03.04.024 - சிவன் - புத்தாண்டு - சிலேடை

03.04 – சிவன் சிலேடைகள்

2006-04-13

3.4.24 - சிவன் - புத்தாண்டு - சிலேடை

--------------------------------------------------------

ஆண்டு வருவதால் அங்கொன்று கூடுவதால்

வேண்டும் பொழுது விழவாடி வாழ்த்தலால்

காண்டற் கரிதாகும் மாண்பினால் இங்கொருபுத்

தாண்டெரு தேறும் அரன்.

சொற்பொருள்:

ஆண்டு வருதல் - 1. வருடம் பிறத்தல்; / 2. ஆட்சி செய்திருத்தல்;

காண்டல் - பார்த்தல்;

மாண்பு - மாட்சிமை; பெருமை;

புத்தாண்டு:

ஆண்டு வருவதால் - ஒரு (புதிய) வருடம் பிறத்தலால்;

அங்கு ஒன்று கூடுவதால் - ஆண்டின் எண் ஒன்று ஏறும் (அல்லது வயது ஒன்று கூடும்);

வேண்டும் பொழுது விழவு ஆடி வாழ்த்தலால் - வெவ்வேறு நாட்டவரும் விரும்பியவாறு வெவ்வேறு சமயத்தில் புத்தாண்டு என்று விழாக் கொண்டாடி ஒருவரை ஒருவர் வாழ்த்துவார்கள்;

காண்டற்கு அரிது ஆகும் மாண்பினால் - புத்தாண்டைக் கண்ணால் காண இயலாது;

இங்கு ஒரு புத்தாண்டு - இந்தப் பாடலில் புத்தாண்டு;

சிவன்:

ஆண்டு வருவதால் - உலகனைத்தும் ஆள்பவன்;

அங்கு ஒன்று கூடுவதால் - பார்வதியோடு ஒன்றாய் இணைந்து அம்மையப்பனாய்க் காண்பவன்;

வேண்டும் பொழுது விழவு ஆடி வாழ்த்தலால் - பக்தர்கள் வேண்டிக் கொள்கின்ற சமயத்தில் விழாக் கொண்டாடி அவனை வாழ்த்துவார்கள்;

காண்டற்கு அரிது ஆகும் மாண்பினால் - கண்ணுக்குப் புலப்படாமல் தன்னை ஒளித்துள்ளவன்; (அரி அயனுக்கும், பிறருக்கும் காண அரிதானவன்);

இங்கு எருது ஏறும் அரன் - இந்தப் பாடலில், இடபவாகனம் உடைய சிவன்;

வி. சுப்பிரமணியன்

-------------------------------- -------------------------------