M.067 - நீரானை - பாரானை - மடக்கு

2016-01-27

M.067 - நீரானை - பாரானை - மடக்கு

-------------

நீரானை ஈருரி தாங்கு நிமலனை

நீரானை ஆட்டானைக் காவானை - நீரானைப்

பாரானை விண்ணெரிகால் ஆனானைச் சாராரைப்

பாரானை நாவேநீ பாடு.

பதம் பிரித்து:

நீர், ஆனை ஈர் உரி தாங்கு நிமலனை,

நீர் ஆனை ஆட்டு ஆனைக்காவானை, - நீரானைப்,

பாரானை, விண் எரி கால் ஆனானைச், சாராரைப்

பாரானை, நாவே நீ பாடு.

சொற்பொருள்:

நீர் - 1. கங்கை; 2. காவிரிப் புனல்; 3. புனல்;

ஆனை - யானை;

ஈர்த்தல் - உரித்தல்;

உரி - தோல்;

ஆட்டுதல் - அபிஷேகம் செய்தல்;

பார் - நிலம் (பிருதிவி) என்னும் பூதம்;

எரி - நெருப்பு;

கால் - காற்று;

சார்தல் - புகலடைதல்;

பார்த்தல் - அருளோடு நோக்குதல்;

நீர், ஆனை ஈர் உரி தாங்கு நிமலனை - கங்கையையும் யானையின் உரித்த தோலையும் தரித்த நின்மலனை;

நீர் ஆனை ஆட்டு ஆனைக்காவானை - யானை நீரால் அபிஷேகம் செய்த திருவானைக்கா ஈசனை;

நீரானைப், பாரானை, விண் எரி கால் ஆனானைச் - நிலம், நீர், நெருப்பு, காற்று, ஆகாயம் என ஐம்பூதங்கள் ஆனவனை; (அப்பர் தேவாரம் - 6.50.1 - "போரானை ஈருரிவைப் போர்வை யானை ... பாரானை .. நெடுவெளியாய்ப் பரந்து நின்ற நீரானைக் காற்றானைத் தீயா னானை");

சாராரைப் பாரானை - தன்னைச் சரணடையாதவர்களை அருளோடு பாராதவனை ( = அவர்களுக்கு அருள் இல்லாதவனை); (அப்பர் தேவாரம் - 6.11.3 - "மாட்டாதார்க்கு எத்திறத்தும் மாட்டாதானை"); (அப்பர் தேவாரம் - 4.11.6 - "சலமிலன் சங்கரன் சார்ந்தவர்க்கலால் நலமிலன்");

நாவே நீ பாடு - என் நாவே, நீ பாடுக;

வி. சுப்பிரமணியன்

-------------