02.26 – இலம்பையங்கோட்டூர்

02.26 – இலம்பையங்கோட்டூர்



2011-08-13
இலம்பையங்கோட்டூர்
-----------------------------
(வஞ்சி விருத்தம் - 'விளம் விளம் காய்' - என்ற அமைப்பு);
(சம்பந்தர் தேவாரம் - 1.114.1 - "குருந்தவன் குருகவன் கூர்மையவன்")



1)
கார்மலி மிடறினன் கண்ணுதலான்
பேர்பல உடையவன் பெற்றமொன்றில்
ஊர்பவன் உறைவிடம் ஒண்பொழில்சூழ்
ஏர்மலி இலம்பையங் கோட்டூரே.

கார் மலி மிடறினன் - நீலகண்டன்;

கண்ணுதலான் - நெற்றிக்கண்ணன்;

பெற்றம் - இடபம்;

ஒண் பொழில் சூழ் - சோலைகள் சூழ்ந்த;

ஏர் - அழகு; நன்மை;

'ஏர் = கலப்பை' என்று பொருள்கொண்டு, 'ஏர் மலி இலம்பையங் கோட்டூர்' என்பதை வயல்வளம் மிக்க இலம்பையங் கோட்டூர் என்றும் பொருள்கொள்ளலாம்;

2)
பழிதுயர் பழவினை தீர்த்தருள்வான்
சுழிநதிச் சடையினன் தோற்றமிலான்
அழிவிலன் உறைவிடம் அஞ்சுரும்பார்
எழில்பொழில் இலம்பையங் கோட்டூரே.

பழி துயர் பழவினை - பழியையும் துயரையும் பழைய வினையையும்;

சுழிநதிச் சடையினன் - சுழிகள் உடைய கங்கையைச் சடையில் உடையவன்;

தோற்றம் - ஆரம்பம்;

அம் சுரும்பு ஆர் எழில் பொழில் - அழகிய வண்டினங்கள் ரீங்காரம் செய்யும் அழகிய சோலை சூழ்ந்த;

3)
கரும்பன இன்மொழிக் காரிகையை
விரும்பியொர் பங்குடை மேனியினான்
அரும்பிள மதியணி அண்ணலிடம்
இரும்பொழில் இலம்பையங் கோட்டூரே.

கரும்பு அன இன் மொழிக் காரிகை - கரும்பைப் போன்ற இனிய மொழி பேசும் பார்வதி;

ஒர் - ஓர் என்பதன் குறுக்கம்;

அரும்பிள மதி - அரும்பு இள மதி / அரும் பிள மதி;

அரும்பு இள மதி - அரும்புகிற/அரும்பு போன்ற பிறைச்சந்திரன்;

அரும் பிள மதி - அரிய பிளந்த மதி - அரிய பிறைச்சந்திரன்;

(பிளத்தல் - போழ்தல்; பிளமதி - பிளந்த மதி - திங்கள் துண்டம்);

சம்பந்தர் தேவாரம் - 3.4.2 - "வாழினும் சாவினும் ..... போழிள மதிவைத்த புண்ணியனே ...";

இரும் பொழில் - பெரிய சோலை;

4)
சேர்விடம் கண்டிரி தேவருய்யக்
கார்விடம் கரந்தருள் கண்டனவன்
போர்விடை மேல்வரும் புனிதனிடம்
ஏருடை இலம்பையங் கோட்டூரே.

இரிதல் - அஞ்சி ஓடுதல்;

சேர் விடம் கண்டு இரி தேவர் - திரண்ட ஆலகால விஷத்தைக் கண்டு அஞ்சி ஓடிய தேவர்கள்;

கார் விடம் கரந்து அருள் கண்டன் அவன் - கரிய விஷத்தைக் கண்டத்தில் மறைத்து அருளிய நீலகண்டன்;

5)
கருஞ்சினக் களிற்றுரிப் போர்வையினான்
அருஞ்சரத் தாலெயில் அன்றெரித்தான்
பெருஞ்சுடர் ஆயவன் பேணுமிடம்
இருஞ்சுனை இலம்பையங் கோட்டூரே.

கரும் சினக் களிற்று உரிப் போர்வையினான் - கரிய சினம் மிக்க யானையின் தோலைப் போர்த்தியவன்;

அரும் சரத்தால் எயில் அன்று எரித்தான் - அரிய அம்பு ஒன்றால் முப்புரங்களை முன்பு எரித்தவன்;

பேணுதல் - விரும்புதல்;

இரும் சுனை - பெரிய நீர்நிலைகள்;

6)
பாடிய அடியரின் பல்பிணிகள்
ஓடிட அருளரன் உறையுமிடம்
நீடிய பொழிலிடை நீலவண்டு
கூடிடும் இலம்பையங் கோட்டூரே.

நீடிய பொழில் - நீண்ட சோலைகள்;

நீல வண்டு - கரிய வண்டுகள்;

7)
அளிகிற அன்பருக் கண்மையனாய்க்
களிதரும் கண்ணுதற் கடவுளிடம்
தெளிநறை மிகமகிழ் தேனினமார்
குளிர்பொழில் இலம்பையங் கோட்டூரே.

அளிகிற அன்பருக்கு அண்மையனாய்க் களிதரும் கண்ணுதற் கடவுள் - குழையும் மனத்தை உடைய பக்தர்களுக்கு அருகிருந்து அவர்களுக்கு இன்பம் தருபவன் நெற்றிக்கண் உடைய கடவுள்;

தெளி நறை மிக மகிழ் தேன் இனம் ஆர் குளிர் பொழில் - தெளிந்த தேனை மிக மகிழும் வண்டினங்கள் ரீங்காரம் செய்யும் குளிர்ந்த சோலைகள்;

8)
தசமுகன் ஓவெனத் தானலற
அசைமலை மேல்விரல் அன்றுவைத்த
பசுபதி ஊர்குயில் பண்பயில
இசைமலி இலம்பையங் கோட்டூரே.

தசமுகன் - பத்துத்தலைகளை உடைய இராவணன்;

அசைமலை - அசைந்த மலை/அசைத்த மலை - இராவணன் அசைத்த கயிலைமலை;

பசுபதி ஊர் - பசுபதியாகிய சிவபெருமான் உறையும் தலம்;

பயில்தல் - ஒலித்தல்;

குயில் பண் பயில இசை மலி - குயில்கள் பண்களைப் பாட இசை மிகுந்த;

9)
தென்பரங் குன்றினன் தேடிருவர்
முன்பெரி யாயுயர் மூலனவன்
என்பணி இறையிடம் வண்டினங்கள்
இன்புறும் இலம்பையங் கோட்டூரே.

தென் பரங்குன்றினன் - அழகிய திருப்பரங்குன்றத்தில் உறையும் சிவபெருமான்;

தேடு இருவர் முன்பு எரியாய் உயர் மூலன் - தேடிய பிரமன் திருமால் இவர்கள் முன் சோதியாகி உயர்ந்த முதற்பொருள்;

மூலன் - அநாதிகாரணன்; முதற்பொருள்;

என்பு அணி இறை இடம் - எலும்பை ஆபரணமாகப் பூணும் இறைவன் உறையும் தலம்;

10)
வசைமொழி மதத்தினர் வல்வினைதீர்
திசையினை அறிகிலர் தேடிவந்து
நசையுடை யார்க்கருள் நம்பனிடம்
இசையுடை இலம்பையங் கோட்டூரே.

வல்வினை தீர் திசையினை அறிகிலர் - தங்களுடைய வலிய வினைகளைத் தீர்க்கும் வழியை அறியாதவர்கள்;

நசை - அன்பு;

நம்பன் - சிவன்;

தேடிவந்து நசை உடையார்க்கு அருள் நம்பன் இடம் - அன்பு உடையவர்களைத் தேடிவந்து அவர்களுக்கு அருளும் சிவன் உறையும் தலம்;

இசை - சங்கீதம் (பக்தர்களின் பாடல், வண்டின் ரீங்காரம்); புகழ்;

(சம்பந்தர் தேவாரம் - 2.40.6 -

"எங்கேனும் யாதாகிப் பிறந்திடினும் தன்னடியார்க்கு

இங்கேஎன்று அருள்புரியும் எம்பெருமான் .....")

11)
தோத்திரம் செய்பவர் தொல்வினையைத்
தீர்த்தருள் செய்கிற செல்வனிடம்
தேத்தென என்றளி இன்னிசையால்
ஏத்திடும் இலம்பையங் கோட்டூரே.

தொல்வினை - பழவினை;

தேத் தென - வண்டுகளின் ரீங்காரத்தைக் குறிக்கும் சொற்றொடர்;

அளி - வண்டு;

அன்போடு,
வி. சுப்பிரமணியன்



பிற்குறிப்பு :
1) இலம்பையங்கோட்டூர் - (எலுமியன்கோட்டூர்) - கோயில் தகவல்கள் - தினமலர் தளத்தில்: http://temple.dinamalar.com/New.php?id=69

-------------- --------------