02.14 – கழுமலம் - (கழுமலம் அடை நெஞ்சே)

02.14 – கழுமலம் - (கழுமலம் அடை நெஞ்சே)



2011-03-21
திருக்கழுமலம் (சீகாழி - சீர்காழி)
"கழுமலம் அடை நெஞ்சே"
--------------------------------
(சந்தக் கலிவிருத்தம் - "தனதன தனதானா தனதன தனதானா” என்ற சந்தம்.
தனதன என்பது தானன என்றும் வரலாம். தனதானா என்பது தானானா என்றோ தானதனா என்றோ வரலாம்.)
(சுந்தரர் தேவாரம் - 7.85.1 - 'வடிவுடை மழுவேந்தி மதகரி யுரிபோர்த்து')



1)
நெடிதுயர் மலையொத்த செடிவினை அவையெல்லாம்
பொடிபட வழிவேண்டில் புகலென அடைநெஞ்சே
அடிமலர் துதியன்பர் அணியென வரிவண்டார்
கடிமலர்ப் பொழில்சூழும் கழுமல நகர்தானே.

நெடிது உயர் மலை ஒத்த – பெரிய மலையைப் போன்ற;

செடி வினை - தீவினை;

பொடிபட வழி வேண்டில் - அழியும் உபாயம் விரும்பினால்;

அடிமலர் துதி அன்பர் அணி என – திருவடித்தாமரையைத் துதிக்கும் பக்தர்களைப் போல;

வரி வண்டு ஆர் கடி மலர்ப் பொழில் சூழும் - வரிகளை உடைய வண்டுகள் ரீங்காரம் செய்யும் வாச மலர்கள் நிறைந்த சோலைகள் சூழ்ந்த;

கழுமல நகர்தானே - திருக்கழுமலம் என்ற சீகாழிப் பதி.

2)
உயர்வழி உணராமல் உலகினில் உழல்கின்ற
மயலற வழிவேண்டில் வழிபட அடைநெஞ்சே
அயலரை மதிசேர அரவையும் அணிவானூர்
கயலுகள் வயல்சூழும் கழுமல நகர்தானே.

மயல் அற வழி வேண்டில் - மயக்கம் தீர ஓர் உபாயத்தை விரும்பினால்;

அயல் அரை மதி சேர - பக்கத்தில் பிறைச்சந்திரன் பொருந்துமாறு;

அரவையும் அணிவான் ஊர் - பாம்பையும் அணிகின்ற சிவபெருமான் உறையும் ஊரான;

கயல் உகள் வயல் சூழும் - கயல் மீன்கள் குதிக்கின்ற வயல் சூழ்ந்த;

கழுமல நகர்தானே - திருக்கழுமலம் என்ற சீகாழிப் பதி.

3)
புவிமிசை மகிழ்வோடு புகழுற அடைநெஞ்சே
செவியினில் ஒருதோடு திகழ்பவன் இவனென்று
சவிமிகு தமிழ்பாடு கவுணியர் பதியான
கவினுறு பொழில்சூழும் கழுமல நகர்தானே.

செவியினில் ஒரு தோடு திகழ்பவன் இவன் என்று - (சம்பந்தர் தேவாரம் - 1.1.1 - “தோடுடைய செவியன் ….. பெம்மான் இவன்அன்றே");

சவி - ஒளி; அழகு;

கவுணியர் - திருஞான சம்பந்தர்;

கவின் - அழகு;

4)
ஒலிமிகு கடல்போல வலிமிகு வினையெல்லாம்
வலிதர வருமுன்னே வழிபட அடைநெஞ்சே
நலிவறு சிவன்நாமம் நவில்கிற அடியார்சேர்
கலிமலி விழவாரும் கழுமல நகர்தானே.

வலி - 1) வன்மை (Strength, power); 2) துன்பம் / நோவு;

நலிவு அறு - துன்பத்தைத் தீர்க்கும்;

கலி மலி விழவு ஆரும் - ஆரவாரம் மிகுந்த விழாக்கள் நிறைந்த;

5)
குறைகெட வழிவேண்டில் இறைதொழ அடைநெஞ்சே
மறைவிரி குருவாகி வருபவன் உமைகேள்வன்
அறைகடல் உமிழ்நஞ்சும் அழகிய மணியாகும்
கறைமிட றுடையானூர் கழுமல நகர்தானே.

இறை தொழ – இறைவனைத் தொழுவதற்கு;

மறை விரி குரு - வேதப்பொருளை விளக்கும் குரு - தட்சிணாமூர்த்தி;

உமைகேள்வன் - உமாபதி;

அறைதல் - ஒலித்தல்; மோதுதல்;

கறைமிடறு உடையான் - நீலகண்டன்;

6)
முனைவினை அவைமூடி முடிவில தெனநாளும்
இனல்விளை வதுதீர இனியடை மடநெஞ்சே
புனைவென முடிமீது புனலொடு மதிசூடி
கனவிடை உடையானூர் கழுமல நகர்தானே.

முனை, இனல் - முன்னை, இன்னல் - இடைக்குறையாக வந்தன;

இனி - இப்பொழுது (Now, immediately);

புனைவு - அலங்காரம்; அழகு;

முடிமீது புனலொடு மதிசூடி - சென்னிமேல் கங்கையையும் சந்திரனையும் அணிந்தவன்;

கன விடை - பெரிய எருது;

7)
மினலன புவிவாழ்வில் மேதியன் வரவாலே
அனலிடை அடையாமுன் அடிதொழ அடைநெஞ்சே
புனலடை சடையீசன் பூங்கணை மதன்வேவக்
கனலுமிழ் விழியானூர் கழுமல நகர்தானே.

மினல் அன - மின்னல் அன்ன - மின்னலைப் போன்ற - நிலையற்ற;

மேதியன் - இயமன் (Yama, as riding a buffalo); (மேதி - எருமை);

அனலிடை அடையாமுன் - தீயிற் புகுவதன் முன்னமே;

புனல் அடை சடை ஈசன் - கங்கை அடைந்த சடையை உடைய ஈசன் / கங்கையை அடைத்த சடையை உடைய ஈசன்;

பூங்கணை மதன் - மலர்க்கணை ஏவும் மன்மதன்;

8)

சதிபுரி புலனைந்தின் தளைகளும் இடரேசெய்

பொதிவினை அவைதீர்ந்து பொலிவுற அடைநெஞ்சே

எதிரிலன் வலியார்தோள் இருபதை நெரிசெய்து

கதிர்மதி அணிவானூர் கழுமல நகர்தானே.

சதிபுரி புலன் ஐந்தின் தளைகளும் - வஞ்சப் புலன்கள் ஐந்தின் கட்டுகளும்;

இடரேசெய் பொதிவினை - துன்பத்தையே நல்கும் வினைப்பொதி; (பொதி - மூட்டை);

அவை தீர்ந்து பொலிவுற அடை நெஞ்சே - அவையெல்லாம் நீங்கி இன்புற, மனமே நீ அடைவாயாக;

எதிர் இலன் வலி ஆர் தோள் இருபதை நெரிசெய்து – போர் இல்லாதவனான இராவணனது வலிமை மிக்க இருபது புஜங்களையும் நசுக்கி; (எதிர் - போர்); (சம்பந்தர் தேவாரம் - 1.116.8 - "செருவி லரக்கனைச் சீரி லடர்த்தருள் செய்தவரே" - செரு இல் அரக்கன் - போரில்லாத இராவணன்);

கதிர்மதி அணிவான் ஊர் கழுமல நகர்தானே - கதிர்கள் வீசும் சந்திரனை அணிந்த சிவன் உறையும் ஊரான திருக்கழுமலமே;

9)
உலகினில் உழலாமல் நிலைபெற அடைநெஞ்சே
மலரவன் அரிநேட வளரெரி எனவான
அலகிலன் அரவாரம் அணியரன் ஒருகையில்
கலைதரி பெருமானூர் கழுமல நகர்தானே.

மலரவன் அரி நேட - பிரமனும் திருமாலும் தேடுமாறு;

வளர் எரி என ஆன – வளரும் தீ என்று ஆன;

அலகு இலன் - அளவு இல்லாதவன்;

அரவு ஆரம் அணி அரன் - பாம்பு மாலை அணியும் ஹரன்;

ஒரு கையில் கையில் கலை தரி பெருமான் - ஒரு கரத்தில் மானை ஏந்தும் பெருமான்;

10)
உணர்விலர் ஒழிவின்றி ஒழிமினும் வழியென்பர்
குணமிலர் அவர்சொல்லும் கூற்றுகள் பொருளல்ல
இணையடி தொழுதேவர் இடர்கெட மதில்மூன்றோர்
கணைகொடு சுடுவானூர் கழுமல நகர்தானே.

உணர்வு இலர் - அறிவு இல்லாதவர்; தெளிவு இல்லாதவர்;

ஒழிவின்றி - ஓயாமல்; எப்போதும்;

ஒழிமினும் - ஒழிமின் உம் / ஒழிமின் நும்;

"ஒழிமின் உம் வழி" என்பர் - "உங்கள் நெறியை விட்டு நீங்குங்கள்” என்று சொல்வார்கள்;

குணமிலர் அவர் சொல்லும் கூற்றுகள் பொருள் அல்ல – குணமிலிகளான அவர்கள் சொல்லும் வார்த்தைகளில் பொருள் இல்லை; அவற்றை மதிக்கவேண்டா;

இணையடி தொழு தேவர் இடர் கெட – அடியிணையைத் தொழுத தேவர்களின் துன்பம் நீங்கும்படி;

மதில் மூன்று ஓர் கணைகொடு சுடுவான் ஊர் - முப்புரங்களை ஓர் அம்பால் எரித்தவன் உறையும் ஊர்;

கழுமல நகர்தானே - திருக்கழுமலம் (சீகாழி);

11)
அயர்வற வழிவேண்டில் அடிதொழ அடைநெஞ்சே
பயிர்வளர் புனல்போல்நம் உயிர்வளர் பரமேட்டி
மயிலன மடமங்கை ஒருபுறம் மகிழ்எந்தை
கயிலைமன் னரனாரூர் கழுமல நகர்தானே.

அயர்வு - சோர்வு;

பரமேட்டி - பரம்பொருள்; தனக்குமேல் ஒன்றில்லாத உயர்ந்த இடத்திலிருப்பவன்;

பயிர் வளர் புனல்போல் நம் உயிர் வளர் பரமேட்டி - பயிரைக் காக்கும் நீர் போல், நம் உயிரைக் காக்கும் பரம்பொருள்;

மயில் அன மட மங்கை ஒரு புறம் மகிழ் எந்தை - மயில்போன்ற அழகிய பார்வதியை ஒரு பங்கில் விரும்பும் எம் தந்தை;;

கயிலை மன்னு அரனார் ஊர் - கயிலாயத்தில் வீற்றிருக்கும் சிவபெருமான் உறையும் ஊர்; ('கயிலை மன் அரனார்' - 'கயிலை இறைவன் அரன்' என்றும் பொருள்படும்);

கழுமல நகர்தானே - திருக்கழுமலம் (சீகாழி);

அன்புடன்,
வி. சுப்பிரமணியன்

-------------- --------------