03.05.080 – அண்ணாமலை - பண்ணார் தமிழ்பாடிப் - (வண்ணம்)
2009-01-19
03.05.080) பண்ணார் தமிழ்பாடிப் - (அண்ணாமலை - திருவண்ணாமலை)
----------------------------------------------------
(வண்ணவிருத்தம்;
தன்னா .. தனதான )
பண்ணார் .. தமிழ்பாடிப்
.. பன்னாள் .. தொழுவேனே
விண்ணோர் .. பெருமானே
.. வெம்மா .. வினைதீராய்
எண்ணா .. அயன்மாலார்
.. என்னே .. எனநேடி
அண்ணா .. நிலையானே
.. அண்ணா .. மலையானே.
பதம் பிரித்து:
பண் ஆர் தமிழ் பாடிப்
.. பன்னாள் தொழுவேனே;
விண்ணோர் பெருமானே;
.. வெம் மா வினை தீராய்;
எண்ணா அயன் மாலார்
.. "என்னே" என நேடி,
அண்ணா நிலையானே;
.. அண்ணாமலையானே.
பண் ஆர் தமிழ் பாடிப் பன்னாள் தொழுவேனே - பண் (இசை) பொருந்திய தமிழ்ப் பாமாலைகள் பாடிப் பல நாளும் உன்னைத் தொழுவேன்; (பன்னாள் - பல் நாள் - பல நாளும்; உம்மைத்தொகை); (பன்னாள் + தொழுவேனே = பன்னாடொழுவேனே);
விண்ணோர் பெருமானே - தேவர்கள் பெருமானே;
வெம் மா வினை தீராய் - எனது கொடிய பெரிய வினைகளைத் தீர்த்தருள்வாயாக; (வெம்மை - வெப்பம்; கடுமை);
எண்ணா அயன் மாலார் "என்னே" என நேடி, அண்ணா நிலையானே - (உன்னை) எண்ணாத பிரமனும் திருமாலும் (அவர்களிடையே சோதியாக நீ எழுந்தபொழுது) 'இஃது என்னே' என அதிசயித்து, (அதன் அடியையும் முடியையும்) தேடியும், அடையாத தன்மை உடையவனே; (என்னே - என்ன; ஓர் அதிசயக் குறிப்பு / இரக்கக் குறிப்பு); (நேடுதல் - தேடுதல்); (அண்ணுதல் - கிட்டுதல்); (நிலை - தன்மை);
அண்ணாமலையானே - திருவண்ணாமலையானே;
வி. சுப்பிரமணியன்
-------------------------------- -------------------------------
No comments:
Post a Comment