01.29 – பொது - தட்சிணாமூர்த்தி போற்றி-2

01.29 – பொது - தட்சிணாமூர்த்தி போற்றி-2



2008-03-26
தட்சிணாமூர்த்தி போற்றி - 2
-----------------------------------
(கலி விருத்தம் - "மா மா மா மா" என்ற வாய்பாடு)
(12 பாடல்கள்)



1)
பாலில் நெய்போல் பயில்வாய் போற்றி
ஆலின் அடியில் அமர்வாய் போற்றி
நூலின் பொருளை நுவல்வாய் போற்றி
மாலின் இருள்தீர் மதியே போற்றி.

பயில்தல் - தங்குதல் (to stay, abide, reside);

நூல் - வேதம், ஆகமம்;

நுவல்தல் - சொல்லுதல் (to say, speak, declare, utter);

மால் - மயக்கம் (illusion, delusion, aberration of mind; dullness; stupor; confusion);

இருள் - துன்பம்; அந்தகாரம் (darkness); மயக்கம் (mental delusion, clouded state of mind); அஞ்ஞானம் (spiritual ignorance concerning god);

மதி - அறிவு; ஞானம்;

மாலின் இருள்தீர் மதியே - அஞ்ஞானத்தால் உண்டாகும் துன்பத்தினை நீக்குகின்ற அறிவுவடிவு ஆனவனே;

2)
வேலை விடம்சேர் மிடற்றாய் போற்றி
மேலை வினைதீர் விமலா போற்றி
காலை உதிக்கும் கதிரே போற்றி
மாலை நீக்கும் மருந்தே போற்றி.

வேலை - கடல்;

மிடற்றாய் - கண்டத்தை உடையவனே; (மிடறு - கழுத்து);

மேலை வினை - ஆகாமியம் (karma which is yet to come, actions good and bad of the present life which are expected to bring their rewards in future births);

விமலன் - மலம் அற்றவன்; பரிசுத்தமானவன்;

கதிர் - சூரியன்; (காலை உதிக்கும் சூரியன் போல் செந்நிறம் உடையவன்);

மால் - மயக்கம் (illusion, delusion, aberration of mind; dullness; stupor; confusion);

மருந்து - அமிர்தம்; ஔஷதம் (medicine);

3)
சின்முத் திரைசேர் கையாய் போற்றி
சன்மத் தொடரைத் தடுப்பாய் போற்றி
புன்மை தீர்க்கும் புனிதா போற்றி
நன்மை நல்கும் நாதா போற்றி.

சின்முத்திரை - Hand-pose assumed by a guru while giving spiritual instruction;

சன்மத் தொடர் - பிறவித் தொடர்;

தடுத்தல் - தடைசெய்தல்; விலக்குதல் (to ward off, avert);

புன்மை - இழிவு (meanness, lowness, vileness); குற்றம் (fault);

4)
ஆசான் ஆகி அமர்வாய் போற்றி
பேசா துரைக்கும் பிரானே போற்றி
ஆசா பாசம் அறுப்பாய் போற்றி
நேசா கல்லால் நிழலா போற்றி.

ஆசாபாசம் - ஆசையாகிய பந்தம் (noose of desire);

கல்லால் - ஆலமர வகைகளுள் ஒன்று;

நிழல் - ஸ்தானம் (place);

5)
கறையை உடைய கண்டா போற்றி
பிறையை அணிபூ ரணனே போற்றி
குறைகள் தீர்க்கும் கோவே போற்றி
மறைகள் சொல்லும் மணியே போற்றி.

பிறையை அணி பூரணன் - பிறைச்சந்திரனை அணிந்த முழுமுதல்;

கோ - தலைவன்; அரசன்;

6)
உறவில் லாதார்க்(கு) உறவே போற்றி
இறவில் லாத ஈசா போற்றி
பிறவிப் பிணிக்கு மருந்தே போற்றி
அறவ ஆல மர்ந்தாய் போற்றி.

(சுந்தரர் தேவாரம் - திருமுறை 7.70.6 -

“குறைவிலா நிறைவே..... உறவிலேன் உனையன்றி..... அறவனே எனை அஞ்சல் என்றருளாய் ஆர் எனக்குறவு அமரர்கள் ஏறே")

இறவு - சாவு (death);

அறவ – அறவனே; (அறவன் - அறவடிவினன்);

ஆல் அமர்ந்தாய் - ஆலமரத்தின்கீழ் அமர்ந்தவனே;

7)
உழையின் உரியை உகந்தாய் போற்றி
பழைய வினைதீர் பரமா போற்றி
குழைய ணிந்த குழகா போற்றி
அழக ஆல மர்ந்தாய் போற்றி.

உழை - மான் (deer);

உரி - தோல்; (அப்பர் தேவாரம் - திருமுறை - 6.47.7 - “உழையுரித்த மானுரிதோ லாடை யானே”)

உகத்தல் - மகிழ்தல்; விரும்புதல்

குழை - குண்டலம் (a kind of earring) – ஆண்கள் காதில் அணிவது;

குழக – குழகனே; (குழகன் - இளையோன் (youth); அழகன் (beautiful person) );

அழக – அழகனே;

8)
மானை ஏந்தெம் மானே போற்றி
வானைக் கடந்து வளர்வாய் போற்றி
மோனத் தாலே மொழிவாய் போற்றி
ஞானச் சுடரே போற்றி போற்றி.

எம்மான் - எம் சுவாமி (our lord);

மோனம் - மௌனம்;

ஞானச்சுடர் - [ஞான ஒளியாய் இருப்பவன்] கடவுள் (God, as the embodiment of Spiritual Light);

9)
தன்போல் இல்லாத் தனியாய் போற்றி
இன்பால் ஆடும் இறைவா போற்றி
தென்பால் நோக்கும் தேவே போற்றி.
அன்பர்க் கறங்கள் அருள்வாய் போற்றி.

தனியன் - ஒன்றியானவன். (தனி - ஒப்பின்மை (Uniqueness, matchlessness) ); (தனியாய் - ஏகனாய் இருப்பவனே);

(திருவாசகம் - திருச்சாழல் - 8.12.3 - "தாயுமிலி தந்தையிலி தான்தனியன்...");

(அப்பர் தேவாரம் - 5.96.3 - “உலகம் முழுது ஆளினும் தனியாய் நீ”);

இன் பால் ஆடுதல் - இனிய பாலால் அபிஷேகம் செய்யப் பெறுதல்;

தென் பால் - தென் திக்கு;

10)
சத்தி இணையும் சத்தே போற்றி
அத்தி முகத்தன் அத்தா போற்றி
சித்தி அளிக்கும் சித்தே போற்றி
முத்தி அளிக்கும் முத்தே போற்றி.

சத்தி - சக்தி - உமை; பார்வதி;

சத்து - மெய்ப்பொருள்; என்றும் உள்ளது (That which exists through all times, the Imperishable);

அத்தி முகத்தன் - யானை முகம் உடைய கணபதி - விநாயகர்;

அத்தன் - தந்தை;

சித்தி - கைகூடுகை (Success, realization, attainment); மோட்சம் (Final liberation);

சித்து - அறிவு (Intellect, intelligence); அறிவுடைப் பொருள் (Intelligent being);

முத்தி - முக்தி;

11)
முன்பின் இல்லா முதல்வா போற்றி
இன்பின் வடிவாய் இருப்பாய் போற்றி
அன்பி னால்ஆல் அமர்வாய் போற்றி
துன்பின் கருவைத் துடைப்பாய் போற்றி.

முன் பின் இல்லா முதல்வன் - காலத்தைக் கடந்தவன்;

இன்பின் வடிவு - ஆனந்த சொரூபி; (இன்பு - இன்பம்);

அன்பு - கருணை; நேசம்;

துன்பின் கரு - துன்பத்திற்கு மூலமான வினை; (துன்பு - துன்பம்);

துடைத்தல் - அழித்தல்; நீக்குதல்;

12)
கோதி லாத குணத்தாய் போற்றி
நீதி வழுவார் நேசா போற்றி
போதிக் கின்ற பொருளே போற்றி
ஆதி குருவே போற்றி போற்றி.

கோது - குற்றம் (fault, blemish, defect, error);

நீதி - ஒழுக்கநெறி (right conduct, morality);

நேசன் - அன்பன்;

பொருள் - மெய்ப்பொருள் - கடவுள் (god);

அன்புடன்,

வி. சுப்பிரமணியன்