04.72 - கடம்பந்துறை (கடம்பர்கோயில் - குளித்தலை)

04.72 - கடம்பந்துறை (கடம்பர்கோயில் - குளித்தலை)

2014-08-06

கடம்பந்துறை (இக்காலத்தில் - கடம்பர்கோயில் - குளித்தலை)

–---------------------------------------------------------------

(கலிவிருத்தம் - மாங்கனி மாங்கனி மாங்கனி மா - வாய்பாடு)

(சம்பந்தர் தேவாரம் - 1.10.1 - "உண்ணாமுலை உமையாளொடும்");

(சுந்தரர் தேவாரம் - 7.1.1 - "பித்தாபிறை சூடீ");

1)

மயலுற்றிரு நிலமேல்மிக வாடும்மட நெஞ்சே

புயலொத்திருள் கண்டத்தினன் பொடிபூசிய மார்பன்

கயிலைக்கிறை உறையும்பதி கடம்பந்துறை கருதாய்

வெயிலொத்தெரி வினையாயின விடுமேசுக(ம்) மிகுமே.

மயலுற்று இருநில(ம்)மேல் மிக வாடும் மடநெஞ்சே - மயங்கிப் பூமியில் மிகவும் வருந்தும் பேதைமனமே; (மயல் - மயக்கம்; அறியாமை); (இருநிலம் - பெரிய பூமி);

புயல் ஒத்து இருள்-கண்டத்தினன் - மேகம் போல் இருண்ட கண்டம் உடையவனும்; (புயல் - மேகம்);

பொடி பூசிய மார்பன் - திருநீற்றை மார்ப்ில் பூசியவனும்; (பொடி - திருநீறு);

கயிலைக்கு இறை உறையும் பதி கடம்பந்துறை கருதாய் - கயிலைநாதனுமான ஈசன் உறையும் தலமாக கடம்பந்துறையை நினைவாயாக; (அப்பர் தேவாரம் - 5.66.1 - "பொற்கயிலைக்கிறை"); (கருதுதல் - எண்ணுதல்; மதித்தல்; விரும்புதல்);

வெயில் ஒத்து எரி- வினை-ஆயின விடுமே - வெயில் போலச் சுட்டெரிக்கும் தீவினைகள் நீங்கும்;

சுக(ம்) மிகுமே - இன்பம் மிகும்;

2)

எண்மீறிய நசையால்தினம் இடருற்றிடும் நெஞ்சே

தண்மாநதி வெண்மாமதி சடைமேலணி தலைவன்

கண்மூன்றினன் உறையும்பதி கடம்பந்துறை கருதாய்

மண்மீதினி வாராநிலை வந்தெய்திடும் திடனே.

எண் மீறிய நசையால் தினம் இடர் உற்றிடும் நெஞ்சே - எண்ணற்ற, அளவு கடந்த ஆசைகளால் என்றும் துன்பம் அடையும் நெஞ்சமே; (எண் - வரையறை); (மீறுதல் - மேற்போதல்); (நசை - ஆசை);

தண்-மா-நதி, வெண்-மா-மதி சடைமேல் அணி தலைவன் - குளிர்ந்த பெரிய ஆறான கங்கையையும், வெண்மையான அழகிய சந்திரனையும் சடைமேல் அணிந்த தலைவனும்;

கண்-மூன்றினன் உறையும் பதி கடம்பந்துறை கருதாய் - முக்கண்ணனுமான ஈசன் உறையும் தலமாக கடம்பந்துறையை நினைவாயாக;

மண்மீது இனி வாரா-நிலை வந்து-எய்திடும் திடனே - பூமியில் மீண்டும் பிறத்தல் இல்லாத நற்கதி வந்தடையும்; இது நிச்சயமே; (திடன் - திடம் - உறுதி; நிச்சயம்); (சம்பந்தர் தேவாரம் - 1.125.2 - "சிவபுரம் அடையநம் இடர்கெடும் உயர்கதி பெறுவது திடனே");

3)

துணையற்றிடர்த் தொடரால்மிகத் துவளும்மட நெஞ்சே

இணையற்றவன் எங்குந்திரி எயில்மூன்றவை எரியக்

கணைதொட்டவன் உறையும்பதி கடம்பந்துறை கருதாய்

விணையெட்டிய மலைபோல்வினை விடுமேசுகம் மிகுமே.

இடர்த்தொடர் - துன்பத்தொடர்;

துவளுதல் - வாடுதல்; வருந்துதல்;

இணையற்றவன் - ஒப்பில்லாதவன்;

எயில் மூன்று - முப்புரங்கள்;

விணை எட்டிய - விண்ணை எட்டிய - வானளாவிய; (விணை - விண்ணை என்பதன் இடைக்குறை விகாரம்);

4)

இறையேனுமென் உரைகேள்மட நெஞ்சேஎதிர் இல்லான்

நறையார்மலர்க் கொன்றைச்சடை நம்பன்கடல் நஞ்சுண்

கறையார்மிட றுடையான்பதி கடம்பந்துறை கருதாய்

பறையாவினை பகலோன்வரப் பனிபோல்விடும் திடனே.

இறையேனும் - சற்றேனும்;

எதிர் இல்லான் - ஒப்பற்றவன்; (எதிர் - ஒப்பு );

நறை ஆர் மலர்க்கொன்றை - தேன் பொருந்திய கொன்றைமலர்;

நம்பன் - சிவன் திருநாமங்களுள் ஒன்று - விரும்பத்தக்கவன்;

கடல் நஞ்சு உண் கறை ஆர் மிடறு உடையான் - கடல்விடத்தை உண்ட கறை பொருந்திய கண்டத்தை உடையவன்; (சம்பந்தர் தேவாரம் - 3.49.10 - "நஞ்சுண் கண்டன் நமச்சிவாயவே");

பறையா வினை பகலோன் வரப் பனிபோல் விடும் - அழியா வினைகள் எல்லாம் சூரியனைக் கண்ட பனிபோல் ஒழியும். (பறைதல் - அழிதல்);

5)

நிலையாததை நேசித்திடும் நெஞ்சேநிழல் மழுவன்

மலையான்மகள் ஒருபங்கினன் மணிமார்பினில் நூலன்

கலைமான்கரன் உறையும்பதி கடம்பந்துறை கருதாய்

மலைபோலுள பழவல்வினை மாயும்திரு வருமே.

நிலையாததை நேசித்திடும் நெஞ்சே - நிலையற்றதையே மிகவும் ஓம்புகின்ற மனமே; (நிலையற்றது = உடல், பொருள், உலகவாழ்வு இத்யாதி);

நிழல் மழுவன் - ஒளி திகழும் மழுவை ஏந்தியவன்;

மணி மார்பினில் நூலன் - அழகிய மார்பில் முப்புரிநூல் அணிந்தவன்;

கலைமான் கரன் - கலைமானைக் கையில் ஏந்தியவன்;

திரு - செல்வம்; நன்மை;

6)

சுற்றத்தினர் காவும்படி துஞ்சாமுனம் நெஞ்சே

ஒற்றைச்சின விடையூர்தியன் உமைகோன்நதி உலவும்

கற்றைச்சடை உடையான்பதி கடம்பந்துறை கருதாய்

பற்றித்தொடர் பழவல்வினை பறையும்திரு வருமே.

சுற்றத்தினர் காவும்படி துஞ்சாமுனம் - உறவினர்கள் தோளிற் சுமந்துசெல்லும்படி உயிர்போவதன் முன்னமே; (காவுதல் - தோளிற் சுமத்தல்); (துஞ்சுதல் - இறத்தல்);

ஒற்றைச் சின விடை ஊர்தியன் - ஒப்பற்ற, சினக்கின்ற இடபத்தை வாகனமாக உடையவன்;

பறையும் - அழியும்;

7)

உண்டிங்குய ஒருநல்வழி உணரென்மட நெஞ்சே

பெண்டங்கிய பாகத்தினன் பிறைசூடிய பெருமான்

கண்டங்கிய நுதலான்பதி கடம்பந்துறை கருதாய்

மண்டங்கிட வைக்கும்வினை மாயும்திரு வருமே.

பதம் பிரித்து:

உண்டு இங்கு உ[ய்]ய ஒரு நல்வழி; உணர் என் மட நெஞ்சே;

பெண் தங்கிய பாகத்தினன், பிறை சூடிய பெருமான்,

கண் தங்கிய நுதலான் பதி கடம்பந்துறை கருதாய்;

மண் தங்கிட வைக்கும் வினை மாயும்; திரு வருமே.

மண் தங்கிட வைக்கும் வினை மாயும் - இப்பூமியில் ஓயாமல் பிறவிகளைத் தரும் வினை அழியும்;

8)

நனிநாள்பல நினைவால்மிக நலியும்மட நெஞ்சே

முனிநால்வருக் கறம்சொன்னவன் முடிபத்தினன் பாடக்

கனிவோடருள் செய்தான்பதி கடம்பந்துறை கருதாய்

இனிவாடுதல் செய்யும்வினை இல்லாநிலை தானே.

நனி நாள் - பல நாள்கள்;

முனி நால்வருக்கு அறம் சொன்னவன் - சனகாதியருக்கு மறைப்பொருளை உபதேசித்த தட்சிணாமூர்த்தி;

முடி பத்தினன் - பத்துத்தலைகள் உடைய இராவணன்;

9)

சும்மாநிதம் துரிசேநினை தொழில்மேவிய நெஞ்சே

அம்மாலயன் அறியாவணம் அழலாகிய ஐயன்

கைம்மாவுரி போர்த்தான்பதி கடம்பந்துறை கருதாய்

வெம்மாவினைப் பகையாயின விடுமேதிரு வருமே.

சும்மா - பயனின்றி; அடிக்கடி;

துரிசு - குற்றம்;

மேவிய - விரும்பிய;

அம் மால் அயன் - அந்தத் திருமாலும் பிரமனும்;

கைம்மா உரி - யானைத்தோல்;

வெம் மா வினைப்பகை ஆயின விடுமே - கொடிய பெரிய வினைப்பகை எல்லாம் நீங்கும்;

10)

நட்டப்பெரு மானைத்தொழ நண்ணாதவர் சொல்லும்

வெட்டிச்சொலை விட்டுத்தினம் மிகவேத்திடு வார்க்குக்

கட்டிக்கரும் பொத்தான்பதி கடம்பந்துறை கருதாய்

ஒட்டித்தொடர் உறுதீவினை ஓயும்திரு உறுமே.

நட்டப் பெருமான் - நடராஜன்; (நட்டம் - கூத்து);

நண்ணுதல் - அடைதல்;

வெட்டிச்சொலை - வெட்டிச்சொல்லை; (வெட்டிச்சொல் - வெட்டிப்பேச்சு - வீண் வார்த்தை); (சொலை - சொல்லை - இடைக்குறை விகாரம்);

கட்டிக்கரும்பு - கருப்பங்கட்டி / கருப்புக்கட்டி - வெல்லம்;

தினம் மிக ஏத்திடுவார்க்குக் கட்டிக்கரும்பு ஒத்தான் - தினமும் மிகவும் துதிக்கும் அன்பர்களுக்கு வெல்லம் போல் இனிமை பயப்பவன்;

உறு தீவினை - மிகுந்த பாவங்கள்;

திரு உறும் - செல்வம்/நன்மை வந்தடையும்;

(அப்பர் தேவாரம் - 4.31.4 - "விளக்குத் தூபம் விதியினால் இடவல்லார்க்குக் கரும்பினிற் கட்டி போல்வார் கடவூர் வீரட்டனாரே");

11)

அருமாமணி மார்க்கண்டரை அடைகூற்றினைச் செற்ற

பெருமானணி யாகப்பணி பிறைசூடிய இறைவன்

கருமாமணி கண்டன்பதி கடம்பந்துறை கருதாய்

மருவாமுனை வினையாயின மறையாப்புகழ் வருமே.

அரு மா மணி மார்க்கண்டரை அடை கூற்றினைச் செற்ற பெருமான் - அரிய சிறந்த மணி போன்ற மார்க்கண்டேயரை நெருங்கிய காலனை அழித்த பெருமான்; (செறுதல் - அழித்தல்);

அணியாகப் பணி பிறை சூடிய இறைவன் - ஆபரணமாகப் பாம்பையும் பிறைச்சந்திரனையும் அணிந்த கடவுள்;

கரு மா மணி கண்டன் பதி கடம்பந்துறை கருதாய் - கரிய அழகிய மணியைக் கண்டத்தில் உடைய சிவன் உறையும் தலமான திருக்கடம்பந்துறையைக் கருதுவாயாக;

மருவா முனை வினை ஆயின - முன்னை வினைகள் எல்லாம் நெருங்கமாட்டா; (மருவுதல் - நெருங்குதல்);

மறையாப் புகழ் வருமே - அழியாத புகழ் வரும்;

வி. சுப்பிரமணியன்

-------------------