03.08.008 - புகல் நீயே - (மடக்கு) (யமகம்)

03.08 – பலவகை

2008-12-29

3.8.8 - புகல் நீயே - (மடக்கு) (யமகம்)

----------------------------------------

(எண்சீர் விருத்தம் - விளம் விளம் மா காய் - அரையடி வாய்பாடு)

ஐங்கணை யாலிடை யூறு செய்தவனை

.. அன்றெரித் துப்பொடி யாகச் செய்தவனை

அங்கியின் வண்ணனை நாக அணியானை

.. அரையினில் ஆடையாத் துகிலை அணியானை

எங்கணும் மாலயன் தேடும் ஒளியானை

.. இறைஞ்சிடும் பத்தருக் கருளை ஒளியானை

அங்கணா உமையொரு பங்கா புகல்நீயே

.. அருள்புரி யாயென நாவே புகல்நீயே.

பதம் பிரித்து:

ஐங்கணையால் இடையூறு செய்தவனை

.. அன்று எரித்துப் பொடியாகச் செய்- தவனை,

அங்கியின் வண்ணனை, நாக அணியானை,

.. அரையினில் ஆடையாத் துகிலை அணியானை,

எங்கணும் மால் அயன் தேடும் ஒளியானை,

.. இறைஞ்சிடும் பத்தருக்கு அருளை ஒளியானை,

"அங்கணா! உமை ஒரு பங்கா! புகல் நீயே!

.. அருள்புரியாய்!" என நாவே புகல் நீயே.

ஐங்கணையால் இடையூறு செய்தவனை அன்று எரித்துப் பொடியாகச் செய்- தவனை - ஐந்து மலர்க்கணைகளை ஏவித் தவத்தைக் கலைக்க முற்பட்ட மன்மதனை அச்சமயத்தில் எரித்துச் சாம்பல் ஆக்கிய தவவடிவினனை; (செய் தவன் - வினைத்தொகை - செய்த தவவடிவினன்);

அங்கியின் வண்ணனை - தீவண்ணனை; (அங்கி - நெருப்பு);

நாக அணியானை - நாகாபரணனை - பாம்பை அணிகலனாக உடையவனை; (அணி - ஆபரணம்);

அரையினில் ஆடையாத் துகிலை அணியானை - அரையில் ஆடையாக நல்ல பூந்துகிலை அணியாதவனை; (தோலை ஆடையாக உடையவனை);

எங்கணும் மால் அயன் தேடும் ஒளியானை - விண்ணிலும் மண்ணிலும் பிரமனும் திருமாலும் தேடிய ஜோதி வடிவினனை; (எங்கணும் - எங்கும்);

இறைஞ்சிடும் பத்தருக்கு அருளை ஒளியானை - அன்போடு வழிபடும் பக்தர்களுக்கு மறைத்தல் இன்றி அருள்பவனை; (ஒளித்தல் - மறைத்தல்);

"அங்கணா! உமை ஒரு பங்கா! புகல் நீயே! அருள்புரியாய்!" என நாவே புகல் நீயே - "அருட்கண்ணனே! மாதொரு பாகனே! எனக்குப் புகலிடம் நீயே! அருள்வாயாக" என்று என் நாக்கே நீ சொல்வாயாக; (புகல் - பற்றுக்கோடு; அடைக்கலம்); (புகல்தல் - சொல்லுதல்);

வி. சுப்பிரமணியன்

-------------------------------- -------------------------------

03.08.007 - நாட்டார் தொழும் - மடக்கு

03.08 – பலவகை

2008-12-07

3.8.7 - நாட்டார் தொழும் - மடக்கு

----------------------------------------

(அறுசீர் விருத்தம் - மா விளம் விளம் - அரையடி வாய்பாடு)

நாட்டார் தொழும்சிவ னாரையுள்

.. நாட்டார் சிலர்அவர்க் குத்தமைக்

காட்டார் நான்மறை போற்றுவெண்

.. காட்டார் முக்கணர் வெண்ணிற

மாட்டார் அடிஅரி காணவும்

.. மாட்டார் அடிதொழு திமையவர்

கேட்டார் அவர்களின் குறைகளைக்

.. கேட்டார் ஆலமுண் கண்டரே.

பதம் பிரித்து:

நாட்டார் தொழும் சிவனாரை உள் நாட்டார் சிலர்; அவர்க்குத் தமைக்

காட்டார், நான்மறை போற்று வெண்காட்டார்; முக்கணர்; வெண்ணிற

மாட்டார்; அடி அரி காணவும் மாட்டார்; அடி தொழுது இமையவர்

கேட்டார்; அவர்களின் குறைகளைக் கேட்டார் (/ கேட்டு ஆர்) ஆலம் உண் கண்டரே.

சொற்பொருள்:

நாட்டார் - 1. தேசத்தினர் / உலகத்தவர்; / 2. நிலையாக எழுந்தருளச்செய்யமாட்டார்;

காட்டார் - 1. காட்டமாட்டார்; / 2. காட்டில் இருப்பவர்;

மாட்டார் - 1. செல்வர்; இடபவாகனர்; (மாடு - செல்வம்; எருது) / 2. இயலார்;

கேட்டார் - 1. வேண்டினார்; / 2a. செவிமடுத்தார்; (கேட்டல் - வேண்டுதல்; காதால் கேட்பது); 2b. கேட்டு ஆர்;

நாட்டார் தொழும் சிவனாரை உள் நாட்டார் சிலர் - நாட்டிலுள்ளோர் பலரும் தொழும் சிவபெருமானாரைச் சிலர் மனத்தில் வைத்து எண்ணமாட்டார்கள்; (உள் - மனம்); (நாட்டுதல் - நடுதல்);

அவர்க்குத் தமைக் காட்டார், நான்மறை போற்று வெண்காட்டார்; - அத்தகையோர்களுக்குத் தம்மைக் காட்டாதவர் (அவர்களால் அறிய ஒண்ணாதவர்), நால்வேதங்களும் போற்றுகின்ற திருவெண்காட்டு ஈசர்;

முக்கணர் - நெற்றிக்கண்ணர்;

வெண்ணிற மாட்டார் - வெண்ணீறு பூசிய மேனியர்; (மேனியெங்கும் திருநீற்றுப் பூச்சால்) வெண்மை திகழும் செல்வர்; (விபூதி - செல்வம். திருநீறு; மாடு - செல்வம்); (இக்கால வழக்கில், "மாடு - எருது" என்று கொண்டும் பொருள்கொள்ளல் ஆம்; - வெள்ளை எருதினை வாகனமாக உடையவர்);

அடி அரி காணவும் மாட்டார் - திருமால் ஈசனார் திருவடியைத் தேடியும் காணாதவர் ஆனார்; (உம் - அசை);

அடி தொழுது இமையவர் கேட்டார் - திருவடியை வணங்கித் தேவர்கள் வேண்டினார்கள்;

அவர்களின் குறைகளைக் கேட்டார் ஆலம் உண் கண்டரே - அத்தேவர்களின் குறைகளைக் கேட்டு அருள்புரிந்தார், (அவர்களது வேண்டுகோளைக் கேட்டு) அரிய ஆலகால விடத்தை உண்ட நீலகண்டர்; (ஆலம் - விஷம்);

வி. சுப்பிரமணியன்

-------------------------------- -------------------------------

03.08.006 - ஏற்றார் ஏற்றார் - மடக்கு

03.08 – பலவகை

2008-12-06

3.8.6 - ஏற்றார் ஏற்றார் - மடக்கு

----------------------------------------

(அறுசீர் விருத்தம் - மா மா மா மா விளம் காய்)

ஏற்றார் ஏற்றார் எரிக்கும் நஞ்சை இன்னமு தாச்சடையில்

ஆற்றார் ஆற்றார் பணிகள் அயன்மால் அடிமுடி தேடியன்னார்

தோற்றார் தோற்றார் நம்மை மீண்டும் தொழாதவர் தலைவிதியை

மாற்றார் மாற்றார் புரங்கள் எரித்த மதியணி மன்னவரே.

பதம் பிரித்து:

ஏற்றார்; ஏற்றார், எரிக்கும் நஞ்சை இன் அமுதாச்; சடையில்

ஆற்றார்; ஆற்றார் பணிகள், அயன் மால்; அடி முடி தேடி அன்னார்

தோற்றார்; தோற்றார், நம்மை மீண்டும்; தொழாதவர் தலைவிதியை

மாற்றார்; மாற்றார் புரங்கள் எரித்த மதி அணி மன்னவரே.

சொற்பொருள்:

ஏற்றார் - 1. ஏற்றினை ஊர்தியாக உடையவர்; / 2. ஏற்றுக்கொண்டார்;

ஆற்றார் - 1. கங்கை ஆற்றை உடையவர்; / 2. செய்யமாட்டார்;

தோற்றார் - 1. தோல்வி அடைந்தார்; / 2. பிறப்பிக்கமாட்டார்;

மாற்றார் - 1. மாற்றமாட்டார்; / 2. பகைவர்;

ஏற்றார் - இடபவாகனர்; (அப்பர் தேவாரம் - 6.19.8 - "தூவெள்ளை யேற்றான் தன்னை");

ஏற்றார் எரிக்கும் நஞ்சை இன் அமுதாச் - எரிக்கின்ற ஆலகால விடத்தை இனிய அமுதம்போல் ஏற்றவர்; (அமுதா - அமுதாக - கடைக்குறை விகாரம்);

சடையில் ஆற்றார் - கங்காதரர்;

ஆற்றார் பணிகள் அயன் மால்; அடி முடி தேடி அன்னார் தோற்றார் - பிரமனும் விஷ்ணுவும் திருத்தொண்டு செய்ய எண்ணாமல் ஆணவத்தால் அடிமுடி தேடிக் காணாது வருந்தினர்; (அயன் மால் - பிரமனும் விஷ்ணுவும் - உம்மைத்தொகை); (அன்னார் - அவர்கள்; அத்தன்மையோர்);

(அப்பர் தேவாரம் - 5.95 - இலிங்கபுராணத் திருக்குறுந்தொகை - பல பாடல்களில் பிரமனும் விஷ்ணுவும் பக்தியோடு தொண்டுசெய்யாதது சுட்டப்பெறுகின்றது);

தோற்றார் நம்மை மீண்டும் - (அடியவர்களான) நம்மை மீண்டும் பிறக்கச்செய்யமாட்டார்; (தோற்றுதல் - தோன்றச்செய்தல்; பிறப்பித்தல்);

தொழாதவர் தலைவிதியை மாற்றார் - அவரை வழிபடாதவர்களைத் தத்தம் வினைப்பயனை அனுபவிக்குமாறு விடுவார்;

மாற்றார் புரங்கள் எரித்த மதி அணி மன்னவரே - பகைவர்களின் முப்புரங்களை எரித்தவரும் பிறைச்சந்திரனைச் சூடியவருமான சிவபெருமானார்; (மன்னவர் - அரசர்; என்றும் நிலைத்து இருப்பவர்);

வி. சுப்பிரமணியன்

-------------------------------- -------------------------------

03.08.005 - நித்தனை நித்தனை - மடக்கு

03.08 – பலவகை

2008-12-05

3.8.5 - நித்தனை நித்தனை - மடக்கு

----------------------------------------

(அறுசீர் விருத்தம் - விளம் விளம் விளம் விளம் மா தேமா)

நித்தனை நித்தனைம் மனத்தொடு வணங்குவார் நிழல்போல் நீங்கா

அத்தனை அத்தனை அமரரின் தலைவனை அன்பு செய்வார்

சித்தனைச் சித்தனை நரிகளைப் பரிகளாச் செய்து காட்டும்

எத்தனை எத்தனை அருளனை எப்படி ஏத்து வேனே.

பதம் பிரித்து:

நித்தனை, நித்தல் நைம்-மனத்தொடு வணங்குவார் நிழல் போல் நீங்கா

அத்தனை, அத்தனை அமரரின் தலைவனை, அன்பு செய்வார்

சித்தனைச், சித்தனை, நரிகளைப் பரிகளாச் செய்து காட்டும்

எத்தனை, எத்தனை அருளனை எப்படி ஏத்துவேனே.

நித்தனை - என்றும் இருப்பவனை; (நித்தன் - அழிவற்றவன்);

நித்தல் நைம் மனத்தொடு வணங்குவார் நிழல்போல் நீங்கா அத்தனை - தினமும் உருகி நைகின்ற மனத்தால் வனங்கும் பக்தர்களை நிழல்போல் என்றும் நீங்காமல் உடன் இருக்கின்ற தந்தையை; (அத்தன் - தந்தை);

அத்தனை அமரரின் தலைவனை - முப்பத்துமுக்கோடி தேவர்களுக்கும் தலைவனை;

அன்பு செய்வார் சித்தனை - பக்தர்களது சித்தத்தில் இருப்பவனை; (சித்தன் - சித்தத்தில் இருப்பவன்);

சித்தனை - சித்திகள் உடையவனை;

நரிகளைப் பரிகளாச் செய்து காட்டும் எத்தனை - நரியைக் குதிரையாகச் செய்யும் வஞ்சகனை; (பரிகளா - பரிகளாக - கடைக்குறை); (எத்தன் - எத்துச் (சூழ்ச்சி/வஞ்சகம்) செய்பவன்);

எத்தனை அருளனை - அளவற்ற அருள் உடையவனை;

இலக்கண குறிப்பு:

"நை + மனம்" என்ற வினைத்தொகை "நைம்மனம்" என்று வரும்.

கை, பை, செய், நெய், பொய்,,, போன்ற சொற்களுக்குப் பின் மெல்லினத்தில் தொடங்கும் சொல் வரின், புணர்ச்சியில் அம்மெல்லினம் மிகும். (கைம்மா, பொய்ஞ்ஞானம், மெய்ந்நெறி,,).

இது வினைத்தொகைக்கும் பொருந்தும். சில உதாரணங்கள்:

பெரியபுராணம் - மூர்த்தி நாயனார் புராணம் - 12.15.31 - "பெய்ம்மாமுகில்";

பெரியபுராணம் - திருக்குறிப்புத்தொண்ட நாயனார் புராணம் - 12.19.5 - "காதல்செய்ம் முறைமை";

ஐங்குறுநூறு - "பெய்ம்மழை";

திருக்குறளில் - "செய்ந்நன்றி";

வி. சுப்பிரமணியன்

-------------------------------- -------------------------------

03.04.084 - சிவன் - கோலம் - சிலேடை

03.04 – சிவன் சிலேடைகள்

2008-11-13

3.4.84 - சிவன் - கோலம் - சிலேடை

-------------------------------------------------------

வெண்பொடி எங்கும் விளங்கும் உருக்கொள்ளும்

மண்மிசைத் தோன்றும்நன் மாவிழையும் - பண்பிருக்கும்

கோடாநிற் கும்பல்லோர் நாளும் குனிந்திடும்

காடாட ரன்கோலம் காண்.

சொற்பொருள்:

வெண்பொடி - 1. வெள்ளைப் பொடி; / 2. திருநீறு;

மாவிழையும் - 1. மா இழையும் (மா = மாவு); / 2. மா விழையும்;

கோடா - 1. கோடாக; (கடைக்குறை விகாரம்) ; / 2. கோடாத - கோடுதல் இல்லாத - பாரபட்சம் இல்லாத; (ஈறுகெட்ட எதிர்மறைப் பெயரெச்சம்);

குனிதல் - 1. வளைதல்; / 2. வணங்குதல்;

இடுதல் - 1. வரைதல்; சித்திரமெழுதுதல்; / 2. ஒரு துணைவினை;

காடு - சுடுகாடு;

கோலம் - 1. தரையில் இடும் கோலம்; / 2. தன்மை;

காண் - முன்னிலை அசை;

கோலம்:

வெண்பொடி எங்கும் விளங்கும் உருக் கொள்ளும் - வெள்ளைப் பொடி எங்கும் திகழும் வடிவம் இருக்கும்;

மண்மிசைத் தோன்றும் - (வீட்டின்முன்) தரைமீது இருக்கும்;

நன் மாவு இழையும் பண்பு இருக்கும் - நல்ல (அரிசி) மாவு இழையும் தன்மை இருக்கும் - (மாக்கோலம், இழைகோலம்);

கோடா நிற்கும் - கோடாக இருக்கும் - கோடுகளால் ஆனது;

பல்லோர் நாளும் குனிந்து இடும் - தினமும் பலரும் உடலை வளைத்துக் குனிந்து இடுகின்ற;

கோலம் - தரையில் இடும் கோலம்.

சிவன்:

வெண் பொடி எங்கும் விளங்கும் உருக் கொள்ளும் - திருநீறு திருமேனியில் எங்கும் விளங்கும் வடிவம் உடையவன்;

மண்மிசைத் தோன்றும் - பூமியில் காட்சிகொடுப்பான்;

நன் மா விழையும் பண்பு இருக்கும் - நல்ல எருதை (வாகனமாக) விரும்புபவன்;

கோடா நிற்கும் - பாரபட்சமின்றி இருப்பவன்;

பல்லோர் நாளும் குனிந்திடும் - பலரும் தினமும் வணங்குகின்ற;

காடு ஆடு அரன் - சுடுகாட்டில் நடம் செய்யும் சிவபெருமான்;

கோலம் - தன்மை;

வி. சுப்பிரமணியன்

-------------------------------- -------------------------------

03.04.083 - சிவன் - கப்பல் - சிலேடை

03.04 – சிவன் சிலேடைகள்

2008-11-07

3.4.83 - சிவன் - கப்பல் - சிலேடை

-------------------------------------------------------

நீர்மேல் இருக்கும் நிரம்பப்பேர் ஏறும்ஓர்

ஊர்தி துறைகளில் உள்ளதே - சேர்விடம்

காணலாம் கண்டங்கண் ணீர்வழிஅன் பர்புகழ்தீத்

தூணரன் கப்பல் துணை.

சொற்பொருள்:

நிரம்ப - நிறைய; மிகுதியாக;

பேர் - 1. ஆள்; / 2. பெயர்; பெரிய;

ஏறு - 1. ஏறுதல்; / 2. எருது;

ஓர் - 1. ஒரு / 2. ஒப்பற்ற;

துறை - 1. துறைமுகம்; / 2, வழி;

உள்ளதே = 1. உள்ளது + ஏ (=அசை); / 2. உள்ள + தே (=தெய்வம்);

சேர்விடம் - 1. சேர்வு+இடம் (அடையும் இடம்); / 2. சேர்கின்ற விடம்; (திரண்ட ஆலகால விஷம்)

கண்டங்கண்ணீர் - 1. கண்டங்கள் + நீர்; / 2. கண்டம் + கண்ணீர்; (இலக்கணக் குறிப்பு: "கண்டங்கள் + நீர் = கண்டங்கண்ணீர்" என்று கொள்ளும் பொழுது ணகர ஒற்று விரித்தல் விகாரம்);

துணை - ஒப்பு;

கப்பல்:

நீர்மேல் இருக்கும் - நீரின் மேலே இருக்கும்;

நிரம்பப் பேர் ஏறும் ஓர் ஊர்தி - பல மனிதர்கள் ஏறிக்கொள்ளும் ஒரு வாகனம்;

துறைகளில் உள்ளதே சேர்விடம் - அது அடையுமிடம் துறைகளில் (ports) உள்ளது;

காணலாம் கண்டங்கள் நீர் வழி - நீரில் உள்ள வழி மூலம் (அது செல்லப்) பல கண்டங்களைக் காணலாம்.

சிவன்:

நீர் மேல் இருக்கும் - முடிமீது கங்கையை உடையவன்;

இருக்கும் நிரம்பப் பேர் - பல பெயர்களை உடையவன்; (இருக்கும் - இடைநிலைத் தீவகமாக இப்படி இருமுறை இயைக்கல் ஆம்);

பேர் ஏறும் ஓர் ஊர்தி - பெரிய எருதும் ஒப்பற்ற வாகனம் ஆகும்;

("நீர்மேல் இருக்கும் நிரம்பப்; பேர் ஏறும் ஓர் ஊர்தி" என்றும் பிரித்துப் பொருள்கொள்ளல் ஆம். "முடிமேல் மிகுந்த நீர் இருக்கும்; பெரிய எருதும் ஒரு வாகனம்;)

துறைகளில் உள்ள தே - (பராய்த்துறை, ஆவடுதுறை, பெருந்துறை, சோற்றுத்துறை, அன்பிலாலந்துறை, குரங்காடுதுறை, மயிலாடுதுறை, எனப்) பல துறைகளிலும் உறைகின்ற தெய்வம்;

சேர் விடம் காணலாம் கண்டம் - சேர்ந்த விடத்தைக் கழுத்தில் காணலாம்;

கண்ணீர் வழி அன்பர் புகழ் தீத் தூண் அரன் - (உள்ளம் உருகிக்) கண்ணீர் வழிகின்ற பக்தர்கள் புகழ்கின்ற, பெரிய நெருப்புத் தூணாக நின்ற சிவபெருமான்;

வி. சுப்பிரமணியன்

-------------------------------- -------------------------------

03.04.082 - சிவன் - வாழைப்பழம் - சிலேடை

03.04 – சிவன் சிலேடைகள்

2008-11-04

3.4.82 - சிவன் - வாழைப்பழம் - சிலேடை

-------------------------------------------------------

உரிதோலே சூழ்ந்திருக்கும் உள்வெளுத்துக் காணும்

பிரியர்க் கினிக்கும் பெரிதும் - கரிமண்டும்

கண்டவிடம் உண்டு கடையிலும் என்பதால்

பண்டரங்கன் வாழைப் பழம்.

சொற்பொருள்:

உரிதோல் - 1. உரிக்கின்ற தோல்; / 2. உரித்த தோல்;

சூழ்தல் - சுற்றியிருத்தல்;

உள் - 1. உள்ளே; / 2. மனம்;

காணுதல் - 1. கண்ணுக்குத் தெரிதல்; / 2. ஆராய்தல்; வணங்குதல்;

பிரியர் - அன்பர்;

கரி - 1. யானை; / 2. விடம்;

மண்டுதல் - 1. நிரம்ப உண்ணுதல்; / 2. மிகுதியாதல்;

கண்டவிடம் - கண்ட இடம் - 1. பார்த்த இடத்தில்; / 2. கழுத்துப் பகுதி;

கடை - 1. அங்காடி; / 2. முடிவு;

பண்டரங்கன் - பாண்டரங்கக் கூத்தாடுவோன் - சிவபிரான்;

வாழைப்பழம்:

உரிதோலே சூழ்ந்திருக்கும் - உரிக்கின்ற தோல் சுற்றி இருக்கும்;

உள் வெளுத்துக் காணும் - உள்ளே வெண்மையாக இருக்கும்;

பிரியர்க்கு இனிக்கும் பெரிதும் - விரும்புவோர்க்கு மிகவும் இனிக்கும்;

கரி மண்டும் கண்ட இடம் - யானை அதனை எங்கே கண்டாலும் நிரம்ப உண்ணும்;

உண்டு கடையிலும் - அங்காடிகளிலும் இருக்கும்;

சிவன்:

உரிதோலே சூழ்ந்திருக்கும் - (யானையின்) உரித்த தோல் அவனைச் சுற்றியிருக்கும் - யானைத்தோலைப் போர்த்தவன்;

உள் வெளுத்துக் காணும் பிரியர்க்கு இனிக்கும் பெரிதும் - (கள்ளம் இல்லா) வெள்ளை உள்ளத்தோடு வணங்கும் / தியானிக்கும் பக்தர்களுக்கு மிகவும் இனிமை பயப்பான்; (--'உள் வெளுத்துக் காணும்' - என்பதைத் "வெளியே தோலால் மூடப்பட்டிருப்பினும், உள்ளே திருமேனிமேல் நீறு பூசியிருப்பான்" என்றும் பொருள் கொள்ளலாம்);

கரி மண்டும் கண்டவிடம் - கழுத்துப் பகுதியில் விடம் மிகுந்திருக்கும்; (--அல்லது-- கழுத்தில் விடம் கருமை மிகுந்திருக்கும்);

உண்டு கடையிலும் - முடிவிலும் இருப்பவன்;

பண்டரங்கன் - பாண்டரங்கக் கூத்தாடும் சிவன்;

வி. சுப்பிரமணியன்

-------------------------------- -------------------------------