரவில் நடம் ஆடும் இறைவன் - பூதங்கள் பாட நள்ளிருளில் கூத்து ஆடும் இறைவன்; (பாரிடங்கள் - பூதகணங்கள்); (சம்பந்தர் தேவாரம் - 3.126.7 - "பாதத்தொலி பாரிடம் பாட நடஞ்செய் நாதத்தொலியர்");

கையில் ஓடு ஏந்தி, "இடுமின் பலி" என்று உழல் ஈசன் - கையில் மண்டையோட்டை ஏந்திப், "பிச்சை இடுங்கள்" என்று திரியும் ஈசன்; (ஓடு - கபாலம்); (பலி - பிச்சை);

சிறை-வண்டு ஆர்க்கும் பொழில் சூழ்ந்த - இறகுகளை உடைய வண்டுகள் ரீங்காரம் செய்யும் சோலை சூழ்ந்த; (சிறை - சிறகு); (ஆர்த்தல் - ஒலித்தல்);

சிக்கல் வெண்ணெய்ப் பெருமானே - திருச்சிக்கலில் உறைகின்ற வெண்ணெய்ப்-பெருமான்;


7)

வம்பு மலியும் மலர்தூவி .. வாசம் குன்றாத் தமிழ்பாடி

நம்பி நாளும் பணிவார்க்கு .. நலங்கள் எல்லாம் நல்குமரன்

கம்பக் கரியின் உரிமூடி .. கங்கை ஆறு பாய்கின்ற

செம்பொற் சடைமேற் பிறைசூடும் .. சிக்கல் வெண்ணெய்ப் பெருமானே.


வம்பு மலியும் மலர் தூவி, வாசம் குன்றாத் தமிழ் பாடி - மணம் மிகுந்த பூக்களைத் தூவி, வாசனை என்றும் குன்றாத பாமாலைகளைப் பாடி; (வம்பு - வாசனை); (வாசம் - மணம்);

நம்பி நாளும் பணிவார்க்கு நலங்கள் எல்லாம் நல்கும் அரன் - விரும்பித் தினமும் வழிபாடு செய்பவர்களுக்கு எல்லா-நலங்களையும் அளிக்கும் ஹரன்; (நம்புதல் - விரும்புதல்);

கம்பக்-கரியின் உரி-மூடி - ஆசையும் இயல்புடைய யானையின் தோலைப் போர்த்தவன்; (கம்பம் - அசைவு); (கரி - யானை); (உரி - தோல்);

கங்கைஆறு பாய்கின்ற செம்பொற் சடைமேல் பிறை சூடும் சிக்கல் வெண்ணெய்ப் பெருமானே - கங்கைநதி பாயும் செம்பொன் போன்ற சடைமேல் பிறையைச் சூடுகின்ற, சிக்கலில் உறைகின்ற வெண்ணெய்ப்-பெருமான்;


8)

நேயம் இன்றி மலைபேர்த்தான் .. நெடுநாள் அரற்ற விரலூன்று

நாயன் பின்னர் இசைகேட்டு .. நாளும் வாளும் அருள்செய்தான்

சேயைத் தந்த கண்ணுதலான் .. தேவ தேவன் ஒருகையில்

தீயை ஏந்தி நடம்செய்யும் .. சிக்கல் வெண்ணெய்ப் பெருமானே.


நேயம் இன்றி மலை-பேர்த்தான் நெடுநாள் அரற்ற விரல் ஊன்று நாயன் - அன்பு இல்லாமல் கயிலைமலையைப் பெயர்த்த இராவணன் பன்னாள் அழுது புலம்பும்படி ஒரு திருவடிவிரலை ஊன்றி அவனை நசுக்கிய கடவுள்; (நேயம் - அன்பு); (நாயன் - தலைவன்; கடவுள்);

பின்னர் இசை-கேட்டு நாளும் வாளும் அருள்செய்தான் - பின் அவன் பாடிய துதிகளைக் கேட்டு இரங்கி அவனுக்கு நீண்ட ஆயுளையும் சந்திரஹாஸம் என்ற வாளையும் வரமருளியவன்;

சேயைத் தந்த கண்ணுதலான் - முருகனை அருளிய நெற்றிக்கண்ணன்; (சேய் - முருகன்);

தேவதேவன் - பரம்பொருள்;

ஒரு கையில் தீயை ஏந்தி நடம்செய்யும் சிக்கல் வெண்ணெய்ப் பெருமானே - ஒரு கையில் நெருப்பை ஏந்திக் கூத்தாடுகின்ற, சிக்கலில் உறைகின்ற வெண்ணெய்ப்-பெருமான்;


9)

சங்கை ஏந்து திருமாலும் .. தாம ரைப்பூ மேலானும்

தங்கை கூப்பித் தொழுமாறு .. தழலாய் நின்ற தனிநாதன்

செங்கண் விடையன் வேல்நெடுங்கண் .. தேவி பங்கன் இண்டையெனத்

திங்கள் திகழும் செஞ்சடையான் .. சிக்கல் வெண்ணெய்ப் பெருமானே.


சங்கை ஏந்து திருமாலும் தாமரைப்பூ மேலானும் - சங்கை ஏந்திய விஷ்ணுவும் தாமரைப்பூவில் இருக்கும் பிரமனும்;

தம் கை கூப்பித் தொழுமாறு தழலாய் நின்ற தனி நாதன் - தங்கள் கைகளைக் கூப்பி வணங்கும்படி ஜோதியாகி ஓங்கிய ஒப்பற்ற தலைவன்; (தனி - ஒப்பற்ற);

வேல்நெடுங்கண்-தேவி பங்கன் - வேல் போன்ற நீண்ட கண்ணுடைய உமாதேவியை ஒரு பங்கில் உடையவன்; (வேல்நெடுங்கட்டேவி - வேல்நெடுங்கண் + தேவி); (* வேல்நெடுங்கண்ணி - திருச்சிக்கல் இறைவி திருநாமம்);

இண்டை எனத் திங்கள் திகழும் செஞ்சடையான் - இண்டைமாலை போலச் சந்திரனைச் சிவந்த சடையில் அணிந்தவன்; (இண்டை - தலையில் அணியும் ஒருவகை மாலை);

சிக்கல் வெண்ணெய்ப் பெருமானே - சிக்கலில் உறைகின்ற வெண்ணெய்ப்-பெருமான்;


10)

நீறு பூசா நெற்றியராய் .. நித்தம் பொய்கள் பலசொல்லி

மாறும் என்று மயக்குகின்ற .. வஞ்சர் வார்த்தை மதியேன்மின்

நாறு மலரிட் டடிபோற்றில் .. நலங்கள் நல்கும் நம்பெருமான்

சீறு நாகம் திகழ்சடையான் .. சிக்கல் வெண்ணெய்ப் பெருமானே.


நீறு பூசா நெற்றியராய், நித்தம் பொய்கள் பல சொல்லி, "மாறும்" என்று மயக்குகின்ற வஞ்சர் வார்த்தை மதியேன்மின் - நெற்றியில் திருநீற்றைப் பூசாதவர்களாகித், எப்பொழுதும் பல பொய்கள் சொல்லி, "மாறுங்கள்" என்று மதியை மயக்க முயலும் வஞ்சகர்களது பேச்சை நீங்கள் மதிக்கவேண்டா; (நித்தம் - எப்பொழுதும்);

நாறு-மலர் இட்டு அடிபோற்றில் நலங்கள் நல்கும் நம்பெருமான் - வாசமலர்களைத் தூவித் திருவடியை வணங்கினால் நன்மைகள் அருளும் நம் பெருமான்; (நாறுதல் - மணம் கமழ்தல்);

சீறு நாகம் திகழ்-சடையான் - சீறுகின்ற பாம்பைச் சடையில் அணிந்தவன்;

சிக்கல் வெண்ணெய்ப் பெருமானே - சிக்கலில் உறைகின்ற வெண்ணெய்ப்-பெருமான்;


11)

வந்தார் மண்மேல் சிலகாலம் .. வாளா வாழ்ந்தார் பின்னெரியில்

வெந்தார் வேறு பிறப்பொன்றில் .. வீழ்ந்தார் என்ற நிலைநீக்கி

நொந்தா இன்பம் தருவான்சீர் .. நுவலும் அன்பர் தமக்கெல்லாம்

செந்தீ வண்ண மேனியினான் .. சிக்கல் வெண்ணெய்ப் பெருமானே.


வந்தார் மண்மேல், சிலகாலம் வாளா வாழ்ந்தார், பின் எரியில் வெந்தார், வேறு பிறப்பு ஒன்றில் வீழ்ந்தார் என்ற நிலை நீக்கி - "பூமியில் பிறந்தார்; சிறிது காலம் பயனின்றி வாழ்ந்தார்; பின் இறந்து சாம்பலானார்; பின்னர் இன்னொரு பிறவி எடுத்தார்" என்று சுழல்கின்ற நிலையை நீக்கி; (வாளா - பயனின்றி; வீணே); (எரி - தீ); (அப்பர் தேவாரம் - 6.95.6 - "திருநாமம் அஞ்செழுத்தும் செப்பாராகில் .. .. அளியற்றார் பிறந்தவாறு ஏதோ என்னில் பெருநோய்கள் மிகநலியப் பெயர்த்தும் செத்தும் பிறப்பதற்கே தொழிலாகி இறக்கின்றாரே");

நொந்தா இன்பம் தருவான் சீர் நுவலும் அன்பர்-தமக்கெல்லாம் - திருப்புகழைச் சொல்லும் பக்தர்களுக்கெல்லாம் அழியாத இன்பத்தை அருள்வான்; (நொந்துதல் - அழிதல்); (நுவல்தல் - சொல்தல்);

செந்தீ-வண்ண மேனியினான் - நெருப்புப் போன்ற செம்மேனியை உடையவன்;

சிக்கல் வெண்ணெய்ப் பெருமானே - சிக்கலில் உறைகின்ற வெண்ணெய்ப்-பெருமான்;


வி. சுப்பிரமணியன்

----------- --------------