03.04.023 - சிவன் - தமிழ் ஆண்டு - சிலேடை

03.04 – சிவன் சிலேடைகள்

2006-04-12

3.4.23 - சிவன் - தமிழ் ஆண்டு - சிலேடை

-------------------------------------------------------------------------

தொன்றுதொட்டுச் சுற்றிப் பலபேர் வலம்வரினும்

என்றும் புதுமை திகழ விடையிலெங்கோ

சென்றாலு மீண்டு வருவதால் தீப்பிழம்பாய்

அன்றோங்கி னான்தமிழ் ஆண்டு.

சொற்பொருள்:

பேர் - 1. நாமம்; / 2. மனிதர்; ஆள்;

திகழ விடையிலெங்கோ சென்றாலு மீண்டு - 1. திகழ இடையில் எங்கோ சென்றாலும் மீண்டு; / 2. திகழ விடையில் எம் கோ சென்றாலும் ஈண்டு;

விடை - இடபம்; எருது;

கோ - தலைவன்;

ஈண்டு - இவ்விடத்தில்; இம்மையில்;

தமிழ் ஆண்டு:

நெடுங்காலமாகப் பல பெயர்கள் (60) சுற்றிச்சுற்றி வந்துகொண்டிருக்கும். ஒரு பெயர் பல வருடங்களாகக் காணாமல் போயிருந்தாலும், 60 ஆண்டுகளுக்குப் பின்னர் அதே பெயர் திரும்ப வந்தாலும், அதனைப் புத்தாண்டாகக் கொண்டாடுகிறோம். தமிழ் ஆண்டு.

சிவன்:

எத்தனையோ யுகங்களாகப் பல பக்தர்கள் வலம்வந்து வணங்குவார்கள். ஆனாலும், என்றும் இளமையோடு இருப்பவன். தனது ஊர்தியான விடையில் எம்முடைய தலைவன் (பல உலகங்களுக்கும்) சென்றாலும், (இங்கு) இம்மையிலே வந்து நமக்கு அருள்புரிபவன்.

(அரியும் அயனும் அடிமுடி தேடியபோது) தீப்பிழம்பாகி எல்லையின்றி ஓங்கி நின்றவன். சிவன்.

வி. சுப்பிரமணியன்

-------------------------------- -------------------------------