01.03 - ஆலவாய் (மதுரை)

01.03 - ஆலவாய் (மதுரை) 

2007-11-04 
மதுரை (ஆலவாய்) 
------------------------------------------
(திருமுக்கால் அமைப்பில்)
(திருஞானசம்பந்தர் தேவாரம் - திருமுறை 3.97.1 - 'திடமலி மதிளணி சிறுகுடி மேவிய')

1)
திருமிகு மதுரையம் பதியினில் திகழ்பவன்
கருநிற மிடறுடை யோனே
கருநிற மிடறுடை யோன்கழல் கருதிட
அருவினை அழிவது திடமே.

திரு - செல்வம்; தெய்வத்தன்மை;

மதுரை அம் பதி - அழகிய மதுரை நகர்;

மிடறு - கழுத்து;

கழல் - திருவடி;

அருவினை - கொடிய வினை;

திடம் - நிச்சயம்;

2)
அணிமிகு மதுரையம் பதியினில் அமரிறை
மணிதிகழ் மிடறுடை யோனே
மணிதிகழ் மிடறுடை யோன்கழல் வழிபடப்
பிணிவினைத் தொடர்விடப் பெறுமே.

அணி - அழகு; பெருமை; கூட்டம்;

அமர்தல் - இருத்தல்; விரும்புதல்;

மணி - நீலமணி;

பிணிவினைத்தொடர் - வினைத்தொகை - பிணிக்கின்ற வினைத்தொடர்;

3)
அறமிகு மதுரையம் பதியினில் அருள்பவன்
கறைமிகு மிடறுடை யோனே
கறைமிகு மிடறுடை யோன்கழல் கைதொழப்
பறைவது பழவினைப் பகையே.

அறம் - தர்மம்;

பறைதல் - அழிதல்;

4)
மறைவளர் மதுரையம் பதியினில் மகிழ்பவன்
கறைமிளிர் திருமிட றோனே
கறைமிளிர் திருமிட றோன்குரை கழல்தொழும்
நிறைவுளர் இலரொரு குறையே.

மறை - வேதம்;

மிடறோன் - "மிடற்றோன்" என்பதன் இடைக்குறை - கழுத்தை உடையவன்;

நிறைவு - திருப்தி; மிகுதி; மாட்சிமை;

உளர் - உள்ளவர்;

5)
தமிழ்வளர் மதுரையம் பதியினில் தருபவன்
உமிழ்கடல் விடமிட றோனே
உமிழ்கடல் விடமிட றோன்கழல் உரைசெய
அமிழ்தன சுவைதரும் அதுவே.

தருபவன் - வரங்கள் தருபவன்;

உமிழ்கடல் விடம் - '(அரவு) உமிழ் விடம், கடல் விடம்' என்று பொருள்கொள்க; ('கடல் உமிழ் விடம்' என்றும் பொருள்கொள்ளலாம்;)

உரை செய்தல் - சொல்லுதல்;

அமிழ்து அன - அமிர்தம் போன்ற; (அன = "அன்ன");

(சம்பந்தர் தேவாரம் - 1.15.4 - "சுடுநீறணி யண்ணல்.....இள வரவாடுமிழ் கடனஞ்சம துண்டான் ... " - இளைய வாசுகியாகிய பாம்பு உமிழ்ந்த நஞ்சோடு கடலில் தோன்றிய நஞ்சினை உண்டவனுமாகிய சிவபிரான்)

6)
எழில்மிகு மதுரையம் பதியுறை இறையவன்
விழிநுதல் திகழ்பெரு மானே
விழிநுதல் திகழ்பெரு மான்கழல் விதிவழி
வழிபடின் உறுவது வளமே.

எழில் - அழகு;

நுதல் - நெற்றி;

விழிநுதல் - கண்ணுதல் - நெற்றிக்கண்;

விதிவழி - முறைப்படி;

7)
புனல்மிகு மதுரையம் பதியினில் பொலிபவன்
அனல்மிகு விழியுடை யோனே
அனல்மிகு விழியுடை யோன்கழல் அடைபவர்
இனல்மிகு பிறவிகள் இலரே.

புனல் - நீர்;

அனல் - தீ;

இனல் - இன்னல் - இடைக்குறையாக வந்தது;

8)
நிலம்புகழ் மதுரையம் பதியினில் நிகழ்பவன்
இலங்கையன் தனையடர்த் தோனே
இலங்கையன் தனையடர்த் தோன்கழல் இணைதொழ
அலந்தரும் அருவினை அறுமே.

நிலம் - உலகம்;

நிகழ்தல் - தங்குதல்; உறைதல்;

இலங்கையன்தனை - இராவணனை;

அடர்த்தல் - அமுக்குதல்; நசுக்குதல்;

கழல் இணை தொழ - திருவடிகளைத் தொழுவதால்;

அலம் - துன்பம்;

9)
வியனகர் மதுரையம் பதியுறை விடையவன்
அயனரி இடையெழு தீயே
அயனரி இடையெழு தீயவன் அடியவர்
இயமன திடர்பிணி இலரே.

வியனகர் - வியன் நகர்;

வியன் - பெருமை (Greatness); சிறப்பு (Excellence);

விடையவன் - இடபவாகனத்தை உடையவன்;

அயன் அரி - பிரமன் திருமால்;

இயமனது இடர் பிணி - எமனுடைய துன்பமும் பிணியும்;

10)
செய்வள மதுரையம் பதியுறை சிவனடி
பொய்வழி யினரறி யாரே
பொய்வழி யினரறி யான்கழல் புகழ்பவர்
நைவழி வுறும்வரும் நலமே.

செய் - வயல்; (செய் வள மதுரை - வயல் வளம் மிகுந்த மதுரை);

நைவு அழிவு உறும் - வருந்துதல் இல்லாமற்போகும் - வருத்தம் தீரும்;

11)
தென்னகர் மதுரையம் பதியினில் திகழ்பவன்
மின்னிறச் சடையுடை யானே
மின்னிறச் சடையுடை யான்கழல் விழைபவர்
இன்னொரு பிறவியும் இலரே.

தென் நகர் - அழகிய நகர்;

மின் நிறம் - மின்னல் போன்ற நிறம்; ("மின்னார் செஞ்சடை");

விழைதல் - விரும்புதல்;

அன்புடன்,
வி. சுப்பிரமணியன்



பிற்குறிப்பு:

இப்பாடல்கள் தேவாரத்தில் திருமுக்கால் என்று குறிப்பிடப்படும் பதிகங்களின் அமைப்பில் உள்ளன. இவற்றை "ஆசிரிய இணைக்குறட்டுறை". என்று கருதலாம். (முதல் அடியும் மூன்றாம் அடியும் அளவடி; இரண்டாம் அடியும் நான்காம் அடியும் சிந்தடி).