03.04 – சிவன் சிலேடைகள்
2009-03-13
3.4.88 - சிவன் - நீள்தொடர் (TV mega serial) - சிலேடை
-------------------------------------------------------
தொல்லை மிகுந்திருக்கும் மேலும் சலமிருக்கும்
எல்லை இலாதிருக்கும் ஏசுதலை - அல்லதொரு
பாத்திரம் இல்லாத பாங்கிருக்கும் நீள்தொடர்
தீத்திரளாய் நின்ற சிவன்.
சொற்பொருள்:
தொல்லை - 1. பழமை; / 2. துன்பம்;
மேலும் - 1. மேலே; (உம் - அசை); / 2. பின்னும்; மற்றும்; (Moreover, further);
சலம் - 1. நீர்; / 2. வஞ்சனை; பொய்ம்மை; கோபம்; தீயசெயல்;
எல்லை - அளவு; முடிவு;
ஏசுதலை - 1. (ஏசு + தலை) இகழப்படும் மண்டையோடு; / 2. (ஏசுதல்+ஐ) திட்டுவதை;
பாத்திரம் - 1. கொள்கலம் (Vessel, utensil); / 2. நாடகத்தில் வேடம்பூண்டு நடிப்பவ-ன்-ள்;
பாங்கு - தன்மை; அழகு;
நீள்தொடர் - நெடுநாள்களுக்குத் தொடரும் தொலைக்காட்சி நாடகம்; (TV mega serial);
தீத்திரள் - ஜோதிப்பிழம்பு;
நீள்தொடர் (TV mega serial):
தொல்லை மிகுந்து இருக்கும் - துன்பம் நிறைய இருக்கும்;
மேலும் சலம் இருக்கும் - அதனுடன், பொய்ம்மை/வஞ்சனை/கோபம் போன்றனவும் மிகுந்திருக்கும்;
எல்லை இலாது இருக்கும் ஏசுதலை அல்லது ஒரு பாத்திரம் இல்லாத பாங்கு இருக்கும் - எல்லாப் பாத்திரங்களும் அளவின்றி/ஓயாமல் அடுத்தவரைத் திட்டுதலையும் பழித்தலையும் செய்யும்; ("எல்லை இலாது இருக்கும் - முடிவின்றி நெடுங்காலம் தொடர்ந்து வரும்" - என்றும் பொருள்கொள்ளல் ஆம்);
நீள்தொடர் - (தொலைக்காட்சியில் வரும்) பெரும்-தொடர்-நாடகங்கள்.
சிவன்:
தொல்லை மிகுந்து இருக்கும் - பழமை மிகுந்திருக்கும்; (அனாதி);
மேலும் சலம் இருக்கும் - (திருமுடி) மேலே நீர் இருக்கும்; (கங்காதரன்);
எல்லை இலாது இருக்கும் - முடிவு இன்றி இருக்கும்; (பிறப்பு இறப்பு அற்றவன்);
ஏசு-தலை அல்லது ஒரு பாத்திரம் இல்லாத பாங்கு இருக்கும் - இகழப்படும் மண்டையோட்டையே பிச்சைப்பாத்திரமாக கொள்ளும்; (அப்பர் தேவாரம் - 6.57.6 - "ஏசுமா முண்டி உடையாய் போற்றி" - ஏசும் - இகழப்படுகின்ற. முண்டி - தசை நீங்கிய தலை);
தீத்திரளாய் நின்ற சிவன் - (அடிமுடி தேடியபொழுது) ஜோதிப்பிழம்பாகி ஓங்கிய சிவபெருமான்; (சம்பந்தர் தேவாரம் - 2.18.9 - "சடையும் அடியும் இருவர் தெரியாததொர் தீத்திரள் ஆயவனே");
வி. சுப்பிரமணியன்
-------------------------------- -------------------------------
