03.04.050 - சிவன் - புத்தகம் - சிலேடை

03.04 – சிவன் சிலேடைகள்

2006-05-13

3.4.50 - சிவன் - புத்தகம் - சிலேடை

-------------------------------------------------------------

கற்றவர் காதலிப்பர் கையோடு கொண்டெங்கும்

சுற்றுவர் நல்ல துணையென்பர் வெற்றிபெற

வேண்டி உலகோதும் தையல்சேர் மேனியுண்டு

தாண்டவனார் ஓர்புத் தகம்.

சொற்பொருள்:

கற்றவர் - 1. படித்தவரகள்; / 2. ஞானநூல்களைக் கற்றவர், வழிபடக் கற்றவர்;

கையோடு - 1. உடன்; / 2. கையில் ஓடு (மண்டையோடு);

என்பர் - 1. என்று சொல்வர்; / 2. எலும்பை அணிபவர்;

வேண்டுதல் - 1. விரும்புதல்; / 2. பிரார்த்தித்தல்;

ஓதுதல் - 1. படித்தல்; / 2. ஜபம் செய்தல்; பாடுதல்;

தையல் - 1. தைப்பு (Sewing, stitching); / 2. பெண்;

தாண்டவம் - கூத்துவகை;

புத்தகம்:

கற்றவர் காதலிப்பர் - படித்தவர்கள் அதனை விரும்புவார்கள்;

கையோடு கொண்டு எங்கும் சுற்றுவர் - எங்குச் சென்றாலும் அதனை உடன் எடுத்துச் செல்வார்கள்;

நல்ல துணை என்பர் - நல்ல துணை ஆகும் என்பார்கள்;

வெற்றி பெறவேண்டி உலகு ஓதும் - உலக மக்கள் (பள்ளியில், வேலையில்) வெற்றி பெற அதனை விரும்பிப் படிப்பார்கள்;

தையல் சேர் மேனி உண்டு - புத்தகத்தில் தையலும் (binding) இருக்கும்;

ஓர் புத்தகம் - ஒரு நூல்;

சிவன்:

கற்றவர் காதலிப்பர் - ஞானிகள் நேசிப்பார்கள்;

கை ஓடு கொண்டு எங்கும் சுற்றுவர் - கையில் ஒரு மண்டையோட்டை ஏந்திப் பிச்சைக்காக எங்கும் திரிபவர்.

நல்ல துணை - பக்தர்களுக்குச் சிறந்த துணை ஆவார்.

என்பர் - எலும்பை அணிபவர்;

வெற்றி பெற வேண்டி உலகு ஓதும் - வாழ்க்கையில் வெற்றிபெற மக்கள் பிரார்த்தனை செய்து அவரது புகழைப் பாடுவர்;

தையல் சேர் மேனி உண்டு - பார்வதியோடு இணைந்த வடிவம் உள்ளவர் - அர்த்தநாரீஸ்வரர்;

தாண்டவனார் - கூத்து ஆடுபவர்; நடராஜர்;

வி. சுப்பிரமணியன்

-------------------------------- -------------------------------