03.04.029 - சிவன் - செயற்கைக்கோள் (Satellite) - சிலேடை - 2

03.04 – சிவன் சிலேடைகள்

2006-04-16

3.4.29 - சிவன் - செயற்கைக்கோள் (Satellite) - சிலேடை - 2

--------------------------------------------------------------------------------

கலமேந்தும் கல்லால் அடியுறலும் ஆகும்

உலகுவலம் செய்யும் உயர நலந்திகழக்

காட்சிதரும் தீயுமுருக் காட்டும் செயற்கைக்கோள்

மாட்சி மிகுகயிலை மன்.

சொற்பொருள்:

கலம் - 1. விண்கலம் (Rocket); / 2. உண்கலம் (பிச்சைப் பாத்திரம்);

உறுதல் - 1. அனுபவித்தல்; / 2. இருத்தல்;

கல்லால் அடி உறல் - 1. கல்லினால் அடி வாங்குதல்; / 2. கல்லால் மரத்தின்கீழ் இருத்தல்;

தீதல் - எரிந்துபோதல்;

தீ - நெருப்பு;

உரு - வடிவம்;

மாட்சி - மகிமை; அழகு;

மன் - அரசன்; தலைவன்;

செயற்கைக்கோள்:

கலம் ஏந்தும் - விண்கலம் அதனைத் தாங்கி மேலே கொண்டு செல்லும்.

கல்லால் அடியுறலும் ஆகும் - அங்கு ஆகாசத்தில் பறக்கும் விண்கற்களால் சில சமயம் தாக்கப்படும்.

உலகு வலம் செய்யும் - உலகைச் சுற்றிவரும்.

உயர நலம் திகழக் காட்சி தரும் - (தொலைநோக்கியால் பார்த்தால்) உயரத்தில் அழகாகத் தோன்றும்.

தீயும் உருக் காட்டும் - (அதன் ஆயுள் முடிந்து மீண்டும் காற்றுமண்டலத்துள் நுழையும்பொழுது) எரிகின்ற வடிவத்தைக் காட்டும். (எரிந்துபோகும்);

செயற்கைக்கோள் - மனிதர்கள் செய்து ஏவிய உபக்கிரகம் (Satellite);

சிவன்:

கலம் ஏந்தும் - கையில் பிச்சைப் பாத்திரம் ஏந்துவான்.

கல்லால்-அடி உறலும் ஆகும் - 1. சமயத்தில் கல்லால் அடியும் உண்டு. (சாக்கிய நாயனார் வரலாற்றில் காண்க). 2. தட்சிணாமூர்த்தியாகக் கல்லால மரத்தின்கீழ் இருப்பவன்.

உலகு வலம் செய்யும் உயர - உலகத்தவர் மேன்மைபெற வேண்டி வலம்வந்து வணங்குவார்கள்.

நலந் திகழக் காட்சி தரும் - (அப்படி வணங்கும் சிறந்த பக்தர்களுக்கு) அழகிய தரிசனம் தருவான்.

தீயும் உருக் காட்டும் - 1. தீப் போன்ற செம்மேனியன்; 2. (அடிமுடி தேடிய சமயத்தில்) தீப்பிழம்பாய் நின்றவன். (உம் - அசை);

மாட்சி மிகு கயிலை மன் - மகிமையும் அழகும் மிகுந்த கயிலைநாதன்.

வி. சுப்பிரமணியன்

-------------------------------- -------------------------------