03.03-61 – அடியும் முடியும் - (பொது)

03.03 – அடியும் முடியும் - (பொது)



2009-01-01 - 2009-07-02
அடியும் முடியும்
--------------------------------------
(108 குறள்வெண்பாக்கள்)
61) கொடு
--------------
கொடுவினையை மாய்க்கலாம்; கோபித்து வேளைச்
சுடுமிறைக்கு நெஞ்சைக் கொடு.

கொடு வினை - கொடிய வினை;

கொடுத்தல் - அளித்தல்;

வேள் - மன்மதன்;

2009-03-01
62) உமை
--------------
உமையொரு பாகத் தொருவரெம் கோவென்
றிமையவரும் சொல்வார் உமை;

பதம் பிரித்து:

"உமை ஒரு பாகத்து ஒருவர்; எம் கோ" என்று

இமையவரும் சொல்வார் உமை;

உமை - 1) உமாதேவி; பார்வதி; 2) உம்மை;

ஒருவர் - ஒப்பற்றவர்;

கோ - தலைவன்; அரசன்;

இமையவர் - தேவர்கள்;

63) படை
--------------
படைத்துப் புரந்தொடுக்கும் சூலப் படையான்
அடியார்க் கமுது படை.

பதம் பிரித்து:

படைத்துப் புரந்து ஒடுக்கும் சூலப் படையான்

அடியார்க்கு அமுது படை.

படைத்தல் - 1) சிருஷ்டித்தல்; 2) பரிமாறுதல் (To serve or distribute, as food to guests);

புரந்து - காத்து; (புரத்தல் - காத்தல்);

சூலப்படையான் - சூலாயுதன்; (படை - ஆயுதம்);

அமுது - சோறு; உணவு;

64) ஆற்று
--------------
ஆற்றுச் சடைமேல் அணிமதி சூடியைப்
போற்றி நிதம்திருத்தொண் டாற்று.

ஆற்றுச் சடை - கங்கையைத் தரித்த சடை;  அணி மதி சூடி - அழகிய பிறைச்சந்திரனைச் சூடியவன்;  நிதம் - தினமும்;  திருத்தொண்டு ஆற்று - திருப்பணி செய்;

2009-03-17
65) நினை
--------------
நினையிரந்தேன் நெஞ்சே நிமிடஅள வேனும்
தினமும் சிவனை நினை.

நினை - 1) நின்னை (உன்னை); 2) எண்ணு;

இரத்தல் - யாசித்தல்; வேண்டுதல்;

நிமிடம் - கண்ணிமைப்பொழுது;

66) கரை
------------
கரைசேர் வதற்குக் கருதினால் முக்கட்
பரனையெண்ணி நெஞ்சே கரை.

கரை சேர்தல் - பிறவிப்பெருங்கடலைக் கடத்தல்;

முக்கட் பரன் - முக்கண் உடைய பரமன் - சிவன்;

கரைதல் - உருகுதல்; அழுதல்; சொல்லுதல்; ஒலித்தல்;

67) ஒன்று
--------------
"ஒன்றாய், இரண்டாய், உளதெல்லாம் ஆனவனே"
என்றென்றே ஏத்திநெஞ்சே ஒன்று.

ஒன்று ஆய் - ஒன்று ஆகி; - ஏகன் ஆகி;

ஏத்தி - துதித்து;

ஒன்றுதல் - ஒருமுகப்படுதல் (To set one's mind solely on an object);

2009-03-27
68) நகர்
------------
நகரரவம் பூண்டான் நகைசெய் தெரித்தான்
இகலியார் மூன்று நகர்.

நகர் அரவம் பூண்டான் - ஊரும் பாம்பை அணிந்தவன்;

நகைசெய்து எரித்தான் - சிரித்து எரித்தான்;

இகலியார் - பகைவர்;

69) கோள்
----------------
கோளரவும் ஆறும் குளிர்நிலவும் சூடினான்
தாளடைந்தால் நன்றுசெய்யும் கோள்.

கோள் அரவு - கொலைத் தொழிலையுடைய பாம்பு;

கோள் - கிரகம்;

70) பரவு
--------------
பரவும் சடைமேல் பனிநிலாச் சூடும்
பரமனைப் பாடிப் பரவு.

பரவுதல் - 1) பரந்திருத்தல்; 2) புகழ்தல்;

அன்போடு,

வி. சுப்பிரமணியன்