01.08 – ஒற்றியூர் - (திருவொற்றியூர்)

01.08 – ஒற்றியூர் - (திருவொற்றியூர்)



2007-11-18
திருவொற்றியூர்
-------------------------
("வஞ்சித்துறை")
(தேவாரத்தில் - திருவிருக்குக்குறள்)



1)
ஒற்றியூர் உறைகிற
பெற்றமே றரன்தொழக்
குற்றமே இலர்களாய்
வெற்றியே பெறுவரே.

பெற்றம் ஏறு அரன் தொழ – இடப வாகனம் உடைய சிவபெருமானைத் தொழுதால்;

2)
அலகிலாப் பெற்றியன்
நலம்தரும் ஒற்றியை
வலம்வரும் பத்தருக்
குலகினில் இன்பமே.

அலகு இலாப் பெற்றியன் - அளவு இல்லாத தன்மை உடையவன்;

ஒற்றி - திருவொற்றியூர்; (அப்பர் தேவாரம் - 6.83.4 - "நீராருஞ் செஞ்சடைமேல் .... கடலொற்றி கருதி னானைப் ..." - ... கடலை அடுத்துள்ள ஒற்றியூரை உயர்வாக மதிப்பவனாகவும் ...);

3)
சுந்தரர் போற்றிய
வெந்தவெண் ணீறணி
எந்தையின் ஒற்றிசேர்
சிந்தையர் நல்லரே.

வெண்ணீறு அணி எந்தை - வெள்ளிய திருநீற்றினை அணியும் எம் தந்தை;

ஒற்றி சேர் சிந்தையர் - திருவொற்றியூரை அடையும் மனத்தினர்;

4)
நெற்றியில் கண்ணுடைப்
புற்றிடம் கொண்டவர்
ஒற்றியைக் கண்டவர்
பற்றறும் உண்மையே.

புற்றிடம் கொண்டவர் - திருவொற்றியூர் இறைவன் பெயர்;

பற்று அறும் - பந்தங்கள் நீங்கும்;

5)
புண்ணிய போற்றியென்பார்
திண்ணிய தீவினைதீர்
அண்ணலார் ஒற்றிநகர்
எண்ணுவாய் ஏழைநெஞ்சே.

புண்ணிய - புண்ணியனே;

திண்ணிய - வலிய;

ஏழை நெஞ்சே - பேதை மனமே;

6)
மருள்களை தேசனவன்
அருளுடை ஈசனுறை
திருமலி ஒற்றிதொழ
வருவன வெற்றிகளே!

மருள் - மயக்கம்; குழப்பம்; (Bewilderment of mind, confusion)

தேசன் - ஒளி வடிவானவன்;

மருள் களை தேசன் - வினைத்தொகை - மயக்கத்தைப் போக்கும் ஒளிவடிவானவன்;

திரு மலி - செல்வம்/மங்கலம் திகழ்கிற;

7)
மெய்யினில் நீறணி
ஐயன தொற்றியைக்
கைதொழ வெற்றியே
ஐயுற வில்லையே.

நீறு அணி ஐயனது ஒற்றியை - திருநீறு அணிகிற தலைவன் ஆன சிவனது திருவொற்றியூரை;

ஐயுறவு - ஐயம்; சந்தேகம்;

8)
இலங்கையர் கோனைஅன்(று)
அலந்திட வைத்தவன்
தலம்திரு ஒற்றியை
வலம்செய வெற்றியே.

இலங்கையர் கோன் - இலன்க்கைக்கு அரசன் - இராவணன்;

அலத்தல் - வருந்துதல்;

வலஞ்செய்தல் - வலம்வருதல்; பிரதட்சிணம் செய்தல்;

9)
அயன்அரி போற்றெரி
பெயர்பல ஏற்றவன்
வியன்நகர் ஒற்றிசேர்
துயர்அறும் வெற்றியே.

எரி - நெருப்பு;

வியன் - பெருமை; சிறப்பு; அகலம்;

ஒற்றி சேர் - திருவொற்றியூரை அடை;

'மனமே' என்பது தொக்கு நிற்கிறது.

10)
மெய்யறி வற்றவர்சொல்
பொய்யுரை விட்டொழிமின்
உய்வழி ஒற்றியுறை
சைவனின் பொற்பதமே.

மெய் அறிவு அற்றவர் - மெய்ஞ்ஞானம் இல்லாதவர்கள்;

பொய் உரை விட்டு ஒழிமின் - பொய்களைப் பொருட்படுத்தாமல் ஒதுக்குவீர்;

உய்வழி - வினைத்தொகை - உய்யும் வழி;

சைவன் - சிவன்;

பொற்பதம் - பொன்னடி;

11)
சுடலையில் ஆடிடும்
அடல்விடை ஐயனின்
கடலயல் ஒற்றிசேர்
நடலையொன் றில்லையே.

சுடலை - சுடுகாடு;

அடல் விடை - வலிய இடபம்;

கடல் அயல் ஒற்றி சேர் - கடலை அடுத்துள்ள திருவொற்றியூரை அடை;

நடலை - துன்பம்;

அன்புடன்,
வி. சுப்பிரமணியன்



பிற்குறிப்பு:

வஞ்சித்துறை - நான்கு குறளடிகள் கொண்ட பாடல். (பாடலில் 4 அடிகள். அடிக்கு 2 சீர்கள்).