01.16 – ஆரூர் - (திருவாரூர்)

01.16 – ஆரூர் - (திருவாரூர்)



2008-01-01
திருவாரூர்
-------------------
(நாலடித் தரவு கொச்சகக் கலிப்பா)



1)
கண்ணிருந்தும் குருடனெனக் காலத்தைக் கழிப்பதற்கே
எண்ணுகிற என்மனமே; இருவிழியும் இல்லாது
மண்ணகழ்ந்து குளம்வெட்டி மகிழ்தண்டிக்(கு) எம்பெருமான்
தண்ணருள்செய் தலம்ஆரூர் தன்னையடைந்(து) உய்வாயே.

பதம் பிரித்து:

கண் இருந்தும் குருடன் எனக் காலத்தைக் கழிப்பதற்கே

எண்ணுகிற என் மனமே; இரு விழியும் இல்லாது

மண் அகழ்ந்து குளம் வெட்டி மகிழ் தண்டிக்கு எம்பெருமான்

தண் அருள்செய் தலம் ஆரூர்தன்னை அடைந்து உய்வாயே.

தண்டி - தண்டியடிகள் நாயனார்; (தண்டியடிகள் வரலாற்றைப் பெரிய புராணத்திற் காண்க);

தண் அருள் - குளிர்ந்த திருவருள்; (சம்பந்தர் தேவாரம் - திருமுறை 2.75.11 - 'கண்ணு மூன்று....தண்ணருள் பேணி....');

ஆரூர்தன்னை - திருவாரூரை;

2)
இளம்பெண்டிர் பொருள்இவற்றின் ஈர்ப்பினிலே உழன்றுழன்று
தளர்கின்ற மடநெஞ்சே; தன்கண்கள் காணாதும்
குளம்வெட்டும் தண்டிக்குக் கொன்றையணி முக்கண்ணன்
அளப்பரிய அருள்செய்த ஆரூரை அடைவாயே.

ஈர்ப்பு - இழுப்பு;

உழலுதல் - அலைதல்; நிலைகெடுதல்;

தளர்தல் - சோர்ந்து போதல்;

மட நெஞ்சே - பேதை மனமே;

தன்கண்கள் காணாதும் - தன்னுடைய கண்கள் பார்வையில்லாதபோதும்;

கொன்றை அணி முக்கண்ணன் - கொன்றை மலர் அணிகின்ற, மூன்று கண்கள் உடைய சிவன்;

அளப்பு அரிய அருள் - அளவு இல்லாத அருள் - பேரருள்;

3)
புலனாசை மிகவாகிப் பொல்லாங்கே புரிந்துபெற்ற
பலன்யாது; கண்களிலே பார்க்கின்ற திறன்சிறிதும்
இலர்ஆன தண்டிசெய்த இறைபணியை ஏற்றுவிழி
நலம்ஆக்கும் ஈசனுறை நல்ஆரூர் அடைநெஞ்சே.

பதம் பிரித்து:

புலன் ஆசை மிக ஆகிப் பொல்லாங்கே புரிந்து பெற்ற

பலன் யாது; கண்களிலே பார்க்கின்ற திறன் சிறிதும்

இலர் ஆன தண்டி செய்த இறை பணியை ஏற்று, விழி

நலம் ஆக்கும் ஈசன் உறை நல் ஆரூர் அடை நெஞ்சே.

பொல்லாங்கு - தீமை; கேடு;

யாது - என்ன?

இறைபணி - திருத்தொண்டு;

4)
உயிர்வளர்க்கும் வழிஒன்றும் உணராமல் தீவினையாம்
பயிர்வளர்க்கும் மடநெஞ்சே; பலர்சிரித்தும் கண்ணின்றிக்
கயிறுகட்டிக் குளம்வெட்டிக் கைங்கரியம் செய்தண்டிக்(கு)
எயில்எரித்தான் அருள்புரிந்த இடம்ஆரூர் அடைவாயே.

உயிர் - ஆன்மா;

ஆம் - An appositional particle – ஆகிய;

கைங்கரியம் செய் தண்டிக்கு - திருத்தொண்டு செய்த தண்டியடிகளுக்கு;

எயில் எரித்தான் - முப்புரங்கள் எரித்த சிவன்;

5)
பெண்டிர்க்கும் பொருளுக்கும் பித்தாகி உடல்பெருக்கும்
உண்டிக்கே தினந்தோறும் உழல்கின்ற மடநெஞ்சே;
தண்டிக்குக் கண்ணிரண்டும் தந்தசிவன் உறைகின்ற
எண்டிக்கும் போற்றுகிற எழில்ஆரூர் அடைவாயே.

உண்டி - உணவு;

தண்டி - தண்டி அடிகள் நாயனார்;

எண்டிக்கும் - எண் திக்கும் - எட்டுத் திசைகளும் - உலக மக்கள் எல்லாம்;

6)
உய்கின்ற வழிஉணரா(து) ஓயாமல் உழன்றுழன்று
தொய்கின்ற மடநெஞ்சே; தொட்டுணர்ந்து குளம்வெட்டி
நைகின்ற தண்டிக்கு நம்பெருமான் இன்னருள்கள்
செய்கின்ற தலமான திருவாரூர் அடைவாயே.

தொய்கின்ற - சோர்கின்ற;

தொட்டு உணர்ந்து - பார்வை இல்லாததால் கயிற்றைத் தொட்டு உணர்ந்து செல்லுதல்;

நைகின்ற - மனம் உருகுகின்ற;

இன் அருள்கள் - இனிய அருள்கள்;

(அப்பர் தேவாரம் - திருமுறை 6.49.10 - 'கையாற் கயிலை யெடுத்தான் தன்னைக்..... மீண்டே அவற்குஅருள்கள் நல்கி னான்காண்....');

7)
அழிகின்ற உடல்மேலே ஆசையுற்றுத் தீவினைசெய்(து)
இழிகின்ற என்மனமே; இருவிழியும் இல்லாதும்
கழியூன்றிக் கைப்பணிசெய் தண்டியடி களுக்கருளும்
விழிமூன்று காட்டுசிவன் ஆரூரை விழைவாயே.

கழி ஊன்றி - கோலை நட்டு;

கைப்பணி - கையால் செய்யும் தொண்டு; (காரைக்கால் அம்மையார் - அற்புதத் திருவந்தாதி - 11.4.72 - “கண்டெந்தை என்றிறைஞ்சிக் கைப்பணியான் செய்யேனேல்”);

விழி மூன்று காட்டு சிவன் - மூன்று கண்கள் உடைய சிவன்;

விழைதல் - விரும்புதல்;

8)
விதிஎல்லாம் எளிதாக வென்றுவிடும் வழிஉண்டே
மதியில்லா இராவணனை மலையின்கீழ் நெரித்தவனே
கதிநீயே என்றிருந்த தண்டிக்குக் கண்தந்த
பதிஆகும் ஆரூர்போய்ப் பணிவாயே மடநெஞ்சே.

உரைநடை:

மட நெஞ்சே! விதி எல்லாம் எளிதாக வென்றுவிடும் வழி உண்டே;

'மதி இல்லா இராவணனை மலையின்கீழ் நெரித்தவனே! கதி நீயே!' என்று இருந்த தண்டிக்குக் கண் தந்த பதி ஆகும் ஆரூர் போய்ப் பணிவாயே.

பதி - தலம்;

9)
மண்ணுக்கும் விண்ணுக்கும் அப்பாலாய் மால்பிரமன்
கண்ணுக்குத் தெரியாத கழல்முடியை உடையசெந்தீ
வண்ணத்தன், வந்திக்கும் தண்டிக்கின் னருள்செய்த
அண்ணிக்கும் அரன்உறையும் ஆரூரை அடைநெஞ்சே.

செம் தீ வண்ணத்தன் - சிவந்த தீ உரு ஆனவன்;

வந்தித்தல் - போற்றுதல்;

அண்ணித்தல் - தித்தித்தல்;

மண்ணுக்கும் விண்ணுக்கும் அப்பால் ஆய் - எல்லா அண்டங்களையும் கடந்து நின்று;

மால் பிரமன் கண்ணுக்குத் தெரியாத கழல் முடியை உடைய செம் தீ வண்ணத்தன் - திருமாலாலும் பிரமனாலும் காண இயலாத திருவடியையும் திருமுடியையும் உடைய சிவந்த தீ உரு ஆனவன்;

வந்திக்கும் தண்டிக்கு இன் அருள்செய்த – வணங்கிய தண்டி அடிகளுக்கு இனிய அருள்புரிந்த;

அண்ணிக்கும் அரன் உறையும் ஆரூரை அடை நெஞ்சே - (பக்தர்களுக்குத்) தித்திக்கும் சிவன் உறைகிற திருவாரூரைச் சென்று அடை மனமே.

10)
மறைநெறியைத் துறந்தெங்கள் வழியேற்று வருகவென்னும்
புறநெறிகள் புகல்கின்ற பொய்களிலே மயங்காமல்
அறநெறியில் நிற்பவர்கள் அன்பன்தண் டிக்கருளும்
இறையவன்முக் கண்ணனுறை எழில்ஆரூர் எய்துவரே.

பதம் பிரித்து:

மறை நெறியைத் துறந்(து) எங்கள் வழி ஏற்று வருக என்னும்

புற நெறிகள் புகல்கின்ற பொய்களிலே மயங்காமல்

அற நெறியில் நிற்பவர்கள், அன்பன் தண்டிக்(கு) அருளும்

இறையவன் முக்கண்ணன் உறை எழில் ஆரூர் எய்துவரே.

மறை நெறி - வேதநெறி;

புற நெறி - பரசமயங்கள்;

அற நெறி - தர்ம மார்க்கம் (Path of virtue);

அன்பன் - பக்தன்;

எழில் ஆரூர் - அழகிய திருவாரூர்;

எய்துதல் - அடைதல்;

11)
நேர்வழியிற் செல்வதற்கு நினையாத மடநெஞ்சே
நீர்வழியும் சடையுடைய நிமலன்தாள் போற்றிவந்த
பார்வையிலாப் பத்தன்தண் டிக்கருளும் பரமனுறை
ஊர்வளங்கள் மலிகின்ற ஆரூர்சென் றுய்வாயே.

பதம் பிரித்து:

நேர் வழியில் செல்வதற்கு நினையாத மட நெஞ்சே;

நீர் வழியும் சடை உடைய நிமலன் தாள் போற்றி வந்த

பார்வை இலாப் பத்தன் தண்டிக்(கு) அருளும் பரமன் உறை

ஊர், வளங்கள் மலிகின்ற ஆரூர் சென்(று) உய்வாயே.

நிமலன் - மலம் இல்லாதவன் - சிவன்;

நினையாத – எண்ணாத;

தாள் - திருவடி;

பரமன் உறை ஊர் - வினைத்தொகை - பரமன் உறைகின்ற ஊர்;

மலிகின்ற - மிகுந்து இருக்கின்ற;

அன்புடன்,
வி. சுப்பிரமணியன்



பிற்குறிப்பு:

திருவாரூர் - கோயில் தகவல்கள்: http://temple.dinamalar.com/New.php?id=598 )