04.02 - இன்னம்பர் - (இன்னம்பூர்) - அசையாத பத்தியினை

04.02 - இன்னம்பர் - (இன்னம்பூர்) - அசையாத பத்தியினை

2013-07-27

இன்னம்பர் - (இன்னம்பூர்)

----------------------------------

(நாலடித் தரவு கொச்சகக் கலிப்பா)

(சம்பந்தர் தேவாரம் - 2.43.1 - "கள்ளார்ந்த பூங்கொன்றை")

1)

அசையாத பத்தியினை அகத்திருத்தித் துதிப்போர்க்கு

விசையோடு வருவினையை விலக்கியினி தருள்புரிவான்

நசையோடு நறைமலரை நாடிவந்து வண்டினங்கள்

இசைபாடும் இன்னம்பர் எழுத்தறியும் பெருமானே.

அசையாத பத்தியினை அகத்து இருத்தித் துதிப்போர்க்கு - மாறாத பக்தியை மனத்தில் வைத்து வழிபடும் பக்தர்களுக்கு;

விசையோடு வரு வினையை விலக்கி இனிது அருள்புரிவான் - அவர்களைத் தாக்க விரைந்துவரும் வினையை நீக்கி இன்னருள் புரிகின்றவன்; (விசை - வேகம்; பலம்);

நசையோடு நறைமலரை நாடிவந்து வண்டினங்கள் இசைபாடும் இன்னம்பர் எழுத்தறியும் பெருமானே - தேன்மலர்களை விரும்பி அடைந்து வண்டுகள் இன்னிசை செய்யும் திருஇன்னம்பரில் உறைகின்ற எழுத்தறியும் பெருமான்; (நசை - விருப்பம்); (நறை - தேன்; வாசனை); (நாடுதல் - தேடுதல்); (* எழுத்தறிநாதர் - இன்னம்பர்த் தலத்து ஈசன் திருநாமம்); (அப்பர் தேவாரம் - 5.21.8 -

"எழுதும் கீழ்க்கணக்கு இன்னம்பர் ஈசனே");

2)

உருள்கின்ற காலத்தால் உடல்ஆவி அழியாமுன்

பொருள்கண்டு போற்றிடுவாய் மடநெஞ்சே புகலாவான்

வெருள்கொண்ட விண்ணவர்கள் வேண்டஅவர்க் கருள்புரிந்த

இருள்கண்டன் இன்னம்பர் எழுத்தறியும் பெருமானே.

உருள்கின்ற காலத்தால் உடல் ஆவி அழியாமுன் பொருள் கண்டு போற்றிடுவாய் மடநெஞ்சே - பேதைமனமே, காலம் உருண்டோடி உடலும் உயிரும் அழிவதன் முன்பே மெய்ப்பொருளை அறிந்து போற்றுவாயாக; (உருள்கின்ற காலம் - பருவங்கள் மாறி மாறி வந்து ஆண்டுகள் கழிவதைச் சுட்டியது); (பொருள் - மெய்ப்பொருள்); (திருவாசகம் - நீத்தல் விண்ணப்பம் - 8.6.17 - "பொருளே தமியேன் புகலிடமே");

புகல் ஆவான் - நமக்குப் புகலிடம் ஆனவன்;

வெருள்கொண்ட விண்ணவர்கள் வேண்ட அவர்க்கு அருள்புரிந்த இருள்-கண்டன் - அஞ்சிய தேவர்கள் இறைஞ்சவும் அவர்களுக்கு அருளி, (ஆலகாலத்தை உண்டு) கறுத்த கண்டம் உடையவன்; (வெருள் - அச்சம்); (இருள்தல் - கறுப்பாதல்);

இன்னம்பர் எழுத்தறியும் பெருமானே - திருஇன்னம்பரில் உறைகின்ற எழுத்தறியும் பெருமான்;

3)

ஆர்வமலி மனத்தினராய் அனுதினமும் அடிபோற்றிப்

பேர்புகலும் நாவினர்க்குப் பேரின்பம் அருளுமரன்

வார்திகழும் வனமுலையாள் ஓர்பங்கு மகிழீசன்

ஏர்திகழும் இன்னம்பர் எழுத்தறியும் பெருமானே.

ஆர்வம் மலி மனத்தினராய் அனுதினமும் அடிபோற்றிப் பேர் புகலும் நாவினர்க்குப் பேரின்பம் அருளும் அரன் - மனத்தில் மிகுந்த அன்போடு நாள்தோறும் திருவடியை வழிபட்டுத் திருநாமத்தைச் சொல்லும் பக்தர்களுக்குப் பேரின்பத்தை வழங்கும் ஹரன்; (ஆர்வம் - அன்பு; பக்தி);

வார் திகழும் வனமுலையாள் ஓர் பங்கு மகிழ் ஈசன் - கச்சணிந்த அழகிய தனங்களையுடைய உமையை ஒரு பங்காக உடைய ஈசன்; (வார் - கச்சு); (வனம் - அழகு);

ஏர் திகழும் இன்னம்பர் எழுத்தறியும் பெருமானே - அழகிய திருஇன்னம்பரில் எழுந்தருளியிருக்கும் எழுத்தறியும் பெருமான்; (ஏர் - அழகு);

4)

சுரங்கொண்டு தமிழ்பாடித் தொழுவார்தம் துயர்தீர்ப்பான்

சரங்கொண்ட கரக்காமன் தனைக்காய்ந்த கண்ணுதலான்

கரந்தன்னிற் கமலத்தான் சிரங்கொண்டூர் இடுபலியை

இரந்துண்பான் இன்னம்பர் எழுத்தறியும் பெருமானே.

சுரம் கொண்டு தமிழ் பாடித் தொழுவார்தம் துயர் தீர்ப்பான் - தமிழ்ப்பாமலைகளை இசையோடு பாடி வழிபடும் பக்தர்களது துன்பத்தைத் தீர்ப்பவன்; (சுரம் - ஸ்வரம் - இசை); (கொண்டு - மூன்றாம் வேற்றுமைச் சொல்லுருபு); (தமிழ் - தேவாரம், திருவாசகம், முதலியன; (அப்பர் தேவாரம் - 4.1.6 - "தமிழோடு இசைபாடல் மறந்தறியேன்");

சரம் கொண்ட கரக்-காமன்தனைக் காய்ந்த கண்ணுதலான் - மலரம்பைக் கையில் எடுத்த மன்மதனை எரித்த நெற்றிக்கண்ணன்; (கொள்ளுதல் - கையால் எடுத்துக் கொள்ளுதல்); (காய்தல் - கோபித்தல்); (நுதல் - நெற்றி);

கரந்தன்னில் கமலத்தான் சிரம் கொண்டு ஊர் இடுபலியை இரந்து உண்பான் - கையில் பிரமனது மண்டையோட்டை ஏந்தி ஊரார் இடும் பிச்சையை ஏற்று உண்பவன்; (கமலத்தான் - பிரமன்);

இன்னம்பர் எழுத்தறியும் பெருமானே - திருஇன்னம்பரில் எழுந்தருளியிருக்கும் எழுத்தறியும் பெருமான்;

5)

ஆழமிகு வினைக்கடலில் ஆழாமல் இன்புற்று

வாழநினை மடநெஞ்சே வஞ்சமிலாச் செஞ்சடையான்

வேழவுரிப் போர்வையினான் வெங்கதிரோற்(கு) அருள்புரிந்த

ஏழைபங்கன் இன்னம்பர் எழுத்தறியும் பெருமானே.

ஆழம் மிகு வினைக்கடலில் ஆழாமல் இன்புற்று வாழ நினை மடநெஞ்சே - பேதைமனமே, ஆழம் மிக்க வினைக்கடலில் மூழ்கி அழியாமல் இன்பமாக வாழ நீ நினைவாயாக;

வஞ்சம் இலாச் செஞ்சடையான் - ஒளித்தல் இன்றி வழங்குபவன், செஞ்சடையை உடையவன்;

வேழ-உரிப் போர்வையினான் - யானைத்தோலைப் போர்வையாகப் போர்த்தவன்;

வெங்கதிரோற்கு அருள்புரிந்த ஏழைபங்கன் - சூரியனுக்கு அருள்செய்தவன், உமைபங்கன்; (கதிரோன் - சூரியன்); (* சூரியன் இத்தலத்தில் ஈசனை வழிபட்டதைத் இத்தலபுராணத்திற் காண்க); (அப்பர் தேவாரம் - 5.21.5 - "இன்னம் இன்புற்ற இன்னம்பர் ஈசனே" - இன்னம் இன்புற்ற - (இனன் - சூரியன்) சூரியன் வழிபட்டு இன்புற்ற. சூரியன் வழிபட்டதால் இனன் நம்பூர் என்ற பெயர் எய்தி மருவி இன்னம்பர் ஆயிற்று என்பர்);

இன்னம்பர் எழுத்தறியும் பெருமானே - திருஇன்னம்பரில் எழுந்தருளியிருக்கும் எழுத்தறியும் பெருமான்;

6)

சுட்டபொடி பூசியடி தொழுவார்க்குத் துணையாவான்

மட்டலர்கள் ஆயிரத்தால் வழிபட்ட மாலுக்குத்

துட்டரைக்கொல் ஆழிதந்தான் தோற்றமந்தம் ஒன்றில்லான்

எட்டுருவன் இன்னம்பர் எழுத்தறியும் பெருமானே.

சுட்ட பொடி பூசி அடி தொழுவார்க்குத் துணை ஆவான் - திருநீற்றைப் பூசியவன்; திருநீற்றைப் பூசித் திருவடியை வணங்கும் அன்பர்களுக்குத் துணை ஆவான்; (பொடி - சாம்பல்); (பூசி - 1. பூசியவன்; 2. பூசிக்கொண்டு);

மட்டு-அலர்கள் ஆயிரத்தால் வழிபட்ட மாலுக்குத் துட்டரைக் கொல் ஆழி தந்தான் - ஆயிரம் தாமரைப்பூக்களால் வழிபட்ட திருமாலுக்குத் துஷ்டர்களை அழிக்கும் சக்கராயுதத்தைத் தந்தவன்; (மட்டு - வாசனை; தேன்); (அலர் - மலர்); (துட்டர் - துஷ்டர் - தீயோர்); (ஆழி - சக்கரம்);

தோற்றம் அந்தம் ஒன்று இல்லான் - பிறப்பும் இறப்பும் இல்லாதவன்; முதலும் முடிவும் இல்லாதவன்; (ஒன்று - ஒன்றும்; உம்மைத்தொகை);

எட்டு உருவன் - அட்டமூர்த்தி; (அப்பர் தேவாரம் - 6.15.9 - "எட்டுருவ மூர்த்தியாம்" - எட்டு உருவம் - அட்டமூர்த்தம் - ஐம்பூதங்கள், சூரியசந்திரர், ஆன்மா என்பன);

இன்னம்பர் எழுத்தறியும் பெருமானே - திருஇன்னம்பரில் எழுந்தருளியிருக்கும் எழுத்தறியும் பெருமான்;

7)

மூத்தவனே முக்கண்ணா அருளென்று முறையிட்டுத்

தோத்திரஞ்செய் அடியார்தம் தொல்வினையைத் துடைத்தருள்வான்

பூத்திரளை ஏந்திவந்து புரந்தரன்தன் ஆனைதொழு(து)

ஏத்தவருள் இன்னம்பர் எழுத்தறியும் பெருமானே.

"மூத்தவனே, முக்கண்ணா, அருள்" என்று முறையிட்டுத் தோத்திரஞ்செய் அடியார்தம் தொல்வினையைத் துடைத்தருள்வான் - "முன்னவனே, முக்கண்ணனே, அருள்க" என்று வேண்டித் துதிக்கும் பக்தர்களது பழவினையை அழித்தருள்வான்; (துடைத்தல் - அழித்தல்);

பூத்திரளை ஏந்திவந்து புரந்தரன்தன் ஆனை தொழு(து) ஏத்த அருள் - பூங்கொத்துகளை ஏந்திவந்து இந்திரனுடைய யானையான ஐராவதம் தொழது வணங்கவும் அதற்கு அருளிய; (புரந்தரன் - இந்திரன்); (* ஐராவதம் இத்தலத்தில் ஈசனைப் பூசை செய்ததைத் தலபுராணத்திற் காண்க);

இன்னம்பர் எழுத்தறியும் பெருமானே - திருஇன்னம்பரில் எழுந்தருளியிருக்கும் எழுத்தறியும் பெருமான்;

8)

குன்றிடந்த இராவணனைக் கூக்குரலிட்(டு) அழுமாறே

அன்றுவிரல் ஒன்றினை-அவ் அருவரைமேல் வைத்தடர்த்தான்

வென்றிவிடைக் கொடியுடையான் விரும்படியார் கட்கிங்கே

என்றருள்வான் இன்னம்பர் எழுத்தறியும் பெருமானே.

குன்று இடந்த இராவணனைக் கூக்குரலிட்டு அழுமாறே அன்று விரல் ஒன்றினை அவ்-அருவரைமேல் வைத்து அடர்த்தான் - கயிலையைப் பேர்த்த இராவணன் ஓலமிட்டு அழும்படி அன்று ஒரு திருப்பாத விரலை அந்த அரிய மலைமேல் ஊன்றி அவனை நசுக்கியவன்; (இடத்தல் - பெயர்த்தல்); (அவ்வருவரை - அ+ அருமை+வரை); (வரை - மலை);

வென்றி-விடைக்கொடி உடையான் - வெற்றியுடைய இடபக்கொடியை உடையவன்; (வென்றி - வெற்றி);

விரும்பு அடியார்கட்கு "இங்கே" என்று அருள்வான் - பக்தர்களைத் தேடிவந்து அவர்களுக்கு அருள்புரிவான்; (சம்பந்தர் தேவாரம் - 2.40.6 - "எங்கேனும் யாதாகிப் பிறந்திடினும் தன்னடியார்க்கு இங்கேயென்று அருள்புரியும் எம்பெருமான் எருதேறி");

இன்னம்பர் எழுத்தறியும் பெருமானே - திருஇன்னம்பரில் எழுந்தருளியிருக்கும் எழுத்தறியும் பெருமான்;

9)

காராரும் கண்டத்தாய் கடல்வண்ணன் அயன்காணாச்

சீராரும் அடிமுடியாய் சிவனேயென்(று) உளமுருகி

நீராரும் கண்ணர்க்கு நீள்வானம் அருள்புரிவான்

ஏராரும் இன்னம்பர் எழுத்தறியும் பெருமானே.

"கார் ஆரும் கண்டத்தாய் - "நீலகண்டனே; (கார் - கருமை); (ஆர்தல் - பொருந்துதல்; அணிதல்);

கடல்வண்ணன் அயன் காணாச் சீர் ஆரும் அடிமுடியாய் - திருமாலாலும் பிரமனாலும் காண ஒண்ணாத பெருமைமிக்க திருவடியும் திருமுடியும் உடையவனே;

சிவனே" என்று உளம் உருகி நீர் ஆரும் கண்ணர்க்கு நீள்-வானம் அருள்புரிவான் - சிவனே" என்று மனம் உருகிக் கண்ணீர் கசிந்து தொழும் பக்தர்களுக்குச் சிவலோகத்தை அருள்செய்பவன்;

ஏர் ஆரும் இன்னம்பர் எழுத்தறியும் பெருமானே - அழகிய திருஇன்னம்பரில் எழுந்தருளியிருக்கும் எழுத்தறியும் பெருமான்;

10)

தொழிலாகத் தூற்றுவதே செய்கின்ற துரிசுடையார்

வழியாகக் கூறுவதை மதியாதீர் மாதேவன்

அழியாத இன்பத்தை அடியார்கட்(கு) அருள்புரிவான்

எழிலாரும் இன்னம்பர் எழுத்தறியும் பெருமானே.

தொழிலாகத் தூற்றுவதே செய்கின்ற துரிசு உடையார் வழியாகக் கூறுவதை மதியாதீர் - பழித்தலே தொழிலாக உடையவர்களான குற்றம் மிக்கவர்கள் மார்க்கம் என்று சொல்வதை நீங்கள் மதிக்கவேண்டா; (துரிசு - குற்றம்);

மாதேவன் - மகாதேவன்;

அழியாத இன்பத்தை அடியார்கட்கு அருள்புரிவான் - அடியார்களுக்குப் பேரின்பத்தை அருள்பவன்;

எழில் ஆரும் இன்னம்பர் எழுத்தறியும் பெருமானே - அழகிய திருஇன்னம்பரில் எழுந்தருளியிருக்கும் எழுத்தறியும் பெருமான்;

11)

நீறுடைய நெற்றியராய் நினைவார்தம் வினைதீர்ப்பான்

ஆறுடைய அஞ்சடையான் ஆகத்தில் அணிமாதோர்

கூறுடையான் கூற்றுதைத்த குரைகழலான் கொடியதன்மேல்

ஏறுடையான் இன்னம்பர் எழுத்தறியும் பெருமானே.

நீறு உடைய நெற்றியராய் நினைவார்தம் வினை தீர்ப்பான் - திருநீற்றை நெற்றியில் பூசித் தியானிக்கும் அன்பர்களது வினையை நீக்குபவன்;

ஆறு உடைய அஞ்சடையான் - ; (அம் - அழகிய);

ஆகத்தில் அணி-மாது ஓர் கூறு உடையான் - திருமேனியில் அழகிய உமையை ஒரு பாகமாக உடையவன்; (ஆகம் - மேனி); (அணி - அழகிய);

கூற்று உதைத்த குரை-கழலான் - ஒலிக்கின்ற கழல் அணிந்த திருவடியால் இயமனை உதைத்தவன்;

கொடியதன்மேல் ஏறு உடையான் - இடபச்சின்னம் பொறித்த கொடியை உடையவன்;

இன்னம்பர் எழுத்தறியும் பெருமானே - திருஇன்னம்பரில் எழுந்தருளியிருக்கும் எழுத்தறியும் பெருமான்;

வி. சுப்பிரமணியன்

----------- --------------