06.01.103 - சிவன் - சீப்பு - சிலேடை

06.01 – சிவன் சிலேடைகள்

2009-11-18

06.01.103 - சிவன் - சீப்பு - சிலேடை

-----------------------------------------------

தலையாய தான மலையும் கரத்திற்

கலையும் கருங்குழலி யோர்பால் - நிலைகொள்ளும்

பல்லுருக் கொள்கின்ற பண்பிருக்கும் ஏற்றின்மேற்

செல்லும் சிவபெருமான் சீப்பு.

சொற்பொருள்:

தானம் - இடம்; உறைவிடம்;

அலை - 1) அலைதல்; / 2) நதியின் அலை;

கலை - 1) கலைதல் (குலைதல்); / 2) மான்;

கருங்குழலியோர் - 1) கரிய கூந்தலை உடைய பெண்கள்; / 2) பார்வதி ஒரு;

பால் - 1) வேற்றுமை உருபு - இடம்; 2) பக்கம்; பகுதி

பல் - 1) சீப்புப்பல் (tooth of a comb); / 2) பல

ஏற்றின் - 1) உயர்த்தினால்; தூக்கினால்; / 2) ஏறு - எருது;

சீப்பு:

தலை ஆய தானம் அலையும் - தலை என்ற இடத்தில் அங்குமிங்கும் செல்லும்;

கரத்தில் கலையும் கருங்குழலியோர்பால் நிலைகொள்ளும் - கலையும் கரிய கூந்தலை உடைய பெண்களிடம் கையில் இருக்கும்;

பல் உருக் கொள்கின்ற பண்பு இருக்கும் - சீப்புப்பல் இருக்கும்;

ஏற்றின் மேல் செல்லும் - உயர்த்தினால் மேலே போகும்; (-- அல்லது -- 'ஏற்றின்மேற் செல்லும்' என்பதைச் சிவனுக்கு மட்டுமே பொருத்திக்கொள்ளலாம்);

சீப்பு.

சிவன்:

தலை ஆய தானம் அலையும் / மலையும் - திருமுடிமேல் (கங்கையின்) அலையும்; (-- அல்லது-- தலையாய உறைவிடமாகக் கயிலை மலையும்);

கரத்தில் கலையும் - கையில் மானும்;

கருங்குழலி ஓர் பால் நிலைகொள்ளும் - கரிய கூந்தலை உடைய பார்வதி ஒரு பக்கமும் இருக்கும்;

பல் உருக் கொள்கின்ற பண்பு இருக்கும் - பல்வேறு வடிவங்கள் கொள்ளும் இயல்பும் இருக்கும்;

ஏற்றின்மேல் செல்லும் சிவபெருமான் - இடபவாகனனாகிய சிவபெருமான்.

வி. சுப்பிரமணியன்

-------------------------------- -------------------------------