03.04 – சிவன் சிலேடைகள்
2006-04-11
3.4.21 - சிவன் - வெளி (ஆகாசம்) - சிலேடை
-------------------------------------------------------------
அனைத்தையும் தன்னுள் அடக்கினும் அங்கோர்
தினையணு உள்ளும் திகழ்ந்து தனக்கொரு
தோற்றம் முடிவின்றித் தோன்றுவதால் செஞ்சடையில்
ஆற்றன் வெளியென் றறி.
சொற்பொருள்:
தோற்றம் - 1. வடிவம்; / 2. பிறப்பு;
முடிவு - 2. எல்லை; / 2. இறப்பு;
ஆற்றன் - கங்காதரன்;
வெளி - ஆகாசம் (space);
வெளி (ஆகாசம் - ஐம்பூதங்களில் ஒன்று):
எல்லாவற்றையும் தன்னுள் கொண்டிருந்தாலும், தினை அணு இவைபோன்ற நுண்ணிய பொருள்களின் உள்ளேயும் (- அல்லது - தினையிலுள்ள அணுவின் உள்ளேயும்) அஃது உள்ளது. அதற்கு ஒரு வடிவம், எல்லை போன்றவை இல்லை. ஆகாசம்.
சிவன்:
(இப்பிரபஞ்சத்தில் உள்ள அண்டங்கள்) எல்லாம் அவனுள் அடங்கும். ஆயினும், அவன் தினை அணு இவைபோன்ற நுண்ணிய பொருள்களின் உள்ளேயும் (- அல்லது - தினையிலுள்ள அணுவின் உள்ளேயும்) இருக்கின்றான். அவனுக்குப் பிறப்பும் இறப்பும் இல்லை. ("வடிவம், அளவு இல்லை" - என்றும் பொருள்கொள்ளல் ஆம்). சிவந்த சடையில் கங்கையை உடைய சிவன்.
வி. சுப்பிரமணியன்
-------------------------------- -------------------------------
