03.03-21 – அடியும் முடியும் - (பொது)

03.03 – அடியும் முடியும் - (பொது)



2009-01-01 - 2009-07-02
அடியும் முடியும்
--------------------------------------
(108 குறள்வெண்பாக்கள்)
21) வலி
------------
வலியைக் கருதி மலையெடுக்க வந்தான்
ஒலித்தழப் பெற்றான் வலி.

பதம் பிரித்து:

வலியைக் கருதி மலை எடுக்க வந்தான்

ஒலித்து அழப் பெற்றான் வலி.

வலி - 1) வன்மை (strength, power); 2) நோவு;

* இராவணன் கயிலையைத் தூக்கமுயன்று நசுக்கப்பட்டதைச் சுட்டியது

22) வரை
------------
வரையில்லா வன்மையேன் என்றிருந்தான் பத்துச்
சிரத்தான் கயிலை வரை!

வரை - 1) அளவு; எல்லை; 2) வரைக்கும் (பரியந்தம் - as far as, up to, till);

வன்மை - வலிமை (strength, power);

"அளவில்லாத வலிமை பெற்றவன் நான்" என்று செருக்கோடு இருந்தான் இராவணன், கயிலையை அடைந்து அதனைப் பெயர்க்க முயல்வதற்கு முன்;

23) நச்சு
-------------
நச்சரவை நல்ல அரைநாணாக் கட்டிய
பிச்சனை நெஞ்சேநீ நச்சு.

பதம் பிரித்து:

நச்சுஅரவை நல்ல அரைநாணாக் கட்டிய

பிச்சனை நெஞ்சே நீ நச்சு.

நச்சு அரவு - விஷப் பாம்பு;

அரைநாணா - அரைநாணாக;

பிச்சன் - பித்தன்; சிவன்;

நச்சுதல் - விரும்புதல்;

24) சரம்
-------------
சரமாகப் பாம்பணிந்தான் தன்புன் சிரிப்பே
புரமெரிக் கின்ற சரம்.

சரம் - 1) மாலை; 2) அம்பு;

25)
மதிசூடும் ஈசன் மலர்த்தாளை வாழ்த்தித்
துதியார் இலரே மதி.

மதி - 1) சந்திரன்; 2) அறிவு;

துதியார் - துதியாதவர்கள் - போற்றாதவர்கள்;

26) விரை
------------
விரையார்தாள் போற்றி வினைகெடக், காலன்
வரவிற்கு முன்னே விரை.

விரை ஆர் தாள் - வாசனை மிக்க திருவடி;

விரைதல் - வேகமாதல்;

வரவு - வருகை (Coming, advent);

27) கூடு
------------
கூடுவிட்டுப் போம்முன்னே கூன்பிறையைச் சூடிநடம்
ஆடும் இறைவனைக் கூடு.

கூடு - உடம்பு;

கூடுதல் - அடைதல்; சேர்தல்;

கூன் - வளைந்த;

28) ஆறு
--------------
ஆறு பொறியால் அறுமுகனைத் தந்தவன்ஏ
றேறும் சிவன்முடிமேல் ஆறு.

ஆறு - 1) ஆறு என்ற எண்; 2) நதி;

ஏறு ஏறும் சிவன் - இடபவாகனம் உடைய சிவபெருமான்;

29) அணி
-------------
அணிஆரூர் வீதிகளில் ஆதிரை நாளில்
மணிகண்டன் அன்பர் அணி.

அணி - 1) அழகு; 2) கூட்டம்;

மணிகண்டன் - நீலகண்டத்தை உடையவன் - சிவன்;

30) இறை
---------------
இறையும் நினையா இராவணன்ஓ என்ன
இறைவிரல்வைத் தான்எம் இறை.

இறை - 1) சிறிது; 2) இறைவன்;

ஓ என்ன - ஓ என்று அலறும்படி;

அன்போடு,

வி. சுப்பிரமணியன்