04.01 - புறம்பயம் (திருப்புறம்பியம்) - எதுநமன் வருநாள்

04.01 - புறம்பயம் (திருப்புறம்பியம்) - எதுநமன் வருநாள்

2013-07-20

புறம்பயம் (திருப்புறம்பயம் - திருப்புறம்பியம்)

----------------------------------

(எழுசீர் ஆசிரிய விருத்தம் - விளம் மா விளம் மா விளம் விளம் மா - வாய்பாடு)

(சம்பந்தர் தேவாரம் - 3.120.1 - மங்கையர்க் கரசி வளவர்கோன் பாவை)

1)

எதுநமன் வருநாள் என்றெவர் அறிவார்

.. என்பதை நினைமட நெஞ்சே

மதுமலர்க் கொன்றை கூவிளம் மத்தம்

.. வார்சடை யிற்புனை மைந்தன்

பதுமநற் பாதம் பரவிடும் அன்பர்

.. பழவினை தீர்ப்பவன் பதிதான்

புதுமலர் நாடி மதுகரம் பாடும்

.. புறம்பயம் தொழப்பயம் போமே.

எது நமன் வரு-நாள் என்று எவர் அறிவார் என்பதை நினை மட-நெஞ்சே - எந்த நாள் காலன் வரும் நாள் என்று யார் அறிவார் என்பதை என் பேதைமனமே, நீ நினைவாயாக;

மதுமலர்க் கொன்றை கூவிளம் மத்தம் வார்-சடையில் புனை மைந்தன் - தேன் நிறைந்த கொன்றைமலர், வில்வம், ஊமத்தமலர் இவற்றையெல்லாம் நீள்சடையில் அணியும் அழகன்; (மைந்தன் - இளைஞன்; வீரன்);

பதும நற்-பாதம் பரவிடும் அன்பர் பழவினை தீர்ப்பவன் பதிதான் - தாமரைமலர் போன்ற நல்ல திருவடியைப் போற்றும் பக்தர்களது பழைய வினைகளையெல்லாம் தீர்க்கின்ற சிவபெருமான் உறையும் தலம் ஆன;

புதுமலர் நாடி மதுகரம் பாடும் புறம்பயம் தொழப் பயம் போமே - புதிய மலர்களை அடைந்து வண்டுகள் ரீங்காரம் செய்யும் திருப்புறம்பயத்தைத் தொழுதால் நம் அச்சம் நீங்கும்; (நாடுதல் - கிட்டுதல்; விரும்புதல்); (மதுகரம் - தேனீ); (பயம் - அச்சம்); (போம் - போகும் - நீங்கும்);

2)

மாமலர் ஐந்தை வாளியா ஏந்தி

.. வந்தொரு கணைதனை எய்த

காமனைக் காய்ந்த கண்ணுதல் அண்ணல்

.. கையினில் மூவிலை வேலன்

தூமறை நாவன் துணையிலாத் தேவன்

.. தொல்வினை தீர்ப்பவன் பதிதான்

பூமரு(வு) அறுகால் காமரம் பாடும்

.. புறம்பயம் தொழப்பயம் போமே.

மாமலர் ஐந்தை வாளியா ஏந்தி வந்து ஒரு கணைதனை எய்த – அழகிய ஐந்து பூக்களை அம்புகளாக ஏந்திவந்து ஓர் அம்பினை ஏவிய; (வாளி - அம்பு);

காமனைக் காய்ந்த கண்ணுதல் அண்ணல் - மன்மதனைச் சாம்பலாக்கிய நெற்றிக்கண்ணுடைய தலைவன்;

கையினில் மூவிலை வேலன் - கையில் திரிசூலத்தை ஏந்தியவன்;

தூமறை நாவன் - தூய வேதங்களைப் பாடியருளியவன்;

துணை இலாத் தேவன் - ஒப்பற்ற தேவன்; (துணை - ஒப்பு; நிகர்);

தொல்வினை தீர்ப்பவன் பதிதான் - பக்தர்களது பழவினையைத் தீர்க்கின்ற சிவபெருமான் உறையும் பதி ஆன;

பூ மருவு அறுகால் காமரம் பாடும் புறம்பயம் தொழப் பயம் போமே - பூக்களை அடைந்து வண்டுகள் இன்னிசை பாடுகின்ற திருப்புறம்பயத்தைத் தொழுதால் நம் அச்சம் நீங்கும்; (காமரம் - சீகாமரம் - ஒரு பண்ணின் பெயர்);

3)

பற்றிய பாம்பு சுற்றிய மலையால்

.. பாற்கடல் கடைந்தவர் அஞ்ச

உற்றவி டத்தைத் துற்றருள் செய்த

.. ஒருமணி திகழ்திரு மிடற்றன்

பெற்றமு கந்த கற்றையஞ் சடையன்

.. பெண்ணொரு பங்கமர் பெருமான்

புற்றர வணிந்த நற்றவன் மேவும்

.. புறம்பயம் தொழப்பயம் போமே.

பற்றிய பாம்பு சுற்றிய மலையால் பாற்கடல் கடைந்தவர் அஞ்ச உற்ற விடத்தைத் துற்று அருள்செய்த - தம் கையில் பற்றிய பாம்பால் சுற்றப்பட்ட மேருமலையையே மத்தாகக் கொண்டு பாற்கடலைக் கடைந்தவர்கள் அஞ்சும்படி அங்கு எழுந்த நஞ்சை உண்டு அருள்புரிந்த; (துற்றுதல் - உண்தல்); (துற்றருள் - துற்றி அருள்; தொகுத்தல் விகாரம்); (அப்பர் தேவாரம் - 4.17.5 - "துற்றவர் வெண்டலையில்");

ஒரு மணி திகழ் திருமிடற்றன் - ஒப்பற்ற நீலமணி திகழும் திருநீலகண்டன்;

பெற்றம் உகந்த கற்றை அம் சடையன் - இடபத்தை வாகனமாக விரும்பும், அழகிய கற்றைச் சடையை உடையவன்; (பெற்றம் - எருது); (அம் - அழகிய);

பெண் ஒரு பங்கு அமர் பெருமான் - உமையை ஒரு பங்கில் விரும்பிய பெருமான்;

புற்றரவு அணிந்த நற்றவன் - புற்றில் இருக்கும் தன்மை உடைய பாம்பை அணியும், சிறந்த தவம் உடையவன்;

மேவும் புறம்பயம் தொழப்பயம் போமே - அப்பெருமான் விரும்பி உறையும் திருப்புறம்பயத்தைத் தொழுதால் நம் அச்சம் நீங்கும்;

4)

மானமர் கரத்தன் ஏனம ருப்பு

.. மாசுணம் திகழ்திரு மார்பன்

கானகத் தாடி ஆனமர் செல்வன்

.. கரியுரி மூடிய ஒருவன்

வானவர் எம்பெம் மானருள் என்று

.. மலரடி போற்றவன் னஞ்சைப்

போனகம் செய்த தேனவன் மேவும்

.. புறம்பயம் தொழப்பயம் போமே.

மான் அமர் கரத்தன் - கையில் மானை ஏந்தியவன்;

ஏன-மருப்பு மாசுணம் திகழ் திருமார்பன் - பன்றிக்கொம்பு பாம்பு இவற்றை மார்பில் அணிந்தவன்; (ஏனம் பன்றி); (மருப்பு - தந்தம்; கொம்பு); (மாசுணம் - பாம்பு);

கானகத்து ஆடி - சுடுகாட்டில் நடம்செய்பவன்;

ஆன் அமர் செல்வன் - இடபத்தை ஊர்தியாக விரும்பும் செல்வன்;

கரியுரி மூடிய ஒருவன் - யானைத்தோலைப் போர்த்தவன்; (உரி - தோல்);

வானவர் "எம்பெம்மான் அருள்" என்று மலரடி போற்ற வன்னஞ்சைப் போனகம் செய்த - தேவர்கள், "எம்பெருமானே, அருள்க" என்று மலர்ப்பாதத்தைப் போற்ற, இரங்கிக் கொடிய விடத்தை உண்டருளிய; (போனகம் - உணவு);

தேனவன் மேவும் புறம்பயம் தொழப் பயம் போமே - தேன் போல் இனிமை பயக்கும் பெருமான் விரும்பி உறையும் திருப்புறம்பயத்தைத் தொழுதால் நம் அச்சம் நீங்கும்;

5)

பங்கினில் மலையான் மங்கையை வைத்த

.. பரிவினன் பாலன நீற்றன்

செங்கதிர் வண்ணன் கங்குலைக் காட்டும்

.. திருமிட றுடையவன் எந்தை

மங்கலம் எல்லாம் தங்கிடம் ஆனான்

.. வார்சடை மேல்வளர் திங்கள்

பொங்கர வணிந்த சங்கரன் மேவும்

.. புறம்பயம் தொழப்பயம் போமே.

பங்கினில் மலையான் மங்கையை வைத்த பரிவினன் - மலைமகளை ஒரு பங்கில் வைத்த அன்பன்;

பால் அன நீற்றன் - பால் போன்ற வெண்ணீற்றைப் பூசியவன்;

செங்கதிர் வண்ணன் - செஞ்சூரியன் போல் செம்மேனியன்;

கங்குலைக் காட்டும் திருமிடறு உடையவன் - கண்டத்தில் கருமையைக் காட்டுபவன்;

எந்தை - எம் தந்தை;

மங்கலம் எல்லாம் தங்கு-இடம் ஆனான் - மங்கலங்களின் உறைவிடம்;

வார்-சடைமேல் வளர்-திங்கள் பொங்கு-அரவு அணிந்த சங்கரன் - நீள்சடைமேல் வளரும் பிறையையும் சீறும் பாம்பையும் அணிந்த சங்கரன்;

மேவும் புறம்பயம் தொழப் பயம் போமே - அப்பெருமான் விரும்பி உறையும் திருப்புறம்பயத்தைத் தொழுதால் நம் அச்சம் நீங்கும்;

6)

பறைபல ஆர்த்துப் பாரிடம் சூழப்

.. பல்பிணக் காட்டினில் ஆடும்

மறைமொழி நாவன் நறைமலர் தூவி

.. வானவர் தம்குறை யிரப்ப

அறைகடல் நஞ்சின் கறையணி கண்டன்

.. அண்டிய தொண்டருக் கென்றும்

பொறைமிக உடைய இறையவன் மேவும்

.. புறம்பயம் தொழப்பயம் போமே.

பறை பல ஆர்த்துப் பாரிடம் சூழப் பல்-பிணக் காட்டினில் ஆடும் - பல பறைகளை ஒலித்துப் பூதகணங்கள் சூழப், பல பிணங்களை உடைய சுடுகாட்டில் கூத்தாடும்; (ஆர்த்தல் - ஒலித்தல்); (பாரிடம் - பூதம்); (சுந்தரர் தேவாரம் - 7.98.4 - "படு பல்பிணக் காடரங்கா ஆடிய மாநடத்தான்");

மறை மொழி நாவன் - வேதங்களைப் பாடியருளியவன்;

நறைமலர் தூவி வானவர் தம் குறையிரப்ப, அறைகடல் நஞ்சின் கறை அணி கண்டன் - வாசமலர்களைத் தூவித் தேவர்கள் வேண்ட, ஒலிக்கும் கடலில் எழுந்த ஆலகாலத்தை உண்டு அதன் கறையைக் கண்டத்தில் அணிந்தவன்; (நறை - தேன்; வாசனை); (குறையிரத்தல் - தன்குறைகூறி வேண்டுதல்);

அண்டிய தொண்டருக்கு என்றும் பொறை மிக உடைய இறையவன் - சரணடைந்த அடியாருக்கு என்றும் மிகுந்த அருள் உடைய இறைவன்; (அண்டுதல் - சரண்புகுதல்; ஆசிரயித்தல்); (பொறை - பொறுமை; அருள்); (அப்பர் தேவாரம் - 6.56.9 - "பொய்யா நஞ்சுண்ட பொறையே போற்றி"); (திருவாசகம் - அடைக்கலப்பத்து - 8.24.2 - "என் சிறுமையை நின் பெருமையினால் பொறுப்பவனே");

மேவும் புறம்பயம் தொழப் பயம் போமே - அப்பெருமான் விரும்பி உறையும் திருப்புறம்பயத்தைத் தொழுதால் நம் அச்சம் நீங்கும்;

7)

நீற்றினைப் பூசி ஆற்றினைத் தாங்கி

.. நேரிலன் ஏரியல் கயிலை

வீற்றிருந் தருளி தோற்றமும் ஏற்று

.. வெண்டலை உண்பலி தேர்வான்

கூற்றுதை காலன் மாற்றிலாச் செம்பொன்

.. குவிகரத் தொடுநிதம் பணிந்து

போற்றுவார்க் கருளும் ஏற்றினன் மேவும்

.. புறம்பயம் தொழப்பயம் போமே.

நீற்றினைப் பூசி - திருநீற்றைப் பூசியவன்;

ஆற்றினைத் தாங்கி - கங்காதரன்;

நேர் இலன் - ஒப்பு இல்லாதவன்;

ஏர் இயல் கயிலை வீற்றிருந்தருளி - அழகிய கயிலைமலையில் சிறப்போடிருந்து அருள்பவன்; (ஏர் - அழகு; நன்மை); (வீற்றிருத்தல் - சிறப்போடிருத்தல்); (அருளி - அருள்பவன்); (சம்பந்தர் தேவாரம் - 2.73.9 - "அரக்கன்விற லழித்தருளி கழுமலம்" - அருளி - சிவன்);

தோற்றமும் ஏற்று வெண்தலை உண்பலி தேர்வான் - ஒரு வடிவத்தையும் ஏற்று வெண்ணிற மண்டையோட்டில் பிச்சையேற்பவன்; (தோற்றமும் ஏற்று - எச்சவும்மை; இறைவனுக்குத் தோற்றம் இன்மையும் இதனால் பெறப்பட்டது);

கூற்று உதை காலன் - காலகாலன்;

மாற்று-இலாச் செம்பொன் - உரைத்து மாற்றுக் காணுதற்கரிய, மிக உயர்ந்த பொன் போன்றவன்;

குவி-கரத்தொடு நிதம் பணிந்து போற்றுவார்க்கு அருளும் ஏற்றினன் - கைகூப்பித் தினமும் வணங்கும் அன்பர்க்கு அருளும் இடபவாகனன்; (சம்பந்தர் தேவாரம் - 2.108.5 - "கடிய ஏற்றினர்");

மேவும் புறம்பயம் தொழப் பயம் போமே - அப்பெருமான் விரும்பி உறையும் திருப்புறம்பயத்தைத் தொழுதால் நம் அச்சம் நீங்கும்;

8)

பருப்பதம் அசைத்த அரக்கனை நெரித்துப்

.. பண்ணிசை கேட்டும கிழ்ந்தான்

விருப்பொடு நாளும் திருப்புகழ் பாடின்

.. மேனிலை கொடுப்பவன் ஏன

மருப்பணி மார்பன் அரப்புனை முடியன்

.. வானதிச் சடையினன் கயிலைப்

பொருப்பினன் கண்ணில் நெருப்பினன் மேவும்

.. புறம்பயம் தொழப்பயம் போமே.

பருப்பதம் அசைத்த அரக்கனை நெரித்துப் பண்ணிசை கேட்டு மகிழ்ந்தான் - கயிலையை ஆட்டிய இராவணனை நசுக்கிப் பின் அவன் பாடிய கீதத்தைக் கேட்டு இரங்கியவன்; (பருப்பதம் - பர்வதம் - மலை);

விருப்பொடு நாளும் திருப்புகழ் பாடின் மேனிலை கொடுப்பவன் - விரும்பித் தினமும் சிவபெருமானது திருப்புகழைப் பாடினால் உயர்ந்த நிலையைக் கொடுப்பவன்; (மேனிலை - மேல் நிலை - உயர்ந்த பதம்); (சுந்தரர் தேவாரம் - 7.69.2 - "திருப்புகழ் விருப்பால் பாடிய அடியேன்");

ஏன மருப்பு அணி மார்பன் - பன்றியின் கொம்பை மார்பில் அணிந்தவன்;

அரப் புனை முடியன் - பாம்பை முடிமேல் அணிந்தவன்; (அர - பாம்பு); (சம்பந்தர் தேவாரம் - 1.98.9 - "அரப்பள்ளியானு மலருறைவானும் அறியாமைக்");

வானதிச் சடையினன் - கங்கைச் சடையன்;

கயிலைப் பொருப்பினன் - கயிலைமலையான்;

கண்ணில் நெருப்பினன் - நெற்றிக்கண்ணில் தீயினன்;

மேவும் புறம்பயம் தொழப் பயம் போமே - அப்பெருமான் விரும்பி உறையும் திருப்புறம்பயத்தைத் தொழுதால் நம் அச்சம் நீங்கும்;

9)

அரியயன் நேடித் திரிந்தடி போற்ற

.. அண்டமெ லாங்கடந் தோங்கும்

எரியவன் எல்லாம் உரியவன் அன்பர்க்(கு)

.. எளியவன் இறைஞ்சினாள் மகிழக்

கரியென அன்று வன்னியும் கிணறும்

.. காட்டிய ருள்புரி அண்ணல்

புரிதரு சடையன் பெரியவன் மேவும்

.. புறம்பயம் தொழப்பயம் போமே.

அரி அயன் நேடித் திரிந்து அடி போற்ற அண்டமெலாம் கடந்து ஓங்கும் எரியவன் - திருமாலும் பிரமனும் அடிமுடி தேடித் திரிந்து பின் அடிபோற்றும்படி எல்லா அண்டங்களையும் தாண்டி நீண்ட ஜோதி வடிவினன்; (நேடுதல் - தேடுதல்); (எரி - நெருப்பு);

எல்லாம் உரியவன் - எல்லாம் உடையவன்;

அன்பர்க்கு எளியவன் - அடியவர்களால் எளிதில் அடையப்படுபவன்;

இறைஞ்சினாள் மகிழக் கரி என அன்று வன்னியும் கிணறும் காட்டி அருள்புரி அண்ணல் - இறைஞ்சிய பக்தை மகிழும்படி முன்பு சாட்சியாக வன்னிமரத்தையும் கிணற்றையும் காட்டி அருளிய பெருமான்; (கரி - சாட்சி); (* இஃது இத்தலவரலாற்றுச் செய்தி; திருவிளையாடற் புராணத்திலும் காணல் ஆம் - வன்னியும் கிணறும் இலிங்கமும் அழைத்த படலம்); (* திருப்புறம்பயத் தலத்து ஈசன் திருநாமங்களுள் சாட்சிநாதர் என்பதும் ஒன்று);

புரிதரு சடையன் - சுருண்ட சடையினன்; (புரிதல் - முறுக்குக்கொள்ளுதல்); (தருதல் - ஒரு துணைவினை);

பெரியவன் - மஹாதேவன்;

மேவும் புறம்பயம் தொழப் பயம் போமே - அப்பெருமான் விரும்பி உறையும் திருப்புறம்பயத்தைத் தொழுதால் நம் அச்சம் நீங்கும்;

10)

நேர்வழி ஆன நீர்மலி சடையன்

.. நீற்றினைப் பூசிட மாட்டார்

ஓர்வழி அறியார் கார்மலி நெஞ்சர்

.. உரைக்கிற பொய்களை ஒழிமின்

தார்விட நாகம் மார்பினில் புரளத்

.. தண்மதிப் பிறையினைச் சூடிப்

போர்விடை ஏறி ஊர்பவன் மேவும்

.. புறம்பயம் தொழப்பயம் போமே.

நேர்வழி ஆன நீர்மலி சடையன் நீற்றினைப் பூசிட மாட்டார் - செந்நெறி ஆன கங்கைச்சடையனது திருநீற்றைப் பூசாதவர்களும்; (பெரியபுராணம் - "நிலவு லாவிய நீர்மலி வேணியன்");

ஓர்வழி அறியார் கார்மலி நெஞ்சர் உரைக்கிற பொய்களை ஒழிமின் - உய்யும் ஒரு நெறியை அறியாதவர்களும் இருள் மிகுந்த வஞ்சநெஞ்சர்களும் சொல்லும் பொய்களை மதியாது நீங்குங்கள்;

தார் விட-நாகம் மார்பினில் புரளத் தண்-மதிப் பிறையினைச் சூடிப் போர்விடை ஏறி ஊர்பவன் - மாலை போல விஷப்பாம்பு மார்பில் புரளக், குளிர்ந்த திங்களை அணிந்து போர் செய்யவல்ல எருதின்மேல் ஏறிச் செல்பவன்; (தார் - மாலை); (மதிப்பிறை - ஒருபொருட்பன்மொழி);

மேவும் புறம்பயம் தொழப் பயம் போமே - அப்பெருமான் விரும்பி உறையும் திருப்புறம்பயத்தைத் தொழுதால் நம் அச்சம் நீங்கும்;

11)

பண்ணியல் தமிழால் மண்ணவர் வாழ்த்தப்

.. பலவரம் நல்கிடும் வரதன்

அண்ணலின் நாமம் எண்ணிய சிந்தை

.. இருவிழிக் கசிவொடு பூசை

பண்ணினார் தம்மை நண்ணிய நமன்மேல்

.. பாய்ந்தவன் மார்பிலு தைத்த

புண்ணியன் திங்கட் கண்ணியன் மேவும்

.. புறம்பயம் தொழப்பயம் போமே.

பண் இயல் தமிழால் மண்ணவர் வாழ்த்தப் பல-வரம் நல்கிடும் வரதன் - தேவாரம் திருவாசகம் முதலிய தமிழ்ப்பாமாலைகளை இசையோடு பாடித் துதிக்கும் பக்தர்களுக்குப் பல வரங்களை அளிக்கும் வரதன்;

அண்ணலின் நாமம் எண்ணிய சிந்தை இருவிழிக் கசிவொடு பூசை பண்ணினார்-தம்மை நண்ணிய நமன்மேல் பாய்ந்து அவன் மார்பில் உதைத்த புண்ணியன் - பெருமானது திருநாமத்தைத் தியானித்த மனத்தோடு கண்ணீர்க்கசிவோடு உருகி வழிபாடு செய்த மார்க்கண்டேயரை நெருங்கிய இயமன்மேல் பாய்ந்து அவன் மார்பில் உதைத்த புண்ணியவடிவினன்;

திங்கட் கண்ணியன் - பிறைச்சந்திரனைக் கண்ணிமாலைபோல் திருமுடியில் சூடியவன்; (கண்ணி - தலையில் அணியும் மாலைவகை);

மேவும் புறம்பயம் தொழப் பயம் போமே - அப்பெருமான் விரும்பி உறையும் திருப்புறம்பயத்தைத் தொழுதால் நம் அச்சம் நீங்கும்;

வி. சுப்பிரமணியன்

பிற்குறிப்புகள்: யாப்புக்குறிப்புகள்:

1. எழுசீர்க் கழிநெடிலடி ஆசிரிய விருத்தம் - விளம் மா விளம் மா விளம் விளம் மா - என்ற வாய்பாடு;

2. இப்பதிகத்தில் பல பாடல்களில் பல அடிகளில் முதற்சீர் - மூன்றாம் சீர் இடையே எதுகைத்தொடை அமைந்துள்ளது. இதனைத் தாஅவண்ணம் என்பர்.

----------- --------------