03.04.028 - சிவன் - செயற்கைக்கோள் (Satellite) - சிலேடை - 1

03.04 – சிவன் சிலேடைகள்

2006-04-16

3.4.28 - சிவன் - செயற்கைக்கோள் (Satellite) - சிலேடை - 1

--------------------------------------------------------------------------------

விண்ணில் உலாவி வெளியில் இருந்தாலும்

மண்ணில் எதுவும் மறைத்திட ஒண்ணுமோ

ஒன்றும் சுழியுமே உன்னில் இயக்குமெல்லாம்

குன்றவில் லான்செயற்கைக் கோள்.

சொற்பொருள்:

விண் - ஆகாயம்;

உலாவுதல் - 1. சஞ்சரித்தல்; இயங்குதல்; / 2. வியாபித்தல்;

உலாவி - உலாவியவன் - வியாபித்தவன்; (சூடி - சூடியவன்; ஆடி - ஆடியவன்; அவ்வாறே, உலாவி - உலாவியவன்);

வெளி - ஆகாசம்; புறம்; பகிரங்கம்;வெளிப்படை;

ஒண்ணுதல் - இயலுதல்;

ஒன்றுதல் - ஒன்றாதல்;

சுழி - 1. பூச்சியம் (zero); / 2. நீர்ச்சுழி;

உன்னுதல் - நினைத்தல்;

செயற்கைக்கோள்:

விண்ணில் உலாவி வெளியில் இருந்தாலும் - ஆகாசத்தில் சஞ்சரித்துப் பகிரங்கமாக (வெளிப்படையாக) இருந்தாலும்,

மண்ணில் எதுவும் மறைத்திட ஒண்ணுமோ - நம்மால் உலகில் எதனையும் அதனிடமிருந்து மறைக்க முடியாது. (உலகில் உள்ள அனைத்தையும் அது காணும்).

ஒன்றும் சுழியுமே உன்னில் இயக்கும் எல்லாம் - உன்னில் ஒன்றும் சுழியுமே இயக்கும் எல்லாம் - சிந்தித்துப் பார்த்தால், அதன் எல்லாச் செயல்களையும் ஒன்றும் பூச்சியமுமே இயக்கும். ("digital").

செயற்கைக்கோள் - மனிதர்கள் செய்து ஏவிய உபக்கிரகம் (Satellite);

சிவன்:

விண்ணில் உலாவி - ஆகாயத்தில் வியாபித்தவன்;

வெளியில் இருந்தாலும் மண்ணில் ஒன்றை மறைத்திட ஒண்ணுமோ - (அப்படி அவன்) ஆகாசத்தில் இருந்தாலும், பூமியில் நடக்கும் அனைத்தையும் அவன் அறிவான்.

ஒன்றும் சுழியுமே - (அவனது முடியில் கங்கையின்) நீர்ச்சுழியும் பொருந்தியிருக்கும்.

உன்னில் இயக்கும் எல்லாம் - திருவுள்ளம் கொண்ட மாத்திரத்திலேயே (இப்பிரபஞ்சத்தில்) எல்லாவற்றையும் இயக்குபவன்.

குன்றவில்லான் - மேருமலையை வில்லாக ஏந்திய சிவபெருமான். (பெரியபுராணம் - மூர்த்தி நாயனார் புராணம் - 12.15.13 - "நீண்ட மேரு வில்லான்");

வி. சுப்பிரமணியன்

-------------------------------- -------------------------------