01.28 – பொது - தட்சிணாமூர்த்தி போற்றி-1

01.28 – பொது - தட்சிணாமூர்த்தி போற்றி-1



2008-03-23
தட்சிணாமூர்த்தி போற்றி - 1
-----------------------------------
(நாலடித் தரவு கொச்சகக் கலிப்பா)
(10 பாடல்கள்)

1)
கல்லால மரத்தின்கீழ்க் கரம்குவித்துக் கழல்போற்றும்
நல்லார்கள் நால்வர்க்கு நான்மறையின் ஞானத்தைச்
சொல்லேதும் சொல்லாது கற்பித்த தூயனிருள்
இல்லாத நிலையளிக்கும் ஈசன்பொற் றாள்போற்றி.

கல்லாலம் - கல்லால் - ஆலமரத்தில் ஒருவகை - கல்லால மரத்தடியில் தக்ஷிணாமூர்த்தி வீற்றிருப்பார்;

நல்லார்கள் நால்வர் - சனகாதி முனிவர்கள் - சனகன், சனாதனன், சனற்குமாரன், சனந்தனன் என்ற நான்கு ரிஷிகள்;

நான்மறை - நால்வேதங்கள்;

தூயன் - பரிசுத்தமானவன்;

இருள் - அறியாமை;

2)
சனகாதி முனிவரெலாம் தாள்பணிந்து கேட்டிருக்கச்
சினமாசை தீவினைகள் தீர்கின்ற வழிகாட்டி
மனமாசை அகற்றுகிற மறைப்பொருளை விரித்தருளி
முனமாலின் கீழிருந்த முக்கண்ணன் தாள்போற்றி.

பதம் பிரித்து:

சனகாதி முனிவர் எலாம் தாள் பணிந்து கேட்டிருக்கச்,

சினம் ஆசை தீவினைகள் தீர்கின்ற வழி காட்டி,

மன மாசை அகற்றுகிற மறைப்பொருளை விரித்து அருளி,

முனம் ஆலின் கீழ் இருந்த முக்கண்ணன் தாள்போற்றி.

எலாம் - எல்லாம்;

மாசு - அழுக்கு; குற்றம்;

மறை - வேதம்;

விரித்தல் - விளக்கி உரைத்தல் (To expound; to elaborate, as in writing or in speaking);

முனம் - முன்னம் - முன்;

ஆல் - கல்லாலமரம்;

இருத்தல் - உட்கார்தல் (To sit);

3)
குறப்பெண்ணை மணம்புரிந்த குகன்தன்னைப் பயந்தபிரான்
பிறப்போடு மரணமெனும் பெருந்துன்பம் தனைநீக்கும்
சிறப்பான சிவதன்மம் செப்பக்கல் லாலமர்ந்த
கறைக்கண்டன், நெற்றியிலோர் கண்ணுடையான் கழல்போற்றி.

குகன்தன்னைப் பயந்த பிரான் - முருகனைப் பெற்ற தலைவன்; (பயத்தல் - To beget, generate, give birth to; பெறுதல்; To give; கொடுத்தல்);

சிவதன்மம் - சிவதர்மம் ஆகிய அறநெறிகள்; (சம்பந்தர் தேவாரம் - 2.43.6 - “திறங்கொண்ட அடியார்மேல் தீவினைநோய் வாராமே அறங்கொண்டு சிவதன்மம் உரைத்தபிரான்”)

கறைக்கண்டன் - நீலகண்டன்;

4)
இருள்சேர்க்கும் இருவினையும் ஈட்டவிழை மனத்தகத்து
மருள்தீர்க்கும் மறைப்பொருளை வாய்ச்சொற்கள் இல்லாதே
அருள்புரியும் குருவாக அன்றாலின் கீழமர்ந்த,
கருள்தெரியும் கண்டத்தன் கமலமொத்த கழல்போற்றி.

இருள் - துன்பம்; அறியாமை; (திருக்குறள் - "இருள்சேர் இருவினை...”);

விழைதல் - விரும்புதல்;

மருள் - மயக்கம்;

கருள் தெரியும் கண்டத்தன் - நீலகண்டன்; (கருள் - கருமை; கறுப்பு);

கமலம் ஒத்த கழல் - தாமரைமலர் போன்ற, கழல் அணிந்த திருவடி;

5)
பிடிவில்லா மலையெடுத்த பெருமான்பேர் பலஉடையான்
வடிவில்லா மெய்ப்பொருளாய் வடிவெல்லாம் ஆகியவன்
முடிவில்லான் பிறைமதிசேர் முடிஉடையான் கல்லாலின்
அடியில்வீற் றிருந்(து)அறம்சொல் அண்ணலவன் கழல்போற்றி.

பிடி வில்லா மலை எடுத்த – (முப்புரம் எரித்தபோது கையிற்) பிடிக்கின்ற வில்லாக மேருமலையை ஏந்திய;

வடிவு இல்லா - உருவம் அற்ற;

முடிவு இல்லான் - அழிவற்றவன்;

6)
ஈனமளி அறியாமை இருள்போக்கும் பரஞ்சோதி
மோனமொழி யோடொருசின் முத்திரையால் முனிவர்க்கு
ஞானமுரைத் தருள்வதற்குக் கல்லாலே நல்லவொரு
தானமென விரும்பியவன் தாமரைத்தாள் இணைபோற்றி.

ஈனம் அளி அறியாமை இருள் - இழிவைக் கொடுக்கின்ற அஞ்ஞானம் என்ற இருள்;

பரஞ்சோதி - மேலான சோதி (Supreme Being, as the Light Divine;);

மோன மொழி - மௌன மொழி;

சின்முத்திரை - உபதேசக் குறியாகச் சுட்டுவிரல் நுனியைப் பெருவிரல் நுனியுடன் சேர்த்துக்காட்டும் ஞானமுத்திரை;

நல்ல ஒரு தானம் - ஒரு நல்ல இடம்; (தானம் - ஸ்தானம் - இடம்);

7)
குற்றமிலாக் குணமுடையோர் குவித்தகரத் தோடமர்ந்த
நற்றவர்கள் நால்வர்க்கு நான்மறையின் பொருளுணர்த்த
உற்றஇடம் எனக்கல்லால் உகந்தபரன் மும்மலங்கள்
அற்றசிவன் திருநட்டம் ஆடுமரன் அடிபோற்றி.

நற்றவர்கள் நால்வர் - சிறந்த தவசிகளான சனகாதியர்கள்;

உகந்த – விரும்பிய;

திருநட்டம் ஆடும் அரன் - திருக்கூத்து ஆடுகின்ற ஹரன்;

8)
செய்தவினை தருமிடர்கள் தீர்க்கின்ற மெய்ந்நெறியை
எய்தமிக எண்ணிநிதம் இணையடியை மறவாது
கைதொழுத நால்வர்க்குக் கருணையொடு கல்லால்கீழ்
உய்திதரும் சிவதன்மம் உரைத்தபிரான் கழல்போற்றி.

எய்த – அடைய; (எய்துதல் - அடைதல்);

நிதம் - தினமும்;

உய்தி - உய்வு;

9)
ஆலமர நிழலினிலே அருட்குருவாய் அமர்ந்தங்குக்
காலடியில் கரம்குவித்துக் கவனத்தோ(டு) அறம்கேட்ட
சீலமிகு நால்வர்க்குச் செந்நெறியைச் செப்பியவன்
கோலமிகு செங்கமலக் குரைகழற்சே வடிபோற்றி.

நிழல் - ஸ்தானம்; இடம்; (Place);

செந்நெறி - சன்மார்க்கம்;

செப்புதல் - சொல்லுதல்;

கோலம் மிகு செங்கமலக் குரைகழல் சேவடி - அழகிய தாமரை போன்ற, ஒலிக்கின்ற வீரக்கழல் அணிந்த, சிவந்த திருவடி;

10)
அஞ்ஞான இருளகற்றும் ஆசிரியன் அடிபோற்றி
மெய்ஞ்ஞான ஒளியாக விளங்குமரன் பதம்போற்றி
எஞ்ஞான்றும் அழியாத இறைவனடி இணைபோற்றி
செஞ்ஞாயி றொத்திலங்கு சிவன்பாத மலர்போற்றி.

விளங்கும் அரன் - பிரகாசிக்கும் ஹரன்;

எஞ்ஞான்றும் - எக்காலத்திலும்;

அடியிணை - இரு திருவடிகள்;

செஞ்ஞாயிறு ஒத்து இலங்கு சிவன் பாதமலர் - செஞ்சூரியன் போல் திகழ்கின்ற சிவபெருமான் மலர்ப்பாதம்;

(அப்பர் தேவாரம் - 4.112.9 - “சிவனெனும் நாமம் தனக்கே உடைய செம்மேனி எம்மான்” - சிவன் - செய்யன். தமிழ்ச் சொல்லாகக் கொண்டு பொருள்கூறிய இடம் இது.);

(அப்பர் தேவாரம் - 4.17.9 - “செஞ்ஞாயி றடிவண்ணம் ஆரூர் அரநெறியார்க்கே” - அவர் திருவடியின் நிறம் சிவந்த காலை ஞாயிற்றின் நிறமாகும்.);

அன்புடன்,

வி. சுப்பிரமணியன்